| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
8. அட்ட²மஸிக்கா²பத³ங்
8. Aṭṭhamasikkhāpadaṃ
965. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ திரோரட்டே² ஸாஸங்கஸம்மதே ஸப்படிப⁴யே அஸத்தி²கா சாரிகங் சரந்தி. து⁴த்தா தூ³ஸெந்தி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ திரோரட்டே² ஸாஸங்கஸம்மதே ஸப்படிப⁴யே அஸத்தி²கா சாரிகங் சரிஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ திரோரட்டே² ஸாஸங்கஸம்மதே ஸப்படிப⁴யே அஸத்தி²கா சாரிகங் சரந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ திரோரட்டே² ஸாஸங்கஸம்மதே ஸப்படிப⁴யே அஸத்தி²கா சாரிகங் சரிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
965. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo tiroraṭṭhe sāsaṅkasammate sappaṭibhaye asatthikā cārikaṃ caranti. Dhuttā dūsenti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo tiroraṭṭhe sāsaṅkasammate sappaṭibhaye asatthikā cārikaṃ carissantī’’ti…pe… saccaṃ kira, bhikkhave, bhikkhuniyo tiroraṭṭhe sāsaṅkasammate sappaṭibhaye asatthikā cārikaṃ carantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo tiroraṭṭhe sāsaṅkasammate sappaṭibhaye asatthikā cārikaṃ carissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
966. ‘‘யா பன பி⁴க்கு²னீ திரோரட்டே² ஸாஸங்கஸம்மதே ஸப்படிப⁴யே அஸத்தி²கா சாரிகங் சரெய்ய, பாசத்திய’’ந்தி.
966.‘‘Yā pana bhikkhunī tiroraṭṭhe sāsaṅkasammate sappaṭibhaye asatthikā cārikaṃ careyya, pācattiya’’nti.
967. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
967.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
திரோரட்டே²தி யஸ்ஸ விஜிதே விஹரதி, தங் ட²பெத்வா அஞ்ஞஸ்ஸ ரட்டே².
Tiroraṭṭheti yassa vijite viharati, taṃ ṭhapetvā aññassa raṭṭhe.
ஸாஸங்கங் நாம தஸ்மிங் மக்³கே³ சோரானங் நிவிட்டோ²காஸோ தி³ஸ்ஸதி, பு⁴த்தோகாஸோ தி³ஸ்ஸதி, டி²தோகாஸோ தி³ஸ்ஸதி, நிஸின்னோகாஸோ தி³ஸ்ஸதி, நிபன்னோகாஸோ தி³ஸ்ஸதி.
Sāsaṅkaṃ nāma tasmiṃ magge corānaṃ niviṭṭhokāso dissati, bhuttokāso dissati, ṭhitokāso dissati, nisinnokāso dissati, nipannokāso dissati.
ஸப்படிப⁴யங் நாம தஸ்மிங் மக்³கே³ சோரேஹி மனுஸ்ஸா ஹதா தி³ஸ்ஸந்தி, விலுத்தா தி³ஸ்ஸந்தி, ஆகோடிதா தி³ஸ்ஸந்தி.
Sappaṭibhayaṃ nāma tasmiṃ magge corehi manussā hatā dissanti, viluttā dissanti, ākoṭitā dissanti.
அஸத்தி²கா நாம வினா ஸத்தே²ன.
Asatthikā nāma vinā satthena.
சாரிகங் சரெய்யாதி குக்குடஸம்பாதே கா³மே கா³மந்தரே கா³மந்தரே, ஆபத்தி பாசித்தியஸ்ஸ. அகா³மகே அரஞ்ஞே அத்³த⁴யோஜனே அத்³த⁴யோஜனே ஆபத்தி பாசித்தியஸ்ஸ.
Cārikaṃ careyyāti kukkuṭasampāte gāme gāmantare gāmantare, āpatti pācittiyassa. Agāmake araññe addhayojane addhayojane āpatti pācittiyassa.
968. அனாபத்தி ஸத்தே²ன ஸஹ க³ச்ச²தி, கே²மே அப்படிப⁴யே க³ச்ச²தி , ஆபதா³ஸு, உம்மத்திகாய, ஆதி³கம்மிகாயாதி.
968. Anāpatti satthena saha gacchati, kheme appaṭibhaye gacchati , āpadāsu, ummattikāya, ādikammikāyāti.
அட்ட²மஸிக்கா²பத³ங் நிட்டி²தங்.
Aṭṭhamasikkhāpadaṃ niṭṭhitaṃ.
Related texts:
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. ச²ட்ட²ஸிக்கா²பத³வண்ணனா • 6. Chaṭṭhasikkhāpadavaṇṇanā
