| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
8. அட்ட²மஸிக்கா²பத³ங்
8. Aṭṭhamasikkhāpadaṃ
1008. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ஆவஸத²ங் அனிஸ்ஸஜ்ஜித்வா சாரிகங் பக்காமி. தேன கோ² பன ஸமயேன து²ல்லனந்தா³ய பி⁴க்கு²னியா ஆவஸதோ² ட³ய்ஹதி. பி⁴க்கு²னியோ ஏவமாஹங்ஸு – ‘‘ஹந்தா³ய்யே, ப⁴ண்ட³கங் நீஹராமா’’தி. ஏகச்சா ஏவமாஹங்ஸு – ‘‘ந மயங், அய்யே, நீஹரிஸ்ஸாம. யங் கிஞ்சி நட்ட²ங் ஸப்³ப³ங் அம்ஹே அபி⁴யுஞ்ஜிஸ்ஸதீ’’தி. து²ல்லனந்தா³ பி⁴க்கு²னீ புனதே³வ தங் ஆவஸத²ங் பச்சாக³ந்த்வா பி⁴க்கு²னியோ புச்சி² – ‘‘அபாய்யே, ப⁴ண்ட³கங் நீஹரித்தா²’’தி? ‘‘ந மயங், அய்யே, நீஹரிம்ஹா’’தி . து²ல்லனந்தா³ பி⁴க்கு²னீ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னியோ ஆவஸதே² ட³ய்ஹமானே ப⁴ண்ட³கங் ந நீஹரிஸ்ஸந்தீ’’தி! யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ ஆவஸத²ங் அனிஸ்ஸஜ்ஜித்வா சாரிகங் பக்கமிஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ஆவஸத²ங் அனிஸ்ஸஜ்ஜித்வா சாரிகங் பக்கமதீதி 1? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஆவஸத²ங் அனிஸ்ஸஜ்ஜித்வா சாரிகங் பக்கமிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1008. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī āvasathaṃ anissajjitvā cārikaṃ pakkāmi. Tena kho pana samayena thullanandāya bhikkhuniyā āvasatho ḍayhati. Bhikkhuniyo evamāhaṃsu – ‘‘handāyye, bhaṇḍakaṃ nīharāmā’’ti. Ekaccā evamāhaṃsu – ‘‘na mayaṃ, ayye, nīharissāma. Yaṃ kiñci naṭṭhaṃ sabbaṃ amhe abhiyuñjissatī’’ti. Thullanandā bhikkhunī punadeva taṃ āvasathaṃ paccāgantvā bhikkhuniyo pucchi – ‘‘apāyye, bhaṇḍakaṃ nīharitthā’’ti? ‘‘Na mayaṃ, ayye, nīharimhā’’ti . Thullanandā bhikkhunī ujjhāyati khiyyati vipāceti – ‘‘kathañhi nāma bhikkhuniyo āvasathe ḍayhamāne bhaṇḍakaṃ na nīharissantī’’ti! Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā āvasathaṃ anissajjitvā cārikaṃ pakkamissatī’’ti…pe… saccaṃ kira, bhikkhave, thullanandā bhikkhunī āvasathaṃ anissajjitvā cārikaṃ pakkamatīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī āvasathaṃ anissajjitvā cārikaṃ pakkamissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1009. ‘‘யா பன பி⁴க்கு²னீ ஆவஸத²ங் அனிஸ்ஸஜ்ஜித்வா சாரிகங் பக்கமெய்ய, பாசித்திய’’ந்தி.
1009.‘‘Yā pana bhikkhunī āvasathaṃ anissajjitvā cārikaṃ pakkameyya, pācittiya’’nti.
1010. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1010.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஆவஸதோ² நாம கவாடப³த்³தோ⁴ வுச்சதி.
Āvasatho nāma kavāṭabaddho vuccati.
அனிஸ்ஸஜ்ஜித்வா சாரிகங் பக்கமெய்யாதி பி⁴க்கு²னியா வா ஸிக்க²மானாய வா ஸாமணேரியா வா அனிஸ்ஸஜ்ஜித்வா பரிக்கி²த்தஸ்ஸ ஆவஸத²ஸ்ஸ பரிக்கே²பங் அதிக்காமெந்தியா ஆபத்தி பாசித்தியஸ்ஸ. அபரிக்கி²த்தஸ்ஸ ஆவஸத²ஸ்ஸ உபசாரங் அதிக்காமெந்தியா ஆபத்தி பாசித்தியஸ்ஸ.
Anissajjitvā cārikaṃ pakkameyyāti bhikkhuniyā vā sikkhamānāya vā sāmaṇeriyā vā anissajjitvā parikkhittassa āvasathassa parikkhepaṃ atikkāmentiyā āpatti pācittiyassa. Aparikkhittassa āvasathassa upacāraṃ atikkāmentiyā āpatti pācittiyassa.
1011. அனிஸ்ஸஜ்ஜிதே அனிஸ்ஸஜ்ஜிதஸஞ்ஞா பக்கமதி, ஆபத்தி பாசித்தியஸ்ஸ. அனிஸ்ஸஜ்ஜிதே வேமதிகா பக்கமதி, ஆபத்தி பாசித்தியஸ்ஸ. அனிஸ்ஸஜ்ஜிதே நிஸ்ஸஜ்ஜிதஸஞ்ஞா பக்கமதி, ஆபத்தி பாசித்தியஸ்ஸ.
1011. Anissajjite anissajjitasaññā pakkamati, āpatti pācittiyassa. Anissajjite vematikā pakkamati, āpatti pācittiyassa. Anissajjite nissajjitasaññā pakkamati, āpatti pācittiyassa.
அகவாடப³த்³த⁴ங் அனிஸ்ஸஜ்ஜித்வா பக்கமதி, ஆபத்தி து³க்கடஸ்ஸ. நிஸ்ஸஜ்ஜிதே அனிஸ்ஸஜ்ஜிதஸஞ்ஞா, ஆபத்தி து³க்கடஸ்ஸ. நிஸ்ஸஜ்ஜிதே வேமதிகா, ஆபத்தி து³க்கடஸ்ஸ. நிஸ்ஸஜ்ஜிதே நிஸ்ஸஜ்ஜிதஸஞ்ஞா, அனாபத்தி.
Akavāṭabaddhaṃ anissajjitvā pakkamati, āpatti dukkaṭassa. Nissajjite anissajjitasaññā, āpatti dukkaṭassa. Nissajjite vematikā, āpatti dukkaṭassa. Nissajjite nissajjitasaññā, anāpatti.
1012. அனாபத்தி நிஸ்ஸஜ்ஜித்வா பக்கமதி, ஸதி அந்தராயே, பரியேஸித்வா ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.
1012. Anāpatti nissajjitvā pakkamati, sati antarāye, pariyesitvā na labhati, gilānāya, āpadāsu, ummattikāya, ādikammikāyāti.
அட்ட²மஸிக்கா²பத³ங் நிட்டி²தங்.
Aṭṭhamasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 8. அட்ட²மஸிக்கா²பத³வண்ணனா • 8. Aṭṭhamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. ச²ட்ட²ஸிக்கா²பத³வண்ணனா • 6. Chaṭṭhasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 8. அட்ட²மஸிக்கா²பத³ங் • 8. Aṭṭhamasikkhāpadaṃ
