| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༡༥. ཨཊྛཱནཔཱལི༹ (པཋམཝགྒ)
15. Aṭṭhānapāḷi (paṭhamavagga)
(༡༥) ༡. ཨཊྛཱནཔཱལི༹-པཋམཝགྒཝཎྞནཱ
(15) 1. Aṭṭhānapāḷi-paṭhamavaggavaṇṇanā
༢༦༨. ཨཊྛཱནཔཱལི༹ཝཎྞནཱཡཾ ཨཝིཛྫམཱནཾ ཋཱནཾ ཨཊྛཱནཾ, ནཏྠི ཋཱནནྟི ཝཱ ཨཊྛཱནཾ། ཨནཝཀཱསོཏི ཨེཏྠཱཔི ཨེསེཝ ནཡོ། ཏདཏྠནིགམནམེཝ ཧི ‘‘ནེཏཾ ཋཱནཾ ཝིཛྫཏཱི’’ཏི ཝཙནནྟི། ཏེནཱཧ – ‘‘ཨུབྷཡེནཔཱི’’ཏིཨཱདི། ཡནྟི ཀཱརཎཏྠེ པཙྩཏྟཝཙནཾ། ཧེཏུཨཏྠོ ཙེཏྠ ཀཱརཎཏྠོཏི ཨཱཧ – ‘‘ཡནྟི ཡེན ཀཱརཎེནཱ’’ཏི། ཨུཀྐཊྛནིདྡེསེནེཏྠ དིཊྛིསམྤཏྟི ཝེདིཏབྦཱཏི ཝུཏྟཾ – ‘‘མགྒདིཊྛིཡཱ སམྤནྣོ’’ཏི། ཀུཏོ པནཱཡམཏྠོ ལབྦྷཏཱིཏི? ལིངྒཏོ, ལིངྒཾ ཙེཏསྶ ནིཙྩཏོ ཨུཔགམནཔྤཊིཀྑེཔོ། ཙཏུབྷཱུམཀེསཱུཏི ཨིདཾ ཙཏུཏྠབྷཱུམཀསངྑཱརཱནཾ ཨརིཡསཱཝཀསྶ ཝིསཡབྷཱཝཱུཔགམནཏོ ཝུཏྟཾ, ན པན ཏེ ཨཱརབྦྷ ནིཙྩཏོ ཨུཔགམནསབྦྷཱཝཏོ། ཝཀྑཏི ཧི ‘‘ཏདབྷཱཝེ ཙཏུཏྠབྷཱུམཀསངྑཱརཱ པནཱ’’ཏིཨཱདིནཱ། ཨབྷིསངྑཏསངྑཱརཨབྷིསངྑརཎཀསངྑཱརཱནཾ སཔྤདེསཏྟཱ ནིཔྤདེསསངྑཱརགྒཧཎཏྠཾ ‘‘སངྑཏསངྑཱརེསཱུ’’ཏི ཝུཏྟཾ, ལོཀུཏྟརསངྑཱརཱནཾ པན ནིཝཏྟནེ ཀཱརཎཾ སཡམེཝ ཝཀྑཏི། ཨེཏཾ ཀཱརཎཾ ནཏྠཱིཏི ཏཐཱ ཨུཔགམནེ སེཏུགྷཱཏོ ནཏྠི། ཏེཛུསྶདཏྟཱཏི སཾཀིལེསཝིདྷམནཏེཛསྶ ཨདྷིཀབྷཱཝཏོ། ཏཐཱ ཧི ཏེ གམྦྷཱིརབྷཱཝེན དུདྡསཱ ཨཀུསལཱནཾ ཨཱརམྨཎཾ ན ཧོནྟཱིཏི། ཨིདཾ པན པཀརཎཝསེན ཝུཏྟཾ། ཨཔྤཧཱིནཝིཔལླཱསཱནཉྷི སནྟཱནེསུ ཀུསལདྷམྨཱནམྤི ཏེ ཨཱརམྨཎཾ ན ཧོནྟི།
268. Aṭṭhānapāḷivaṇṇanāyaṃ avijjamānaṃ ṭhānaṃ aṭṭhānaṃ, natthi ṭhānanti vā aṭṭhānaṃ. Anavakāsoti etthāpi eseva nayo. Tadatthanigamanameva hi ‘‘netaṃ ṭhānaṃ vijjatī’’ti vacananti. Tenāha – ‘‘ubhayenapī’’tiādi. Yanti kāraṇatthe paccattavacanaṃ. Hetuattho cettha kāraṇatthoti āha – ‘‘yanti yena kāraṇenā’’ti. Ukkaṭṭhaniddesenettha diṭṭhisampatti veditabbāti vuttaṃ – ‘‘maggadiṭṭhiyā sampanno’’ti. Kuto panāyamattho labbhatīti? Liṅgato, liṅgaṃ cetassa niccato upagamanappaṭikkhepo. Catubhūmakesūti idaṃ catutthabhūmakasaṅkhārānaṃ ariyasāvakassa visayabhāvūpagamanato vuttaṃ, na pana te ārabbha niccato upagamanasabbhāvato. Vakkhati hi ‘‘tadabhāve catutthabhūmakasaṅkhārā panā’’tiādinā. Abhisaṅkhatasaṅkhāraabhisaṅkharaṇakasaṅkhārānaṃ sappadesattā nippadesasaṅkhāraggahaṇatthaṃ ‘‘saṅkhatasaṅkhāresū’’ti vuttaṃ, lokuttarasaṅkhārānaṃ pana nivattane kāraṇaṃ sayameva vakkhati. Etaṃ kāraṇaṃ natthīti tathā upagamane setughāto natthi. Tejussadattāti saṃkilesavidhamanatejassa adhikabhāvato. Tathā hi te gambhīrabhāvena duddasā akusalānaṃ ārammaṇaṃ na hontīti. Idaṃ pana pakaraṇavasena vuttaṃ. Appahīnavipallāsānañhi santānesu kusaladhammānampi te ārammaṇaṃ na honti.
༢༦༩. ཨསུཁེ སུཁནྟི ཝིཔལླཱསོ ཙ ཨིདྷ སུཁཏོ ཨུཔགམནསྶ ཋཱནནྟི དསྶེནྟོ ‘‘ཨེཀནྟ…པེ॰… ཨཏྟདིཊྛིཝསེནཱ’’ཏི པདྷཱནདིཊྛིམཱཧ། གཱུཐནྟི གཱུཐཊྛཱནཾ, དིཊྛིཡཱ ནིབྦཱནསྶ ཨཝིསཡབྷཱཝོ ཧེཊྛཱ ཝུཏྟོ ཨེཝཱཏི ཀསིཎཱདིཔཎྞཏྟིསངྒཧཏྠནྟི ཝུཏྟཾ།
269. Asukhe sukhanti vipallāso ca idha sukhato upagamanassa ṭhānanti dassento ‘‘ekanta…pe… attadiṭṭhivasenā’’ti padhānadiṭṭhimāha. Gūthanti gūthaṭṭhānaṃ, diṭṭhiyā nibbānassa avisayabhāvo heṭṭhā vutto evāti kasiṇādipaṇṇattisaṅgahatthanti vuttaṃ.
༢༧༠. པརིཙྪེདོཏི པརིཙྪིནྡནཾ པརིཙྪིཛྫ ཏསྶ གཧཎཾ། སྭཱཡཾ ཡེསུ ནིཙྩཱདིཏོ ཨུཔགམནཾ སམྦྷཝཏི, ཏེསཾ ཝསེནཡེཝ ཀཱཏབྦོཏི དསྶེནྟོ ‘‘སབྦཝཱརེསུ ཝཱ’’ཏིཨཱདིམཱཧ། སབྦཝཱརེསཱུཏི ‘‘ནིཙྩཏོ ཨུཔགཙྪེཡྻཱ’’ཏིཨཱདིནཱ ཨཱགཏེསུ སབྦེསུ སུཏྟཔདེསུ། པུཐུཛྫནོ ཧཱིཏི ཧི-སདྡོ ཧེཏུཨཏྠོ། ཡསྨཱ ཡཾ ཡཾ སངྑཱརཾ པུཐུཛྫནོ ནིཙྩཱདིཝསེན གཎྷཱཏི, ཏཾ ཏཾ ཨརིཡསཱཝཀོ ཨནིཙྩཱདིཝསེན གཎྷནྟོ ཡཱཐཱཝཏོ ཛཱནནྟོ ཏཾ གཱཧཾ ཏཾ དིཊྛིཾ ཝིསྶཛྫེཏི, ཏསྨཱ ཡཏྠ གཱཧོ, ཏཏྠ ཝིསྶཛྫནཱཏི ཙཏུབྷཱུམཀསངྑཱརཱ ཨིདྷ སངྑཱརགྒཧཎེན ན གཡ྄ཧནྟཱིཏི ཨཏྠོ།
270.Paricchedoti paricchindanaṃ paricchijja tassa gahaṇaṃ. Svāyaṃ yesu niccādito upagamanaṃ sambhavati, tesaṃ vasenayeva kātabboti dassento ‘‘sabbavāresu vā’’tiādimāha. Sabbavāresūti ‘‘niccato upagaccheyyā’’tiādinā āgatesu sabbesu suttapadesu. Puthujjano hīti hi-saddo hetuattho. Yasmā yaṃ yaṃ saṅkhāraṃ puthujjano niccādivasena gaṇhāti, taṃ taṃ ariyasāvako aniccādivasena gaṇhanto yāthāvato jānanto taṃ gāhaṃ taṃ diṭṭhiṃ vissajjeti, tasmā yattha gāho, tattha vissajjanāti catubhūmakasaṅkhārā idha saṅkhāraggahaṇena na gayhantīti attho.
༢༧༡. པུཏྟསམྦནྡྷེན མཱཏུཔིཏུསམཉྙཱ དཏྟཀིཏྟིམཱདིཝསེནཔི པུཏྟཝོཧཱརོ ལོཀེ དིསྶཏི, སོ ཙ ཁོ པརིཡཱཡེནཱཏི ནིཔྤརིཡཱཡེན སིདྡྷཾ ཏཾ དསྶེཏུཾ – ‘‘ཛནིཀཱཝ མཱཏཱ, ཛནཀོཝ པིཏཱ’’ཏི ཝུཏྟཾ། ཏཐཱ ཨཱནནྟརིཡཀམྨསྶ ཨདྷིཔྤེཏཏྟཱ ‘‘མནུསྶབྷཱུཏོཝ ཁཱིཎཱསཝོ ཨརཧཱཏི ཨདྷིཔྤེཏོ’’ཏི ཝུཏྟཾ། ‘‘ཨཊྛཱནམེཏ’’ནྟིཨཱདིནཱ ‘‘མཱཏུཨཱདཱིནཾཡེཝ ཛཱིཝིཏཱ ཝོརོཔནེ ཨརིཡསཱཝཀསྶ ཨབྷབྦབྷཱཝདསྶནཏོ ཏདཉྙཾ ཨརིཡསཱཝཀོ ཛཱིཝིཏཱ ཝོརོཔེཏཱིཏི ཨིདཾ ཨཏྠཏོ ཨཱཔནྣམེཝཱ’’ཏི མཉྙམཱནོ ཝདཏི – ‘‘ཀིཾ པན ཨརིཡསཱཝཀོ ཨཉྙཾ ཛཱིཝིཏཱ ཝོརོཔེཡྻཱ’’ཏི? ‘‘ཨཊྛཱནམེཏཾ ཨནཝཀཱསོ, ཡཾ དིཊྛིསམྤནྣོ པུགྒལོ སཉྩིཙྩ པཱཎཾ ཛཱིཝིཏཱ ཝོརོཔེཡྻ, ནེཏཾ ཋཱནཾ ཝིཛྫཏཱི’’ཏི ཝཙནཏོ ‘‘ཨེཏམྤི ཨཊྛཱན’’ནྟི ཝུཏྟཾ། ཏེནེཝཱཧ – ‘‘སཙེ ཧཱི’’ཏིཨཱདི། ཨེཝཾ སནྟེ ཀསྨཱ ‘‘མཱཏར’’ནྟིཨཱདིནཱ ཝིསེསེཏྭཱ ཝུཏྟནྟི ཨཱཧ – ‘‘པུཐུཛྫནབྷཱཝསྶ པནཱ’’ཏིཨཱདི། ཏཏྠ བལདཱིཔནཏྠནྟི སདྡྷཱདིབལསམནྣཱགམདཱིཔནཏྠཾ། ཨརིཡམགྒེནཱགཏསདྡྷཱདྷིབལཝསེན ཧི ཨརིཡསཱཝཀོ ཏཱདིསཾ སཱཝཛྫཾ ན ཀརོཏི།
271. Puttasambandhena mātupitusamaññā dattakittimādivasenapi puttavohāro loke dissati, so ca kho pariyāyenāti nippariyāyena siddhaṃ taṃ dassetuṃ – ‘‘janikāva mātā, janakova pitā’’ti vuttaṃ. Tathā ānantariyakammassa adhippetattā ‘‘manussabhūtova khīṇāsavo arahāti adhippeto’’ti vuttaṃ. ‘‘Aṭṭhānameta’’ntiādinā ‘‘mātuādīnaṃyeva jīvitā voropane ariyasāvakassa abhabbabhāvadassanato tadaññaṃ ariyasāvako jīvitā voropetīti idaṃ atthato āpannamevā’’ti maññamāno vadati – ‘‘kiṃ pana ariyasāvako aññaṃ jīvitā voropeyyā’’ti? ‘‘Aṭṭhānametaṃ anavakāso, yaṃ diṭṭhisampanno puggalo sañcicca pāṇaṃ jīvitā voropeyya, netaṃ ṭhānaṃ vijjatī’’ti vacanato ‘‘etampi aṭṭhāna’’nti vuttaṃ. Tenevāha – ‘‘sace hī’’tiādi. Evaṃ sante kasmā ‘‘mātara’’ntiādinā visesetvā vuttanti āha – ‘‘puthujjanabhāvassa panā’’tiādi. Tattha baladīpanatthanti saddhādibalasamannāgamadīpanatthaṃ. Ariyamaggenāgatasaddhādhibalavasena hi ariyasāvako tādisaṃ sāvajjaṃ na karoti.
