| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
২. অত্থঙ্গতসিক্খাপদৰণ্ণনা
2. Atthaṅgatasikkhāpadavaṇṇanā
১৫৩. দুতিযে কুসলানং ধম্মানং সাতচ্চকিরিযাযাতি পুব্বভাগপ্পটিপত্তিৰসেন ৰুত্তং। মুনাতীতি জানাতি। তেন ঞাণেনাতি তেন অরহত্তফলপঞ্ঞাসঙ্খাতেন ঞাণেন। পথেসূতি উপাযমগ্গেসু। অরহতো পরিনিট্ঠিতসিক্খত্তা আহ ‘‘ইদঞ্চ…পে॰… ৰুত্ত’’ন্তি। অথ ৰা ‘‘অপ্পমজ্জতো সিক্খতো’’তি ইমেসং পদানং হেতুঅত্থতা দট্ঠব্বা, তস্মা অপ্পমজ্জনহেতু সিক্খনহেতু চ অধিচেতসোতি অত্থো। সোকাতি চিত্তসন্তাপা। এত্থ চ অধিচেতসোতি ইমিনা অধিচিত্তসিক্খা, অপ্পমজ্জতোতি ইমিনা অধিসীলসিক্খা, মুনিনো মোনপথেসু সিক্খতোতি এতেহি অধিপঞ্ঞাসিক্খা, মুনিনোতি ৰা এতেন অধিপঞ্ঞাসিক্খা, মোনপথেসু সিক্খতোতি এতেন তাসং লোকুত্তরসিক্খানং পুব্বভাগপ্পটিপদা, সোকা ন ভৰন্তীতিআদীহি সিক্খাপারিপূরিযা আনিসংসা পকাসিতাতি ৰেদিতব্বং।
153. Dutiye kusalānaṃ dhammānaṃ sātaccakiriyāyāti pubbabhāgappaṭipattivasena vuttaṃ. Munātīti jānāti. Tena ñāṇenāti tena arahattaphalapaññāsaṅkhātena ñāṇena. Pathesūti upāyamaggesu. Arahato pariniṭṭhitasikkhattā āha ‘‘idañca…pe… vutta’’nti. Atha vā ‘‘appamajjato sikkhato’’ti imesaṃ padānaṃ hetuatthatā daṭṭhabbā, tasmā appamajjanahetu sikkhanahetu ca adhicetasoti attho. Sokāti cittasantāpā. Ettha ca adhicetasoti iminā adhicittasikkhā, appamajjatoti iminā adhisīlasikkhā, munino monapathesu sikkhatoti etehi adhipaññāsikkhā, muninoti vā etena adhipaññāsikkhā, monapathesu sikkhatoti etena tāsaṃ lokuttarasikkhānaṃ pubbabhāgappaṭipadā, sokā na bhavantītiādīhi sikkhāpāripūriyā ānisaṃsā pakāsitāti veditabbaṃ.
কোকনুদন্তি পদুমৰিসেসনং যথা ‘‘কোকাসয’’ন্তি, তং কির বহুপত্তং ৰণ্ণসম্পন্নং অতিৰিয সুগন্ধঞ্চ হোতি। ‘‘কোকনুদং নাম সেতপদুম’’ন্তিপি ৰদন্তি। পাতোতি পগেৰ। অযঞ্হেত্থ অত্থো – যথা কোকনুদসঙ্খাতং পদুমং পাতো সূরিযুগ্গমনৰেলাযং ফুল্লং ৰিকসিতং অৰীতগন্ধং সিযা ৰিরোচমানং, এৰং সরীরগন্ধেন গুণগন্ধেন চ সুগন্ধং সরদকালে অন্তলিক্খে আদিচ্চমিৰ অত্তনো তেজসা তপন্তং অঙ্গেহি নিচ্ছরণজুতিতায অঙ্গীরসং সম্মাসম্বুদ্ধং পস্সাতি।
Kokanudanti padumavisesanaṃ yathā ‘‘kokāsaya’’nti, taṃ kira bahupattaṃ vaṇṇasampannaṃ ativiya sugandhañca hoti. ‘‘Kokanudaṃ nāma setapaduma’’ntipi vadanti. Pātoti pageva. Ayañhettha attho – yathā kokanudasaṅkhātaṃ padumaṃ pāto sūriyuggamanavelāyaṃ phullaṃ vikasitaṃ avītagandhaṃ siyā virocamānaṃ, evaṃ sarīragandhena guṇagandhena ca sugandhaṃ saradakāle antalikkhe ādiccamiva attano tejasā tapantaṃ aṅgehi niccharaṇajutitāya aṅgīrasaṃ sammāsambuddhaṃ passāti.
