| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
১৫. অট্ঠানপাল়ি (পঠমৰগ্গ)
15. Aṭṭhānapāḷi (paṭhamavagga)
(১৫) ১. অট্ঠানপাল়ি-পঠমৰগ্গৰণ্ণনা
(15) 1. Aṭṭhānapāḷi-paṭhamavaggavaṇṇanā
২৬৮. অট্ঠানপাল়িৰণ্ণনাযং অৰিজ্জমানং ঠানং অট্ঠানং, নত্থি ঠানন্তি ৰা অট্ঠানং। অনৰকাসোতি এত্থাপি এসেৰ নযো। তদত্থনিগমনমেৰ হি ‘‘নেতং ঠানং ৰিজ্জতী’’তি ৰচনন্তি। তেনাহ – ‘‘উভযেনপী’’তিআদি। যন্তি কারণত্থে পচ্চত্তৰচনং। হেতুঅত্থো চেত্থ কারণত্থোতি আহ – ‘‘যন্তি যেন কারণেনা’’তি। উক্কট্ঠনিদ্দেসেনেত্থ দিট্ঠিসম্পত্তি ৰেদিতব্বাতি ৰুত্তং – ‘‘মগ্গদিট্ঠিযা সম্পন্নো’’তি। কুতো পনাযমত্থো লব্ভতীতি? লিঙ্গতো, লিঙ্গং চেতস্স নিচ্চতো উপগমনপ্পটিক্খেপো। চতুভূমকেসূতি ইদং চতুত্থভূমকসঙ্খারানং অরিযসাৰকস্স ৰিসযভাৰূপগমনতো ৰুত্তং, ন পন তে আরব্ভ নিচ্চতো উপগমনসব্ভাৰতো। ৰক্খতি হি ‘‘তদভাৰে চতুত্থভূমকসঙ্খারা পনা’’তিআদিনা। অভিসঙ্খতসঙ্খারঅভিসঙ্খরণকসঙ্খারানং সপ্পদেসত্তা নিপ্পদেসসঙ্খারগ্গহণত্থং ‘‘সঙ্খতসঙ্খারেসূ’’তি ৰুত্তং, লোকুত্তরসঙ্খারানং পন নিৰত্তনে কারণং সযমেৰ ৰক্খতি। এতং কারণং নত্থীতি তথা উপগমনে সেতুঘাতো নত্থি। তেজুস্সদত্তাতি সংকিলেসৰিধমনতেজস্স অধিকভাৰতো। তথা হি তে গম্ভীরভাৰেন দুদ্দসা অকুসলানং আরম্মণং ন হোন্তীতি। ইদং পন পকরণৰসেন ৰুত্তং। অপ্পহীনৰিপল্লাসানঞ্হি সন্তানেসু কুসলধম্মানম্পি তে আরম্মণং ন হোন্তি।
268. Aṭṭhānapāḷivaṇṇanāyaṃ avijjamānaṃ ṭhānaṃ aṭṭhānaṃ, natthi ṭhānanti vā aṭṭhānaṃ. Anavakāsoti etthāpi eseva nayo. Tadatthanigamanameva hi ‘‘netaṃ ṭhānaṃ vijjatī’’ti vacananti. Tenāha – ‘‘ubhayenapī’’tiādi. Yanti kāraṇatthe paccattavacanaṃ. Hetuattho cettha kāraṇatthoti āha – ‘‘yanti yena kāraṇenā’’ti. Ukkaṭṭhaniddesenettha diṭṭhisampatti veditabbāti vuttaṃ – ‘‘maggadiṭṭhiyā sampanno’’ti. Kuto panāyamattho labbhatīti? Liṅgato, liṅgaṃ cetassa niccato upagamanappaṭikkhepo. Catubhūmakesūti idaṃ catutthabhūmakasaṅkhārānaṃ ariyasāvakassa visayabhāvūpagamanato vuttaṃ, na pana te ārabbha niccato upagamanasabbhāvato. Vakkhati hi ‘‘tadabhāve catutthabhūmakasaṅkhārā panā’’tiādinā. Abhisaṅkhatasaṅkhāraabhisaṅkharaṇakasaṅkhārānaṃ sappadesattā nippadesasaṅkhāraggahaṇatthaṃ ‘‘saṅkhatasaṅkhāresū’’ti vuttaṃ, lokuttarasaṅkhārānaṃ pana nivattane kāraṇaṃ sayameva vakkhati. Etaṃ kāraṇaṃ natthīti tathā upagamane setughāto natthi. Tejussadattāti saṃkilesavidhamanatejassa adhikabhāvato. Tathā hi te gambhīrabhāvena duddasā akusalānaṃ ārammaṇaṃ na hontīti. Idaṃ pana pakaraṇavasena vuttaṃ. Appahīnavipallāsānañhi santānesu kusaladhammānampi te ārammaṇaṃ na honti.
২৬৯. অসুখে সুখন্তি ৰিপল্লাসো চ ইধ সুখতো উপগমনস্স ঠানন্তি দস্সেন্তো ‘‘একন্ত…পে॰… অত্তদিট্ঠিৰসেনা’’তি পধানদিট্ঠিমাহ। গূথন্তি গূথট্ঠানং, দিট্ঠিযা নিব্বানস্স অৰিসযভাৰো হেট্ঠা ৰুত্তো এৰাতি কসিণাদিপণ্ণত্তিসঙ্গহত্থন্তি ৰুত্তং।
269. Asukhe sukhanti vipallāso ca idha sukhato upagamanassa ṭhānanti dassento ‘‘ekanta…pe… attadiṭṭhivasenā’’ti padhānadiṭṭhimāha. Gūthanti gūthaṭṭhānaṃ, diṭṭhiyā nibbānassa avisayabhāvo heṭṭhā vutto evāti kasiṇādipaṇṇattisaṅgahatthanti vuttaṃ.
২৭০. পরিচ্ছেদোতি পরিচ্ছিন্দনং পরিচ্ছিজ্জ তস্স গহণং। স্ৰাযং যেসু নিচ্চাদিতো উপগমনং সম্ভৰতি, তেসং ৰসেনযেৰ কাতব্বোতি দস্সেন্তো ‘‘সব্বৰারেসু ৰা’’তিআদিমাহ। সব্বৰারেসূতি ‘‘নিচ্চতো উপগচ্ছেয্যা’’তিআদিনা আগতেসু সব্বেসু সুত্তপদেসু। পুথুজ্জনো হীতি হি-সদ্দো হেতুঅত্থো। যস্মা যং যং সঙ্খারং পুথুজ্জনো নিচ্চাদিৰসেন গণ্হাতি, তং তং অরিযসাৰকো অনিচ্চাদিৰসেন গণ্হন্তো যাথাৰতো জানন্তো তং গাহং তং দিট্ঠিং ৰিস্সজ্জেতি, তস্মা যত্থ গাহো, তত্থ ৰিস্সজ্জনাতি চতুভূমকসঙ্খারা ইধ সঙ্খারগ্গহণেন ন গয্হন্তীতি অত্থো।
270.Paricchedoti paricchindanaṃ paricchijja tassa gahaṇaṃ. Svāyaṃ yesu niccādito upagamanaṃ sambhavati, tesaṃ vasenayeva kātabboti dassento ‘‘sabbavāresu vā’’tiādimāha. Sabbavāresūti ‘‘niccato upagaccheyyā’’tiādinā āgatesu sabbesu suttapadesu. Puthujjano hīti hi-saddo hetuattho. Yasmā yaṃ yaṃ saṅkhāraṃ puthujjano niccādivasena gaṇhāti, taṃ taṃ ariyasāvako aniccādivasena gaṇhanto yāthāvato jānanto taṃ gāhaṃ taṃ diṭṭhiṃ vissajjeti, tasmā yattha gāho, tattha vissajjanāti catubhūmakasaṅkhārā idha saṅkhāraggahaṇena na gayhantīti attho.
২৭১. পুত্তসম্বন্ধেন মাতুপিতুসমঞ্ঞা দত্তকিত্তিমাদিৰসেনপি পুত্তৰোহারো লোকে দিস্সতি, সো চ খো পরিযাযেনাতি নিপ্পরিযাযেন সিদ্ধং তং দস্সেতুং – ‘‘জনিকাৰ মাতা, জনকোৰ পিতা’’তি ৰুত্তং। তথা আনন্তরিযকম্মস্স অধিপ্পেতত্তা ‘‘মনুস্সভূতোৰ খীণাসৰো অরহাতি অধিপ্পেতো’’তি ৰুত্তং। ‘‘অট্ঠানমেত’’ন্তিআদিনা ‘‘মাতুআদীনংযেৰ জীৰিতা ৰোরোপনে অরিযসাৰকস্স অভব্বভাৰদস্সনতো তদঞ্ঞং অরিযসাৰকো জীৰিতা ৰোরোপেতীতি ইদং অত্থতো আপন্নমেৰা’’তি মঞ্ঞমানো ৰদতি – ‘‘কিং পন অরিযসাৰকো অঞ্ঞং জীৰিতা ৰোরোপেয্যা’’তি? ‘‘অট্ঠানমেতং অনৰকাসো, যং দিট্ঠিসম্পন্নো পুগ্গলো সঞ্চিচ্চ পাণং জীৰিতা ৰোরোপেয্য, নেতং ঠানং ৰিজ্জতী’’তি ৰচনতো ‘‘এতম্পি অট্ঠান’’ন্তি ৰুত্তং। তেনেৰাহ – ‘‘সচে হী’’তিআদি। এৰং সন্তে কস্মা ‘‘মাতর’’ন্তিআদিনা ৰিসেসেত্ৰা ৰুত্তন্তি আহ – ‘‘পুথুজ্জনভাৰস্স পনা’’তিআদি। তত্থ বলদীপনত্থন্তি সদ্ধাদিবলসমন্নাগমদীপনত্থং। অরিযমগ্গেনাগতসদ্ধাধিবলৰসেন হি অরিযসাৰকো তাদিসং সাৰজ্জং ন করোতি।
271. Puttasambandhena mātupitusamaññā dattakittimādivasenapi puttavohāro loke dissati, so ca kho pariyāyenāti nippariyāyena siddhaṃ taṃ dassetuṃ – ‘‘janikāva mātā, janakova pitā’’ti vuttaṃ. Tathā ānantariyakammassa adhippetattā ‘‘manussabhūtova khīṇāsavo arahāti adhippeto’’ti vuttaṃ. ‘‘Aṭṭhānameta’’ntiādinā ‘‘mātuādīnaṃyeva jīvitā voropane ariyasāvakassa abhabbabhāvadassanato tadaññaṃ ariyasāvako jīvitā voropetīti idaṃ atthato āpannamevā’’ti maññamāno vadati – ‘‘kiṃ pana ariyasāvako aññaṃ jīvitā voropeyyā’’ti? ‘‘Aṭṭhānametaṃ anavakāso, yaṃ diṭṭhisampanno puggalo sañcicca pāṇaṃ jīvitā voropeyya, netaṃ ṭhānaṃ vijjatī’’ti vacanato ‘‘etampi aṭṭhāna’’nti vuttaṃ. Tenevāha – ‘‘sace hī’’tiādi. Evaṃ sante kasmā ‘‘mātara’’ntiādinā visesetvā vuttanti āha – ‘‘puthujjanabhāvassa panā’’tiādi. Tattha baladīpanatthanti saddhādibalasamannāgamadīpanatthaṃ. Ariyamaggenāgatasaddhādhibalavasena hi ariyasāvako tādisaṃ sāvajjaṃ na karoti.
