| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
8. අට්‌ඨමසික්‌ඛාපදං
8. Aṭṭhamasikkhāpadaṃ
1107. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ථුල්‌ලනන්‌දා භික්‌ඛුනී සහජීවිනිං වුට්‌ඨාපෙත්‌වා ද්‌වෙ වස්‌සානි නෙව අනුග්‌ගණ්‌හාති න අනුග්‌ගණ්‌හාපෙති. තා බාලා හොන්‌ති අබ්‍යත්‌තා; න ජානන්‌ති කප්‌පියං වා අකප්‌පියං වා. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා සහජීවිනිං වුට්‌ඨාපෙත්‌වා ද්‌වෙ වස්‌සානි නෙව අනුග්‌ගණ්‌හිස්‌සති න අනුග්‌ගණ්‌හාපෙස්‌සතී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී සහජීවිනිං වුට්‌ඨාපෙත්‌වා ද්‌වෙ වස්‌සානි නෙව අනුග්‌ගණ්‌හාති න අනුග්‌ගණ්‌හාපෙතීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී සහජීවිනිං වුට්‌ඨාපෙත්‌වා ද්‌වෙ වස්‌සානි නෙව අනුග්‌ගණ්‌හිස්‌සති න අනුග්‌ගණ්‌හාපෙස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1107. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī sahajīviniṃ vuṭṭhāpetvā dve vassāni neva anuggaṇhāti na anuggaṇhāpeti. Tā bālā honti abyattā; na jānanti kappiyaṃ vā akappiyaṃ vā. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā sahajīviniṃ vuṭṭhāpetvā dve vassāni neva anuggaṇhissati na anuggaṇhāpessatī’’ti…pe… saccaṃ kira, bhikkhave, thullanandā bhikkhunī sahajīviniṃ vuṭṭhāpetvā dve vassāni neva anuggaṇhāti na anuggaṇhāpetīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī sahajīviniṃ vuṭṭhāpetvā dve vassāni neva anuggaṇhissati na anuggaṇhāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1108. ‘‘යා පන භික්‌ඛුනී සහජීවිනිං වුට්‌ඨාපෙත්‌වා ද්‌වෙ වස්‌සානි නෙව අනුග්‌ගණ්‌හෙය්‍ය න අනුග්‌ගණ්‌හාපෙය්‍ය, පාචිත්‌තිය’’න්‌ති.
1108.‘‘Yā pana bhikkhunī sahajīviniṃ vuṭṭhāpetvā dve vassāni neva anuggaṇheyya na anuggaṇhāpeyya, pācittiya’’nti.
1109. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
1109.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
සහජීවිනී නාම සද්‌ධිවිහාරිනී වුච්‌චති. වුට්‌ඨාපෙත්‌වාති උපසම්‌පාදෙත්‌වා. ද්‌වෙ වස්‌සානීති ද්‌වෙ සංවච්‌ඡරානි.
Sahajīvinī nāma saddhivihārinī vuccati. Vuṭṭhāpetvāti upasampādetvā. Dve vassānīti dve saṃvaccharāni.
නෙව අනුග්‌ගණ්‌හෙය්‍යාති න සයං අනුග්‌ගණ්‌හෙය්‍ය උද්‌දෙසෙන පරිපුච්‌ඡාය ඔවාදෙන අනුසාසනියා.
Neva anuggaṇheyyāti na sayaṃ anuggaṇheyya uddesena paripucchāya ovādena anusāsaniyā.
න අනුග්‌ගණ්‌හාපෙය්‍යාති න අඤ්‌ඤං ආණාපෙය්‍ය ‘‘ද්‌වෙ වස්‌සානි නෙව අනුග්‌ගණ්‌හිස්‌සාමි න අනුග්‌ගණ්‌හාපෙස්‌සාමී’’ති ධුරං නික්‌ඛිත්‌තමත්‌තෙ ආපත්‌ති පාචිත්‌තියස්‌ස.
Na anuggaṇhāpeyyāti na aññaṃ āṇāpeyya ‘‘dve vassāni neva anuggaṇhissāmi na anuggaṇhāpessāmī’’ti dhuraṃ nikkhittamatte āpatti pācittiyassa.
1110. අනාපත්‌ති සති අන්‌තරායෙ, පරියෙසිත්‌වා න ලභති, ගිලානාය, ආපදාසු, උම්‌මත්‌තිකාය, ආදිකම්‌මිකායාති.
1110. Anāpatti sati antarāye, pariyesitvā na labhati, gilānāya, āpadāsu, ummattikāya, ādikammikāyāti.
අට්‌ඨමසික්‌ඛාපදං නිට්‌ඨිතං.
Aṭṭhamasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 8. අට්‌ඨමසික්‌ඛාපදවණ්‌ණනා • 8. Aṭṭhamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
