| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
8. அட்ட²மஸிக்கா²பத³ங்
8. Aṭṭhamasikkhāpadaṃ
1154. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரா ஸிக்க²மானா து²ல்லனந்த³ங் பி⁴க்கு²னிங் உபஸங்கமித்வா உபஸம்பத³ங் யாசி. து²ல்லனந்தா³ பி⁴க்கு²னீ தங் ஸிக்க²மானங் ‘‘ஸசே மங் த்வங், அய்யே, த்³வே வஸ்ஸானி அனுப³ந்தி⁴ஸ்ஸஸி ஏவாஹங் தங் வுட்டா²பெஸ்ஸாமீ’’தி வத்வா, நேவ வுட்டா²பேதி ந வுட்டா²பனாய உஸ்ஸுக்கங் கரோதி. அத² கோ² ஸா ஸிக்க²மானா பி⁴க்கு²னீனங் ஏதமத்த²ங் ஆரோசேஸி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ ஸிக்க²மானங் – ஸசே மங் த்வங், அய்யே, த்³வே வஸ்ஸானி அனுப³ந்தி⁴ஸ்ஸஸி ஏவாஹங் தங் வுட்டா²பெஸ்ஸாமீதி வத்வா, நேவ வுட்டா²பெஸ்ஸதி ந வுட்டா²பனாய உஸ்ஸுக்கங் கரிஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ஸிக்க²மானங் – ‘‘ஸசே மங் த்வங் அய்யே த்³வே வஸ்ஸானி அனுப³ந்தி⁴ஸ்ஸஸி ஏவாஹங் தங் வுட்டா²பெஸ்ஸாமீ’’தி வத்வா, நேவ வுட்டா²பேதி ந வுட்டா²பனாய உஸ்ஸுக்கங் கரோதீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஸிக்க²மானங் – ‘‘ஸசே மங் த்வங், அய்யே, த்³வே வஸ்ஸானி அனுப³ந்தி⁴ஸ்ஸஸி ஏவாஹங் தங் வுட்டா²பெஸ்ஸாமீ’’தி வத்வா, நேவ வுட்டா²பெஸ்ஸதி ந வுட்டா²பனாய உஸ்ஸுக்கங் கரிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1154. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā sikkhamānā thullanandaṃ bhikkhuniṃ upasaṅkamitvā upasampadaṃ yāci. Thullanandā bhikkhunī taṃ sikkhamānaṃ ‘‘sace maṃ tvaṃ, ayye, dve vassāni anubandhissasi evāhaṃ taṃ vuṭṭhāpessāmī’’ti vatvā, neva vuṭṭhāpeti na vuṭṭhāpanāya ussukkaṃ karoti. Atha kho sā sikkhamānā bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā sikkhamānaṃ – sace maṃ tvaṃ, ayye, dve vassāni anubandhissasi evāhaṃ taṃ vuṭṭhāpessāmīti vatvā, neva vuṭṭhāpessati na vuṭṭhāpanāya ussukkaṃ karissatī’’ti…pe… saccaṃ kira, bhikkhave, thullanandā bhikkhunī sikkhamānaṃ – ‘‘sace maṃ tvaṃ ayye dve vassāni anubandhissasi evāhaṃ taṃ vuṭṭhāpessāmī’’ti vatvā, neva vuṭṭhāpeti na vuṭṭhāpanāya ussukkaṃ karotīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī sikkhamānaṃ – ‘‘sace maṃ tvaṃ, ayye, dve vassāni anubandhissasi evāhaṃ taṃ vuṭṭhāpessāmī’’ti vatvā, neva vuṭṭhāpessati na vuṭṭhāpanāya ussukkaṃ karissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1155. ‘‘யா பன பி⁴க்கு²னீ ஸிக்க²மானங் – ‘ஸசே மங் த்வங் அய்யே த்³வே வஸ்ஸானி அனுப³ந்தி⁴ஸ்ஸஸி ஏவாஹங் தங் வுட்டா²பெஸ்ஸாமீ’தி வத்வா, ஸா பச்சா² அனந்தராயிகினீ நேவ வுட்டா²பெய்ய ந வுட்டா²பனாய உஸ்ஸுக்கங் கரெய்ய, பாசித்திய’’ந்தி.
1155.‘‘Yā pana bhikkhunī sikkhamānaṃ – ‘sace maṃ tvaṃ ayye dve vassāni anubandhissasi evāhaṃ taṃ vuṭṭhāpessāmī’ti vatvā, sā pacchā anantarāyikinīneva vuṭṭhāpeyya na vuṭṭhāpanāya ussukkaṃ kareyya, pācittiya’’nti.
1156. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1156.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஸிக்க²மானா நாம த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா².
Sikkhamānā nāma dve vassāni chasu dhammesu sikkhitasikkhā.
ஸசே மங் த்வங் அய்யே த்³வே வஸ்ஸானி அனுப³ந்தி⁴ஸ்ஸஸீதி த்³வே ஸங்வச்ச²ரானி உபட்ட²ஹிஸ்ஸஸி.
Sace maṃ tvaṃ ayye dve vassāni anubandhissasīti dve saṃvaccharāni upaṭṭhahissasi.
ஏவாஹங் தங் வுட்டா²பெஸ்ஸாமீதி ஏவாஹங் தங் உபஸம்பாதெ³ஸ்ஸாமி.
Evāhaṃ taṃ vuṭṭhāpessāmīti evāhaṃ taṃ upasampādessāmi.
ஸா பச்சா² அனந்தராயிகினீதி அஸதி அந்தராயே.
Sā pacchā anantarāyikinīti asati antarāye.
நேவ வுட்டா²பெய்யாதி ந ஸயங் வுட்டா²பெய்ய.
Neva vuṭṭhāpeyyāti na sayaṃ vuṭṭhāpeyya.
ந வுட்டா²பனாய உஸ்ஸுக்கங் கரெய்யாதி ந அஞ்ஞங் ஆணாபெய்ய. ‘‘நேவ வுட்டா²பெஸ்ஸாமி ந வுட்டா²பனாய உஸ்ஸுக்கங் கரிஸ்ஸாமீ’’தி து⁴ரங் நிக்கி²த்தமத்தே ஆபத்தி பாசித்தியஸ்ஸ.
Na vuṭṭhāpanāya ussukkaṃ kareyyāti na aññaṃ āṇāpeyya. ‘‘Neva vuṭṭhāpessāmi na vuṭṭhāpanāya ussukkaṃ karissāmī’’ti dhuraṃ nikkhittamatte āpatti pācittiyassa.
1157. அனாபத்தி ஸதி அந்தராயே, பரியேஸித்வா ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.
1157. Anāpatti sati antarāye, pariyesitvā na labhati, gilānāya, āpadāsu, ummattikāya, ādikammikāyāti.
அட்ட²மஸிக்கா²பத³ங் நிட்டி²தங்.
Aṭṭhamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 8. அட்ட²மஸிக்கா²பத³வண்ணனா • 8. Aṭṭhamasikkhāpadavaṇṇanā
