| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
8. அட்ட²மஸிக்கா²பத³ங்
8. Aṭṭhamasikkhāpadaṃ
824. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ ப்³ராஹ்மணோ நிப்³பி³ட்ட²ராஜப⁴டோ ‘‘தஞ்ஞேவ ப⁴டபத²ங் யாசிஸ்ஸாமீ’’தி ஸீஸங் நஹாயித்வா பி⁴க்கு²னுபஸ்ஸயங் நிஸ்ஸாய ராஜகுலங் க³ச்ச²தி. அஞ்ஞதரா பி⁴க்கு²னீ கடாஹே வச்சங் கத்வா திரோகுட்டே ச²ட்³டெ³ந்தீ தஸ்ஸ ப்³ராஹ்மணஸ்ஸ மத்த²கே ஆஸும்பி⁴. அத² கோ² ஸோ ப்³ராஹ்மணோ உஜ்ஜா²யதி கி²ய்யதி விபாசேதி – ‘‘அஸ்ஸமணியோ இமா முண்டா³ ப³ந்த⁴கினியோ. கத²ஞ்ஹி நாம கூ³த²கடாஹங் மத்த²கே ஆஸும்பி⁴ஸ்ஸந்தி! இமாஸங் உபஸ்ஸயங் ஜா²பெஸ்ஸாமீ’’தி! உம்முகங் க³ஹெத்வா உபஸ்ஸயங் பவிஸதி. அஞ்ஞதரோ உபாஸகோ உபஸ்ஸயா நிக்க²மந்தோ அத்³த³ஸ தங் ப்³ராஹ்மணங் உம்முகங் க³ஹெத்வா உபஸ்ஸயங் பவிஸந்தங். தி³ஸ்வான தங் ப்³ராஹ்மணங் ஏதத³வோச – ‘‘கிஸ்ஸ த்வங், போ⁴, உம்முகங் க³ஹெத்வா உபஸ்ஸயங் பவிஸஸீ’’தி? ‘‘இமா மங், போ⁴, முண்டா³ ப³ந்த⁴கினியோ கூ³த²கடாஹங் மத்த²கே ஆஸும்பி⁴ங்ஸு. இமாஸங் உபஸ்ஸயங் ஜா²பெஸ்ஸாமீ’’தி. ‘‘க³ச்ச², போ⁴ ப்³ராஹ்மண, மங்க³லங் ஏதங். ஸஹஸ்ஸங் லச்ச²ஸி தஞ்ச ப⁴டபத²’’ந்தி. அத² கோ² ஸோ ப்³ராஹ்மணோ ஸீஸங் நஹாயித்வா ராஜகுலங் க³ந்த்வா ஸஹஸ்ஸங் அலத்த² தஞ்ச ப⁴டபத²ங். அத² கோ² ஸோ உபாஸகோ உபஸ்ஸயங் பவிஸித்வா பி⁴க்கு²னீனங் ஏதமத்த²ங் ஆரோசெத்வா பரிபா⁴ஸி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ உச்சாரங் திரோகுட்டே ச²ட்³டெ³ஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ உச்சாரங் திரோகுட்டே ச²ட்³டெ³ந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ உச்சாரங் திரோகுட்டே ச²ட்³டெ³ஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே , பி⁴க்கு²னியோ இமங் ஸிக்கா²பத³ங் உத்³தி³ஸந்து –
824. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro brāhmaṇo nibbiṭṭharājabhaṭo ‘‘taññeva bhaṭapathaṃ yācissāmī’’ti sīsaṃ nahāyitvā bhikkhunupassayaṃ nissāya rājakulaṃ gacchati. Aññatarā bhikkhunī kaṭāhe vaccaṃ katvā tirokuṭṭe chaḍḍentī tassa brāhmaṇassa matthake āsumbhi. Atha kho so brāhmaṇo ujjhāyati khiyyati vipāceti – ‘‘assamaṇiyo imā muṇḍā bandhakiniyo. Kathañhi nāma gūthakaṭāhaṃ matthake āsumbhissanti! Imāsaṃ upassayaṃ jhāpessāmī’’ti! Ummukaṃ gahetvā upassayaṃ pavisati. Aññataro upāsako upassayā nikkhamanto addasa taṃ brāhmaṇaṃ ummukaṃ gahetvā upassayaṃ pavisantaṃ. Disvāna taṃ brāhmaṇaṃ etadavoca – ‘‘kissa tvaṃ, bho, ummukaṃ gahetvā upassayaṃ pavisasī’’ti? ‘‘Imā maṃ, bho, muṇḍā bandhakiniyo gūthakaṭāhaṃ matthake āsumbhiṃsu. Imāsaṃ upassayaṃ jhāpessāmī’’ti. ‘‘Gaccha, bho brāhmaṇa, maṅgalaṃ etaṃ. Sahassaṃ lacchasi tañca bhaṭapatha’’nti. Atha kho so brāhmaṇo sīsaṃ nahāyitvā rājakulaṃ gantvā sahassaṃ alattha tañca bhaṭapathaṃ. Atha kho so upāsako upassayaṃ pavisitvā bhikkhunīnaṃ etamatthaṃ ārocetvā paribhāsi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo uccāraṃ tirokuṭṭe chaḍḍessantī’’ti…pe… saccaṃ kira, bhikkhave, bhikkhuniyo uccāraṃ tirokuṭṭe chaḍḍentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo uccāraṃ tirokuṭṭe chaḍḍessanti! Netaṃ, bhikkhave, appasannānaṃ vā pasādāya…pe… evañca pana, bhikkhave , bhikkhuniyo imaṃ sikkhāpadaṃ uddisantu –
825. ‘‘யா பன பி⁴க்கு²னீ உச்சாரங் வா பஸ்ஸாவங் வா ஸங்காரங் வா விகா⁴ஸங் வா திரோகுட்டே வா திரோபாகாரே வா ச²ட்³டெ³ய்ய வா ச²ட்³டா³பெய்ய வா, பாசித்திய’’ந்தி.