২৭৫. পঞ্চহি কারণেহীতি ইদমেত্থ নিপ্ফাদকানি তেসং পুব্বভাগিযানি চ কারণানি কারণভাৰসামঞ্ঞেন একজ্ঝং গহেত্ৰা ৰুত্তং, ন পন সব্বেসং সমানযোগক্খমত্তা। আকারেহীতি কারণেহি। অনুস্সাৰনেনাতি অনুরূপং সাৰনেন। ভেদস্স অনুরূপং যথা ভেদো হোতি, এৰং ভিন্দিতব্বানং ভিক্খূনং অত্তনো ৰচনস্স সাৰনেন ৰিঞ্ঞাপনেন। তেনাহ – ‘‘ননু তুম্হে’’তিআদি। কণ্ণমূলে ৰচীভেদং কত্ৰাতি এতেন পাকটং কত্ৰা ভেদকরৰত্থুদীপনং ৰোহারো, তত্থ অত্তনো নিচ্ছিতমত্থং রহস্সৰসেন ৰিঞ্ঞাপনং অনুস্সাৰনন্তি দস্সেতি।
275.Pañcahi kāraṇehīti idamettha nipphādakāni tesaṃ pubbabhāgiyāni ca kāraṇāni kāraṇabhāvasāmaññena ekajjhaṃ gahetvā vuttaṃ, na pana sabbesaṃ samānayogakkhamattā. Ākārehīti kāraṇehi. Anussāvanenāti anurūpaṃ sāvanena. Bhedassa anurūpaṃ yathā bhedo hoti, evaṃ bhinditabbānaṃ bhikkhūnaṃ attano vacanassa sāvanena viññāpanena. Tenāha – ‘‘nanu tumhe’’tiādi. Kaṇṇamūle vacībhedaṃ katvāti etena pākaṭaṃ katvā bhedakaravatthudīpanaṃ vohāro, tattha attano nicchitamatthaṃ rahassavasena viññāpanaṃ anussāvananti dasseti.
কম্মমেৰ উদ্দেসো ৰা পমাণন্তি তেহি সঙ্ঘভেদসিদ্ধিতো ৰুত্তং, ইতরে পন তেসং সম্ভারভূতা। তেনাহ – ‘‘ৰোহারা’’তিআদি। তত্থাতি ৰোহরণে। চুতিঅনন্তরং ফলং অনন্তরং নাম, তস্মিং অনন্তরে নিযুত্তানি, তন্নিব্বত্তনেন অনন্তরকরণসীলানি, অনন্তরপ্পযোজনানি চাতি আনন্তরিযানি, তানি এৰ কম্মানীতি আনন্তরিযকম্মানি।
Kammameva uddeso vā pamāṇanti tehi saṅghabhedasiddhito vuttaṃ, itare pana tesaṃ sambhārabhūtā. Tenāha – ‘‘vohārā’’tiādi. Tatthāti voharaṇe. Cutianantaraṃ phalaṃ anantaraṃ nāma, tasmiṃ anantare niyuttāni, tannibbattanena anantarakaraṇasīlāni, anantarappayojanāni cāti ānantariyāni, tāni eva kammānīti ānantariyakammāni.
কম্মতোতি ‘‘এৰং আনন্তরিযকম্মং হোতি, এৰং আনন্তরিযকম্মসদিস’’ন্তি এৰং কম্মৰিভাগতো। দ্ৰারতোতি কাযদ্ৰারতো। কপ্পট্ঠিতিযতোতি ‘‘ইদং কপ্পট্ঠিতিযৰিপাকং, ইদং ন কপ্পট্ঠিতিযৰিপাক’’ন্তি এৰং কপ্পট্ঠিতিযৰিভাগতো। পাকসাধারণাদীহীতি ‘‘ইদমেত্থ ৰিপচ্চতি, ইদং ন ৰিপচ্চতী’’তি ৰিপচ্চনৰিভাগতো, গহট্ঠপব্বজিতানং সাধারণাসাধারণতো, আদি-সদ্দেন ৰেদনাদিৰিভাগতো চ।
Kammatoti ‘‘evaṃ ānantariyakammaṃ hoti, evaṃ ānantariyakammasadisa’’nti evaṃ kammavibhāgato. Dvāratoti kāyadvārato. Kappaṭṭhitiyatoti ‘‘idaṃ kappaṭṭhitiyavipākaṃ, idaṃ na kappaṭṭhitiyavipāka’’nti evaṃ kappaṭṭhitiyavibhāgato. Pākasādhāraṇādīhīti ‘‘idamettha vipaccati, idaṃ na vipaccatī’’ti vipaccanavibhāgato, gahaṭṭhapabbajitānaṃ sādhāraṇāsādhāraṇato, ādi-saddena vedanādivibhāgato ca.
কম্মতো তাৰ ৰিনিচ্ছযো ৰুচ্চতীতি সম্বন্ধো। যস্মা মনুস্সত্তভাৰে ঠিতস্সেৰ কুসলধম্মানং তিক্খৰিসদভাৰাপত্তি, যথা তিণ্ণং বোধিসত্তানং বোধিত্তযনিব্বত্তিযং, এৰং মনুস্সভাৰে ঠিতস্সেৰ এদিসানং অকুসলধম্মানম্পি তিক্খৰিসদভাৰাপত্তীতি আহ – ‘‘মনুস্সভূতস্সেৰা’’তি। পাকতিকমনুস্সানম্পি চ কুসলধম্মানং ৰিসেসপ্পত্তি ৰিমানৰত্থুঅট্ঠকথাযং ৰুত্তনযেনেৰ ৰেদিতব্বা। যথাৰুত্তো চ অত্থো সমানজাতিযস্স ৰিকোপনে গরুতরো, ন তথা ৰিজাতিযস্সাতি ৰুত্তং – ‘‘মনুস্সভূতং মাতরং ৰা পিতরং ৰা’’তি। লিঙ্গপরিৰত্তে চ সো এৰ এককম্মনিব্বত্তো ভৰঙ্গপ্পবন্ধো জীৰিতিন্দ্রিযপবন্ধো চ, ন অঞ্ঞোতি আহ – ‘‘অপি পরিৰত্তলিঙ্গ’’ন্তি। অরহত্তং পত্তেপি এসেৰ নযো। তস্স ৰিপাকন্তিআদি কম্মস্স আনন্তরিযভাৰসমত্থনং। চতুক্কোটিযঞ্চেত্থ সম্ভৰতি। তত্থ পঠমা কোটি দস্সিতা, ইতরাসু ৰিসঙ্কেতভাৰং দস্সেতুং – ‘‘যো পনা’’তিআদি ৰুত্তং। যদিপি তত্থ ৰিসঙ্কেতো, কম্মং পন গরুতরং আনন্তরিযসদিসং ভাযিতব্বন্তি আহ – ‘‘ভারিযং…পে॰… তিট্ঠতী’’তি। অযং পঞ্হোতি ঞাপনিচ্ছানিব্বত্তা কথা।
Kammato tāva vinicchayo vuccatīti sambandho. Yasmā manussattabhāve ṭhitasseva kusaladhammānaṃ tikkhavisadabhāvāpatti, yathā tiṇṇaṃ bodhisattānaṃ bodhittayanibbattiyaṃ, evaṃ manussabhāve ṭhitasseva edisānaṃ akusaladhammānampi tikkhavisadabhāvāpattīti āha – ‘‘manussabhūtassevā’’ti. Pākatikamanussānampi ca kusaladhammānaṃ visesappatti vimānavatthuaṭṭhakathāyaṃ vuttanayeneva veditabbā. Yathāvutto ca attho samānajātiyassa vikopane garutaro, na tathā vijātiyassāti vuttaṃ – ‘‘manussabhūtaṃ mātaraṃ vā pitaraṃ vā’’ti. Liṅgaparivatte ca so eva ekakammanibbatto bhavaṅgappabandho jīvitindriyapabandho ca, na aññoti āha – ‘‘api parivattaliṅga’’nti. Arahattaṃ pattepi eseva nayo. Tassa vipākantiādi kammassa ānantariyabhāvasamatthanaṃ. Catukkoṭiyañcettha sambhavati. Tattha paṭhamā koṭi dassitā, itarāsu visaṅketabhāvaṃ dassetuṃ – ‘‘yo panā’’tiādi vuttaṃ. Yadipi tattha visaṅketo, kammaṃ pana garutaraṃ ānantariyasadisaṃ bhāyitabbanti āha – ‘‘bhāriyaṃ…pe… tiṭṭhatī’’ti. Ayaṃ pañhoti ñāpanicchānibbattā kathā.
