| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၈. အဋ္ဌမသိက္ခာပဒံ
8. Aṭṭhamasikkhāpadaṃ
၁၁၅၄. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန အညတရာ သိက္ခမာနာ ထုလ္လနန္ဒံ ဘိက္ခုနိံ ဥပသင္ကမိတ္ဝာ ဥပသမ္ပဒံ ယာစိ။ ထုလ္လနန္ဒာ ဘိက္ခုနီ တံ သိက္ခမာနံ ‘‘သစေ မံ တ္ဝံ, အယ္ယေ, ဒ္ဝေ ဝသ္သာနိ အနုဗန္ဓိသ္သသိ ဧဝာဟံ တံ ဝုဋ္ဌာပေသ္သာမီ’’တိ ဝတ္ဝာ, နေဝ ဝုဋ္ဌာပေတိ န ဝုဋ္ဌာပနာယ ဥသ္သုက္ကံ ကရောတိ။ အထ ခော သာ သိက္ခမာနာ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အယ္ယာ ထုလ္လနန္ဒာ သိက္ခမာနံ – သစေ မံ တ္ဝံ, အယ္ယေ, ဒ္ဝေ ဝသ္သာနိ အနုဗန္ဓိသ္သသိ ဧဝာဟံ တံ ဝုဋ္ဌာပေသ္သာမီတိ ဝတ္ဝာ, နေဝ ဝုဋ္ဌာပေသ္သတိ န ဝုဋ္ဌာပနာယ ဥသ္သုက္ကံ ကရိသ္သတီ’’တိ။ပေ.။ သစ္စံ ကိရ, ဘိက္ခဝေ, ထုလ္လနန္ဒာ ဘိက္ခုနီ သိက္ခမာနံ – ‘‘သစေ မံ တ္ဝံ အယ္ယေ ဒ္ဝေ ဝသ္သာနိ အနုဗန္ဓိသ္သသိ ဧဝာဟံ တံ ဝုဋ္ဌာပေသ္သာမီ’’တိ ဝတ္ဝာ, နေဝ ဝုဋ္ဌာပေတိ န ဝုဋ္ဌာပနာယ ဥသ္သုက္ကံ ကရောတီတိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ထုလ္လနန္ဒာ ဘိက္ခုနီ သိက္ခမာနံ – ‘‘သစေ မံ တ္ဝံ, အယ္ယေ, ဒ္ဝေ ဝသ္သာနိ အနုဗန္ဓိသ္သသိ ဧဝာဟံ တံ ဝုဋ္ဌာပေသ္သာမီ’’တိ ဝတ္ဝာ, နေဝ ဝုဋ္ဌာပေသ္သတိ န ဝုဋ္ဌာပနာယ ဥသ္သုက္ကံ ကရိသ္သတိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
1154. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā sikkhamānā thullanandaṃ bhikkhuniṃ upasaṅkamitvā upasampadaṃ yāci. Thullanandā bhikkhunī taṃ sikkhamānaṃ ‘‘sace maṃ tvaṃ, ayye, dve vassāni anubandhissasi evāhaṃ taṃ vuṭṭhāpessāmī’’ti vatvā, neva vuṭṭhāpeti na vuṭṭhāpanāya ussukkaṃ karoti. Atha kho sā sikkhamānā bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā sikkhamānaṃ – sace maṃ tvaṃ, ayye, dve vassāni anubandhissasi evāhaṃ taṃ vuṭṭhāpessāmīti vatvā, neva vuṭṭhāpessati na vuṭṭhāpanāya ussukkaṃ karissatī’’ti…pe… saccaṃ kira, bhikkhave, thullanandā bhikkhunī sikkhamānaṃ – ‘‘sace maṃ tvaṃ ayye dve vassāni anubandhissasi evāhaṃ taṃ vuṭṭhāpessāmī’’ti vatvā, neva vuṭṭhāpeti na vuṭṭhāpanāya ussukkaṃ karotīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī sikkhamānaṃ – ‘‘sace maṃ tvaṃ, ayye, dve vassāni anubandhissasi evāhaṃ taṃ vuṭṭhāpessāmī’’ti vatvā, neva vuṭṭhāpessati na vuṭṭhāpanāya ussukkaṃ karissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
၁၁၅၅. ‘‘ယာ ပန ဘိက္ခုနီ သိက္ခမာနံ – ‘သစေ မံ တ္ဝံ အယ္ယေ ဒ္ဝေ ဝသ္သာနိ အနုဗန္ဓိသ္သသိ ဧဝာဟံ တံ ဝုဋ္ဌာပေသ္သာမီ’တိ ဝတ္ဝာ, သာ ပစ္ဆာ အနန္တရာယိကိနီ နေဝ ဝုဋ္ဌာပေယ္ယ န ဝုဋ္ဌာပနာယ ဥသ္သုက္ကံ ကရေယ္ယ, ပာစိတ္တိယ’’န္တိ။
1155.‘‘Yā pana bhikkhunī sikkhamānaṃ – ‘sace maṃ tvaṃ ayye dve vassāni anubandhissasi evāhaṃ taṃ vuṭṭhāpessāmī’ti vatvā, sā pacchā anantarāyikinīneva vuṭṭhāpeyya na vuṭṭhāpanāya ussukkaṃ kareyya, pācittiya’’nti.