༢༧༥. པཉྩཧི ཀཱརཎེཧཱིཏི ཨིདམེཏྠ ནིཔྥཱདཀཱནི ཏེསཾ པུབྦབྷཱགིཡཱནི ཙ ཀཱརཎཱནི ཀཱརཎབྷཱཝསཱམཉྙེན ཨེཀཛ྄ཛྷཾ གཧེཏྭཱ ཝུཏྟཾ, ན པན སབྦེསཾ སམཱནཡོགཀྑམཏྟཱ། ཨཱཀཱརེཧཱིཏི ཀཱརཎེཧི། ཨནུསྶཱཝནེནཱཏི ཨནུརཱུཔཾ སཱཝནེན། བྷེདསྶ ཨནུརཱུཔཾ ཡཐཱ བྷེདོ ཧོཏི, ཨེཝཾ བྷིནྡིཏབྦཱནཾ བྷིཀྑཱུནཾ ཨཏྟནོ ཝཙནསྶ སཱཝནེན ཝིཉྙཱཔནེན། ཏེནཱཧ – ‘‘ནནུ ཏུམྷེ’’ཏིཨཱདི། ཀཎྞམཱུལེ ཝཙཱིབྷེདཾ ཀཏྭཱཏི ཨེཏེན པཱཀཊཾ ཀཏྭཱ བྷེདཀརཝཏྠུདཱིཔནཾ ཝོཧཱརོ, ཏཏྠ ཨཏྟནོ ནིཙྪིཏམཏྠཾ རཧསྶཝསེན ཝིཉྙཱཔནཾ ཨནུསྶཱཝནནྟི དསྶེཏི།
275.Pañcahi kāraṇehīti idamettha nipphādakāni tesaṃ pubbabhāgiyāni ca kāraṇāni kāraṇabhāvasāmaññena ekajjhaṃ gahetvā vuttaṃ, na pana sabbesaṃ samānayogakkhamattā. Ākārehīti kāraṇehi. Anussāvanenāti anurūpaṃ sāvanena. Bhedassa anurūpaṃ yathā bhedo hoti, evaṃ bhinditabbānaṃ bhikkhūnaṃ attano vacanassa sāvanena viññāpanena. Tenāha – ‘‘nanu tumhe’’tiādi. Kaṇṇamūle vacībhedaṃ katvāti etena pākaṭaṃ katvā bhedakaravatthudīpanaṃ vohāro, tattha attano nicchitamatthaṃ rahassavasena viññāpanaṃ anussāvananti dasseti.
ཀམྨམེཝ ཨུདྡེསོ ཝཱ པམཱཎནྟི ཏེཧི སངྒྷབྷེདསིདྡྷིཏོ ཝུཏྟཾ, ཨིཏརེ པན ཏེསཾ སམྦྷཱརབྷཱུཏཱ། ཏེནཱཧ – ‘‘ཝོཧཱརཱ’’ཏིཨཱདི། ཏཏྠཱཏི ཝོཧརཎེ། ཙུཏིཨནནྟརཾ ཕལཾ ཨནནྟརཾ ནཱམ, ཏསྨིཾ ཨནནྟརེ ནིཡུཏྟཱནི, ཏནྣིབྦཏྟནེན ཨནནྟརཀརཎསཱིལཱནི, ཨནནྟརཔྤཡོཛནཱནི ཙཱཏི ཨཱནནྟརིཡཱནི, ཏཱནི ཨེཝ ཀམྨཱནཱིཏི ཨཱནནྟརིཡཀམྨཱནི།
Kammameva uddeso vā pamāṇanti tehi saṅghabhedasiddhito vuttaṃ, itare pana tesaṃ sambhārabhūtā. Tenāha – ‘‘vohārā’’tiādi. Tatthāti voharaṇe. Cutianantaraṃ phalaṃ anantaraṃ nāma, tasmiṃ anantare niyuttāni, tannibbattanena anantarakaraṇasīlāni, anantarappayojanāni cāti ānantariyāni, tāni eva kammānīti ānantariyakammāni.
ཀམྨཏོཏི ‘‘ཨེཝཾ ཨཱནནྟརིཡཀམྨཾ ཧོཏི, ཨེཝཾ ཨཱནནྟརིཡཀམྨསདིས’’ནྟི ཨེཝཾ ཀམྨཝིབྷཱགཏོ། དྭཱརཏོཏི ཀཱཡདྭཱརཏོ། ཀཔྤཊྛིཏིཡཏོཏི ‘‘ཨིདཾ ཀཔྤཊྛིཏིཡཝིཔཱཀཾ, ཨིདཾ ན ཀཔྤཊྛིཏིཡཝིཔཱཀ’’ནྟི ཨེཝཾ ཀཔྤཊྛིཏིཡཝིབྷཱགཏོ། པཱཀསཱདྷཱརཎཱདཱིཧཱིཏི ‘‘ཨིདམེཏྠ ཝིཔཙྩཏི, ཨིདཾ ན ཝིཔཙྩཏཱི’’ཏི ཝིཔཙྩནཝིབྷཱགཏོ, གཧཊྛཔབྦཛིཏཱནཾ སཱདྷཱརཎཱསཱདྷཱརཎཏོ, ཨཱདི-སདྡེན ཝེདནཱདིཝིབྷཱགཏོ ཙ།
Kammatoti ‘‘evaṃ ānantariyakammaṃ hoti, evaṃ ānantariyakammasadisa’’nti evaṃ kammavibhāgato. Dvāratoti kāyadvārato. Kappaṭṭhitiyatoti ‘‘idaṃ kappaṭṭhitiyavipākaṃ, idaṃ na kappaṭṭhitiyavipāka’’nti evaṃ kappaṭṭhitiyavibhāgato. Pākasādhāraṇādīhīti ‘‘idamettha vipaccati, idaṃ na vipaccatī’’ti vipaccanavibhāgato, gahaṭṭhapabbajitānaṃ sādhāraṇāsādhāraṇato, ādi-saddena vedanādivibhāgato ca.
ཀམྨཏོ ཏཱཝ ཝིནིཙྪཡོ ཝུཙྩཏཱིཏི སམྦནྡྷོ། ཡསྨཱ མནུསྶཏྟབྷཱཝེ ཋིཏསྶེཝ ཀུསལདྷམྨཱནཾ ཏིཀྑཝིསདབྷཱཝཱཔཏྟི, ཡཐཱ ཏིཎྞཾ བོདྷིསཏྟཱནཾ བོདྷིཏྟཡནིབྦཏྟིཡཾ, ཨེཝཾ མནུསྶབྷཱཝེ ཋིཏསྶེཝ ཨེདིསཱནཾ ཨཀུསལདྷམྨཱནམྤི ཏིཀྑཝིསདབྷཱཝཱཔཏྟཱིཏི ཨཱཧ – ‘‘མནུསྶབྷཱུཏསྶེཝཱ’’ཏི། པཱཀཏིཀམནུསྶཱནམྤི ཙ ཀུསལདྷམྨཱནཾ ཝིསེསཔྤཏྟི ཝིམཱནཝཏྠུཨཊྛཀཐཱཡཾ ཝུཏྟནཡེནེཝ ཝེདིཏབྦཱ། ཡཐཱཝུཏྟོ ཙ ཨཏྠོ སམཱནཛཱཏིཡསྶ ཝིཀོཔནེ གརུཏརོ, ན ཏཐཱ ཝིཛཱཏིཡསྶཱཏི ཝུཏྟཾ – ‘‘མནུསྶབྷཱུཏཾ མཱཏརཾ ཝཱ པིཏརཾ ཝཱ’’ཏི། ལིངྒཔརིཝཏྟེ ཙ སོ ཨེཝ ཨེཀཀམྨནིབྦཏྟོ བྷཝངྒཔྤབནྡྷོ ཛཱིཝིཏིནྡྲིཡཔབནྡྷོ ཙ, ན ཨཉྙོཏི ཨཱཧ – ‘‘ཨཔི པརིཝཏྟལིངྒ’’ནྟི། ཨརཧཏྟཾ པཏྟེཔི ཨེསེཝ ནཡོ། ཏསྶ ཝིཔཱཀནྟིཨཱདི ཀམྨསྶ ཨཱནནྟརིཡབྷཱཝསམཏྠནཾ། ཙཏུཀྐོཊིཡཉྩེཏྠ སམྦྷཝཏི། ཏཏྠ པཋམཱ ཀོཊི དསྶིཏཱ, ཨིཏརཱསུ ཝིསངྐེཏབྷཱཝཾ དསྶེཏུཾ – ‘‘ཡོ པནཱ’’ཏིཨཱདི ཝུཏྟཾ། ཡདིཔི ཏཏྠ ཝིསངྐེཏོ, ཀམྨཾ པན གརུཏརཾ ཨཱནནྟརིཡསདིསཾ བྷཱཡིཏབྦནྟི ཨཱཧ – ‘‘བྷཱརིཡཾ…པེ॰… ཏིཊྛཏཱི’’ཏི། ཨཡཾ པཉྷོཏི ཉཱཔནིཙྪཱནིབྦཏྟཱ ཀཐཱ།
Kammato tāva vinicchayo vuccatīti sambandho. Yasmā manussattabhāve ṭhitasseva kusaladhammānaṃ tikkhavisadabhāvāpatti, yathā tiṇṇaṃ bodhisattānaṃ bodhittayanibbattiyaṃ, evaṃ manussabhāve ṭhitasseva edisānaṃ akusaladhammānampi tikkhavisadabhāvāpattīti āha – ‘‘manussabhūtassevā’’ti. Pākatikamanussānampi ca kusaladhammānaṃ visesappatti vimānavatthuaṭṭhakathāyaṃ vuttanayeneva veditabbā. Yathāvutto ca attho samānajātiyassa vikopane garutaro, na tathā vijātiyassāti vuttaṃ – ‘‘manussabhūtaṃ mātaraṃ vā pitaraṃ vā’’ti. Liṅgaparivatte ca so eva ekakammanibbatto bhavaṅgappabandho jīvitindriyapabandho ca, na aññoti āha – ‘‘api parivattaliṅga’’nti. Arahattaṃ pattepi eseva nayo. Tassa vipākantiādi kammassa ānantariyabhāvasamatthanaṃ. Catukkoṭiyañcettha sambhavati. Tattha paṭhamā koṭi dassitā, itarāsu visaṅketabhāvaṃ dassetuṃ – ‘‘yo panā’’tiādi vuttaṃ. Yadipi tattha visaṅketo, kammaṃ pana garutaraṃ ānantariyasadisaṃ bhāyitabbanti āha – ‘‘bhāriyaṃ…pe… tiṭṭhatī’’ti. Ayaṃ pañhoti ñāpanicchānibbattā kathā.