অভিসন্ধিনাতি অধিপ্পাযেন। আনন্তরিযং ফুসতীতি মরণাধিপ্পাযেনেৰ আনন্তরিযৰত্থুনো ৰিকোপিতত্তা ৰুত্তং। আনন্তরিযং ন ফুসতীতি আনন্তরিযৰত্থুঅভাৰতো আনন্তরিযং ন হোতি। সব্বত্থ হি পুরিমং অভিসন্ধিচিত্তং অপ্পমাণং, ৰধকচিত্তং পন তদারম্মণং জীৰিতিন্দ্রিযঞ্চ আনন্তরিযভাৰে পমাণন্তি দট্ঠব্বং। সঙ্গামচতুক্কং সম্পত্তৰসেন যোজেতব্বং। যো হি পরসেনায অঞ্ঞঞ্চ যোধং পিতরঞ্চ কম্মং করোন্তে দিস্ৰা যোধস্স উসুং খিপতি ‘‘এতং ৰিজ্ঝিত্ৰা মম পিতরং ৰিজ্ঝিস্সতী’’তি, যথাধিপ্পাযং গতে পিতুঘাতকো হোতি। ‘‘যোধে ৰিদ্ধে মম পিতা পলাযিস্সতী’’তি খিপতি, উসুং অযথাধিপ্পাযং গন্ত্ৰা পিতরং মারেতি, ৰোহারৰসেন পিতুঘাতকোতি ৰুচ্চতি, আনন্তরিযং পন নত্থীতি। চোরচতুক্কং পন যো ‘‘চোরং মারেস্সামী’’তি চোরৰেসেন গচ্ছন্তং পিতরং মারেতি, আনন্তরিযং ফুসতীতিআদিনা যোজেতব্বং। তেনেৰাতি তেনেৰ পযোগেন। অরহন্তঘাতকো হোতিযেৰাতি অরহতো মারিতত্তা ৰুত্তং, পুথুজ্জনস্সেৰ তং দিন্নং হোতীতি এত্থাযমধিপ্পাযো – যথা ৰধকচেতনা পচ্চুপ্পন্নারম্মণাপি পবন্ধৰিচ্ছেদনৰসেন জীৰিতিন্দ্রিযং আরম্মণং কত্ৰা পৰত্ততি, ন এৰং চাগচেতনা। সা হি চজিতব্বৰত্থুং আরম্মণং কত্ৰা চজনমত্তমেৰ হোতি, অঞ্ঞসন্তকভাৰকরণঞ্চ তস্স চজনং, তস্মা যস্স তং সন্তকং কতং, তস্সেৰ দিন্নং হোতীতি।
Abhisandhināti adhippāyena. Ānantariyaṃ phusatīti maraṇādhippāyeneva ānantariyavatthuno vikopitattā vuttaṃ. Ānantariyaṃ na phusatīti ānantariyavatthuabhāvato ānantariyaṃ na hoti. Sabbattha hi purimaṃ abhisandhicittaṃ appamāṇaṃ, vadhakacittaṃ pana tadārammaṇaṃ jīvitindriyañca ānantariyabhāve pamāṇanti daṭṭhabbaṃ. Saṅgāmacatukkaṃ sampattavasena yojetabbaṃ. Yo hi parasenāya aññañca yodhaṃ pitarañca kammaṃ karonte disvā yodhassa usuṃ khipati ‘‘etaṃ vijjhitvā mama pitaraṃ vijjhissatī’’ti, yathādhippāyaṃ gate pitughātako hoti. ‘‘Yodhe viddhe mama pitā palāyissatī’’ti khipati, usuṃ ayathādhippāyaṃ gantvā pitaraṃ māreti, vohāravasena pitughātakoti vuccati, ānantariyaṃ pana natthīti. Coracatukkaṃ pana yo ‘‘coraṃ māressāmī’’ti coravesena gacchantaṃ pitaraṃ māreti, ānantariyaṃ phusatītiādinā yojetabbaṃ. Tenevāti teneva payogena. Arahantaghātako hotiyevāti arahato māritattā vuttaṃ, puthujjanasseva taṃ dinnaṃ hotīti etthāyamadhippāyo – yathā vadhakacetanā paccuppannārammaṇāpi pabandhavicchedanavasena jīvitindriyaṃ ārammaṇaṃ katvā pavattati, na evaṃ cāgacetanā. Sā hi cajitabbavatthuṃ ārammaṇaṃ katvā cajanamattameva hoti, aññasantakabhāvakaraṇañca tassa cajanaṃ, tasmā yassa taṃ santakaṃ kataṃ, tasseva dinnaṃ hotīti.
লোহিতং সমোসরতীতি অভিঘাতেন পকুপ্পমানং সঞ্চিতং হোতি। মহন্ততরন্তি গরুতরং। সরীরপ্পটিজগ্গনে ৰিযাতি সত্থুরূপকাযপ্পটিজগ্গনে ৰিয।
Lohitaṃsamosaratīti abhighātena pakuppamānaṃ sañcitaṃ hoti. Mahantataranti garutaraṃ. Sarīrappaṭijaggane viyāti satthurūpakāyappaṭijaggane viya.
অসন্নিপতিতেতি ইদং সামগ্গিযদীপনং। ভেদো চ হোতীতি সঙ্ঘস্স ভেদো চ হোতি। ৰট্টতীতি সঞ্ঞাযাতি ‘‘ঈদিসং করণং সঙ্ঘভেদায ন হোতী’’তি সঞ্ঞায। তথা নৰতো ঊনপরিসাযাতি নৰতো ঊনপরিসায করোন্তস্স তথাতি যোজেতব্বং। তথাতি চ ইমিনা ‘‘ন আনন্তরিযকম্ম’’ন্তি ইমং আকড্ঢতি, ন পন ‘‘ভেদোৰ হোতী’’তি ইদং। হেট্ঠিমন্তেন হি নৰন্নমেৰ ৰসেন সঙ্ঘভেদো। ধম্মৰাদিনো অনৰজ্জাতি যথাধম্মং অনৰট্ঠানতো। সঙ্ঘভেদস্স পুব্বভাগো সঙ্ঘরাজি।
Asannipatiteti idaṃ sāmaggiyadīpanaṃ. Bhedo ca hotīti saṅghassa bhedo ca hoti. Vaṭṭatīti saññāyāti ‘‘īdisaṃ karaṇaṃ saṅghabhedāya na hotī’’ti saññāya. Tathā navato ūnaparisāyāti navato ūnaparisāya karontassa tathāti yojetabbaṃ. Tathāti ca iminā ‘‘na ānantariyakamma’’nti imaṃ ākaḍḍhati, na pana ‘‘bhedova hotī’’ti idaṃ. Heṭṭhimantena hi navannameva vasena saṅghabhedo. Dhammavādino anavajjāti yathādhammaṃ anavaṭṭhānato. Saṅghabhedassa pubbabhāgo saṅgharāji.
কাযদ্ৰারমেৰ পূরেন্তি কাযকম্মভাৰেনেৰ লক্খিতব্বতো। সণ্ঠহন্তেহি কপ্পে…পে॰… মুচ্চতীতি ইদং কপ্পট্ঠকথায (কথা॰ ৬৫৪ আদযো) ন সমেতি। তত্থ হি অট্ঠকথায (কথা॰ অট্ঠ॰ ৬৫৪-৬৫৭) ৰুত্তং – ‘‘আপাযিকোতি ইদং সুত্তং যং সো একং কপ্পং অসীতিভাগে কত্ৰা ততো একভাগমত্তং কালং তিট্ঠেয্য, তং আযুকপ্পং সন্ধায ৰুত্ত’’ন্তি। কপ্পৰিনাসেযেৰাতি চ আযুকপ্পৰিনাসে এৰাতি অত্থে সতি নত্থি ৰিরোধো। এত্থ চ সণ্ঠহন্তেতি ইদম্পি ‘‘স্ৰেৰ ৰিনস্সিস্সতী’’তি ৰিয অভূতপরিকপ্পৰসেন ৰুত্তং। একদিৰসমেৰ নিরযে পচ্চতি, ততো পরং কপ্পাভাৰে আযুকপ্পস্সপি অভাৰতোতি অৰিরোধতো অত্থযোজনা দট্ঠব্বা। সেসানীতি সঙ্ঘভেদতো অঞ্ঞানি আনন্তরিযকম্মানি।
Kāyadvārameva pūrenti kāyakammabhāveneva lakkhitabbato. Saṇṭhahantehi kappe…pe… muccatīti idaṃ kappaṭṭhakathāya (kathā. 654 ādayo) na sameti. Tattha hi aṭṭhakathāya (kathā. aṭṭha. 654-657) vuttaṃ – ‘‘āpāyikoti idaṃ suttaṃ yaṃ so ekaṃ kappaṃ asītibhāge katvā tato ekabhāgamattaṃ kālaṃ tiṭṭheyya, taṃ āyukappaṃ sandhāya vutta’’nti. Kappavināseyevāti ca āyukappavināse evāti atthe sati natthi virodho. Ettha ca saṇṭhahanteti idampi ‘‘sveva vinassissatī’’ti viya abhūtaparikappavasena vuttaṃ. Ekadivasameva niraye paccati, tato paraṃ kappābhāve āyukappassapi abhāvatoti avirodhato atthayojanā daṭṭhabbā. Sesānīti saṅghabhedato aññāni ānantariyakammāni.
