| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
8. அட்ட²மஸிக்கா²பத³ங்
8. Aṭṭhamasikkhāpadaṃ
1107. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ஸஹஜீவினிங் வுட்டா²பெத்வா த்³வே வஸ்ஸானி நேவ அனுக்³க³ண்ஹாதி ந அனுக்³க³ண்ஹாபேதி. தா பா³லா ஹொந்தி அப்³யத்தா; ந ஜானந்தி கப்பியங் வா அகப்பியங் வா. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ ஸஹஜீவினிங் வுட்டா²பெத்வா த்³வே வஸ்ஸானி நேவ அனுக்³க³ண்ஹிஸ்ஸதி ந அனுக்³க³ண்ஹாபெஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ஸஹஜீவினிங் வுட்டா²பெத்வா த்³வே வஸ்ஸானி நேவ அனுக்³க³ண்ஹாதி ந அனுக்³க³ண்ஹாபேதீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஸஹஜீவினிங் வுட்டா²பெத்வா த்³வே வஸ்ஸானி நேவ அனுக்³க³ண்ஹிஸ்ஸதி ந அனுக்³க³ண்ஹாபெஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1107. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī sahajīviniṃ vuṭṭhāpetvā dve vassāni neva anuggaṇhāti na anuggaṇhāpeti. Tā bālā honti abyattā; na jānanti kappiyaṃ vā akappiyaṃ vā. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā sahajīviniṃ vuṭṭhāpetvā dve vassāni neva anuggaṇhissati na anuggaṇhāpessatī’’ti…pe… saccaṃ kira, bhikkhave, thullanandā bhikkhunī sahajīviniṃ vuṭṭhāpetvā dve vassāni neva anuggaṇhāti na anuggaṇhāpetīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī sahajīviniṃ vuṭṭhāpetvā dve vassāni neva anuggaṇhissati na anuggaṇhāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1108. ‘‘யா பன பி⁴க்கு²னீ ஸஹஜீவினிங் வுட்டா²பெத்வா த்³வே வஸ்ஸானி நேவ அனுக்³க³ண்ஹெய்ய ந அனுக்³க³ண்ஹாபெய்ய, பாசித்திய’’ந்தி.
1108.‘‘Yā pana bhikkhunī sahajīviniṃ vuṭṭhāpetvā dve vassāni neva anuggaṇheyya na anuggaṇhāpeyya, pācittiya’’nti.
1109. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1109.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஸஹஜீவினீ நாம ஸத்³தி⁴விஹாரினீ வுச்சதி. வுட்டா²பெத்வாதி உபஸம்பாதெ³த்வா. த்³வே வஸ்ஸானீதி த்³வே ஸங்வச்ச²ரானி.
Sahajīvinī nāma saddhivihārinī vuccati. Vuṭṭhāpetvāti upasampādetvā. Dve vassānīti dve saṃvaccharāni.
நேவ அனுக்³க³ண்ஹெய்யாதி ந ஸயங் அனுக்³க³ண்ஹெய்ய உத்³தே³ஸேன பரிபுச்சா²ய ஓவாதே³ன அனுஸாஸனியா.
Neva anuggaṇheyyāti na sayaṃ anuggaṇheyya uddesena paripucchāya ovādena anusāsaniyā.
ந அனுக்³க³ண்ஹாபெய்யாதி ந அஞ்ஞங் ஆணாபெய்ய ‘‘த்³வே வஸ்ஸானி நேவ அனுக்³க³ண்ஹிஸ்ஸாமி ந அனுக்³க³ண்ஹாபெஸ்ஸாமீ’’தி து⁴ரங் நிக்கி²த்தமத்தே ஆபத்தி பாசித்தியஸ்ஸ.
Na anuggaṇhāpeyyāti na aññaṃ āṇāpeyya ‘‘dve vassāni neva anuggaṇhissāmi na anuggaṇhāpessāmī’’ti dhuraṃ nikkhittamatte āpatti pācittiyassa.
1110. அனாபத்தி ஸதி அந்தராயே, பரியேஸித்வா ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.
1110. Anāpatti sati antarāye, pariyesitvā na labhati, gilānāya, āpadāsu, ummattikāya, ādikammikāyāti.
அட்ட²மஸிக்கா²பத³ங் நிட்டி²தங்.
Aṭṭhamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 8. அட்ட²மஸிக்கா²பத³வண்ணனா • 8. Aṭṭhamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