ཨབྷིསནྡྷིནཱཏི ཨདྷིཔྤཱཡེན། ཨཱནནྟརིཡཾ ཕུསཏཱིཏི མརཎཱདྷིཔྤཱཡེནེཝ ཨཱནནྟརིཡཝཏྠུནོ ཝིཀོཔིཏཏྟཱ ཝུཏྟཾ། ཨཱནནྟརིཡཾ ན ཕུསཏཱིཏི ཨཱནནྟརིཡཝཏྠུཨབྷཱཝཏོ ཨཱནནྟརིཡཾ ན ཧོཏི། སབྦཏྠ ཧི པུརིམཾ ཨབྷིསནྡྷིཙིཏྟཾ ཨཔྤམཱཎཾ, ཝདྷཀཙིཏྟཾ པན ཏདཱརམྨཎཾ ཛཱིཝིཏིནྡྲིཡཉྩ ཨཱནནྟརིཡབྷཱཝེ པམཱཎནྟི དཊྛབྦཾ། སངྒཱམཙཏུཀྐཾ སམྤཏྟཝསེན ཡོཛེཏབྦཾ། ཡོ ཧི པརསེནཱཡ ཨཉྙཉྩ ཡོདྷཾ པིཏརཉྩ ཀམྨཾ ཀརོནྟེ དིསྭཱ ཡོདྷསྶ ཨུསུཾ ཁིཔཏི ‘‘ཨེཏཾ ཝིཛ྄ཛྷིཏྭཱ མམ པིཏརཾ ཝིཛ྄ཛྷིསྶཏཱི’’ཏི, ཡཐཱདྷིཔྤཱཡཾ གཏེ པིཏུགྷཱཏཀོ ཧོཏི། ‘‘ཡོདྷེ ཝིདྡྷེ མམ པིཏཱ པལཱཡིསྶཏཱི’’ཏི ཁིཔཏི, ཨུསུཾ ཨཡཐཱདྷིཔྤཱཡཾ གནྟྭཱ པིཏརཾ མཱརེཏི, ཝོཧཱརཝསེན པིཏུགྷཱཏཀོཏི ཝུཙྩཏི, ཨཱནནྟརིཡཾ པན ནཏྠཱིཏི། ཙོརཙཏུཀྐཾ པན ཡོ ‘‘ཙོརཾ མཱརེསྶཱམཱི’’ཏི ཙོརཝེསེན གཙྪནྟཾ པིཏརཾ མཱརེཏི, ཨཱནནྟརིཡཾ ཕུསཏཱིཏིཨཱདིནཱ ཡོཛེཏབྦཾ། ཏེནེཝཱཏི ཏེནེཝ པཡོགེན། ཨརཧནྟགྷཱཏཀོ ཧོཏིཡེཝཱཏི ཨརཧཏོ མཱརིཏཏྟཱ ཝུཏྟཾ, པུཐུཛྫནསྶེཝ ཏཾ དིནྣཾ ཧོཏཱིཏི ཨེཏྠཱཡམདྷིཔྤཱཡོ – ཡཐཱ ཝདྷཀཙེཏནཱ པཙྩུཔྤནྣཱརམྨཎཱཔི པབནྡྷཝིཙྪེདནཝསེན ཛཱིཝིཏིནྡྲིཡཾ ཨཱརམྨཎཾ ཀཏྭཱ པཝཏྟཏི, ན ཨེཝཾ ཙཱགཙེཏནཱ། སཱ ཧི ཙཛིཏབྦཝཏྠུཾ ཨཱརམྨཎཾ ཀཏྭཱ ཙཛནམཏྟམེཝ ཧོཏི, ཨཉྙསནྟཀབྷཱཝཀརཎཉྩ ཏསྶ ཙཛནཾ, ཏསྨཱ ཡསྶ ཏཾ སནྟཀཾ ཀཏཾ, ཏསྶེཝ དིནྣཾ ཧོཏཱིཏི།
Abhisandhināti adhippāyena. Ānantariyaṃ phusatīti maraṇādhippāyeneva ānantariyavatthuno vikopitattā vuttaṃ. Ānantariyaṃ na phusatīti ānantariyavatthuabhāvato ānantariyaṃ na hoti. Sabbattha hi purimaṃ abhisandhicittaṃ appamāṇaṃ, vadhakacittaṃ pana tadārammaṇaṃ jīvitindriyañca ānantariyabhāve pamāṇanti daṭṭhabbaṃ. Saṅgāmacatukkaṃ sampattavasena yojetabbaṃ. Yo hi parasenāya aññañca yodhaṃ pitarañca kammaṃ karonte disvā yodhassa usuṃ khipati ‘‘etaṃ vijjhitvā mama pitaraṃ vijjhissatī’’ti, yathādhippāyaṃ gate pitughātako hoti. ‘‘Yodhe viddhe mama pitā palāyissatī’’ti khipati, usuṃ ayathādhippāyaṃ gantvā pitaraṃ māreti, vohāravasena pitughātakoti vuccati, ānantariyaṃ pana natthīti. Coracatukkaṃ pana yo ‘‘coraṃ māressāmī’’ti coravesena gacchantaṃ pitaraṃ māreti, ānantariyaṃ phusatītiādinā yojetabbaṃ. Tenevāti teneva payogena. Arahantaghātako hotiyevāti arahato māritattā vuttaṃ, puthujjanasseva taṃ dinnaṃ hotīti etthāyamadhippāyo – yathā vadhakacetanā paccuppannārammaṇāpi pabandhavicchedanavasena jīvitindriyaṃ ārammaṇaṃ katvā pavattati, na evaṃ cāgacetanā. Sā hi cajitabbavatthuṃ ārammaṇaṃ katvā cajanamattameva hoti, aññasantakabhāvakaraṇañca tassa cajanaṃ, tasmā yassa taṃ santakaṃ kataṃ, tasseva dinnaṃ hotīti.
ལོཧིཏཾ སམོསརཏཱིཏི ཨབྷིགྷཱཏེན པཀུཔྤམཱནཾ སཉྩིཏཾ ཧོཏི། མཧནྟཏརནྟི གརུཏརཾ། སརཱིརཔྤཊིཛགྒནེ ཝིཡཱཏི སཏྠུརཱུཔཀཱཡཔྤཊིཛགྒནེ ཝིཡ།
Lohitaṃsamosaratīti abhighātena pakuppamānaṃ sañcitaṃ hoti. Mahantataranti garutaraṃ. Sarīrappaṭijaggane viyāti satthurūpakāyappaṭijaggane viya.
ཨསནྣིཔཏིཏེཏི ཨིདཾ སཱམགྒིཡདཱིཔནཾ། བྷེདོ ཙ ཧོཏཱིཏི སངྒྷསྶ བྷེདོ ཙ ཧོཏི། ཝཊྚཏཱིཏི སཉྙཱཡཱཏི ‘‘ཨཱིདིསཾ ཀརཎཾ སངྒྷབྷེདཱཡ ན ཧོཏཱི’’ཏི སཉྙཱཡ། ཏཐཱ ནཝཏོ ཨཱུནཔརིསཱཡཱཏི ནཝཏོ ཨཱུནཔརིསཱཡ ཀརོནྟསྶ ཏཐཱཏི ཡོཛེཏབྦཾ། ཏཐཱཏི ཙ ཨིམིནཱ ‘‘ན ཨཱནནྟརིཡཀམྨ’’ནྟི ཨིམཾ ཨཱཀཌྜྷཏི, ན པན ‘‘བྷེདོཝ ཧོཏཱི’’ཏི ཨིདཾ། ཧེཊྛིམནྟེན ཧི ནཝནྣམེཝ ཝསེན སངྒྷབྷེདོ། དྷམྨཝཱདིནོ ཨནཝཛྫཱཏི ཡཐཱདྷམྨཾ ཨནཝཊྛཱནཏོ། སངྒྷབྷེདསྶ པུབྦབྷཱགོ སངྒྷརཱཛི།
Asannipatiteti idaṃ sāmaggiyadīpanaṃ. Bhedo ca hotīti saṅghassa bhedo ca hoti. Vaṭṭatīti saññāyāti ‘‘īdisaṃ karaṇaṃ saṅghabhedāya na hotī’’ti saññāya. Tathā navato ūnaparisāyāti navato ūnaparisāya karontassa tathāti yojetabbaṃ. Tathāti ca iminā ‘‘na ānantariyakamma’’nti imaṃ ākaḍḍhati, na pana ‘‘bhedova hotī’’ti idaṃ. Heṭṭhimantena hi navannameva vasena saṅghabhedo. Dhammavādino anavajjāti yathādhammaṃ anavaṭṭhānato. Saṅghabhedassa pubbabhāgo saṅgharāji.
ཀཱཡདྭཱརམེཝ པཱུརེནྟི ཀཱཡཀམྨབྷཱཝེནེཝ ལཀྑིཏབྦཏོ། སཎྛཧནྟེཧི ཀཔྤེ…པེ॰… མུཙྩཏཱིཏི ཨིདཾ ཀཔྤཊྛཀཐཱཡ (ཀཐཱ॰ ༦༥༤ ཨཱདཡོ) ན སམེཏི། ཏཏྠ ཧི ཨཊྛཀཐཱཡ (ཀཐཱ॰ ཨཊྛ॰ ༦༥༤-༦༥༧) ཝུཏྟཾ – ‘‘ཨཱཔཱཡིཀོཏི ཨིདཾ སུཏྟཾ ཡཾ སོ ཨེཀཾ ཀཔྤཾ ཨསཱིཏིབྷཱགེ ཀཏྭཱ ཏཏོ ཨེཀབྷཱགམཏྟཾ ཀཱལཾ ཏིཊྛེཡྻ, ཏཾ ཨཱཡུཀཔྤཾ སནྡྷཱཡ ཝུཏྟ’’ནྟི། ཀཔྤཝིནཱསེཡེཝཱཏི ཙ ཨཱཡུཀཔྤཝིནཱསེ ཨེཝཱཏི ཨཏྠེ སཏི ནཏྠི ཝིརོདྷོ། ཨེཏྠ ཙ སཎྛཧནྟེཏི ཨིདམྤི ‘‘སྭེཝ ཝིནསྶིསྶཏཱི’’ཏི ཝིཡ ཨབྷཱུཏཔརིཀཔྤཝསེན ཝུཏྟཾ། ཨེཀདིཝསམེཝ ནིརཡེ པཙྩཏི, ཏཏོ པརཾ ཀཔྤཱབྷཱཝེ ཨཱཡུཀཔྤསྶཔི ཨབྷཱཝཏོཏི ཨཝིརོདྷཏོ ཨཏྠཡོཛནཱ དཊྛབྦཱ། སེསཱནཱིཏི སངྒྷབྷེདཏོ ཨཉྙཱནི ཨཱནནྟརིཡཀམྨཱནི།
Kāyadvārameva pūrenti kāyakammabhāveneva lakkhitabbato. Saṇṭhahantehi kappe…pe… muccatīti idaṃ kappaṭṭhakathāya (kathā. 654 ādayo) na sameti. Tattha hi aṭṭhakathāya (kathā. aṭṭha. 654-657) vuttaṃ – ‘‘āpāyikoti idaṃ suttaṃ yaṃ so ekaṃ kappaṃ asītibhāge katvā tato ekabhāgamattaṃ kālaṃ tiṭṭheyya, taṃ āyukappaṃ sandhāya vutta’’nti. Kappavināseyevāti ca āyukappavināse evāti atthe sati natthi virodho. Ettha ca saṇṭhahanteti idampi ‘‘sveva vinassissatī’’ti viya abhūtaparikappavasena vuttaṃ. Ekadivasameva niraye paccati, tato paraṃ kappābhāve āyukappassapi abhāvatoti avirodhato atthayojanā daṭṭhabbā. Sesānīti saṅghabhedato aññāni ānantariyakammāni.