যদি তানি অহোসিকম্মসঙ্খং গচ্ছন্তি, এৰং সতি কথং নেসং আনন্তরিযতা চুতিঅনন্তরং ৰিপাকদানাভাৰতো। অথ সতি ফলদানে চুতিঅনন্তরো এৰ এতেসং ফলকালো, ন অঞ্ঞোতি ফলকালনিযমেন নিযততা ইচ্ছিতা, ন ফলদাননিযমেন। এৰম্পি নিযতফলকালানং অঞ্ঞেসম্পি উপপজ্জৰেদনীযানং দিট্ঠধম্মৰেদনীযানঞ্চ নিযততা আপজ্জেয্য, তস্মা ৰিপাকধম্মধম্মানং পচ্চযন্তরৰিকলতাদীহি অৰিপচ্চমানানম্পি অত্তনো সভাৰেন ৰিপাকধম্মতা ৰিয বলৰতা আনন্তরিযেন ৰিপাকে দিন্নে অৰিপচ্চমানানম্পি আনন্তরিযানং ফলদানে নিযতসভাৰা আনন্তরিযসভাৰা চ পৰত্তীতি অত্তনো সভাৰেন ফলদাননিযমেনেৰ নিযতা আনন্তরিযতা চ ৰেদিতব্বা। অৰস্সঞ্চ আনন্তরিযসভাৰা ততো এৰ নিযতসভাৰা চ তেসং পৰত্তীতি সম্পটিচ্ছিতব্বমেতং, অঞ্ঞস্স বলৰতো আনন্তরিযস্স অভাৰে সতি চুতিঅনন্তরং একন্তেন ফলদানতো।
Yadi tāni ahosikammasaṅkhaṃ gacchanti, evaṃ sati kathaṃ nesaṃ ānantariyatā cutianantaraṃ vipākadānābhāvato. Atha sati phaladāne cutianantaro eva etesaṃ phalakālo, na aññoti phalakālaniyamena niyatatā icchitā, na phaladānaniyamena. Evampi niyataphalakālānaṃ aññesampi upapajjavedanīyānaṃ diṭṭhadhammavedanīyānañca niyatatā āpajjeyya, tasmā vipākadhammadhammānaṃ paccayantaravikalatādīhi avipaccamānānampi attano sabhāvena vipākadhammatā viya balavatā ānantariyena vipāke dinne avipaccamānānampi ānantariyānaṃ phaladāne niyatasabhāvā ānantariyasabhāvā ca pavattīti attano sabhāvena phaladānaniyameneva niyatā ānantariyatā ca veditabbā. Avassañca ānantariyasabhāvā tato eva niyatasabhāvā ca tesaṃ pavattīti sampaṭicchitabbametaṃ, aññassa balavato ānantariyassa abhāve sati cutianantaraṃ ekantena phaladānato.
ননু এৰং অঞ্ঞেসম্পি উপপজ্জৰেদনীযানং অঞ্ঞস্মিং ৰিপাকদাযকে অসতি চুতিঅনন্তরমেৰ একন্তেন ফলদানতো নিযতসভাৰা আনন্তরিযসভাৰা চ পৰত্তি আপজ্জতীতি? নাপজ্জতি অসমানজাতিকেন চেতোপণিধিৰসেন উপঘাতকেন চ নিৰত্তেতব্বৰিপাকত্তা অনন্তরে একন্তফলদাযকত্তাভাৰা, ন পন আনন্তরিযানং পঠমজ্ঝানাদীনং দুতিযজ্ঝানাদীনি ৰিয অসমানজাতিকং ফলনিৰত্তকং অত্থি সব্বানন্তরিযানং অৰীচিফলত্তা, ন চ হেট্ঠূপপত্তিং ইচ্ছতো সীলৰতো চেতোপণিধি ৰিয উপরূপপত্তিজনককম্মফলং আনন্তরিযফলং নিৰত্তেতুং সমত্থো চেতোপণিধি অত্থি অনিচ্ছন্তস্সেৰ অৰীচিপাতনতো, ন চ আনন্তরিযোপঘাতকং কিঞ্চি কম্মং অত্থি, তস্মা তেসংযেৰ অনন্তরে একন্তৰিপাকজনকসভাৰা পৰত্তীতি। অনেকানি চ আনন্তরিযানি কতানি একন্তেন ৰিপাকে নিযতসভাৰত্তা উপরতাৰিপচ্চনসভাৰাসঙ্কত্তা নিচ্ছিতানি সভাৰতো নিযতানেৰ। তেসু পন সমানসভাৰেসু একেন ৰিপাকে দিন্নে ইতরানি অত্তনা কত্তব্বকিচ্চস্স তেনেৰ কতত্তা ন দুতিযং ততিযম্পি চ পটিসন্ধিং করোন্তি, ন সমত্থতাৰিঘাতত্তাতি নত্থি তেসং আনন্তরিযকতানিৰত্তি, গরুগরুতরভাৰো পন তেসং লব্ভতেৰাতি সঙ্ঘভেদস্স সিযা গরুতরভাৰোতি ‘‘যেন…পে॰… ৰিপচ্চতী’’তি আহ। একস্স পন অঞ্ঞানি উপত্থম্ভকানি হোন্তীতি দট্ঠব্বানি। পটিসন্ধিৰসেন ৰিপচ্চতীতি ৰচনেন ইতরেসং পৰত্তিৰিপাকদাযিতা অনুঞ্ঞাতা ৰিয দিস্সতি। নো ৰা তথা সীলৰতীতি যথা পিতা সীলৰা, তথা সীলৰতী নো ৰা হোতীতি যোজনা। সচে মাতা সীলৰতী, মাতুঘাতো পটিসন্ধিৰসেন ৰিপচ্চতীতি যোজনা।
Nanu evaṃ aññesampi upapajjavedanīyānaṃ aññasmiṃ vipākadāyake asati cutianantarameva ekantena phaladānato niyatasabhāvā ānantariyasabhāvā ca pavatti āpajjatīti? Nāpajjati asamānajātikena cetopaṇidhivasena upaghātakena ca nivattetabbavipākattā anantare ekantaphaladāyakattābhāvā, na pana ānantariyānaṃ paṭhamajjhānādīnaṃ dutiyajjhānādīni viya asamānajātikaṃ phalanivattakaṃ atthi sabbānantariyānaṃ avīciphalattā, na ca heṭṭhūpapattiṃ icchato sīlavato cetopaṇidhi viya uparūpapattijanakakammaphalaṃ ānantariyaphalaṃ nivattetuṃ samattho cetopaṇidhi atthi anicchantasseva avīcipātanato, na ca ānantariyopaghātakaṃ kiñci kammaṃ atthi, tasmā tesaṃyeva anantare ekantavipākajanakasabhāvā pavattīti. Anekāni ca ānantariyāni katāni ekantena vipāke niyatasabhāvattā uparatāvipaccanasabhāvāsaṅkattā nicchitāni sabhāvato niyatāneva. Tesu pana samānasabhāvesu ekena vipāke dinne itarāni attanā kattabbakiccassa teneva katattā na dutiyaṃ tatiyampi ca paṭisandhiṃ karonti, na samatthatāvighātattāti natthi tesaṃ ānantariyakatānivatti, garugarutarabhāvo pana tesaṃ labbhatevāti saṅghabhedassa siyā garutarabhāvoti ‘‘yena…pe… vipaccatī’’ti āha. Ekassa pana aññāni upatthambhakāni hontīti daṭṭhabbāni. Paṭisandhivasena vipaccatīti vacanena itaresaṃ pavattivipākadāyitā anuññātā viya dissati. No vā tathā sīlavatīti yathā pitā sīlavā, tathā sīlavatī no vā hotīti yojanā. Sace mātā sīlavatī, mātughāto paṭisandhivasena vipaccatīti yojanā.
পকতত্তোতি অনুক্খিত্তো। সমানসংৰাসকোতি অপারাজিকো। সমানসীমাযন্তি একসীমাযং।
Pakatattoti anukkhitto. Samānasaṃvāsakoti apārājiko. Samānasīmāyanti ekasīmāyaṃ.
২৭৬. সত্থু কিচ্চং কাতুং অসমত্থোতি যং সত্থারা কাতব্বকিচ্চং অনুসাসনাদি, নং কাতুং অসমত্থোতি ভগৰন্তং পচ্চক্খায। অঞ্ঞং তিত্থকরন্তি অঞ্ঞং সত্থারং। ৰুত্তঞ্হেতং –
276.Satthu kiccaṃ kātuṃ asamatthoti yaṃ satthārā kātabbakiccaṃ anusāsanādi, naṃ kātuṃ asamatthoti bhagavantaṃ paccakkhāya. Aññaṃ titthakaranti aññaṃ satthāraṃ. Vuttañhetaṃ –
‘‘তিত্থং জানিতব্বং, তিত্থকরো জানিতব্বো, তিত্থিযা জানিতব্বা, তিত্থিযসাৰকা জানিতব্বা। তত্থ তিত্থং নাম দ্ৰাসট্ঠি দিট্ঠিযো। এত্থ হি সত্থা তরন্তি উপ্লৰন্তি উম্মুজ্জনিমুজ্জং করোন্তি, তস্মা তিত্থন্তি ৰুচ্চন্তি। তাদিসানং দিট্ঠীনং উপ্পাদেতা তিত্থকরো নাম পূরণকস্সপাদিকো। তস্স লদ্ধিং গহেত্ৰা পব্বজিতা তিত্থিযা নাম। তে হি তিত্থে জাতাতি তিত্থিযা। যথাৰুত্তং ৰা দিট্ঠিগতসঙ্খাতং তিত্থং এতেসং অত্থীতি তিত্থিকা , তিত্থিকা এৰ তিত্থিযা। তেসং পচ্চযদাযকা তিত্থিযসাৰকাতি ৰেদিতব্বা’’তি (ম॰ নি॰ অট্ঠ॰ ১.১৪০)।
‘‘Titthaṃ jānitabbaṃ, titthakaro jānitabbo, titthiyā jānitabbā, titthiyasāvakā jānitabbā. Tattha titthaṃ nāma dvāsaṭṭhi diṭṭhiyo. Ettha hi satthā taranti uplavanti ummujjanimujjaṃ karonti, tasmā titthanti vuccanti. Tādisānaṃ diṭṭhīnaṃ uppādetā titthakaro nāma pūraṇakassapādiko. Tassa laddhiṃ gahetvā pabbajitā titthiyā nāma. Te hi titthe jātāti titthiyā. Yathāvuttaṃ vā diṭṭhigatasaṅkhātaṃ titthaṃ etesaṃ atthīti titthikā , titthikā eva titthiyā. Tesaṃ paccayadāyakā titthiyasāvakāti veditabbā’’ti (ma. ni. aṭṭha. 1.140).
