| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
8. අට්‌ඨමසික්‌ඛාපදං
8. Aṭṭhamasikkhāpadaṃ
1008. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ථුල්‌ලනන්‌දා භික්‌ඛුනී ආවසථං අනිස්‌සජ්‌ජිත්‌වා චාරිකං පක්‌කාමි. තෙන ඛො පන සමයෙන ථුල්‌ලනන්‌දාය භික්‌ඛුනියා ආවසථො ඩය්‌හති. භික්‌ඛුනියො එවමාහංසු – ‘‘හන්‌දාය්‍යෙ, භණ්‌ඩකං නීහරාමා’’ති. එකච්‌චා එවමාහංසු – ‘‘න මයං, අය්‍යෙ, නීහරිස්‌සාම. යං කිඤ්‌චි නට්‌ඨං සබ්‌බං අම්‌හෙ අභියුඤ්‌ජිස්‌සතී’’ති. ථුල්‌ලනන්‌දා භික්‌ඛුනී පුනදෙව තං ආවසථං පච්‌චාගන්‌ත්‌වා භික්‌ඛුනියො පුච්‌ඡි – ‘‘අපාය්‍යෙ, භණ්‌ඩකං නීහරිත්‌ථා’’ති? ‘‘න මයං, අය්‍යෙ, නීහරිම්‌හා’’ති . ථුල්‌ලනන්‌දා භික්‌ඛුනී උජ්‌ඣායති ඛිය්‍යති විපාචෙති – ‘‘කථඤ්‌හි නාම භික්‌ඛුනියො ආවසථෙ ඩය්‌හමානෙ භණ්‌ඩකං න නීහරිස්‌සන්‌තී’’ති! යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා ආවසථං අනිස්‌සජ්‌ජිත්‌වා චාරිකං පක්‌කමිස්‌සතී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී ආවසථං අනිස්‌සජ්‌ජිත්‌වා චාරිකං පක්‌කමතීති 1? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී ආවසථං අනිස්‌සජ්‌ජිත්‌වා චාරිකං පක්‌කමිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1008. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī āvasathaṃ anissajjitvā cārikaṃ pakkāmi. Tena kho pana samayena thullanandāya bhikkhuniyā āvasatho ḍayhati. Bhikkhuniyo evamāhaṃsu – ‘‘handāyye, bhaṇḍakaṃ nīharāmā’’ti. Ekaccā evamāhaṃsu – ‘‘na mayaṃ, ayye, nīharissāma. Yaṃ kiñci naṭṭhaṃ sabbaṃ amhe abhiyuñjissatī’’ti. Thullanandā bhikkhunī punadeva taṃ āvasathaṃ paccāgantvā bhikkhuniyo pucchi – ‘‘apāyye, bhaṇḍakaṃ nīharitthā’’ti? ‘‘Na mayaṃ, ayye, nīharimhā’’ti . Thullanandā bhikkhunī ujjhāyati khiyyati vipāceti – ‘‘kathañhi nāma bhikkhuniyo āvasathe ḍayhamāne bhaṇḍakaṃ na nīharissantī’’ti! Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā āvasathaṃ anissajjitvā cārikaṃ pakkamissatī’’ti…pe… saccaṃ kira, bhikkhave, thullanandā bhikkhunī āvasathaṃ anissajjitvā cārikaṃ pakkamatīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī āvasathaṃ anissajjitvā cārikaṃ pakkamissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1009. ‘‘යා පන භික්‌ඛුනී ආවසථං අනිස්‌සජ්‌ජිත්‌වා චාරිකං පක්‌කමෙය්‍ය, පාචිත්‌තිය’’න්‌ති.
1009.‘‘Yā pana bhikkhunī āvasathaṃ anissajjitvā cārikaṃ pakkameyya, pācittiya’’nti.
1010. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
1010.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ආවසථො නාම කවාටබද්‌ධො වුච්‌චති.