ཡདི ཏཱནི ཨཧོསིཀམྨསངྑཾ གཙྪནྟི, ཨེཝཾ སཏི ཀཐཾ ནེསཾ ཨཱནནྟརིཡཏཱ ཙུཏིཨནནྟརཾ ཝིཔཱཀདཱནཱབྷཱཝཏོ། ཨཐ སཏི ཕལདཱནེ ཙུཏིཨནནྟརོ ཨེཝ ཨེཏེསཾ ཕལཀཱལོ, ན ཨཉྙོཏི ཕལཀཱལནིཡམེན ནིཡཏཏཱ ཨིཙྪིཏཱ, ན ཕལདཱནནིཡམེན། ཨེཝམྤི ནིཡཏཕལཀཱལཱནཾ ཨཉྙེསམྤི ཨུཔཔཛྫཝེདནཱིཡཱནཾ དིཊྛདྷམྨཝེདནཱིཡཱནཉྩ ནིཡཏཏཱ ཨཱཔཛྫེཡྻ, ཏསྨཱ ཝིཔཱཀདྷམྨདྷམྨཱནཾ པཙྩཡནྟརཝིཀལཏཱདཱིཧི ཨཝིཔཙྩམཱནཱནམྤི ཨཏྟནོ སབྷཱཝེན ཝིཔཱཀདྷམྨཏཱ ཝིཡ བལཝཏཱ ཨཱནནྟརིཡེན ཝིཔཱཀེ དིནྣེ ཨཝིཔཙྩམཱནཱནམྤི ཨཱནནྟརིཡཱནཾ ཕལདཱནེ ནིཡཏསབྷཱཝཱ ཨཱནནྟརིཡསབྷཱཝཱ ཙ པཝཏྟཱིཏི ཨཏྟནོ སབྷཱཝེན ཕལདཱནནིཡམེནེཝ ནིཡཏཱ ཨཱནནྟརིཡཏཱ ཙ ཝེདིཏབྦཱ། ཨཝསྶཉྩ ཨཱནནྟརིཡསབྷཱཝཱ ཏཏོ ཨེཝ ནིཡཏསབྷཱཝཱ ཙ ཏེསཾ པཝཏྟཱིཏི སམྤཊིཙྪིཏབྦམེཏཾ, ཨཉྙསྶ བལཝཏོ ཨཱནནྟརིཡསྶ ཨབྷཱཝེ སཏི ཙུཏིཨནནྟརཾ ཨེཀནྟེན ཕལདཱནཏོ།
Yadi tāni ahosikammasaṅkhaṃ gacchanti, evaṃ sati kathaṃ nesaṃ ānantariyatā cutianantaraṃ vipākadānābhāvato. Atha sati phaladāne cutianantaro eva etesaṃ phalakālo, na aññoti phalakālaniyamena niyatatā icchitā, na phaladānaniyamena. Evampi niyataphalakālānaṃ aññesampi upapajjavedanīyānaṃ diṭṭhadhammavedanīyānañca niyatatā āpajjeyya, tasmā vipākadhammadhammānaṃ paccayantaravikalatādīhi avipaccamānānampi attano sabhāvena vipākadhammatā viya balavatā ānantariyena vipāke dinne avipaccamānānampi ānantariyānaṃ phaladāne niyatasabhāvā ānantariyasabhāvā ca pavattīti attano sabhāvena phaladānaniyameneva niyatā ānantariyatā ca veditabbā. Avassañca ānantariyasabhāvā tato eva niyatasabhāvā ca tesaṃ pavattīti sampaṭicchitabbametaṃ, aññassa balavato ānantariyassa abhāve sati cutianantaraṃ ekantena phaladānato.
ནནུ ཨེཝཾ ཨཉྙེསམྤི ཨུཔཔཛྫཝེདནཱིཡཱནཾ ཨཉྙསྨིཾ ཝིཔཱཀདཱཡཀེ ཨསཏི ཙུཏིཨནནྟརམེཝ ཨེཀནྟེན ཕལདཱནཏོ ནིཡཏསབྷཱཝཱ ཨཱནནྟརིཡསབྷཱཝཱ ཙ པཝཏྟི ཨཱཔཛྫཏཱིཏི? ནཱཔཛྫཏི ཨསམཱནཛཱཏིཀེན ཙེཏོཔཎིདྷིཝསེན ཨུཔགྷཱཏཀེན ཙ ནིཝཏྟེཏབྦཝིཔཱཀཏྟཱ ཨནནྟརེ ཨེཀནྟཕལདཱཡཀཏྟཱབྷཱཝཱ, ན པན ཨཱནནྟརིཡཱནཾ པཋམཛ྄ཛྷཱནཱདཱིནཾ དུཏིཡཛ྄ཛྷཱནཱདཱིནི ཝིཡ ཨསམཱནཛཱཏིཀཾ ཕལནིཝཏྟཀཾ ཨཏྠི སབྦཱནནྟརིཡཱནཾ ཨཝཱིཙིཕལཏྟཱ, ན ཙ ཧེཊྛཱུཔཔཏྟིཾ ཨིཙྪཏོ སཱིལཝཏོ ཙེཏོཔཎིདྷི ཝིཡ ཨུཔརཱུཔཔཏྟིཛནཀཀམྨཕལཾ ཨཱནནྟརིཡཕལཾ ནིཝཏྟེཏུཾ སམཏྠོ ཙེཏོཔཎིདྷི ཨཏྠི ཨནིཙྪནྟསྶེཝ ཨཝཱིཙིཔཱཏནཏོ, ན ཙ ཨཱནནྟརིཡོཔགྷཱཏཀཾ ཀིཉྩི ཀམྨཾ ཨཏྠི, ཏསྨཱ ཏེསཾཡེཝ ཨནནྟརེ ཨེཀནྟཝིཔཱཀཛནཀསབྷཱཝཱ པཝཏྟཱིཏི། ཨནེཀཱནི ཙ ཨཱནནྟརིཡཱནི ཀཏཱནི ཨེཀནྟེན ཝིཔཱཀེ ནིཡཏསབྷཱཝཏྟཱ ཨུཔརཏཱཝིཔཙྩནསབྷཱཝཱསངྐཏྟཱ ནིཙྪིཏཱནི སབྷཱཝཏོ ནིཡཏཱནེཝ། ཏེསུ པན སམཱནསབྷཱཝེསུ ཨེཀེན ཝིཔཱཀེ དིནྣེ ཨིཏརཱནི ཨཏྟནཱ ཀཏྟབྦཀིཙྩསྶ ཏེནེཝ ཀཏཏྟཱ ན དུཏིཡཾ ཏཏིཡམྤི ཙ པཊིསནྡྷིཾ ཀརོནྟི, ན སམཏྠཏཱཝིགྷཱཏཏྟཱཏི ནཏྠི ཏེསཾ ཨཱནནྟརིཡཀཏཱནིཝཏྟི, གརུགརུཏརབྷཱཝོ པན ཏེསཾ ལབྦྷཏེཝཱཏི སངྒྷབྷེདསྶ སིཡཱ གརུཏརབྷཱཝོཏི ‘‘ཡེན…པེ॰… ཝིཔཙྩཏཱི’’ཏི ཨཱཧ། ཨེཀསྶ པན ཨཉྙཱནི ཨུཔཏྠམྦྷཀཱནི ཧོནྟཱིཏི དཊྛབྦཱནི། པཊིསནྡྷིཝསེན ཝིཔཙྩཏཱིཏི ཝཙནེན ཨིཏརེསཾ པཝཏྟིཝིཔཱཀདཱཡིཏཱ ཨནུཉྙཱཏཱ ཝིཡ དིསྶཏི། ནོ ཝཱ ཏཐཱ སཱིལཝཏཱིཏི ཡཐཱ པིཏཱ སཱིལཝཱ, ཏཐཱ སཱིལཝཏཱི ནོ ཝཱ ཧོཏཱིཏི ཡོཛནཱ། སཙེ མཱཏཱ སཱིལཝཏཱི, མཱཏུགྷཱཏོ པཊིསནྡྷིཝསེན ཝིཔཙྩཏཱིཏི ཡོཛནཱ།
Nanu evaṃ aññesampi upapajjavedanīyānaṃ aññasmiṃ vipākadāyake asati cutianantarameva ekantena phaladānato niyatasabhāvā ānantariyasabhāvā ca pavatti āpajjatīti? Nāpajjati asamānajātikena cetopaṇidhivasena upaghātakena ca nivattetabbavipākattā anantare ekantaphaladāyakattābhāvā, na pana ānantariyānaṃ paṭhamajjhānādīnaṃ dutiyajjhānādīni viya asamānajātikaṃ phalanivattakaṃ atthi sabbānantariyānaṃ avīciphalattā, na ca heṭṭhūpapattiṃ icchato sīlavato cetopaṇidhi viya uparūpapattijanakakammaphalaṃ ānantariyaphalaṃ nivattetuṃ samattho cetopaṇidhi atthi anicchantasseva avīcipātanato, na ca ānantariyopaghātakaṃ kiñci kammaṃ atthi, tasmā tesaṃyeva anantare ekantavipākajanakasabhāvā pavattīti. Anekāni ca ānantariyāni katāni ekantena vipāke niyatasabhāvattā uparatāvipaccanasabhāvāsaṅkattā nicchitāni sabhāvato niyatāneva. Tesu pana samānasabhāvesu ekena vipāke dinne itarāni attanā kattabbakiccassa teneva katattā na dutiyaṃ tatiyampi ca paṭisandhiṃ karonti, na samatthatāvighātattāti natthi tesaṃ ānantariyakatānivatti, garugarutarabhāvo pana tesaṃ labbhatevāti saṅghabhedassa siyā garutarabhāvoti ‘‘yena…pe… vipaccatī’’ti āha. Ekassa pana aññāni upatthambhakāni hontīti daṭṭhabbāni. Paṭisandhivasena vipaccatīti vacanena itaresaṃ pavattivipākadāyitā anuññātā viya dissati. No vā tathā sīlavatīti yathā pitā sīlavā, tathā sīlavatī no vā hotīti yojanā. Sace mātā sīlavatī, mātughāto paṭisandhivasena vipaccatīti yojanā.
པཀཏཏྟོཏི ཨནུཀྑིཏྟོ། སམཱནསཾཝཱསཀོཏི ཨཔཱརཱཛིཀོ། སམཱནསཱིམཱཡནྟི ཨེཀསཱིམཱཡཾ།
Pakatattoti anukkhitto. Samānasaṃvāsakoti apārājiko. Samānasīmāyanti ekasīmāyaṃ.
༢༧༦. སཏྠུ ཀིཙྩཾ ཀཱཏུཾ ཨསམཏྠོཏི ཡཾ སཏྠཱརཱ ཀཱཏབྦཀིཙྩཾ ཨནུསཱསནཱདི, ནཾ ཀཱཏུཾ ཨསམཏྠོཏི བྷགཝནྟཾ པཙྩཀྑཱཡ། ཨཉྙཾ ཏིཏྠཀརནྟི ཨཉྙཾ སཏྠཱརཾ། ཝུཏྟཉྷེཏཾ –
276.Satthu kiccaṃ kātuṃ asamatthoti yaṃ satthārā kātabbakiccaṃ anusāsanādi, naṃ kātuṃ asamatthoti bhagavantaṃ paccakkhāya. Aññaṃ titthakaranti aññaṃ satthāraṃ. Vuttañhetaṃ –
‘‘ཏིཏྠཾ ཛཱནིཏབྦཾ, ཏིཏྠཀརོ ཛཱནིཏབྦོ, ཏིཏྠིཡཱ ཛཱནིཏབྦཱ, ཏིཏྠིཡསཱཝཀཱ ཛཱནིཏབྦཱ། ཏཏྠ ཏིཏྠཾ ནཱམ དྭཱསཊྛི དིཊྛིཡོ། ཨེཏྠ ཧི སཏྠཱ ཏརནྟི ཨུཔླཝནྟི ཨུམྨུཛྫནིམུཛྫཾ ཀརོནྟི, ཏསྨཱ ཏིཏྠནྟི ཝུཙྩནྟི། ཏཱདིསཱནཾ དིཊྛཱིནཾ ཨུཔྤཱདེཏཱ ཏིཏྠཀརོ ནཱམ པཱུརཎཀསྶཔཱདིཀོ། ཏསྶ ལདྡྷིཾ གཧེཏྭཱ པབྦཛིཏཱ ཏིཏྠིཡཱ ནཱམ། ཏེ ཧི ཏིཏྠེ ཛཱཏཱཏི ཏིཏྠིཡཱ། ཡཐཱཝུཏྟཾ ཝཱ དིཊྛིགཏསངྑཱཏཾ ཏིཏྠཾ ཨེཏེསཾ ཨཏྠཱིཏི ཏིཏྠིཀཱ , ཏིཏྠིཀཱ ཨེཝ ཏིཏྠིཡཱ། ཏེསཾ པཙྩཡདཱཡཀཱ ཏིཏྠིཡསཱཝཀཱཏི ཝེདིཏབྦཱ’’ཏི (མ॰ ནི॰ ཨཊྛ॰ ༡.༡༤༠)།
‘‘Titthaṃ jānitabbaṃ, titthakaro jānitabbo, titthiyā jānitabbā, titthiyasāvakā jānitabbā. Tattha titthaṃ nāma dvāsaṭṭhi diṭṭhiyo. Ettha hi satthā taranti uplavanti ummujjanimujjaṃ karonti, tasmā titthanti vuccanti. Tādisānaṃ diṭṭhīnaṃ uppādetā titthakaro nāma pūraṇakassapādiko. Tassa laddhiṃ gahetvā pabbajitā titthiyā nāma. Te hi titthe jātāti titthiyā. Yathāvuttaṃ vā diṭṭhigatasaṅkhātaṃ titthaṃ etesaṃ atthīti titthikā , titthikā eva titthiyā. Tesaṃ paccayadāyakā titthiyasāvakāti veditabbā’’ti (ma. ni. aṭṭha. 1.140).