২৭৭. অভিজাতিআদীসু পকম্পনদেৰতূপসঙ্কমনাদিনা জাতচক্কৰাল়েন সমানযোগক্খমং দসসহস্সপরিমাণং চক্কৰাল়ং জাতিখেত্তং। সরসেনেৰ আণাপৰত্তনট্ঠানং আণাখেত্তং। ৰিসযভূতং ঠানং ৰিসযখেত্তং। দসসহস্সী লোকধাতূতি ইমায লোকধাতুযা সদ্ধিং ইমং লোকধাতুং পরিৰারেত্ৰা ঠিতা দসসহস্সী লোকধাতু। তত্তকানংযেৰ জাতিখেত্তভাৰো ধম্মতাৰসেন ৰেদিতব্বো। ‘‘পরিগ্গহৰসেনা’’তি কেচি, ‘‘সব্বেসংযেৰ বুদ্ধানং তত্তকংযেৰ জাতিখেত্তং তন্নিৰাসীনংযেৰ দেৰতানং ধম্মাভিসমযো’’তি চ ৰদন্তি। মাতুকুচ্ছি ওক্কমনকালাদীনং ছন্নং এৰ গহণং নিদস্সনমত্তং মহাভিনীহারাদিকালেপি তস্স পকম্পনস্স লব্ভনতো। আণাখেত্তং নাম যং একজ্ঝং সংৰট্টতি ৰিৰট্টতি চ, আণা পৰত্ততি আণায তন্নিৰাসিদেৰতানং সিরসা সম্পটিচ্ছনেন, তঞ্চ খো কেৰলং বুদ্ধানং আনুভাৰেনেৰ, ন অধিপ্পাযৰসেন। অধিপ্পাযৰসেন পন ‘‘যাৰতা ৰা পন আকঙ্খেয্যা’’তি (অ॰ নি॰ ৩.৮১) ৰচনতো ততো পরম্পি আণা ৰত্তেয্যেৰ।
277. Abhijātiādīsu pakampanadevatūpasaṅkamanādinā jātacakkavāḷena samānayogakkhamaṃ dasasahassaparimāṇaṃ cakkavāḷaṃ jātikhettaṃ. Saraseneva āṇāpavattanaṭṭhānaṃ āṇākhettaṃ. Visayabhūtaṃ ṭhānaṃ visayakhettaṃ. Dasasahassī lokadhātūti imāya lokadhātuyā saddhiṃ imaṃ lokadhātuṃ parivāretvā ṭhitā dasasahassī lokadhātu. Tattakānaṃyeva jātikhettabhāvo dhammatāvasena veditabbo. ‘‘Pariggahavasenā’’ti keci, ‘‘sabbesaṃyeva buddhānaṃ tattakaṃyeva jātikhettaṃ tannivāsīnaṃyeva devatānaṃ dhammābhisamayo’’ti ca vadanti. Mātukucchi okkamanakālādīnaṃ channaṃ eva gahaṇaṃ nidassanamattaṃ mahābhinīhārādikālepi tassa pakampanassa labbhanato. Āṇākhettaṃ nāma yaṃ ekajjhaṃ saṃvaṭṭati vivaṭṭati ca, āṇā pavattati āṇāya tannivāsidevatānaṃ sirasā sampaṭicchanena, tañca kho kevalaṃ buddhānaṃ ānubhāveneva, na adhippāyavasena. Adhippāyavasena pana ‘‘yāvatā vā pana ākaṅkheyyā’’ti (a. ni. 3.81) vacanato tato parampi āṇā vatteyyeva.
ন উপ্পজ্জন্তীতি পন অত্থীতি ‘‘ন মে আচরিযো অত্থি, সদিসো মে ন ৰিজ্জতী’’তিআদিং (ম॰ নি॰ ১.২৮৫; মহাৰ॰ ১১; কথা॰ ৪০৫) ইমিস্সা লোকধাতুযা ঠত্ৰা ৰদন্তেন ভগৰতা ‘‘কিং পনাৰুসো, সারিপুত্ত, অত্থেতরহি অঞ্ঞে সমণা ৰা ব্রাহ্মণা ৰা ভগৰতা সমসমা সম্বোধিযন্তি, এৰং পুট্ঠো অহং, ভন্তে, ‘নো’তি ৰদেয্য’’ন্তি (দী॰ নি॰ ৩.১৬১) ৰত্ৰা তস্স কারণং দস্সেতুং – ‘‘অট্ঠানমেতং অনৰকাসো, যং একিস্সা লোকধাতুযা দ্ৰে অরহন্তো সম্মাসম্বুদ্ধা অপুব্বং অচরিমং উপ্পজ্জেয্যু’’ন্তি ইমং সুত্তং (অ॰ নি॰ ১.২৭৭; ৰিভ॰ ৮০৯; ম॰ নি॰ ৩.১২৯; মি॰ প॰ ৫.১.১) আহরন্তেন ধম্মসেনাপতিনা চ বুদ্ধখেত্তভূতং ইমং লোকধাতুং ঠপেত্ৰা অঞ্ঞত্থ অনুপ্পত্তি ৰুত্তা হোতীতি অধিপ্পাযো।
Na uppajjantīti pana atthīti ‘‘na me ācariyo atthi, sadiso me na vijjatī’’tiādiṃ (ma. ni. 1.285; mahāva. 11; kathā. 405) imissā lokadhātuyā ṭhatvā vadantena bhagavatā ‘‘kiṃ panāvuso, sāriputta, atthetarahi aññe samaṇā vā brāhmaṇā vā bhagavatā samasamā sambodhiyanti, evaṃ puṭṭho ahaṃ, bhante, ‘no’ti vadeyya’’nti (dī. ni. 3.161) vatvā tassa kāraṇaṃ dassetuṃ – ‘‘aṭṭhānametaṃ anavakāso, yaṃ ekissā lokadhātuyā dve arahanto sammāsambuddhā apubbaṃ acarimaṃ uppajjeyyu’’nti imaṃ suttaṃ (a. ni. 1.277; vibha. 809; ma. ni. 3.129; mi. pa. 5.1.1) āharantena dhammasenāpatinā ca buddhakhettabhūtaṃ imaṃ lokadhātuṃ ṭhapetvā aññattha anuppatti vuttā hotīti adhippāyo.
একতোতি সহ, একস্মিং কালেতি অত্থো, সো পন কালো কথং পরিচ্ছিন্নোতি চরিমভৰে পটিসন্ধিগ্গহণতো পট্ঠায যাৰ ধাতুপরিনিব্বানাতি দস্সেন্তো, ‘‘তত্থা’’তিআদিমাহ। অনচ্ছরিযত্তাতি দ্ৰীসুপি উপ্পজ্জমানেসু অচ্ছরিযত্তাভাৰতোতি অত্থো। দ্ৰীসুপি উপ্পজ্জমানেসু অনচ্ছরিযতা, কিমঙ্গং পন বহূসূতি দস্সেন্তো, ‘‘যদি চা’’তিআদিমাহ। বুদ্ধা নাম মজ্ঝে ভিন্নসুৰণ্ণং ৰিয একসদিসাতি তেসং দেসনাপি একরসা একধাতি আহ – ‘‘দেসনায চ ৰিসেসাভাৰতো’’তি । এতেনপি অনচ্ছরিযত্তমেৰ সাধেতি। ৰিৰাদভাৰতোতি এতেন ৰিৰাদাভাৰত্থং দ্ৰে বুদ্ধা একতো ন উপ্পজ্জন্তীতি দস্সেতি। এতং কারণন্তি এতং অনচ্ছরিযতাদিকারণং। তত্থাতি মিলিন্দপঞ্হে।
Ekatoti saha, ekasmiṃ kāleti attho, so pana kālo kathaṃ paricchinnoti carimabhave paṭisandhiggahaṇato paṭṭhāya yāva dhātuparinibbānāti dassento, ‘‘tatthā’’tiādimāha. Anacchariyattāti dvīsupi uppajjamānesu acchariyattābhāvatoti attho. Dvīsupi uppajjamānesu anacchariyatā, kimaṅgaṃ pana bahūsūti dassento, ‘‘yadi cā’’tiādimāha. Buddhā nāma majjhe bhinnasuvaṇṇaṃ viya ekasadisāti tesaṃ desanāpi ekarasā ekadhāti āha – ‘‘desanāya ca visesābhāvato’’ti . Etenapi anacchariyattameva sādheti. Vivādabhāvatoti etena vivādābhāvatthaṃ dve buddhā ekato na uppajjantīti dasseti. Etaṃ kāraṇanti etaṃ anacchariyatādikāraṇaṃ. Tatthāti milindapañhe.