၁၁၅၆. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
1156.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
သိက္ခမာနာ နာမ ဒ္ဝေ ဝသ္သာနိ ဆသု ဓမ္မေသု သိက္ခိတသိက္ခာ။
Sikkhamānā nāma dve vassāni chasu dhammesu sikkhitasikkhā.
သစေ မံ တ္ဝံ အယ္ယေ ဒ္ဝေ ဝသ္သာနိ အနုဗန္ဓိသ္သသီတိ ဒ္ဝေ သံဝစ္ဆရာနိ ဥပဋ္ဌဟိသ္သသိ။
Sace maṃ tvaṃ ayye dve vassāni anubandhissasīti dve saṃvaccharāni upaṭṭhahissasi.
ဧဝာဟံ တံ ဝုဋ္ဌာပေသ္သာမီတိ ဧဝာဟံ တံ ဥပသမ္ပာဒေသ္သာမိ။
Evāhaṃ taṃ vuṭṭhāpessāmīti evāhaṃ taṃ upasampādessāmi.
သာ ပစ္ဆာ အနန္တရာယိကိနီတိ အသတိ အန္တရာယေ။
Sā pacchā anantarāyikinīti asati antarāye.
နေဝ ဝုဋ္ဌာပေယ္ယာတိ န သယံ ဝုဋ္ဌာပေယ္ယ။
Neva vuṭṭhāpeyyāti na sayaṃ vuṭṭhāpeyya.
န ဝုဋ္ဌာပနာယ ဥသ္သုက္ကံ ကရေယ္ယာတိ န အညံ အာဏာပေယ္ယ။ ‘‘နေဝ ဝုဋ္ဌာပေသ္သာမိ န ဝုဋ္ဌာပနာယ ဥသ္သုက္ကံ ကရိသ္သာမီ’’တိ ဓုရံ နိက္ခိတ္တမတ္တေ အာပတ္တိ ပာစိတ္တိယသ္သ။
Na vuṭṭhāpanāya ussukkaṃ kareyyāti na aññaṃ āṇāpeyya. ‘‘Neva vuṭṭhāpessāmi na vuṭṭhāpanāya ussukkaṃ karissāmī’’ti dhuraṃ nikkhittamatte āpatti pācittiyassa.
၁၁၅၇. အနာပတ္တိ သတိ အန္တရာယေ, ပရိယေသိတ္ဝာ န လဘတိ, ဂိလာနာယ, အာပဒာသု, ဥမ္မတ္တိကာယ, အာဒိကမ္မိကာယာတိ။
1157. Anāpatti sati antarāye, pariyesitvā na labhati, gilānāya, āpadāsu, ummattikāya, ādikammikāyāti.
အဋ္ဌမသိက္ခာပဒံ နိဋ္ဌိတံ။
Aṭṭhamasikkhāpadaṃ niṭṭhitaṃ.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၈. အဋ္ဌမသိက္ခာပဒဝဏ္ဏနာ • 8. Aṭṭhamasikkhāpadavaṇṇanā