༢༧༧. ཨབྷིཛཱཏིཨཱདཱིསུ པཀམྤནདེཝཏཱུཔསངྐམནཱདིནཱ ཛཱཏཙཀྐཝཱལེ༹ན སམཱནཡོགཀྑམཾ དསསཧསྶཔརིམཱཎཾ ཙཀྐཝཱལ༹ཾ ཛཱཏིཁེཏྟཾ། སརསེནེཝ ཨཱཎཱཔཝཏྟནཊྛཱནཾ ཨཱཎཱཁེཏྟཾ། ཝིསཡབྷཱུཏཾ ཋཱནཾ ཝིསཡཁེཏྟཾ། དསསཧསྶཱི ལོཀདྷཱཏཱུཏི ཨིམཱཡ ལོཀདྷཱཏུཡཱ སདྡྷིཾ ཨིམཾ ལོཀདྷཱཏུཾ པརིཝཱརེཏྭཱ ཋིཏཱ དསསཧསྶཱི ལོཀདྷཱཏུ། ཏཏྟཀཱནཾཡེཝ ཛཱཏིཁེཏྟབྷཱཝོ དྷམྨཏཱཝསེན ཝེདིཏབྦོ། ‘‘པརིགྒཧཝསེནཱ’’ཏི ཀེཙི, ‘‘སབྦེསཾཡེཝ བུདྡྷཱནཾ ཏཏྟཀཾཡེཝ ཛཱཏིཁེཏྟཾ ཏནྣིཝཱསཱིནཾཡེཝ དེཝཏཱནཾ དྷམྨཱབྷིསམཡོ’’ཏི ཙ ཝདནྟི། མཱཏུཀུཙྪི ཨོཀྐམནཀཱལཱདཱིནཾ ཚནྣཾ ཨེཝ གཧཎཾ ནིདསྶནམཏྟཾ མཧཱབྷིནཱིཧཱརཱདིཀཱལེཔི ཏསྶ པཀམྤནསྶ ལབྦྷནཏོ། ཨཱཎཱཁེཏྟཾ ནཱམ ཡཾ ཨེཀཛ྄ཛྷཾ སཾཝཊྚཏི ཝིཝཊྚཏི ཙ, ཨཱཎཱ པཝཏྟཏི ཨཱཎཱཡ ཏནྣིཝཱསིདེཝཏཱནཾ སིརསཱ སམྤཊིཙྪནེན, ཏཉྩ ཁོ ཀེཝལཾ བུདྡྷཱནཾ ཨཱནུབྷཱཝེནེཝ, ན ཨདྷིཔྤཱཡཝསེན། ཨདྷིཔྤཱཡཝསེན པན ‘‘ཡཱཝཏཱ ཝཱ པན ཨཱཀངྑེཡྻཱ’’ཏི (ཨ॰ ནི॰ ༣.༨༡) ཝཙནཏོ ཏཏོ པརམྤི ཨཱཎཱ ཝཏྟེཡྻེཝ།
277. Abhijātiādīsu pakampanadevatūpasaṅkamanādinā jātacakkavāḷena samānayogakkhamaṃ dasasahassaparimāṇaṃ cakkavāḷaṃ jātikhettaṃ. Saraseneva āṇāpavattanaṭṭhānaṃ āṇākhettaṃ. Visayabhūtaṃ ṭhānaṃ visayakhettaṃ. Dasasahassī lokadhātūti imāya lokadhātuyā saddhiṃ imaṃ lokadhātuṃ parivāretvā ṭhitā dasasahassī lokadhātu. Tattakānaṃyeva jātikhettabhāvo dhammatāvasena veditabbo. ‘‘Pariggahavasenā’’ti keci, ‘‘sabbesaṃyeva buddhānaṃ tattakaṃyeva jātikhettaṃ tannivāsīnaṃyeva devatānaṃ dhammābhisamayo’’ti ca vadanti. Mātukucchi okkamanakālādīnaṃ channaṃ eva gahaṇaṃ nidassanamattaṃ mahābhinīhārādikālepi tassa pakampanassa labbhanato. Āṇākhettaṃ nāma yaṃ ekajjhaṃ saṃvaṭṭati vivaṭṭati ca, āṇā pavattati āṇāya tannivāsidevatānaṃ sirasā sampaṭicchanena, tañca kho kevalaṃ buddhānaṃ ānubhāveneva, na adhippāyavasena. Adhippāyavasena pana ‘‘yāvatā vā pana ākaṅkheyyā’’ti (a. ni. 3.81) vacanato tato parampi āṇā vatteyyeva.
ན ཨུཔྤཛྫནྟཱིཏི པན ཨཏྠཱིཏི ‘‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏཱི’’ཏིཨཱདིཾ (མ॰ ནི॰ ༡.༢༨༥; མཧཱཝ॰ ༡༡; ཀཐཱ॰ ༤༠༥) ཨིམིསྶཱ ལོཀདྷཱཏུཡཱ ཋཏྭཱ ཝདནྟེན བྷགཝཏཱ ‘‘ཀིཾ པནཱཝུསོ, སཱརིཔུཏྟ, ཨཏྠེཏརཧི ཨཉྙེ སམཎཱ ཝཱ བྲཱཧྨཎཱ ཝཱ བྷགཝཏཱ སམསམཱ སམྦོདྷིཡནྟི, ཨེཝཾ པུཊྛོ ཨཧཾ, བྷནྟེ, ‘ནོ’ཏི ཝདེཡྻ’’ནྟི (དཱི॰ ནི॰ ༣.༡༦༡) ཝཏྭཱ ཏསྶ ཀཱརཎཾ དསྶེཏུཾ – ‘‘ཨཊྛཱནམེཏཾ ཨནཝཀཱསོ, ཡཾ ཨེཀིསྶཱ ལོཀདྷཱཏུཡཱ དྭེ ཨརཧནྟོ སམྨཱསམྦུདྡྷཱ ཨཔུབྦཾ ཨཙརིམཾ ཨུཔྤཛྫེཡྻུ’’ནྟི ཨིམཾ སུཏྟཾ (ཨ॰ ནི॰ ༡.༢༧༧; ཝིབྷ॰ ༨༠༩; མ॰ ནི॰ ༣.༡༢༩; མི॰ པ॰ ༥.༡.༡) ཨཱཧརནྟེན དྷམྨསེནཱཔཏིནཱ ཙ བུདྡྷཁེཏྟབྷཱུཏཾ ཨིམཾ ལོཀདྷཱཏུཾ ཋཔེཏྭཱ ཨཉྙཏྠ ཨནུཔྤཏྟི ཝུཏྟཱ ཧོཏཱིཏི ཨདྷིཔྤཱཡོ།
Na uppajjantīti pana atthīti ‘‘na me ācariyo atthi, sadiso me na vijjatī’’tiādiṃ (ma. ni. 1.285; mahāva. 11; kathā. 405) imissā lokadhātuyā ṭhatvā vadantena bhagavatā ‘‘kiṃ panāvuso, sāriputta, atthetarahi aññe samaṇā vā brāhmaṇā vā bhagavatā samasamā sambodhiyanti, evaṃ puṭṭho ahaṃ, bhante, ‘no’ti vadeyya’’nti (dī. ni. 3.161) vatvā tassa kāraṇaṃ dassetuṃ – ‘‘aṭṭhānametaṃ anavakāso, yaṃ ekissā lokadhātuyā dve arahanto sammāsambuddhā apubbaṃ acarimaṃ uppajjeyyu’’nti imaṃ suttaṃ (a. ni. 1.277; vibha. 809; ma. ni. 3.129; mi. pa. 5.1.1) āharantena dhammasenāpatinā ca buddhakhettabhūtaṃ imaṃ lokadhātuṃ ṭhapetvā aññattha anuppatti vuttā hotīti adhippāyo.
ཨེཀཏོཏི སཧ, ཨེཀསྨིཾ ཀཱལེཏི ཨཏྠོ, སོ པན ཀཱལོ ཀཐཾ པརིཙྪིནྣོཏི ཙརིམབྷཝེ པཊིསནྡྷིགྒཧཎཏོ པཊྛཱཡ ཡཱཝ དྷཱཏུཔརིནིབྦཱནཱཏི དསྶེནྟོ, ‘‘ཏཏྠཱ’’ཏིཨཱདིམཱཧ། ཨནཙྪརིཡཏྟཱཏི དྭཱིསུཔི ཨུཔྤཛྫམཱནེསུ ཨཙྪརིཡཏྟཱབྷཱཝཏོཏི ཨཏྠོ། དྭཱིསུཔི ཨུཔྤཛྫམཱནེསུ ཨནཙྪརིཡཏཱ, ཀིམངྒཾ པན བཧཱུསཱུཏི དསྶེནྟོ, ‘‘ཡདི ཙཱ’’ཏིཨཱདིམཱཧ། བུདྡྷཱ ནཱམ མཛ྄ཛྷེ བྷིནྣསུཝཎྞཾ ཝིཡ ཨེཀསདིསཱཏི ཏེསཾ དེསནཱཔི ཨེཀརསཱ ཨེཀདྷཱཏི ཨཱཧ – ‘‘དེསནཱཡ ཙ ཝིསེསཱབྷཱཝཏོ’’ཏི ། ཨེཏེནཔི ཨནཙྪརིཡཏྟམེཝ སཱདྷེཏི། ཝིཝཱདབྷཱཝཏོཏི ཨེཏེན ཝིཝཱདཱབྷཱཝཏྠཾ དྭེ བུདྡྷཱ ཨེཀཏོ ན ཨུཔྤཛྫནྟཱིཏི དསྶེཏི། ཨེཏཾ ཀཱརཎནྟི ཨེཏཾ ཨནཙྪརིཡཏཱདིཀཱརཎཾ། ཏཏྠཱཏི མིལིནྡཔཉྷེ།
Ekatoti saha, ekasmiṃ kāleti attho, so pana kālo kathaṃ paricchinnoti carimabhave paṭisandhiggahaṇato paṭṭhāya yāva dhātuparinibbānāti dassento, ‘‘tatthā’’tiādimāha. Anacchariyattāti dvīsupi uppajjamānesu acchariyattābhāvatoti attho. Dvīsupi uppajjamānesu anacchariyatā, kimaṅgaṃ pana bahūsūti dassento, ‘‘yadi cā’’tiādimāha. Buddhā nāma majjhe bhinnasuvaṇṇaṃ viya ekasadisāti tesaṃ desanāpi ekarasā ekadhāti āha – ‘‘desanāya ca visesābhāvato’’ti . Etenapi anacchariyattameva sādheti. Vivādabhāvatoti etena vivādābhāvatthaṃ dve buddhā ekato na uppajjantīti dasseti. Etaṃ kāraṇanti etaṃ anacchariyatādikāraṇaṃ. Tatthāti milindapañhe.