825.‘‘Yāpana bhikkhunī uccāraṃ vā passāvaṃ vā saṅkāraṃ vā vighāsaṃ vā tirokuṭṭe vā tiropākāre vā chaḍḍeyya vā chaḍḍāpeyya vā, pācittiya’’nti.
826. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
826.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
உச்சாரோ நாம கூ³தோ² வுச்சதி. பஸ்ஸாவோ நாம முத்தங் வுச்சதி.
Uccāro nāma gūtho vuccati. Passāvo nāma muttaṃ vuccati.
ஸங்காரங் நாம கசவரங் வுச்சதி.
Saṅkāraṃ nāma kacavaraṃ vuccati.
விகா⁴ஸங் நாம சலகானி வா அட்டி²கானி வா உச்சி²ட்டோ²த³கங் வா.
Vighāsaṃ nāma calakāni vā aṭṭhikāni vā ucchiṭṭhodakaṃ vā.
குட்டோ நாம தயோ குட்டா – இட்ட²காகுட்டோ, ஸிலாகுட்டோ, தா³ருகுட்டோ.
Kuṭṭo nāma tayo kuṭṭā – iṭṭhakākuṭṭo, silākuṭṭo, dārukuṭṭo.
பாகாரோ நாம தயோ பாகாரா – இட்ட²காபாகாரோ, ஸிலாபாகாரோ, தா³ருபாகாரோ.
Pākāro nāma tayo pākārā – iṭṭhakāpākāro, silāpākāro, dārupākāro.
திரோகுட்டேதி குட்டஸ்ஸ பரதோ. திரோபாகாரேதி பாகாரஸ்ஸ பரதோ.
Tirokuṭṭeti kuṭṭassa parato. Tiropākāreti pākārassa parato.
ச²ட்³டெ³ய்யாதி ஸயங் ச²ட்³டே³தி, ஆபத்தி பாசித்தியஸ்ஸ.
Chaḍḍeyyāti sayaṃ chaḍḍeti, āpatti pācittiyassa.
ச²ட்³டா³பெய்யாதி அஞ்ஞங் ஆணாபேதி, ஆபத்தி து³க்கடஸ்ஸ. ஸகிங் ஆணத்தா ப³ஹுகம்பி ச²ட்³டே³தி, ஆபத்தி பாசித்தியஸ்ஸ.
Chaḍḍāpeyyāti aññaṃ āṇāpeti, āpatti dukkaṭassa. Sakiṃ āṇattā bahukampi chaḍḍeti, āpatti pācittiyassa.
827. அனாபத்தி ஓலோகெத்வா ச²ட்³டே³தி, அவளஞ்ஜே ச²ட்³டே³தி, உம்மத்திகாய, ஆதி³கம்மிகாயாதி.
827. Anāpatti oloketvā chaḍḍeti, avaḷañje chaḍḍeti, ummattikāya, ādikammikāyāti.
அட்ட²மஸிக்கா²பத³ங் நிட்டி²தங்.
Aṭṭhamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 8. அட்ட²மஸிக்கா²பத³வண்ணனா • 8. Aṭṭhamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. லஸுணவக்³க³வண்ணனா • 1. Lasuṇavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 8. அட்ட²மஸிக்கா²பத³வண்ணனா • 8. Aṭṭhamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மலஸுணாதி³ஸிக்கா²பத³வண்ணனா • 1. Paṭhamalasuṇādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 8. அட்ட²மஸிக்கா²பத³ங் • 8. Aṭṭhamasikkhāpadaṃ