অভব্বোতি পটিপত্তিসারমিদং সাসনং, পটিপত্তি চ পরিযত্তিমূলিকা, ত্ৰঞ্চ পরিযত্তিং উগ্গহেতুং অসমত্থো, তস্মা অভব্বোতি অধিপ্পাযো। সুদ্ধং পিলোতিকখণ্ডন্তি ইদ্ধিযা অভিসঙ্খতং পরিসুদ্ধং চোল়খণ্ডং। তদা কির ভগৰা ‘‘ন সজ্ঝাযং কাতুং অসক্কোন্তো মম সাসনে অভব্বো নাম হোতি, মা সোচি ভিক্খূ’’তি তং বাহাযং গহেত্ৰা ৰিহারং পৰিসিত্ৰা ইদ্ধিযা পিলোতিকখণ্ডং অভিনিম্মিনিত্ৰা ‘‘হন্দ, ভিক্খু, ইমং পরিমজ্জন্তো ‘রজোহরণং রজোহরণ’ন্তি পুনপ্পুনং সজ্ঝাযং করোহী’’তি ৰত্ৰা অদাসি তত্থ পুব্বেকতাধিকারত্তা।
Abhabboti paṭipattisāramidaṃ sāsanaṃ, paṭipatti ca pariyattimūlikā, tvañca pariyattiṃ uggahetuṃ asamattho, tasmā abhabboti adhippāyo. Suddhaṃ pilotikakhaṇḍanti iddhiyā abhisaṅkhataṃ parisuddhaṃ coḷakhaṇḍaṃ. Tadā kira bhagavā ‘‘na sajjhāyaṃ kātuṃ asakkonto mama sāsane abhabbo nāma hoti, mā soci bhikkhū’’ti taṃ bāhāyaṃ gahetvā vihāraṃ pavisitvā iddhiyā pilotikakhaṇḍaṃ abhinimminitvā ‘‘handa, bhikkhu, imaṃ parimajjanto ‘rajoharaṇaṃ rajoharaṇa’nti punappunaṃ sajjhāyaṃ karohī’’ti vatvā adāsi tattha pubbekatādhikārattā.
সো কির পুব্বে রাজা হুত্ৰা নগরং পদক্খিণং করোন্তো নলাটতো সেদে মুচ্চন্তে পরিসুদ্ধেন সাটকেন নলাটং পুঞ্ছি, সাটকো কিলিট্ঠো অহোসি । সো ‘‘ইমং সরীরং নিস্সায এৰরূপো পরিসুদ্ধসাটকো পকতিং জহিত্ৰা কিলিট্ঠো জাতো, অনিচ্চা ৰত সঙ্খারা’’তি অনিচ্চসঞ্ঞং পটিলভতি, তেন কারণেনস্স রজোহরণমেৰ পচ্চযো জাতো। রজং হরতীতি রজোহরণং। সংৰেগং পটিলভিত্ৰাতি অসুভসঞ্ঞং অনিচ্চসঞ্ঞঞ্চ উপট্ঠপেন্তো সংৰেগং পটিলভিত্ৰা। সো হি যোনিসো উম্মজ্জন্তো ‘‘পরিসুদ্ধং ৰত্থং, নত্থেত্থ দোসো, অত্তভাৰস্স পনাযং দোসো’’তি অসুভসঞ্ঞং অনিচ্চসঞ্ঞঞ্চ পটিলভিত্ৰা নামরূপপরিগ্গহাদিনা পঞ্চসু খন্ধেসু ঞাণং ওতারেত্ৰা কলাপসম্মসনাদিক্কমেন ৰিপস্সনং ৰড্ঢেত্ৰা উদযব্বযঞাণাদিপঅপাটিযা ৰিপস্সনং অনুলোমগোত্রভুসমীপং পাপেসি। তং সন্ধায ৰুত্তং ‘‘ৰিপস্সনং আরভী’’তি। ওভাসগাথং অভাসীতি ওভাসৰিস্সজ্জনপুব্বকভাসিতগাথা ওভাসগাথা, তং অভাসীতি অত্থো।