একং এৰ বুদ্ধং ধারেতীতি একবুদ্ধধারণী। এতেন এৰংসভাৰা এতে বুদ্ধগুণা, যেন দুতিযবুদ্ধগুণে ধারেতুং অসমত্থা অযং লোকধাতূতি দস্সেতি। পচ্চযৰিসেসনিপ্ফন্নানঞ্হি গুণধম্মানং ভারিযো ৰিসেসো মহাপথৰিযাপি দুস্সহোতি সক্কা ৰিঞ্ঞাতুং। তথা হি অভিসম্বোধিসমযে উপগতস্স লোকনাথস্স গুণভারং বোধিরুক্খস্স তীসুপি দিসাসু মহাপথৰী সন্ধারেতুং নাসক্খি। তস্মা ‘‘ন ধারেয্যা’’তি ৰত্ৰা তমেৰ অধারণং পরিযাযন্তরেহি পকাসেন্তো ‘‘চলেয্যা’’তিআদিমাহ। তত্থ চলেয্যাতি পরিপ্ফন্দেয্য। কম্পেয্যাতি পৰেধেয্য । নমেয্যাতি একপস্সেন নমেয্য। ওনমেয্যাতি ওসীদেয্য। ৰিনমেয্যাতি ৰিৰিধং ইতো চিতো চ নমেয্য। ৰিকিরেয্যাতি ৰাতেন থুসমুট্ঠি ৰিয ৰিপ্পকিরেয্য। ৰিধমেয্যাতি ৰিনস্সেয্য। ৰিদ্ধংসেয্যাতি সব্বসো ৰিদ্ধস্তা ভৰেয্য। তথাভূতা চ ন কত্থচি তিট্ঠেয্যাতি আহ – ‘‘ন ঠানমুপগচ্ছেয্যা’’তি।
Ekaṃ eva buddhaṃ dhāretīti ekabuddhadhāraṇī. Etena evaṃsabhāvā ete buddhaguṇā, yena dutiyabuddhaguṇe dhāretuṃ asamatthā ayaṃ lokadhātūti dasseti. Paccayavisesanipphannānañhi guṇadhammānaṃ bhāriyo viseso mahāpathaviyāpi dussahoti sakkā viññātuṃ. Tathā hi abhisambodhisamaye upagatassa lokanāthassa guṇabhāraṃ bodhirukkhassa tīsupi disāsu mahāpathavī sandhāretuṃ nāsakkhi. Tasmā ‘‘na dhāreyyā’’ti vatvā tameva adhāraṇaṃ pariyāyantarehi pakāsento ‘‘caleyyā’’tiādimāha. Tattha caleyyāti paripphandeyya. Kampeyyāti pavedheyya . Nameyyāti ekapassena nameyya. Onameyyāti osīdeyya. Vinameyyāti vividhaṃ ito cito ca nameyya. Vikireyyāti vātena thusamuṭṭhi viya vippakireyya. Vidhameyyāti vinasseyya. Viddhaṃseyyāti sabbaso viddhastā bhaveyya. Tathābhūtā ca na katthaci tiṭṭheyyāti āha – ‘‘na ṭhānamupagaccheyyā’’ti.
ইদানি তত্থ নিদস্সনং দস্সেন্তো, ‘‘যথা, মহারাজা’’তিআদিমাহ। তত্থ একে পুরিসেতি একস্মিং পুরিসে। সমুপাদিকাতি সমং উদ্ধং পজ্জতি পৰত্ততীতি সমুপাদিকা, উদকস্স উপরি সমং গামিনীতি অত্থো। ‘‘সমুপ্পাদিকা’’তিপি পঠন্তি, অযমেৰত্থো। ৰণ্ণেনাতি সণ্ঠানেন। পমাণেনাতি আরোহেন। কিসথূলেনাতি কিসথূলভাৰেন, পরিণাহেনাতি অত্থো। দ্ৰিন্নম্পীতি দ্ৰেপি, দ্ৰিন্নম্পি ৰা সরীরভারং।
Idāni tattha nidassanaṃ dassento, ‘‘yathā, mahārājā’’tiādimāha. Tattha eke puriseti ekasmiṃ purise. Samupādikāti samaṃ uddhaṃ pajjati pavattatīti samupādikā, udakassa upari samaṃ gāminīti attho. ‘‘Samuppādikā’’tipi paṭhanti, ayamevattho. Vaṇṇenāti saṇṭhānena. Pamāṇenāti ārohena. Kisathūlenāti kisathūlabhāvena, pariṇāhenāti attho. Dvinnampīti dvepi, dvinnampi vā sarīrabhāraṃ.
ছাদেন্তন্তি রোচেন্তং রুচিং উপ্পাদেন্তং। তন্দিকতোতি তেন ভোজনেন তন্দিভূতো। অনোনমিতদণ্ডজাতোতি যাৰদত্থং ভোজনেন ওনমিতুং অসক্কুণেয্যতায অনোনমনদণ্ডো ৰিয জাতো। সকিং ভুত্তো ৰমেয্যাতি একম্পি আলোপং অজ্ঝোহরিত্ৰা ৰমেয্যাতি অত্থো।
Chādentanti rocentaṃ ruciṃ uppādentaṃ. Tandikatoti tena bhojanena tandibhūto. Anonamitadaṇḍajātoti yāvadatthaṃ bhojanena onamituṃ asakkuṇeyyatāya anonamanadaṇḍo viya jāto. Sakiṃ bhutto vameyyāti ekampi ālopaṃ ajjhoharitvā vameyyāti attho.
অতিধম্মভারেন পথৰী চলতীতি ধম্মেন নাম পথৰী তিট্ঠেয্য। সা কিং তেনেৰ চলতি ৰিনস্সতীতি অধিপ্পাযেন পুচ্ছতি। পুন থেরো ‘‘রতনং নাম লোকে কুটুম্বং সন্ধারেন্তং অভিমতঞ্চ লোকেন অত্তনো গরুসভাৰতায সকটভঙ্গস্স কারণং অতিভারভূতং দিট্ঠং। এৰং ধম্মো চ হিতসুখৰিসেসেহি তংসমঙ্গীনং ধারেন্তো অভিমতো চ ৰিঞ্ঞূনং গম্ভীরপ্পমেয্যভাৰেন গরুসভাৰত্তা অতিভারভূতো পথৰীচলনস্স কারণং হোতী’’তি দস্সেন্তো, ‘‘ইধ, মহারাজ, দ্ৰে সকটা’’তিআদিমাহ । এতেনেৰ তথাগতস্স মাতুকুচ্ছিওক্কমনাদিকালে পথৰীকম্পনকারণং সংৰণ্ণিতন্তি দট্ঠব্বং। একস্সাতি একস্মা, একস্স ৰা সকটস্স রতনং, তস্মা সকটা গহেত্ৰাতি অত্থো।
Atidhammabhārena pathavī calatīti dhammena nāma pathavī tiṭṭheyya. Sā kiṃ teneva calati vinassatīti adhippāyena pucchati. Puna thero ‘‘ratanaṃ nāma loke kuṭumbaṃ sandhārentaṃ abhimatañca lokena attano garusabhāvatāya sakaṭabhaṅgassa kāraṇaṃ atibhārabhūtaṃ diṭṭhaṃ. Evaṃ dhammo ca hitasukhavisesehi taṃsamaṅgīnaṃ dhārento abhimato ca viññūnaṃ gambhīrappameyyabhāvena garusabhāvattā atibhārabhūto pathavīcalanassa kāraṇaṃ hotī’’ti dassento, ‘‘idha, mahārāja, dve sakaṭā’’tiādimāha . Eteneva tathāgatassa mātukucchiokkamanādikāle pathavīkampanakāraṇaṃ saṃvaṇṇitanti daṭṭhabbaṃ. Ekassāti ekasmā, ekassa vā sakaṭassa ratanaṃ, tasmā sakaṭā gahetvāti attho.
ওসারিতন্তি উচ্চারিতং, ৰুত্তন্তি অত্থো। অগ্গোতি সব্বসত্তেহি অগ্গো। জেট্ঠোতি ৰুদ্ধতরো। সেট্ঠোতি পসত্থতরো। ৰিসিট্ঠেহি সীলাদীহি গুণেহি সমন্নাগতত্তা ৰিসিট্ঠো। উগ্গততমোতি উত্তমো। পৰরোতি তস্সেৰ ৰেৰচনং। নত্থি এতস্স সমোতি অসমো। অসমা পুব্ববুদ্ধা, তেহি সমোতি অসমসমো। নত্থি এতস্স পটিসমো পটিপুগ্গলোতি অপ্পটিসমো। নত্থি এতস্স পটিভাগোতি অপ্পটিভাগো। নত্থি এতস্স পটিপুগ্গলোতি অপ্পটিপুগ্গলো।
Osāritanti uccāritaṃ, vuttanti attho. Aggoti sabbasattehi aggo. Jeṭṭhoti vuddhataro. Seṭṭhoti pasatthataro. Visiṭṭhehi sīlādīhi guṇehi samannāgatattā visiṭṭho. Uggatatamoti uttamo. Pavaroti tasseva vevacanaṃ. Natthi etassa samoti asamo. Asamā pubbabuddhā, tehi samoti asamasamo. Natthi etassa paṭisamo paṭipuggaloti appaṭisamo. Natthi etassa paṭibhāgoti appaṭibhāgo. Natthi etassa paṭipuggaloti appaṭipuggalo.