ཨེཀཾ ཨེཝ བུདྡྷཾ དྷཱརེཏཱིཏི ཨེཀབུདྡྷདྷཱརཎཱི། ཨེཏེན ཨེཝཾསབྷཱཝཱ ཨེཏེ བུདྡྷགུཎཱ, ཡེན དུཏིཡབུདྡྷགུཎེ དྷཱརེཏུཾ ཨསམཏྠཱ ཨཡཾ ལོཀདྷཱཏཱུཏི དསྶེཏི། པཙྩཡཝིསེསནིཔྥནྣཱནཉྷི གུཎདྷམྨཱནཾ བྷཱརིཡོ ཝིསེསོ མཧཱཔཐཝིཡཱཔི དུསྶཧོཏི སཀྐཱ ཝིཉྙཱཏུཾ། ཏཐཱ ཧི ཨབྷིསམྦོདྷིསམཡེ ཨུཔགཏསྶ ལོཀནཱཐསྶ གུཎབྷཱརཾ བོདྷིརུཀྑསྶ ཏཱིསུཔི དིསཱསུ མཧཱཔཐཝཱི སནྡྷཱརེཏུཾ ནཱསཀྑི། ཏསྨཱ ‘‘ན དྷཱརེཡྻཱ’’ཏི ཝཏྭཱ ཏམེཝ ཨདྷཱརཎཾ པརིཡཱཡནྟརེཧི པཀཱསེནྟོ ‘‘ཙལེཡྻཱ’’ཏིཨཱདིམཱཧ། ཏཏྠ ཙལེཡྻཱཏི པརིཔྥནྡེཡྻ། ཀམྤེཡྻཱཏི པཝེདྷེཡྻ ། ནམེཡྻཱཏི ཨེཀཔསྶེན ནམེཡྻ། ཨོནམེཡྻཱཏི ཨོསཱིདེཡྻ། ཝིནམེཡྻཱཏི ཝིཝིདྷཾ ཨིཏོ ཙིཏོ ཙ ནམེཡྻ། ཝིཀིརེཡྻཱཏི ཝཱཏེན ཐུསམུཊྛི ཝིཡ ཝིཔྤཀིརེཡྻ། ཝིདྷམེཡྻཱཏི ཝིནསྶེཡྻ། ཝིདྡྷཾསེཡྻཱཏི སབྦསོ ཝིདྡྷསྟཱ བྷཝེཡྻ། ཏཐཱབྷཱུཏཱ ཙ ན ཀཏྠཙི ཏིཊྛེཡྻཱཏི ཨཱཧ – ‘‘ན ཋཱནམུཔགཙྪེཡྻཱ’’ཏི།
Ekaṃ eva buddhaṃ dhāretīti ekabuddhadhāraṇī. Etena evaṃsabhāvā ete buddhaguṇā, yena dutiyabuddhaguṇe dhāretuṃ asamatthā ayaṃ lokadhātūti dasseti. Paccayavisesanipphannānañhi guṇadhammānaṃ bhāriyo viseso mahāpathaviyāpi dussahoti sakkā viññātuṃ. Tathā hi abhisambodhisamaye upagatassa lokanāthassa guṇabhāraṃ bodhirukkhassa tīsupi disāsu mahāpathavī sandhāretuṃ nāsakkhi. Tasmā ‘‘na dhāreyyā’’ti vatvā tameva adhāraṇaṃ pariyāyantarehi pakāsento ‘‘caleyyā’’tiādimāha. Tattha caleyyāti paripphandeyya. Kampeyyāti pavedheyya . Nameyyāti ekapassena nameyya. Onameyyāti osīdeyya. Vinameyyāti vividhaṃ ito cito ca nameyya. Vikireyyāti vātena thusamuṭṭhi viya vippakireyya. Vidhameyyāti vinasseyya. Viddhaṃseyyāti sabbaso viddhastā bhaveyya. Tathābhūtā ca na katthaci tiṭṭheyyāti āha – ‘‘na ṭhānamupagaccheyyā’’ti.
ཨིདཱནི ཏཏྠ ནིདསྶནཾ དསྶེནྟོ, ‘‘ཡཐཱ, མཧཱརཱཛཱ’’ཏིཨཱདིམཱཧ། ཏཏྠ ཨེཀེ པུརིསེཏི ཨེཀསྨིཾ པུརིསེ། སམུཔཱདིཀཱཏི སམཾ ཨུདྡྷཾ པཛྫཏི པཝཏྟཏཱིཏི སམུཔཱདིཀཱ, ཨུདཀསྶ ཨུཔརི སམཾ གཱམིནཱིཏི ཨཏྠོ། ‘‘སམུཔྤཱདིཀཱ’’ཏིཔི པཋནྟི, ཨཡམེཝཏྠོ། ཝཎྞེནཱཏི སཎྛཱནེན། པམཱཎེནཱཏི ཨཱརོཧེན། ཀིསཐཱུལེནཱཏི ཀིསཐཱུལབྷཱཝེན, པརིཎཱཧེནཱཏི ཨཏྠོ། དྭིནྣམྤཱིཏི དྭེཔི, དྭིནྣམྤི ཝཱ སརཱིརབྷཱརཾ།
Idāni tattha nidassanaṃ dassento, ‘‘yathā, mahārājā’’tiādimāha. Tattha eke puriseti ekasmiṃ purise. Samupādikāti samaṃ uddhaṃ pajjati pavattatīti samupādikā, udakassa upari samaṃ gāminīti attho. ‘‘Samuppādikā’’tipi paṭhanti, ayamevattho. Vaṇṇenāti saṇṭhānena. Pamāṇenāti ārohena. Kisathūlenāti kisathūlabhāvena, pariṇāhenāti attho. Dvinnampīti dvepi, dvinnampi vā sarīrabhāraṃ.
ཚཱདེནྟནྟི རོཙེནྟཾ རུཙིཾ ཨུཔྤཱདེནྟཾ། ཏནྡིཀཏོཏི ཏེན བྷོཛནེན ཏནྡིབྷཱུཏོ། ཨནོནམིཏདཎྜཛཱཏོཏི ཡཱཝདཏྠཾ བྷོཛནེན ཨོནམིཏུཾ ཨསཀྐུཎེཡྻཏཱཡ ཨནོནམནདཎྜོ ཝིཡ ཛཱཏོ། སཀིཾ བྷུཏྟོ ཝམེཡྻཱཏི ཨེཀམྤི ཨཱལོཔཾ ཨཛ྄ཛྷོཧརིཏྭཱ ཝམེཡྻཱཏི ཨཏྠོ།
Chādentanti rocentaṃ ruciṃ uppādentaṃ. Tandikatoti tena bhojanena tandibhūto. Anonamitadaṇḍajātoti yāvadatthaṃ bhojanena onamituṃ asakkuṇeyyatāya anonamanadaṇḍo viya jāto. Sakiṃ bhutto vameyyāti ekampi ālopaṃ ajjhoharitvā vameyyāti attho.
ཨཏིདྷམྨབྷཱརེན པཐཝཱི ཙལཏཱིཏི དྷམྨེན ནཱམ པཐཝཱི ཏིཊྛེཡྻ། སཱ ཀིཾ ཏེནེཝ ཙལཏི ཝིནསྶཏཱིཏི ཨདྷིཔྤཱཡེན པུཙྪཏི། པུན ཐེརོ ‘‘རཏནཾ ནཱམ ལོཀེ ཀུཊུམྦཾ སནྡྷཱརེནྟཾ ཨབྷིམཏཉྩ ལོཀེན ཨཏྟནོ གརུསབྷཱཝཏཱཡ སཀཊབྷངྒསྶ ཀཱརཎཾ ཨཏིབྷཱརབྷཱུཏཾ དིཊྛཾ། ཨེཝཾ དྷམྨོ ཙ ཧིཏསུཁཝིསེསེཧི ཏཾསམངྒཱིནཾ དྷཱརེནྟོ ཨབྷིམཏོ ཙ ཝིཉྙཱུནཾ གམྦྷཱིརཔྤམེཡྻབྷཱཝེན གརུསབྷཱཝཏྟཱ ཨཏིབྷཱརབྷཱུཏོ པཐཝཱིཙལནསྶ ཀཱརཎཾ ཧོཏཱི’’ཏི དསྶེནྟོ, ‘‘ཨིདྷ, མཧཱརཱཛ, དྭེ སཀཊཱ’’ཏིཨཱདིམཱཧ ། ཨེཏེནེཝ ཏཐཱགཏསྶ མཱཏུཀུཙྪིཨོཀྐམནཱདིཀཱལེ པཐཝཱིཀམྤནཀཱརཎཾ སཾཝཎྞིཏནྟི དཊྛབྦཾ། ཨེཀསྶཱཏི ཨེཀསྨཱ, ཨེཀསྶ ཝཱ སཀཊསྶ རཏནཾ, ཏསྨཱ སཀཊཱ གཧེཏྭཱཏི ཨཏྠོ།
Atidhammabhārena pathavī calatīti dhammena nāma pathavī tiṭṭheyya. Sā kiṃ teneva calati vinassatīti adhippāyena pucchati. Puna thero ‘‘ratanaṃ nāma loke kuṭumbaṃ sandhārentaṃ abhimatañca lokena attano garusabhāvatāya sakaṭabhaṅgassa kāraṇaṃ atibhārabhūtaṃ diṭṭhaṃ. Evaṃ dhammo ca hitasukhavisesehi taṃsamaṅgīnaṃ dhārento abhimato ca viññūnaṃ gambhīrappameyyabhāvena garusabhāvattā atibhārabhūto pathavīcalanassa kāraṇaṃ hotī’’ti dassento, ‘‘idha, mahārāja, dve sakaṭā’’tiādimāha . Eteneva tathāgatassa mātukucchiokkamanādikāle pathavīkampanakāraṇaṃ saṃvaṇṇitanti daṭṭhabbaṃ. Ekassāti ekasmā, ekassa vā sakaṭassa ratanaṃ, tasmā sakaṭā gahetvāti attho.
ཨོསཱརིཏནྟི ཨུཙྩཱརིཏཾ, ཝུཏྟནྟི ཨཏྠོ། ཨགྒོཏི སབྦསཏྟེཧི ཨགྒོ། ཛེཊྛོཏི ཝུདྡྷཏརོ། སེཊྛོཏི པསཏྠཏརོ། ཝིསིཊྛེཧི སཱིལཱདཱིཧི གུཎེཧི སམནྣཱགཏཏྟཱ ཝིསིཊྛོ། ཨུགྒཏཏམོཏི ཨུཏྟམོ། པཝརོཏི ཏསྶེཝ ཝེཝཙནཾ། ནཏྠི ཨེཏསྶ སམོཏི ཨསམོ། ཨསམཱ པུབྦབུདྡྷཱ, ཏེཧི སམོཏི ཨསམསམོ། ནཏྠི ཨེཏསྶ པཊིསམོ པཊིཔུགྒལོཏི ཨཔྤཊིསམོ། ནཏྠི ཨེཏསྶ པཊིབྷཱགོཏི ཨཔྤཊིབྷཱགོ། ནཏྠི ཨེཏསྶ པཊིཔུགྒལོཏི ཨཔྤཊིཔུགྒལོ།
Osāritanti uccāritaṃ, vuttanti attho. Aggoti sabbasattehi aggo. Jeṭṭhoti vuddhataro. Seṭṭhoti pasatthataro. Visiṭṭhehi sīlādīhi guṇehi samannāgatattā visiṭṭho. Uggatatamoti uttamo. Pavaroti tasseva vevacanaṃ. Natthi etassa samoti asamo. Asamā pubbabuddhā, tehi samoti asamasamo. Natthi etassa paṭisamo paṭipuggaloti appaṭisamo. Natthi etassa paṭibhāgoti appaṭibhāgo. Natthi etassa paṭipuggaloti appaṭipuggalo.
