| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৮. অট্ঠমসিক্খাপদং
8. Aṭṭhamasikkhāpadaṃ
৮৬৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ভদ্দায কাপিলানিযা অন্তেৰাসিনী ভিক্খুনী ভদ্দং কাপিলানিং সক্কচ্চং উপট্ঠেতি। ভদ্দা কাপিলানী ভিক্খুনিযো এতদৰোচ – ‘‘অযং মং, অয্যে, ভিক্খুনী সক্কচং উপট্ঠেতি, ইমিস্সাহং চীৰরং দস্সামী’’তি। অথ খো সা ভিক্খুনী দুগ্গহিতেন দূপধারিতেন পরং উজ্ঝাপেসি – ‘‘অহং কিরায্যে, অয্যং ন সক্কচ্চং উপট্ঠেমি, ন কির মে অয্যা চীৰরং দস্সতী’’তি। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী দুগ্গহিতেন দূপধারিতেন পরং উজ্ঝাপেস্সতী’’তি…পে॰… সচ্চং কির, ভিক্খৰে, ভিক্খুনী দুগ্গহিতেন দূপধারিতেন পরং উজ্ঝাপেতীতি 1? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ভিক্খুনী দুগ্গহিতেন দূপধারিতেন পরং উজ্ঝাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
869. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhaddāya kāpilāniyā antevāsinī bhikkhunī bhaddaṃ kāpilāniṃ sakkaccaṃ upaṭṭheti. Bhaddā kāpilānī bhikkhuniyo etadavoca – ‘‘ayaṃ maṃ, ayye, bhikkhunī sakkacaṃ upaṭṭheti, imissāhaṃ cīvaraṃ dassāmī’’ti. Atha kho sā bhikkhunī duggahitena dūpadhāritena paraṃ ujjhāpesi – ‘‘ahaṃ kirāyye, ayyaṃ na sakkaccaṃ upaṭṭhemi, na kira me ayyā cīvaraṃ dassatī’’ti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī duggahitena dūpadhāritena paraṃ ujjhāpessatī’’ti…pe… saccaṃ kira, bhikkhave, bhikkhunī duggahitena dūpadhāritena paraṃ ujjhāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī duggahitena dūpadhāritena paraṃ ujjhāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৮৭০. ‘‘যা পন ভিক্খুনী দুগ্গহিতেন দূপধারিতেন পরং উজ্ঝাপেয্য, পাচিত্তিয’’ন্তি।
870.‘‘Yā pana bhikkhunī duggahitena dūpadhāritena paraṃ ujjhāpeyya, pācittiya’’nti.
৮৭১. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
871.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
দূপধারিতেনাতি অঞ্ঞথা উপধারিতেন।
Dūpadhāritenāti aññathā upadhāritena.
পরন্তি উপসম্পন্নং উজ্ঝাপেতি, আপত্তি পাচিত্তিযস্স।
Paranti upasampannaṃ ujjhāpeti, āpatti pācittiyassa.
৮৭২. উপসম্পন্নায উপসম্পন্নসঞ্ঞা উজ্ঝাপেতি, আপত্তি পাচিত্তিযস্স। উপসম্পন্নায ৰেমতিকা উজ্ঝাপেতি, আপত্তি পাচিত্তিযস্স। উপসম্পন্নায অনুপসম্পন্নসঞ্ঞা উজ্ঝাপেতি, আপত্তি পাচিত্তিযস্স।
872. Upasampannāya upasampannasaññā ujjhāpeti, āpatti pācittiyassa. Upasampannāya vematikā ujjhāpeti, āpatti pācittiyassa. Upasampannāya anupasampannasaññā ujjhāpeti, āpatti pācittiyassa.
অনুপসম্পন্নং উজ্ঝাপেতি, আপত্তি দুক্কটস্স। অনুপসম্পন্নায উপসম্পন্নসঞ্ঞা, আপত্তি দুক্কটস্স। অনুপসম্পন্নায ৰেমতিকা, আপত্তি দুক্কটস্স। অনুপসম্পন্নায অনুপসম্পন্নসঞ্ঞা, আপত্তি দুক্কটস্স।
Anupasampannaṃ ujjhāpeti, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
৮৭৩. অনাপত্তি উম্মত্তিকায, আদিকম্মিকাযাতি।
873. Anāpatti ummattikāya, ādikammikāyāti.
অট্ঠমসিক্খাপদং নিট্ঠিতং।
Aṭṭhamasikkhāpadaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ৮. অট্ঠমসিক্খাপদৰণ্ণনা • 8. Aṭṭhamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৮. অট্ঠমসিক্খাপদৰণ্ণনা • 8. Aṭṭhamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমাদিসিক্খাপদৰণ্ণনা • 1. Paṭhamādisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮. অট্ঠমসিক্খাপদং • 8. Aṭṭhamasikkhāpadaṃ