Āvasatho nāma kavāṭabaddho vuccati.
අනිස්‌සජ්‌ජිත්‌වා චාරිකං පක්‌කමෙය්‍යාති භික්‌ඛුනියා වා සික්‌ඛමානාය වා සාමණෙරියා වා අනිස්‌සජ්‌ජිත්‌වා පරික්‌ඛිත්‌තස්‌ස ආවසථස්‌ස පරික්‌ඛෙපං අතික්‌කාමෙන්‌තියා ආපත්‌ති පාචිත්‌තියස්‌ස. අපරික්‌ඛිත්‌තස්‌ස ආවසථස්‌ස උපචාරං අතික්‌කාමෙන්‌තියා ආපත්‌ති පාචිත්‌තියස්‌ස.
Anissajjitvā cārikaṃ pakkameyyāti bhikkhuniyā vā sikkhamānāya vā sāmaṇeriyā vā anissajjitvā parikkhittassa āvasathassa parikkhepaṃ atikkāmentiyā āpatti pācittiyassa. Aparikkhittassa āvasathassa upacāraṃ atikkāmentiyā āpatti pācittiyassa.
1011. අනිස්‌සජ්‌ජිතෙ අනිස්‌සජ්‌ජිතසඤ්‌ඤා පක්‌කමති, ආපත්‌ති පාචිත්‌තියස්‌ස. අනිස්‌සජ්‌ජිතෙ වෙමතිකා පක්‌කමති, ආපත්‌ති පාචිත්‌තියස්‌ස. අනිස්‌සජ්‌ජිතෙ නිස්‌සජ්‌ජිතසඤ්‌ඤා පක්‌කමති, ආපත්‌ති පාචිත්‌තියස්‌ස.
1011. Anissajjite anissajjitasaññā pakkamati, āpatti pācittiyassa. Anissajjite vematikā pakkamati, āpatti pācittiyassa. Anissajjite nissajjitasaññā pakkamati, āpatti pācittiyassa.
අකවාටබද්‌ධං අනිස්‌සජ්‌ජිත්‌වා පක්‌කමති, ආපත්‌ති දුක්‌කටස්‌ස. නිස්‌සජ්‌ජිතෙ අනිස්‌සජ්‌ජිතසඤ්‌ඤා, ආපත්‌ති දුක්‌කටස්‌ස. නිස්‌සජ්‌ජිතෙ වෙමතිකා, ආපත්‌ති දුක්‌කටස්‌ස. නිස්‌සජ්‌ජිතෙ නිස්‌සජ්‌ජිතසඤ්‌ඤා, අනාපත්‌ති.
Akavāṭabaddhaṃ anissajjitvā pakkamati, āpatti dukkaṭassa. Nissajjite anissajjitasaññā, āpatti dukkaṭassa. Nissajjite vematikā, āpatti dukkaṭassa. Nissajjite nissajjitasaññā, anāpatti.
1012. අනාපත්‌ති නිස්‌සජ්‌ජිත්‌වා පක්‌කමති, සති අන්‌තරායෙ, පරියෙසිත්‌වා න ලභති, ගිලානාය, ආපදාසු, උම්‌මත්‌තිකාය, ආදිකම්‌මිකායාති.
1012. Anāpatti nissajjitvā pakkamati, sati antarāye, pariyesitvā na labhati, gilānāya, āpadāsu, ummattikāya, ādikammikāyāti.
අට්‌ඨමසික්‌ඛාපදං නිට්‌ඨිතං.
Aṭṭhamasikkhāpadaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 8. අට්‌ඨමසික්‌ඛාපදවණ්‌ණනා • 8. Aṭṭhamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. ඡට්‌ඨසික්‌ඛාපදවණ්‌ණනා • 6. Chaṭṭhasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 8. අට්‌ඨමසික්‌ඛාපදං • 8. Aṭṭhamasikkhāpadaṃ