སབྷཱཝཔཀཏིཀཱཏི སབྷཱཝབྷཱུཏཱ ཨཀིཏྟིམཱ པཀཏི། ཀཱརཎམཧནྟཏྟཱཏི ཀཱརཎཱནཾ མཧནྟཏཱཡ, མཧནྟེཧི བུདྡྷཀརདྷམྨེཧི པཱརམིསངྑཱཏེཧི ཀཱརཎེཧི བུདྡྷགུཎཱནཾ ནིབྦཏྟིཏོཏི ཝུཏྟཾ ཧོཏི། པཐཝཱིཨཱདཱིནི མཧནྟཱནི ཝཏྠཱུནི, མཧནྟཱ ཙཀྐཝཱལཱ༹དཡོ ཨཏྟནོ ཨཏྟནོ ཝིསཡེ ཨེཀེཀཱཝ, ཨེཝཾ སམྨཱསམྦུདྡྷོཔི མཧནྟོ ཨཏྟནོ ཝིསཡེ ཨེཀོ ཨེཝ། ཀོ ཙ ཏསྶ ཝིསཡོ? བུདྡྷབྷཱུམི, ཡཱཝཏཀཾ ཝཱ ཉེཡྻཾ། ‘‘ཨཱཀཱསོ ཝིཡ ཨནནྟཝིསཡོ བྷགཝཱ ཨེཀོ ཨེཝ ཧོཏཱི’’ཏི ཝདནྟོ པརཙཀྐཝཱལེ༹སུཔི དུཏིཡསྶ བུདྡྷསྶ ཨབྷཱཝཾ དསྶེཏི།
Sabhāvapakatikāti sabhāvabhūtā akittimā pakati. Kāraṇamahantattāti kāraṇānaṃ mahantatāya, mahantehi buddhakaradhammehi pāramisaṅkhātehi kāraṇehi buddhaguṇānaṃ nibbattitoti vuttaṃ hoti. Pathavīādīni mahantāni vatthūni, mahantā cakkavāḷādayo attano attano visaye ekekāva, evaṃ sammāsambuddhopi mahanto attano visaye eko eva. Ko ca tassa visayo? Buddhabhūmi, yāvatakaṃ vā ñeyyaṃ. ‘‘Ākāso viya anantavisayo bhagavā eko eva hotī’’ti vadanto paracakkavāḷesupi dutiyassa buddhassa abhāvaṃ dasseti.
ཨིམིནཱཝ པདེནཱཏི ‘‘ཨེཀིསྶཱ ལོཀདྷཱཏུཡཱ’’ཏི ཨིམིནཱ ཨེཝ པདེན། དས ཙཀྐཝཱལ༹སཧསྶཱནི གཧིཏཱནཱིཏི ཛཱཏིཁེཏྟཱཔེཀྑཱཡ གཧིཏཱནི། ཨེཀཙཀྐཝཱལེ༹ནེཝཱཏི ཨིམིནཱ ཨེཝ ཨེཀཙཀྐཝཱལེ༹ན, ན ཡེན ཀེནཙི། ཡཐཱ ‘‘ཨིམསྨིཾཡེཝ ཙཀྐཝཱལེ༹ ཨུཔྤཛྫནྟཱི’’ཏི ཝུཏྟེ ཨིམསྨིམྤི ཙཀྐཝཱལེ༹ ཛམྦུདཱིཔེ ཨེཝ, ཏཏྠཱཔི མཛ྄ཛྷིམདེསེ ཨེཝཱཏི པརིཙྪིནྡིཏུཾ ཝཊྚཏི, ཨེཝཾ ‘‘ཨེཀིསྶཱ ལོཀདྷཱཏུཡཱ’’ཏི ཛཱཏིཁེཏྟེ ཨདྷིཔྤེཏེཔི ཨིམིནཱཝ ཙཀྐཝཱལེ༹ན པརིཙྪིནྡིཏུཾ ཝཊྚཏི།
Imināva padenāti ‘‘ekissā lokadhātuyā’’ti iminā eva padena. Dasa cakkavāḷasahassāni gahitānīti jātikhettāpekkhāya gahitāni. Ekacakkavāḷenevāti iminā eva ekacakkavāḷena, na yena kenaci. Yathā ‘‘imasmiṃyeva cakkavāḷe uppajjantī’’ti vutte imasmimpi cakkavāḷe jambudīpe eva, tatthāpi majjhimadese evāti paricchindituṃ vaṭṭati, evaṃ ‘‘ekissā lokadhātuyā’’ti jātikhette adhippetepi imināva cakkavāḷena paricchindituṃ vaṭṭati.
པཋམཝགྒཝཎྞནཱ ནིཊྛིཏཱ།
Paṭhamavaggavaṇṇanā niṭṭhitā.
༡༥. ཨཊྛཱནཔཱལི༹ (དུཏིཡཝགྒ)
15. Aṭṭhānapāḷi (dutiyavagga)
(༡༥) ༢. ཨཊྛཱནཔཱལི༹-དུཏིཡཝགྒཝཎྞནཱ
(15) 2. Aṭṭhānapāḷi-dutiyavaggavaṇṇanā
༢༧༨. ཝིཝཱདུཔཙྪེདཏོཏི ཝིཝཱདུཔཙྪེདཀཱརཎཱ། དྭཱིསུ ཨུཔྤནྣེསུ ཡོ ཝིཝཱདོ བྷཝེཡྻ, ཏསྶ ཨནུཔྤཱདོཡེཝེཏྠ ཝིཝཱདུཔཙྪེདོ། ཨེཀསྨིཾ དཱིཔེཏིཨཱདིནཱ དཱིཔནྟརེཔི ཨེཀཛ྄ཛྷཾ ན ཨུཔྤཛྫཏི, པགེཝ ཨེཀདཱིཔེཏི དསྶེཏི། སོཔི པརིཧཱཡེཐཱཏི ཙཀྐཝཱལ༹སྶ པདེསེ ཨེཝ པཝཏྟིཏབྦཏྟཱ པརིཧཱཡེཡྻ།
278.Vivādupacchedatoti vivādupacchedakāraṇā. Dvīsu uppannesu yo vivādo bhaveyya, tassa anuppādoyevettha vivādupacchedo. Ekasmiṃ dīpetiādinā dīpantarepi ekajjhaṃ na uppajjati, pageva ekadīpeti dasseti. Sopi parihāyethāti cakkavāḷassa padese eva pavattitabbattā parihāyeyya.
༢༧༩-༢༨༠. མནུསྶཏྟནྟི མནུསྶབྷཱཝོ ཏསྶེཝ པབྦཛྫཱདིགུཎཱནཾ ཡོགྒབྷཱཝཏོ། ལིངྒསམྤཏྟཱིཏི པུརིསབྷཱཝོ། ཧེཏཱུཏི མནོཝཙཱིཔཎིདྷཱནཔུབྦིཀཱ ཧེཏུསམྤདཱ། སཏྠཱརདསྶནནྟི སཏྠུསམྨུཁཱིབྷཱཝོ། པབྦཛྫཱཏི ཀམྨཀིརིཡཝཱདཱིསུ ཏཱཔསེསུ, བྷིཀྑཱུསུ ཝཱ པབྦཛྫཱ། གུཎསམྤཏྟཱིཏི ཨབྷིཉྙཱདིགུཎསམྤདཱ། ཨདྷིཀཱརོཏི བུདྡྷེ ཨུདྡིསྶ ཨདྷིཀོ ཀཱརོ, སཝིསེསཱ ཨུཔཀཱརཀིརིཡཱ ཨདྷིཀོ སཀྐཱརོཏི ཝུཏྟཾ ཧོཏི། ཚནྡོཝ ཚནྡཏཱ, སམྨཱསམྦོདྷིཾ ཨུདྡིསྶ སཱཏིསཡོ ཀཏྟུཀམྱཏཱཀུསལཙྪནྡོ། ཨཊྛདྷམྨསམོདྷཱནཱཏི ཨེཏེསཾ ཨཊྛནྣཾ དྷམྨཱནཾ སམཱཡོགེན། ཨབྷིནཱིཧཱརོཏི ཀཱཡཔཎིདྷཱནཾ། སམིཛ྄ཛྷཏཱིཏི ནིཔྥཛྫཏི། ཨཡམེཏྠ སངྑེཔོ, ཝིཏྠཱརོ པན པརམཏྠདཱིཔནིཡཱ ཙརིཡཱཔིཊཀཝཎྞནཱཡ (ཙརིཡཱ॰ ཨཊྛ॰ པཀིཎྞཀཀཐཱ) ཝུཏྟནཡེན ཝེདིཏབྦོ། སབྦཱཀཱརཔརིཔཱུརམེཝཱཏི པརིཔུཎྞལཀྑཎཏཱཡ སཏྟུཏྟམཱདཱིཧི སབྦཱཀཱརེན སམྤནྣམེཝ། ན ཧི ཨིཏྠིཡཱ ཀོསོཧིཏཝཏྠགུཡ྄ཧཏཱདི སམྦྷཝཏི། དུཏིཡཔཀཏི ཙ ནཱམ པཋམཔཀཏིཏོ ནིཧཱིནཱ ཨེཝ། ཏེནེཝཱཧ – ཨནནྟརཝཱརེ ‘‘ཡསྨཱ’’ཏིཨཱདི།
279-280.Manussattanti manussabhāvo tasseva pabbajjādiguṇānaṃ yoggabhāvato. Liṅgasampattīti purisabhāvo. Hetūti manovacīpaṇidhānapubbikā hetusampadā. Satthāradassananti satthusammukhībhāvo. Pabbajjāti kammakiriyavādīsu tāpasesu, bhikkhūsu vā pabbajjā. Guṇasampattīti abhiññādiguṇasampadā. Adhikāroti buddhe uddissa adhiko kāro, savisesā upakārakiriyā adhiko sakkāroti vuttaṃ hoti. Chandova chandatā, sammāsambodhiṃ uddissa sātisayo kattukamyatākusalacchando. Aṭṭhadhammasamodhānāti etesaṃ aṭṭhannaṃ dhammānaṃ samāyogena. Abhinīhāroti kāyapaṇidhānaṃ. Samijjhatīti nipphajjati. Ayamettha saṅkhepo, vitthāro pana paramatthadīpaniyā cariyāpiṭakavaṇṇanāya (cariyā. aṭṭha. pakiṇṇakakathā) vuttanayena veditabbo. Sabbākāraparipūramevāti paripuṇṇalakkhaṇatāya sattuttamādīhi sabbākārena sampannameva. Na hi itthiyā kosohitavatthaguyhatādi sambhavati. Dutiyapakati ca nāma paṭhamapakatito nihīnā eva. Tenevāha – anantaravāre ‘‘yasmā’’tiādi.
༢༨༡. ཨིདྷ པུརིསསྶ ཏཏྠ ནིབྦཏྟནཏོཏི ཨིམསྨིཾ མནུསྶལོཀེ པུརིསབྷཱུཏསྶ ཏཏྠ བྲཧྨལོཀེ བྲཧྨཏྟབྷཱཝེན ནིབྦཏྟནཏོ། ཏེན ཨསཏིཔི པུརིསལིངྒེ པུརིསཱཀཱརཱ བྲཧྨཱནོ ཧོནྟཱིཏི དསྶེཏི། ཏཾཡེཝ ཙ པུརིསཱཀཱརཾ སནྡྷཱཡ ཝུཏྟཾ བྷགཝཏཱ ‘‘ཡཾ པུརིསོ བྲཧྨཏྟཾ ཀཱརེཡྻཱ’’ཏི། ཏེནེཝཱཧ – ‘‘སམཱནེཔཱི’’ཏིཨཱདི། ཡདི ཨེཝཾ ཨིཏྠིཡོ བྲཧྨལོཀེ ན ཨུཔྤཛྫེཡྻུནྟི ཨཱཧ – ‘‘བྲཧྨཏྟ’’ནྟིཨཱདི།
281.Idha purisassa tattha nibbattanatoti imasmiṃ manussaloke purisabhūtassa tattha brahmaloke brahmattabhāvena nibbattanato. Tena asatipi purisaliṅge purisākārā brahmāno hontīti dasseti. Taṃyeva ca purisākāraṃ sandhāya vuttaṃ bhagavatā ‘‘yaṃ puriso brahmattaṃ kāreyyā’’ti. Tenevāha – ‘‘samānepī’’tiādi. Yadi evaṃ itthiyo brahmaloke na uppajjeyyunti āha – ‘‘brahmatta’’ntiādi.