সভাৰপকতিকাতি সভাৰভূতা অকিত্তিমা পকতি। কারণমহন্তত্তাতি কারণানং মহন্ততায, মহন্তেহি বুদ্ধকরধম্মেহি পারমিসঙ্খাতেহি কারণেহি বুদ্ধগুণানং নিব্বত্তিতোতি ৰুত্তং হোতি। পথৰীআদীনি মহন্তানি ৰত্থূনি, মহন্তা চক্কৰাল়াদযো অত্তনো অত্তনো ৰিসযে একেকাৰ, এৰং সম্মাসম্বুদ্ধোপি মহন্তো অত্তনো ৰিসযে একো এৰ। কো চ তস্স ৰিসযো? বুদ্ধভূমি, যাৰতকং ৰা ঞেয্যং। ‘‘আকাসো ৰিয অনন্তৰিসযো ভগৰা একো এৰ হোতী’’তি ৰদন্তো পরচক্কৰাল়েসুপি দুতিযস্স বুদ্ধস্স অভাৰং দস্সেতি।
Sabhāvapakatikāti sabhāvabhūtā akittimā pakati. Kāraṇamahantattāti kāraṇānaṃ mahantatāya, mahantehi buddhakaradhammehi pāramisaṅkhātehi kāraṇehi buddhaguṇānaṃ nibbattitoti vuttaṃ hoti. Pathavīādīni mahantāni vatthūni, mahantā cakkavāḷādayo attano attano visaye ekekāva, evaṃ sammāsambuddhopi mahanto attano visaye eko eva. Ko ca tassa visayo? Buddhabhūmi, yāvatakaṃ vā ñeyyaṃ. ‘‘Ākāso viya anantavisayo bhagavā eko eva hotī’’ti vadanto paracakkavāḷesupi dutiyassa buddhassa abhāvaṃ dasseti.
ইমিনাৰ পদেনাতি ‘‘একিস্সা লোকধাতুযা’’তি ইমিনা এৰ পদেন। দস চক্কৰাল়সহস্সানি গহিতানীতি জাতিখেত্তাপেক্খায গহিতানি। একচক্কৰাল়েনেৰাতি ইমিনা এৰ একচক্কৰাল়েন, ন যেন কেনচি। যথা ‘‘ইমস্মিংযেৰ চক্কৰাল়ে উপ্পজ্জন্তী’’তি ৰুত্তে ইমস্মিম্পি চক্কৰাল়ে জম্বুদীপে এৰ, তত্থাপি মজ্ঝিমদেসে এৰাতি পরিচ্ছিন্দিতুং ৰট্টতি, এৰং ‘‘একিস্সা লোকধাতুযা’’তি জাতিখেত্তে অধিপ্পেতেপি ইমিনাৰ চক্কৰাল়েন পরিচ্ছিন্দিতুং ৰট্টতি।
Imināva padenāti ‘‘ekissā lokadhātuyā’’ti iminā eva padena. Dasa cakkavāḷasahassāni gahitānīti jātikhettāpekkhāya gahitāni. Ekacakkavāḷenevāti iminā eva ekacakkavāḷena, na yena kenaci. Yathā ‘‘imasmiṃyeva cakkavāḷe uppajjantī’’ti vutte imasmimpi cakkavāḷe jambudīpe eva, tatthāpi majjhimadese evāti paricchindituṃ vaṭṭati, evaṃ ‘‘ekissā lokadhātuyā’’ti jātikhette adhippetepi imināva cakkavāḷena paricchindituṃ vaṭṭati.
পঠমৰগ্গৰণ্ণনা নিট্ঠিতা।
Paṭhamavaggavaṇṇanā niṭṭhitā.
১৫. অট্ঠানপাল়ি (দুতিযৰগ্গ)
15. Aṭṭhānapāḷi (dutiyavagga)
(১৫) ২. অট্ঠানপাল়ি-দুতিযৰগ্গৰণ্ণনা
(15) 2. Aṭṭhānapāḷi-dutiyavaggavaṇṇanā
২৭৮. ৰিৰাদুপচ্ছেদতোতি ৰিৰাদুপচ্ছেদকারণা। দ্ৰীসু উপ্পন্নেসু যো ৰিৰাদো ভৰেয্য, তস্স অনুপ্পাদোযেৰেত্থ ৰিৰাদুপচ্ছেদো। একস্মিং দীপেতিআদিনা দীপন্তরেপি একজ্ঝং ন উপ্পজ্জতি, পগেৰ একদীপেতি দস্সেতি। সোপি পরিহাযেথাতি চক্কৰাল়স্স পদেসে এৰ পৰত্তিতব্বত্তা পরিহাযেয্য।
278.Vivādupacchedatoti vivādupacchedakāraṇā. Dvīsu uppannesu yo vivādo bhaveyya, tassa anuppādoyevettha vivādupacchedo. Ekasmiṃ dīpetiādinā dīpantarepi ekajjhaṃ na uppajjati, pageva ekadīpeti dasseti. Sopi parihāyethāti cakkavāḷassa padese eva pavattitabbattā parihāyeyya.
২৭৯-২৮০. মনুস্সত্তন্তি মনুস্সভাৰো তস্সেৰ পব্বজ্জাদিগুণানং যোগ্গভাৰতো। লিঙ্গসম্পত্তীতি পুরিসভাৰো। হেতূতি মনোৰচীপণিধানপুব্বিকা হেতুসম্পদা। সত্থারদস্সনন্তি সত্থুসম্মুখীভাৰো। পব্বজ্জাতি কম্মকিরিযৰাদীসু তাপসেসু, ভিক্খূসু ৰা পব্বজ্জা। গুণসম্পত্তীতি অভিঞ্ঞাদিগুণসম্পদা। অধিকারোতি বুদ্ধে উদ্দিস্স অধিকো কারো, সৰিসেসা উপকারকিরিযা অধিকো সক্কারোতি ৰুত্তং হোতি। ছন্দোৰ ছন্দতা, সম্মাসম্বোধিং উদ্দিস্স সাতিসযো কত্তুকম্যতাকুসলচ্ছন্দো। অট্ঠধম্মসমোধানাতি এতেসং অট্ঠন্নং ধম্মানং সমাযোগেন। অভিনীহারোতি কাযপণিধানং। সমিজ্ঝতীতি নিপ্ফজ্জতি। অযমেত্থ সঙ্খেপো, ৰিত্থারো পন পরমত্থদীপনিযা চরিযাপিটকৰণ্ণনায (চরিযা॰ অট্ঠ॰ পকিণ্ণককথা) ৰুত্তনযেন ৰেদিতব্বো। সব্বাকারপরিপূরমেৰাতি পরিপুণ্ণলক্খণতায সত্তুত্তমাদীহি সব্বাকারেন সম্পন্নমেৰ। ন হি ইত্থিযা কোসোহিতৰত্থগুয্হতাদি সম্ভৰতি। দুতিযপকতি চ নাম পঠমপকতিতো নিহীনা এৰ। তেনেৰাহ – অনন্তরৰারে ‘‘যস্মা’’তিআদি।
279-280.Manussattanti manussabhāvo tasseva pabbajjādiguṇānaṃ yoggabhāvato. Liṅgasampattīti purisabhāvo. Hetūti manovacīpaṇidhānapubbikā hetusampadā. Satthāradassananti satthusammukhībhāvo. Pabbajjāti kammakiriyavādīsu tāpasesu, bhikkhūsu vā pabbajjā. Guṇasampattīti abhiññādiguṇasampadā. Adhikāroti buddhe uddissa adhiko kāro, savisesā upakārakiriyā adhiko sakkāroti vuttaṃ hoti. Chandova chandatā, sammāsambodhiṃ uddissa sātisayo kattukamyatākusalacchando. Aṭṭhadhammasamodhānāti etesaṃ aṭṭhannaṃ dhammānaṃ samāyogena. Abhinīhāroti kāyapaṇidhānaṃ. Samijjhatīti nipphajjati. Ayamettha saṅkhepo, vitthāro pana paramatthadīpaniyā cariyāpiṭakavaṇṇanāya (cariyā. aṭṭha. pakiṇṇakakathā) vuttanayena veditabbo. Sabbākāraparipūramevāti paripuṇṇalakkhaṇatāya sattuttamādīhi sabbākārena sampannameva. Na hi itthiyā kosohitavatthaguyhatādi sambhavati. Dutiyapakati ca nāma paṭhamapakatito nihīnā eva. Tenevāha – anantaravāre ‘‘yasmā’’tiādi.
২৮১. ইধ পুরিসস্স তত্থ নিব্বত্তনতোতি ইমস্মিং মনুস্সলোকে পুরিসভূতস্স তত্থ ব্রহ্মলোকে ব্রহ্মত্তভাৰেন নিব্বত্তনতো। তেন অসতিপি পুরিসলিঙ্গে পুরিসাকারা ব্রহ্মানো হোন্তীতি দস্সেতি। তংযেৰ চ পুরিসাকারং সন্ধায ৰুত্তং ভগৰতা ‘‘যং পুরিসো ব্রহ্মত্তং কারেয্যা’’তি। তেনেৰাহ – ‘‘সমানেপী’’তিআদি। যদি এৰং ইত্থিযো ব্রহ্মলোকে ন উপ্পজ্জেয্যুন্তি আহ – ‘‘ব্রহ্মত্ত’’ন্তিআদি।
281.Idha purisassa tattha nibbattanatoti imasmiṃ manussaloke purisabhūtassa tattha brahmaloke brahmattabhāvena nibbattanato. Tena asatipi purisaliṅge purisākārā brahmāno hontīti dasseti. Taṃyeva ca purisākāraṃ sandhāya vuttaṃ bhagavatā ‘‘yaṃ puriso brahmattaṃ kāreyyā’’ti. Tenevāha – ‘‘samānepī’’tiādi. Yadi evaṃ itthiyo brahmaloke na uppajjeyyunti āha – ‘‘brahmatta’’ntiādi.
