| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༥. ཨཊྛངྒིཀསུཏྟཾ
5. Aṭṭhaṅgikasuttaṃ
༢༠༥. ‘‘ཨསཔྤུརིསཉྩ ཝོ, བྷིཀྑཝེ, དེསེསྶཱམི, ཨསཔྤུརིསེན ཨསཔྤུརིསཏརཉྩ; སཔྤུརིསཉྩ, སཔྤུརིསེན སཔྤུརིསཏརཉྩ། ཏཾ སུཎཱཐ…པེ॰…།
205. ‘‘Asappurisañca vo, bhikkhave, desessāmi, asappurisena asappurisatarañca; sappurisañca, sappurisena sappurisatarañca. Taṃ suṇātha…pe….
‘‘ཀཏམོ ཙ, བྷིཀྑཝེ, ཨསཔྤུརིསོ? ཨིདྷ, བྷིཀྑཝེ, ཨེཀཙྩོ མིཙྪཱདིཊྛིཀོ ཧོཏི, མིཙྪཱསངྐཔྤོ ཧོཏི, མིཙྪཱཝཱཙོ ཧོཏི, མིཙྪཱཀམྨནྟོ ཧོཏི, མིཙྪཱཨཱཛཱིཝོ ཧོཏི, མིཙྪཱཝཱཡཱམོ ཧོཏི, མིཙྪཱསཏི ཧོཏི, མིཙྪཱསམཱདྷི ཧོཏི། ཨཡཾ ཝུཙྩཏི, བྷིཀྑཝེ, ཨསཔྤུརིསོ།
‘‘Katamo ca, bhikkhave, asappuriso? Idha, bhikkhave, ekacco micchādiṭṭhiko hoti, micchāsaṅkappo hoti, micchāvāco hoti, micchākammanto hoti, micchāājīvo hoti, micchāvāyāmo hoti, micchāsati hoti, micchāsamādhi hoti. Ayaṃ vuccati, bhikkhave, asappuriso.
‘‘ཀཏམོ ཙ, བྷིཀྑཝེ, ཨསཔྤུརིསེན ཨསཔྤུརིསཏརོ? ཨིདྷ བྷིཀྑཝེ, ཨེཀཙྩོ ཨཏྟནཱ ཙ མིཙྪཱདིཊྛིཀོ ཧོཏི, པརཉྩ མིཙྪཱདིཊྛིཡཱ སམཱདཔེཏི; ཨཏྟནཱ ཙ མིཙྪཱསངྐཔྤོ ཧོཏི, པརཉྩ མིཙྪཱསངྐཔྤེ སམཱདཔེཏི; ཨཏྟནཱ ཙ མིཙྪཱཝཱཙོ ཧོཏི, པརཉྩ མིཙྪཱཝཱཙཱཡ སམཱདཔེཏི; ཨཏྟནཱ ཙ མིཙྪཱཀམྨནྟོ ཧོཏི, པརཉྩ མིཙྪཱཀམྨནྟེ སམཱདཔེཏི; ཨཏྟནཱ ཙ མིཙྪཱཨཱཛཱིཝོ ཧོཏི, པརཉྩ མིཙྪཱཨཱཛཱིཝེ སམཱདཔེཏི; ཨཏྟནཱ ཙ མིཙྪཱཝཱཡཱམོ ཧོཏི, པརཉྩ མིཙྪཱཝཱཡཱམེ སམཱདཔེཏི; ཨཏྟནཱ ཙ མིཙྪཱསཏི ཧོཏི, པརཉྩ མིཙྪཱསཏིཡཱ སམཱདཔེཏི; ཨཏྟནཱ ཙ མིཙྪཱསམཱདྷི ཧོཏི, པརཉྩ མིཙྪཱསམཱདྷིམྷི སམཱདཔེཏི། ཨཡཾ ཝུཙྩཏི, བྷིཀྑཝེ, ཨསཔྤུརིསེན ཨསཔྤུརིསཏརོ།
‘‘Katamo ca, bhikkhave, asappurisena asappurisataro? Idha bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti; attanā ca micchāsaṅkappo hoti, parañca micchāsaṅkappe samādapeti; attanā ca micchāvāco hoti, parañca micchāvācāya samādapeti; attanā ca micchākammanto hoti, parañca micchākammante samādapeti; attanā ca micchāājīvo hoti, parañca micchāājīve samādapeti; attanā ca micchāvāyāmo hoti, parañca micchāvāyāme samādapeti; attanā ca micchāsati hoti, parañca micchāsatiyā samādapeti; attanā ca micchāsamādhi hoti, parañca micchāsamādhimhi samādapeti. Ayaṃ vuccati, bhikkhave, asappurisena asappurisataro.
