| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৫. অট্ঠঙ্গিকসুত্তং
5. Aṭṭhaṅgikasuttaṃ
২০৫. ‘‘অসপ্পুরিসঞ্চ ৰো, ভিক্খৰে, দেসেস্সামি, অসপ্পুরিসেন অসপ্পুরিসতরঞ্চ; সপ্পুরিসঞ্চ, সপ্পুরিসেন সপ্পুরিসতরঞ্চ। তং সুণাথ…পে॰…।
205. ‘‘Asappurisañca vo, bhikkhave, desessāmi, asappurisena asappurisatarañca; sappurisañca, sappurisena sappurisatarañca. Taṃ suṇātha…pe….
‘‘কতমো চ, ভিক্খৰে, অসপ্পুরিসো? ইধ, ভিক্খৰে, একচ্চো মিচ্ছাদিট্ঠিকো হোতি, মিচ্ছাসঙ্কপ্পো হোতি, মিচ্ছাৰাচো হোতি, মিচ্ছাকম্মন্তো হোতি, মিচ্ছাআজীৰো হোতি, মিচ্ছাৰাযামো হোতি, মিচ্ছাসতি হোতি, মিচ্ছাসমাধি হোতি। অযং ৰুচ্চতি, ভিক্খৰে, অসপ্পুরিসো।
‘‘Katamo ca, bhikkhave, asappuriso? Idha, bhikkhave, ekacco micchādiṭṭhiko hoti, micchāsaṅkappo hoti, micchāvāco hoti, micchākammanto hoti, micchāājīvo hoti, micchāvāyāmo hoti, micchāsati hoti, micchāsamādhi hoti. Ayaṃ vuccati, bhikkhave, asappuriso.
‘‘কতমো চ, ভিক্খৰে, অসপ্পুরিসেন অসপ্পুরিসতরো? ইধ ভিক্খৰে, একচ্চো অত্তনা চ মিচ্ছাদিট্ঠিকো হোতি, পরঞ্চ মিচ্ছাদিট্ঠিযা সমাদপেতি; অত্তনা চ মিচ্ছাসঙ্কপ্পো হোতি, পরঞ্চ মিচ্ছাসঙ্কপ্পে সমাদপেতি; অত্তনা চ মিচ্ছাৰাচো হোতি, পরঞ্চ মিচ্ছাৰাচায সমাদপেতি; অত্তনা চ মিচ্ছাকম্মন্তো হোতি, পরঞ্চ মিচ্ছাকম্মন্তে সমাদপেতি; অত্তনা চ মিচ্ছাআজীৰো হোতি, পরঞ্চ মিচ্ছাআজীৰে সমাদপেতি; অত্তনা চ মিচ্ছাৰাযামো হোতি, পরঞ্চ মিচ্ছাৰাযামে সমাদপেতি; অত্তনা চ মিচ্ছাসতি হোতি, পরঞ্চ মিচ্ছাসতিযা সমাদপেতি; অত্তনা চ মিচ্ছাসমাধি হোতি, পরঞ্চ মিচ্ছাসমাধিম্হি সমাদপেতি। অযং ৰুচ্চতি, ভিক্খৰে, অসপ্পুরিসেন অসপ্পুরিসতরো।
‘‘Katamo ca, bhikkhave, asappurisena asappurisataro? Idha bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti; attanā ca micchāsaṅkappo hoti, parañca micchāsaṅkappe samādapeti; attanā ca micchāvāco hoti, parañca micchāvācāya samādapeti; attanā ca micchākammanto hoti, parañca micchākammante samādapeti; attanā ca micchāājīvo hoti, parañca micchāājīve samādapeti; attanā ca micchāvāyāmo hoti, parañca micchāvāyāme samādapeti; attanā ca micchāsati hoti, parañca micchāsatiyā samādapeti; attanā ca micchāsamādhi hoti, parañca micchāsamādhimhi samādapeti. Ayaṃ vuccati, bhikkhave, asappurisena asappurisataro.
‘‘কতমো চ, ভিক্খৰে, সপ্পুরিসো? ইধ, ভিক্খৰে, একচ্চো সম্মাদিট্ঠিকো হোতি, সম্মাসঙ্কপ্পো হোতি, সম্মাৰাচো হোতি, সম্মাকম্মন্তো হোতি, সম্মাআজীৰো হোতি, সম্মাৰাযামো হোতি, সম্মাসতি হোতি, সম্মাসমাধি হোতি। অযং ৰুচ্চতি, ভিক্খৰে, সপ্পুরিসো।
‘‘Katamo ca, bhikkhave, sappuriso? Idha, bhikkhave, ekacco sammādiṭṭhiko hoti, sammāsaṅkappo hoti, sammāvāco hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti. Ayaṃ vuccati, bhikkhave, sappuriso.
‘‘কতমো চ, ভিক্খৰে, সপ্পুরিসেন সপ্পুরিসতরো? ইধ, ভিক্খৰে, একচ্চো অত্তনা চ সম্মাদিট্ঠিকো হোতি, পরঞ্চ সম্মাদিট্ঠিযা সমাদপেতি; অত্তনা চ সম্মাসঙ্কপ্পো হোতি, পরঞ্চ সম্মাসঙ্কপ্পে সমাদপেতি; অত্তনা চ সম্মাৰাচো হোতি, পরঞ্চ সম্মাৰাচায সমাদপেতি; অত্তনা চ সম্মাকম্মন্তো হোতি, পরঞ্চ সম্মাকম্মন্তে সমাদপেতি; অত্তনা চ সম্মাআজীৰো হোতি, পরঞ্চ সম্মাআজীৰে সমাদপেতি; অত্তনা চ সম্মাৰাযামো হোতি, পরঞ্চ সম্মাৰাযামে সমাদপেতি; অত্তনা চ সম্মাসতি হোতি, পরঞ্চ সম্মাসতিযা সমাদপেতি; অত্তনা চ সম্মাসমাধি হোতি, পরঞ্চ সম্মাসমাধিম্হি সমাদপেতি। অযং ৰুচ্চতি, ভিক্খৰে, সপ্পুরিসেন সপ্পুরিসতরো’’তি। পঞ্চমং।
‘‘Katamo ca, bhikkhave, sappurisena sappurisataro? Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti; attanā ca sammāsaṅkappo hoti, parañca sammāsaṅkappe samādapeti; attanā ca sammāvāco hoti, parañca sammāvācāya samādapeti; attanā ca sammākammanto hoti, parañca sammākammante samādapeti; attanā ca sammāājīvo hoti, parañca sammāājīve samādapeti; attanā ca sammāvāyāmo hoti, parañca sammāvāyāme samādapeti; attanā ca sammāsati hoti, parañca sammāsatiyā samādapeti; attanā ca sammāsamādhi hoti, parañca sammāsamādhimhi samādapeti. Ayaṃ vuccati, bhikkhave, sappurisena sappurisataro’’ti. Pañcamaṃ.
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. সিক্খাপদসুত্তাদিৰণ্ণনা • 1-10. Sikkhāpadasuttādivaṇṇanā
