| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
၂. အတ္ထင္ဂတသိက္ခာပဒဝဏ္ဏနာ
2. Atthaṅgatasikkhāpadavaṇṇanā
၁၅၃. ဒုတိယေ ကောကနဒန္တိ ပဒုမဝိသေသံ, တံ ကိရ ဗဟုပတ္တံ ဝဏ္ဏသမ္ပန္နံ။ အယဉ္ဟေတ္ထ အတ္ထော – ယထာ ကောကနဒသင္ခာတံ ပဒုမံ, ဧဝံ ဖုလ္လမုခပဒုမံ အဝီတဂုဏဂန္ဓံ နိမ္မလေ အန္တလိက္ခေ အာဒိစ္စံ ဝိယ စ အတ္တနော တေဇသာ တပန္တံ တတော ဧဝ ဝိရောစမာနံ အင္ဂေဟိ နိစ္ဆရဏကဇုတိယာ အင္ဂီရသံ သမ္မာသမ္ဗုဒ္ဓံ ပသ္သာတိ။ ရဇောဟရဏန္တိ သရီရေ ရဇံ ပုဉ္ဆတီတိ ရဇောဟရဏန္တိ ပုဉ္ဆနစောဠသ္သ နာမံ။ ဩဘာသဝိသ္သဇ္ဇနပုဗ္ဗကာ ဘာသိတဂာထာ ဩဘာသဂာထာ နာမ။ ဝိသုဒ္ဓိမဂ္ဂာဒီသု (ဝိသုဒ္ဓိ. ၂.၃၈၆) ပန ‘‘ရာဂော ရဇော န စ ပန ရေဏု ဝုစ္စတီ’’တိအာဒိ ဩဘာသဂာထာ ဝုတ္တာ, န ပနေသာ ‘‘အဓိစေတသော’’တိ ဂာထာ။ အယဉ္စ စူဠပန္ထကတ္ထေရသ္သ ဥဒာနဂာထာတိ ဥဒာနပာဠိယံ နတ္ထိ, ဧကုဒာနိယတ္ထေရသ္သ (ထေရဂာ. ၁.၆၇ ဧကုဒာနိယတ္ထေရဂာထာဝဏ္ဏနာ) နာယံ ဥဒာနဂာထာတိ တတ္ထ ဝုတ္တံ။ ဣဓ ပန ပာဠိယာ ဧဝ ဝုတ္တတ္တာ ထေရသ္သာပိ ဥဒာနဂာထာတိ ဂဟေတဗ္ဗံ။ ဣဓ စ အဂရုဓမ္မေနာပိ ဩဝဒတော ပာစိတ္တိယမေဝ။ အတ္ထင္ဂတသူရိယတာ, ပရိပုဏ္ဏူပသမ္ပန္နတာ, ဩဝဒနန္တိ ဣမာနေတ္ထ တီဏိ အင္ဂာနိ။
153. Dutiye kokanadanti padumavisesaṃ, taṃ kira bahupattaṃ vaṇṇasampannaṃ. Ayañhettha attho – yathā kokanadasaṅkhātaṃ padumaṃ, evaṃ phullamukhapadumaṃ avītaguṇagandhaṃ nimmale antalikkhe ādiccaṃ viya ca attano tejasā tapantaṃ tato eva virocamānaṃ aṅgehi niccharaṇakajutiyā aṅgīrasaṃ sammāsambuddhaṃ passāti. Rajoharaṇanti sarīre rajaṃ puñchatīti rajoharaṇanti puñchanacoḷassa nāmaṃ. Obhāsavissajjanapubbakā bhāsitagāthā obhāsagāthā nāma. Visuddhimaggādīsu (visuddhi. 2.386) pana ‘‘rāgo rajo na ca pana reṇu vuccatī’’tiādi obhāsagāthā vuttā, na panesā ‘‘adhicetaso’’ti gāthā. Ayañca cūḷapanthakattherassa udānagāthāti udānapāḷiyaṃ natthi, ekudāniyattherassa (theragā. 1.67 ekudāniyattheragāthāvaṇṇanā) nāyaṃ udānagāthāti tattha vuttaṃ. Idha pana pāḷiyā eva vuttattā therassāpi udānagāthāti gahetabbaṃ. Idha ca agarudhammenāpi ovadato pācittiyameva. Atthaṅgatasūriyatā, paripuṇṇūpasampannatā, ovadananti imānettha tīṇi aṅgāni.
အတ္ထင္ဂတသိက္ခာပဒဝဏ္ဏနာ နိဋ္ဌိတာ။
Atthaṅgatasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၃. ဩဝာဒဝဂ္ဂော • 3. Ovādavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၂. အတ္ထင္ဂတသိက္ခာပဒဝဏ္ဏနာ • 2. Atthaṅgatasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၂. အတ္ထင္ဂတသိက္ခာပဒဝဏ္ဏနာ • 2. Atthaṅgatasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၂. အတ္ထင္ဂတသိက္ခာပဒဝဏ္ဏနာ • 2. Atthaṅgatasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂. အတ္ထင္ဂတသိက္ခာပဒံ • 2. Atthaṅgatasikkhāpadaṃ