‘‘ཀཏམོ ཙ, བྷིཀྑཝེ, སཔྤུརིསོ? ཨིདྷ, བྷིཀྑཝེ, ཨེཀཙྩོ སམྨཱདིཊྛིཀོ ཧོཏི, སམྨཱསངྐཔྤོ ཧོཏི, སམྨཱཝཱཙོ ཧོཏི, སམྨཱཀམྨནྟོ ཧོཏི, སམྨཱཨཱཛཱིཝོ ཧོཏི, སམྨཱཝཱཡཱམོ ཧོཏི, སམྨཱསཏི ཧོཏི, སམྨཱསམཱདྷི ཧོཏི། ཨཡཾ ཝུཙྩཏི, བྷིཀྑཝེ, སཔྤུརིསོ།
‘‘Katamo ca, bhikkhave, sappuriso? Idha, bhikkhave, ekacco sammādiṭṭhiko hoti, sammāsaṅkappo hoti, sammāvāco hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti. Ayaṃ vuccati, bhikkhave, sappuriso.
‘‘ཀཏམོ ཙ, བྷིཀྑཝེ, སཔྤུརིསེན སཔྤུརིསཏརོ? ཨིདྷ, བྷིཀྑཝེ, ཨེཀཙྩོ ཨཏྟནཱ ཙ སམྨཱདིཊྛིཀོ ཧོཏི, པརཉྩ སམྨཱདིཊྛིཡཱ སམཱདཔེཏི; ཨཏྟནཱ ཙ སམྨཱསངྐཔྤོ ཧོཏི, པརཉྩ སམྨཱསངྐཔྤེ སམཱདཔེཏི; ཨཏྟནཱ ཙ སམྨཱཝཱཙོ ཧོཏི, པརཉྩ སམྨཱཝཱཙཱཡ སམཱདཔེཏི; ཨཏྟནཱ ཙ སམྨཱཀམྨནྟོ ཧོཏི, པརཉྩ སམྨཱཀམྨནྟེ སམཱདཔེཏི; ཨཏྟནཱ ཙ སམྨཱཨཱཛཱིཝོ ཧོཏི, པརཉྩ སམྨཱཨཱཛཱིཝེ སམཱདཔེཏི; ཨཏྟནཱ ཙ སམྨཱཝཱཡཱམོ ཧོཏི, པརཉྩ སམྨཱཝཱཡཱམེ སམཱདཔེཏི; ཨཏྟནཱ ཙ སམྨཱསཏི ཧོཏི, པརཉྩ སམྨཱསཏིཡཱ སམཱདཔེཏི; ཨཏྟནཱ ཙ སམྨཱསམཱདྷི ཧོཏི, པརཉྩ སམྨཱསམཱདྷིམྷི སམཱདཔེཏི། ཨཡཾ ཝུཙྩཏི, བྷིཀྑཝེ, སཔྤུརིསེན སཔྤུརིསཏརོ’’ཏི། པཉྩམཾ།
‘‘Katamo ca, bhikkhave, sappurisena sappurisataro? Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti; attanā ca sammāsaṅkappo hoti, parañca sammāsaṅkappe samādapeti; attanā ca sammāvāco hoti, parañca sammāvācāya samādapeti; attanā ca sammākammanto hoti, parañca sammākammante samādapeti; attanā ca sammāājīvo hoti, parañca sammāājīve samādapeti; attanā ca sammāvāyāmo hoti, parañca sammāvāyāme samādapeti; attanā ca sammāsati hoti, parañca sammāsatiyā samādapeti; attanā ca sammāsamādhi hoti, parañca sammāsamādhimhi samādapeti. Ayaṃ vuccati, bhikkhave, sappurisena sappurisataro’’ti. Pañcamaṃ.
Related texts:
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༠. སིཀྑཱཔདསུཏྟཱདིཝཎྞནཱ • 1-10. Sikkhāpadasuttādivaṇṇanā