২৯০-২৯৫. ‘‘কাযদুচ্চরিতস্সা’’তিআদিপাল়িযা কম্মনিযামো নাম কথিতো। সমঞ্জনং সমঙ্গো, সমন্নাগমো, সো এতস্স অত্থীতি সমঙ্গী, সমন্নাগতো, সমঞ্জনসীলো ৰা সমঙ্গী, পুব্বভাগে উপকরণসমুদাযতো পভুতি আযূহনৰসেন আযূহনসমঙ্গীতা, সন্নিট্ঠাপকচেতনাৰসেন চেতনাসমঙ্গিতা। চেতনাসন্ততিৰসেন ৰা আযূহনসমঙ্গিতা, তংতংচেতনাক্খণৰসেন চেতনাসমঙ্গীতা। কতূপচিতস্স অৰিপক্কৰিপাকস্স কম্মস্স ৰসেন কম্মসমঙ্গিতা। কম্মে পন ৰিপচ্চিতুং আরদ্ধে ৰিপাকপ্পৰত্তিৰসেন ৰিপাকসমঙ্গিতা। কম্মাদীনং উপট্ঠানকালৰসেন উপট্ঠানসমঙ্গিতা। কুসলাকুসলকম্মাযূহনক্খণেতি কুসলকম্মস্স অকুসলকম্মস্স চ সমীহনক্খণে। তথাতি ইমিনা কুসলাকুসলকম্মপদং আকড্ঢতি। যথা কতং কম্মং ফলদানসমত্থং হোতি, তথা কতং উপচিতং। ৰিপাকারহন্তি দুতিযভৰাদীসু ৰিপচ্চনারহং। উপ্পজ্জমানানং উপপত্তিনিমিত্তং উপট্ঠাতীতি যোজনা। উপপত্তিযা উপ্পজ্জনস্স নিমিত্তং কারণন্তি উপপত্তিনিমিত্তং, কম্মং, কম্মনিমিত্তং, গতিনিমিত্তঞ্চ। অট্ঠকথাযং পন গতিনিমিত্তৰসেনেৰ যোজনা দস্সিতা। কম্মকম্মনিমিত্তানম্পি উপট্ঠানং যথারহং দট্ঠব্বং। ‘‘যানিস্স তানি পুব্বে কতানি কম্মানি, তানিস্স তস্মিং সমযে ওলম্বন্তি অজ্ঝোলম্বন্তি অভিলম্বন্তি’’তি (ম॰ নি॰ ৩.২৪৮) ৰচনতো সাযন্হে মহন্তানং পব্বতকূটানং ছাযা ৰিয আসন্নমরণস্স সত্তস্স চিত্তে সুপিনে ৰিয ৰিপচ্চিতুং কতোকাসং কম্মং, তস্স নিমিত্তং গতিনিমিত্তং উপতিট্ঠতেৰ। চলতীতি পরিৰত্ততি। একেন হি কম্মুনা তজ্জে নিমিত্তে উপট্ঠিতে পচ্চযৰিসেসৰসেন ততো অঞ্ঞেন কম্মুনা তদঞ্ঞস্স নিমিত্তস্স উপট্ঠানং পরিৰত্তনং। সেসা নিচ্চলা অৰসেসা চতুব্বিধাপি সমঙ্গিতা নিচ্চলা অপরিৰত্তনতো।
290-295. ‘‘Kāyaduccaritassā’’tiādipāḷiyā kammaniyāmo nāma kathito. Samañjanaṃ samaṅgo, samannāgamo, so etassa atthīti samaṅgī, samannāgato, samañjanasīlo vā samaṅgī, pubbabhāge upakaraṇasamudāyato pabhuti āyūhanavasena āyūhanasamaṅgītā, sanniṭṭhāpakacetanāvasena cetanāsamaṅgitā. Cetanāsantativasena vā āyūhanasamaṅgitā, taṃtaṃcetanākkhaṇavasena cetanāsamaṅgītā. Katūpacitassa avipakkavipākassa kammassa vasena kammasamaṅgitā. Kamme pana vipaccituṃ āraddhe vipākappavattivasena vipākasamaṅgitā. Kammādīnaṃ upaṭṭhānakālavasena upaṭṭhānasamaṅgitā. Kusalākusalakammāyūhanakkhaṇeti kusalakammassa akusalakammassa ca samīhanakkhaṇe. Tathāti iminā kusalākusalakammapadaṃ ākaḍḍhati. Yathā kataṃ kammaṃ phaladānasamatthaṃ hoti, tathā kataṃ upacitaṃ. Vipākārahanti dutiyabhavādīsu vipaccanārahaṃ. Uppajjamānānaṃ upapattinimittaṃ upaṭṭhātīti yojanā. Upapattiyā uppajjanassa nimittaṃ kāraṇanti upapattinimittaṃ, kammaṃ, kammanimittaṃ, gatinimittañca. Aṭṭhakathāyaṃ pana gatinimittavaseneva yojanā dassitā. Kammakammanimittānampi upaṭṭhānaṃ yathārahaṃ daṭṭhabbaṃ. ‘‘Yānissa tāni pubbe katāni kammāni, tānissa tasmiṃ samaye olambanti ajjholambanti abhilambanti’’ti (ma. ni. 3.248) vacanato sāyanhe mahantānaṃ pabbatakūṭānaṃ chāyā viya āsannamaraṇassa sattassa citte supine viya vipaccituṃ katokāsaṃ kammaṃ, tassa nimittaṃ gatinimittaṃ upatiṭṭhateva. Calatīti parivattati. Ekena hi kammunā tajje nimitte upaṭṭhite paccayavisesavasena tato aññena kammunā tadaññassa nimittassa upaṭṭhānaṃ parivattanaṃ. Sesā niccalā avasesā catubbidhāpi samaṅgitā niccalā aparivattanato.
সুনখৰাজিকোতি সুনখেহি মিগৰাজৰসেন ৰজনসীলো, সুনখলুদ্দকোতি অত্থো। তলসন্থরণপূজন্তি ভূমিতলস্স পুপ্ফেহি সন্থরণপূজং। আযূহনচেতনা কম্মসমঙ্গিতাৰসেনাতি কাযদুচ্চরিতস্স অপরাপরং আযূহনেন সন্নিট্ঠাপকচেতনায তস্সেৰ পকপ্পনে কম্মক্খযকরঞাণেন অখেপিতত্তা যথূপচিতকম্মুনা চ সমঙ্গিভাৰস্স ৰসেন।
Sunakhavājikoti sunakhehi migavājavasena vajanasīlo, sunakhaluddakoti attho. Talasantharaṇapūjanti bhūmitalassa pupphehi santharaṇapūjaṃ. Āyūhanacetanā kammasamaṅgitāvasenāti kāyaduccaritassa aparāparaṃ āyūhanena sanniṭṭhāpakacetanāya tasseva pakappane kammakkhayakarañāṇena akhepitattā yathūpacitakammunā ca samaṅgibhāvassa vasena.
কম্মন্তি অকুসলকম্মং। তস্মিংযেৰ খণেতি আযূহনক্খণেযেৰ। তস্সাতি কম্মসমঙ্গিনো পুগ্গলস্স সগ্গো ৰারিতো, তঞ্চে কম্মং ৰিপাকৰারং লভেয্যাতি অধিপ্পাযো। সগ্গো ৰারিতোতি চ নিদস্সনমত্তং। মনুস্সলোকোপিস্স ৰারিতোৰাতি। অপরে পন পুরিমেহি ৰিপাকাৰরণস্স অনুদ্ধটত্তা ‘‘তস্মিংযেৰ খণে’’তি চ অৰিসেসেন ৰুত্তত্তা তং দোসং পরিহরিতুং ‘‘আযূহিতকম্মং নামা’’তিআদিমাহ। যদা কম্মং ৰিপাকৰারং লভতীতি ইদং কতোকাসস্স অপ্পটিবাহিযত্তা ৰুত্তং । তথা হি ভগৰা ততিযপারাজিকৰত্থুস্মিং (পারা॰ ১৬২ আদযো) পটিসল্লীযি, ইমস্মিং সুত্তে ‘‘কাযদুচ্চরিতসমঙ্গী’’তি আগতত্তা ৰিপাকূপট্ঠানসমঙ্গিতা ন লব্ভন্তি।
Kammanti akusalakammaṃ. Tasmiṃyeva khaṇeti āyūhanakkhaṇeyeva. Tassāti kammasamaṅgino puggalassa saggo vārito, tañce kammaṃ vipākavāraṃ labheyyāti adhippāyo. Saggo vāritoti ca nidassanamattaṃ. Manussalokopissa vāritovāti. Apare pana purimehi vipākāvaraṇassa anuddhaṭattā ‘‘tasmiṃyeva khaṇe’’ti ca avisesena vuttattā taṃ dosaṃ pariharituṃ ‘‘āyūhitakammaṃ nāmā’’tiādimāha. Yadā kammaṃ vipākavāraṃ labhatīti idaṃ katokāsassa appaṭibāhiyattā vuttaṃ . Tathā hi bhagavā tatiyapārājikavatthusmiṃ (pārā. 162 ādayo) paṭisallīyi, imasmiṃ sutte ‘‘kāyaduccaritasamaṅgī’’ti āgatattā vipākūpaṭṭhānasamaṅgitā na labbhanti.
(দুতিযৰগ্গৰণ্ণনা নিট্ঠিতা।)
(Dutiyavaggavaṇṇanā niṭṭhitā.)
অট্ঠানপাল়িৰণ্ণনাযং অনুত্তানত্থদীপনা নিট্ঠিতা।
Aṭṭhānapāḷivaṇṇanāyaṃ anuttānatthadīpanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১৫. অট্ঠানপাল়ি • 15. Aṭṭhānapāḷi
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১৫. অট্ঠানপাল়ি • 15. Aṭṭhānapāḷi