༢༩༠-༢༩༥. ‘‘ཀཱཡདུཙྩརིཏསྶཱ’’ཏིཨཱདིཔཱལི༹ཡཱ ཀམྨནིཡཱམོ ནཱམ ཀཐིཏོ། སམཉྫནཾ སམངྒོ, སམནྣཱགམོ, སོ ཨེཏསྶ ཨཏྠཱིཏི སམངྒཱི, སམནྣཱགཏོ, སམཉྫནསཱིལོ ཝཱ སམངྒཱི, པུབྦབྷཱགེ ཨུཔཀརཎསམུདཱཡཏོ པབྷུཏི ཨཱཡཱུཧནཝསེན ཨཱཡཱུཧནསམངྒཱིཏཱ, སནྣིཊྛཱཔཀཙེཏནཱཝསེན ཙེཏནཱསམངྒིཏཱ། ཙེཏནཱསནྟཏིཝསེན ཝཱ ཨཱཡཱུཧནསམངྒིཏཱ, ཏཾཏཾཙེཏནཱཀྑཎཝསེན ཙེཏནཱསམངྒཱིཏཱ། ཀཏཱུཔཙིཏསྶ ཨཝིཔཀྐཝིཔཱཀསྶ ཀམྨསྶ ཝསེན ཀམྨསམངྒིཏཱ། ཀམྨེ པན ཝིཔཙྩིཏུཾ ཨཱརདྡྷེ ཝིཔཱཀཔྤཝཏྟིཝསེན ཝིཔཱཀསམངྒིཏཱ། ཀམྨཱདཱིནཾ ཨུཔཊྛཱནཀཱལཝསེན ཨུཔཊྛཱནསམངྒིཏཱ། ཀུསལཱཀུསལཀམྨཱཡཱུཧནཀྑཎེཏི ཀུསལཀམྨསྶ ཨཀུསལཀམྨསྶ ཙ སམཱིཧནཀྑཎེ། ཏཐཱཏི ཨིམིནཱ ཀུསལཱཀུསལཀམྨཔདཾ ཨཱཀཌྜྷཏི། ཡཐཱ ཀཏཾ ཀམྨཾ ཕལདཱནསམཏྠཾ ཧོཏི, ཏཐཱ ཀཏཾ ཨུཔཙིཏཾ། ཝིཔཱཀཱརཧནྟི དུཏིཡབྷཝཱདཱིསུ ཝིཔཙྩནཱརཧཾ། ཨུཔྤཛྫམཱནཱནཾ ཨུཔཔཏྟིནིམིཏྟཾ ཨུཔཊྛཱཏཱིཏི ཡོཛནཱ། ཨུཔཔཏྟིཡཱ ཨུཔྤཛྫནསྶ ནིམིཏྟཾ ཀཱརཎནྟི ཨུཔཔཏྟིནིམིཏྟཾ, ཀམྨཾ, ཀམྨནིམིཏྟཾ, གཏིནིམིཏྟཉྩ། ཨཊྛཀཐཱཡཾ པན གཏིནིམིཏྟཝསེནེཝ ཡོཛནཱ དསྶིཏཱ། ཀམྨཀམྨནིམིཏྟཱནམྤི ཨུཔཊྛཱནཾ ཡཐཱརཧཾ དཊྛབྦཾ། ‘‘ཡཱནིསྶ ཏཱནི པུབྦེ ཀཏཱནི ཀམྨཱནི, ཏཱནིསྶ ཏསྨིཾ སམཡེ ཨོལམྦནྟི ཨཛ྄ཛྷོལམྦནྟི ཨབྷིལམྦནྟི’’ཏི (མ॰ ནི॰ ༣.༢༤༨) ཝཙནཏོ སཱཡནྷེ མཧནྟཱནཾ པབྦཏཀཱུཊཱནཾ ཚཱཡཱ ཝིཡ ཨཱསནྣམརཎསྶ སཏྟསྶ ཙིཏྟེ སུཔིནེ ཝིཡ ཝིཔཙྩིཏུཾ ཀཏོཀཱསཾ ཀམྨཾ, ཏསྶ ནིམིཏྟཾ གཏིནིམིཏྟཾ ཨུཔཏིཊྛཏེཝ། ཙལཏཱིཏི པརིཝཏྟཏི། ཨེཀེན ཧི ཀམྨུནཱ ཏཛྫེ ནིམིཏྟེ ཨུཔཊྛིཏེ པཙྩཡཝིསེསཝསེན ཏཏོ ཨཉྙེན ཀམྨུནཱ ཏདཉྙསྶ ནིམིཏྟསྶ ཨུཔཊྛཱནཾ པརིཝཏྟནཾ། སེསཱ ནིཙྩལཱ ཨཝསེསཱ ཙཏུབྦིདྷཱཔི སམངྒིཏཱ ནིཙྩལཱ ཨཔརིཝཏྟནཏོ།
290-295. ‘‘Kāyaduccaritassā’’tiādipāḷiyā kammaniyāmo nāma kathito. Samañjanaṃ samaṅgo, samannāgamo, so etassa atthīti samaṅgī, samannāgato, samañjanasīlo vā samaṅgī, pubbabhāge upakaraṇasamudāyato pabhuti āyūhanavasena āyūhanasamaṅgītā, sanniṭṭhāpakacetanāvasena cetanāsamaṅgitā. Cetanāsantativasena vā āyūhanasamaṅgitā, taṃtaṃcetanākkhaṇavasena cetanāsamaṅgītā. Katūpacitassa avipakkavipākassa kammassa vasena kammasamaṅgitā. Kamme pana vipaccituṃ āraddhe vipākappavattivasena vipākasamaṅgitā. Kammādīnaṃ upaṭṭhānakālavasena upaṭṭhānasamaṅgitā. Kusalākusalakammāyūhanakkhaṇeti kusalakammassa akusalakammassa ca samīhanakkhaṇe. Tathāti iminā kusalākusalakammapadaṃ ākaḍḍhati. Yathā kataṃ kammaṃ phaladānasamatthaṃ hoti, tathā kataṃ upacitaṃ. Vipākārahanti dutiyabhavādīsu vipaccanārahaṃ. Uppajjamānānaṃ upapattinimittaṃ upaṭṭhātīti yojanā. Upapattiyā uppajjanassa nimittaṃ kāraṇanti upapattinimittaṃ, kammaṃ, kammanimittaṃ, gatinimittañca. Aṭṭhakathāyaṃ pana gatinimittavaseneva yojanā dassitā. Kammakammanimittānampi upaṭṭhānaṃ yathārahaṃ daṭṭhabbaṃ. ‘‘Yānissa tāni pubbe katāni kammāni, tānissa tasmiṃ samaye olambanti ajjholambanti abhilambanti’’ti (ma. ni. 3.248) vacanato sāyanhe mahantānaṃ pabbatakūṭānaṃ chāyā viya āsannamaraṇassa sattassa citte supine viya vipaccituṃ katokāsaṃ kammaṃ, tassa nimittaṃ gatinimittaṃ upatiṭṭhateva. Calatīti parivattati. Ekena hi kammunā tajje nimitte upaṭṭhite paccayavisesavasena tato aññena kammunā tadaññassa nimittassa upaṭṭhānaṃ parivattanaṃ. Sesā niccalā avasesā catubbidhāpi samaṅgitā niccalā aparivattanato.
སུནཁཝཱཛིཀོཏི སུནཁེཧི མིགཝཱཛཝསེན ཝཛནསཱིལོ, སུནཁལུདྡཀོཏི ཨཏྠོ། ཏལསནྠརཎཔཱུཛནྟི བྷཱུམིཏལསྶ པུཔྥེཧི སནྠརཎཔཱུཛཾ། ཨཱཡཱུཧནཙེཏནཱ ཀམྨསམངྒིཏཱཝསེནཱཏི ཀཱཡདུཙྩརིཏསྶ ཨཔརཱཔརཾ ཨཱཡཱུཧནེན སནྣིཊྛཱཔཀཙེཏནཱཡ ཏསྶེཝ པཀཔྤནེ ཀམྨཀྑཡཀརཉཱཎེན ཨཁེཔིཏཏྟཱ ཡཐཱུཔཙིཏཀམྨུནཱ ཙ སམངྒིབྷཱཝསྶ ཝསེན།
Sunakhavājikoti sunakhehi migavājavasena vajanasīlo, sunakhaluddakoti attho. Talasantharaṇapūjanti bhūmitalassa pupphehi santharaṇapūjaṃ. Āyūhanacetanā kammasamaṅgitāvasenāti kāyaduccaritassa aparāparaṃ āyūhanena sanniṭṭhāpakacetanāya tasseva pakappane kammakkhayakarañāṇena akhepitattā yathūpacitakammunā ca samaṅgibhāvassa vasena.
ཀམྨནྟི ཨཀུསལཀམྨཾ། ཏསྨིཾཡེཝ ཁཎེཏི ཨཱཡཱུཧནཀྑཎེཡེཝ། ཏསྶཱཏི ཀམྨསམངྒིནོ པུགྒལསྶ སགྒོ ཝཱརིཏོ, ཏཉྩེ ཀམྨཾ ཝིཔཱཀཝཱརཾ ལབྷེཡྻཱཏི ཨདྷིཔྤཱཡོ། སགྒོ ཝཱརིཏོཏི ཙ ནིདསྶནམཏྟཾ། མནུསྶལོཀོཔིསྶ ཝཱརིཏོཝཱཏི། ཨཔརེ པན པུརིམེཧི ཝིཔཱཀཱཝརཎསྶ ཨནུདྡྷཊཏྟཱ ‘‘ཏསྨིཾཡེཝ ཁཎེ’’ཏི ཙ ཨཝིསེསེན ཝུཏྟཏྟཱ ཏཾ དོསཾ པརིཧརིཏུཾ ‘‘ཨཱཡཱུཧིཏཀམྨཾ ནཱམཱ’’ཏིཨཱདིམཱཧ། ཡདཱ ཀམྨཾ ཝིཔཱཀཝཱརཾ ལབྷཏཱིཏི ཨིདཾ ཀཏོཀཱསསྶ ཨཔྤཊིབཱཧིཡཏྟཱ ཝུཏྟཾ ། ཏཐཱ ཧི བྷགཝཱ ཏཏིཡཔཱརཱཛིཀཝཏྠུསྨིཾ (པཱརཱ॰ ༡༦༢ ཨཱདཡོ) པཊིསལླཱིཡི, ཨིམསྨིཾ སུཏྟེ ‘‘ཀཱཡདུཙྩརིཏསམངྒཱི’’ཏི ཨཱགཏཏྟཱ ཝིཔཱཀཱུཔཊྛཱནསམངྒིཏཱ ན ལབྦྷནྟི།
Kammanti akusalakammaṃ. Tasmiṃyeva khaṇeti āyūhanakkhaṇeyeva. Tassāti kammasamaṅgino puggalassa saggo vārito, tañce kammaṃ vipākavāraṃ labheyyāti adhippāyo. Saggo vāritoti ca nidassanamattaṃ. Manussalokopissa vāritovāti. Apare pana purimehi vipākāvaraṇassa anuddhaṭattā ‘‘tasmiṃyeva khaṇe’’ti ca avisesena vuttattā taṃ dosaṃ pariharituṃ ‘‘āyūhitakammaṃ nāmā’’tiādimāha. Yadā kammaṃ vipākavāraṃ labhatīti idaṃ katokāsassa appaṭibāhiyattā vuttaṃ . Tathā hi bhagavā tatiyapārājikavatthusmiṃ (pārā. 162 ādayo) paṭisallīyi, imasmiṃ sutte ‘‘kāyaduccaritasamaṅgī’’ti āgatattā vipākūpaṭṭhānasamaṅgitā na labbhanti.
(དུཏིཡཝགྒཝཎྞནཱ ནིཊྛིཏཱ།)
(Dutiyavaggavaṇṇanā niṭṭhitā.)
ཨཊྛཱནཔཱལི༹ཝཎྞནཱཡཾ ཨནུཏྟཱནཏྠདཱིཔནཱ ནིཊྛིཏཱ།
Aṭṭhānapāḷivaṇṇanāyaṃ anuttānatthadīpanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡༥. ཨཊྛཱནཔཱལི༹ • 15. Aṭṭhānapāḷi
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༥. ཨཊྛཱནཔཱལི༹ • 15. Aṭṭhānapāḷi