So kira pubbe rājā hutvā nagaraṃ padakkhiṇaṃ karonto nalāṭato sede muccante parisuddhena sāṭakena nalāṭaṃ puñchi, sāṭako kiliṭṭho ahosi . So ‘‘imaṃ sarīraṃ nissāya evarūpo parisuddhasāṭako pakatiṃ jahitvā kiliṭṭho jāto, aniccā vata saṅkhārā’’ti aniccasaññaṃ paṭilabhati, tena kāraṇenassa rajoharaṇameva paccayo jāto. Rajaṃ haratīti rajoharaṇaṃ. Saṃvegaṃ paṭilabhitvāti asubhasaññaṃ aniccasaññañca upaṭṭhapento saṃvegaṃ paṭilabhitvā. So hi yoniso ummajjanto ‘‘parisuddhaṃ vatthaṃ, natthettha doso, attabhāvassa panāyaṃ doso’’ti asubhasaññaṃ aniccasaññañca paṭilabhitvā nāmarūpapariggahādinā pañcasu khandhesu ñāṇaṃ otāretvā kalāpasammasanādikkamena vipassanaṃ vaḍḍhetvā udayabbayañāṇādipaapāṭiyā vipassanaṃ anulomagotrabhusamīpaṃ pāpesi. Taṃ sandhāya vuttaṃ ‘‘vipassanaṃ ārabhī’’ti. Obhāsagāthaṃ abhāsīti obhāsavissajjanapubbakabhāsitagāthā obhāsagāthā, taṃ abhāsīti attho.
এত্থ চ ‘‘অধিচেতসোতি ইমং ওভাসগাথং অভাসী’’তি ইধেৰ ৰুত্তং। ৰিসুদ্ধিমগ্গে (ৰিসুদ্ধি॰ ২.৩৮৬) পন ধম্মপদট্ঠকথাযং (ধ॰ প॰ অট্ঠ॰ ১.চূল়পন্থকত্থেরৰত্থু) থেরগাথাসংৰণ্ণনাযঞ্চ (থেরগা॰ অট্ঠ॰ ২.৫৬৬) –
Ettha ca ‘‘adhicetasoti imaṃ obhāsagāthaṃ abhāsī’’ti idheva vuttaṃ. Visuddhimagge (visuddhi. 2.386) pana dhammapadaṭṭhakathāyaṃ (dha. pa. aṭṭha. 1.cūḷapanthakattheravatthu) theragāthāsaṃvaṇṇanāyañca (theragā. aṭṭha. 2.566) –
‘‘রাগো রজো ন চ পন রেণু ৰুচ্চতি।
‘‘Rāgo rajo na ca pana reṇu vuccati;
রাগস্সেতং অধিৰচনং রজোতি।
Rāgassetaṃ adhivacanaṃ rajoti;
এতং রজং ৰিপ্পজহিত্ৰা পণ্ডিতা।
Etaṃ rajaṃ vippajahitvā paṇḍitā;
ৰিহরন্তি তে ৰিগতরজস্স সাসনে॥
Viharanti te vigatarajassa sāsane.
‘‘দোসো…পে॰… সাসনে॥
‘‘Doso…pe… sāsane.
‘‘মোহো রজো ন চ পন রেণু ৰুচ্চতি।
‘‘Moho rajo na ca pana reṇu vuccati;
মোহস্সেতং অধিৰচনং রজোতি।
Mohassetaṃ adhivacanaṃ rajoti;
এতং রজং ৰিপ্পজহিত্ৰা পণ্ডিতা।
Etaṃ rajaṃ vippajahitvā paṇḍitā;
ৰিহরন্তি তে ৰিগতরজস্স সাসনেতি॥ –
Viharanti te vigatarajassa sāsaneti. –
ইমা তিস্সো ওভাসগাথা অভাসী’’তি ৰুত্তং। অধিচেতসোতি চ অযং চূল়পন্থকত্থেরস্স উদানগাথাতি ইমিস্সাযেৰ পাল়িযা আগতং। থেরগাথাযং পন চূল়পন্থকত্থেরস্স উদানগাথাসু অযং অনারুল়্হা, ‘‘একুদানিযত্থেরস্স পন অযং উদানগাথা’’তি (থেরগা॰ অট্ঠ॰ ১.একুদানিযত্থেরগাথাৰণ্ণনা) তত্থ ৰুত্তং। এৰং সন্তেপি ইমিস্সা পাল়িযা অট্ঠকথায চ এৰমাগতত্তা চূল়পন্থকত্থেরস্সপি অযং উদানগাথা ওভাসগাথাৰসেন চ ভগৰতা ভাসিতাতি গহেতব্বং। অরহত্তং পাপুণীতি অভিঞ্ঞাপটিসম্ভিদাপরিৰারং অরহত্তং পাপুণি। অভব্বো ত্ৰন্তিআদিৰচনতো অনুকম্পাৰসেন সদ্ধিৰিহারিকাদিং সঙ্ঘিকৰিহারা নিক্কড্ঢাপেন্তস্স অনাপত্তি ৰিয দিস্সতি। অভব্বো হি থেরো সঞ্চিচ্চ তং কাতুং, নিক্কড্ঢনসিক্খাপদে ৰা অপঞ্ঞত্তে থেরেন এৰং কতন্তি গহেতব্বং।
Imā tisso obhāsagāthā abhāsī’’ti vuttaṃ. Adhicetasoti ca ayaṃ cūḷapanthakattherassa udānagāthāti imissāyeva pāḷiyā āgataṃ. Theragāthāyaṃ pana cūḷapanthakattherassa udānagāthāsu ayaṃ anāruḷhā, ‘‘ekudāniyattherassa pana ayaṃ udānagāthā’’ti (theragā. aṭṭha. 1.ekudāniyattheragāthāvaṇṇanā) tattha vuttaṃ. Evaṃ santepi imissā pāḷiyā aṭṭhakathāya ca evamāgatattā cūḷapanthakattherassapi ayaṃ udānagāthā obhāsagāthāvasena ca bhagavatā bhāsitāti gahetabbaṃ. Arahattaṃ pāpuṇīti abhiññāpaṭisambhidāparivāraṃ arahattaṃ pāpuṇi. Abhabbo tvantiādivacanato anukampāvasena saddhivihārikādiṃ saṅghikavihārā nikkaḍḍhāpentassa anāpatti viya dissati. Abhabbo hi thero sañcicca taṃ kātuṃ, nikkaḍḍhanasikkhāpade vā apaññatte therena evaṃ katanti gahetabbaṃ.
১৫৬. ওৰদন্তস্স পাচিত্তিযন্তি অত্থঙ্গতে সূরিযে গরুধম্মেহি ৰা অঞ্ঞেন ৰা ধম্মেনেৰ ওৰদন্তস্স সম্মতস্সপি পাচিত্তিযং। সেসমেত্থ উত্তানমেৰ। অত্থঙ্গতসূরিযতা, পরিপুণ্ণূপসম্পন্নতা, ওৰদনন্তি ইমানি পনেত্থ তীণি অঙ্গানি।
156.Ovadantassa pācittiyanti atthaṅgate sūriye garudhammehi vā aññena vā dhammeneva ovadantassa sammatassapi pācittiyaṃ. Sesamettha uttānameva. Atthaṅgatasūriyatā, paripuṇṇūpasampannatā, ovadananti imāni panettha tīṇi aṅgāni.
অত্থঙ্গতসিক্খাপদৰণ্ণনা নিট্ঠিতা।
Atthaṅgatasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. ওৰাদৰগ্গো • 3. Ovādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. অত্থঙ্গতসিক্খাপদৰণ্ণনা • 2. Atthaṅgatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. অত্থঙ্গতসিক্খাপদৰণ্ণনা • 2. Atthaṅgatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. অত্থঙ্গতসিক্খাপদৰণ্ণনা • 2. Atthaṅgatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২. অত্থঙ্গতসিক্খাপদং • 2. Atthaṅgatasikkhāpadaṃ
