| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
அட்டா²ரஸவத்தங்
Aṭṭhārasavattaṃ
16. ‘‘நியஸ்ஸகம்மகதேன , பி⁴க்க²வே, பி⁴க்கு²னா ஸம்மா வத்திதப்³ப³ங். தத்ராயங் ஸம்மாவத்தனா – ந உபஸம்பாதே³தப்³ப³ங், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேனபி பி⁴க்கு²னியோ ந ஓவதி³தப்³பா³. யாய ஆபத்தியா ஸங்கே⁴ன நியஸ்ஸகம்மங் கதங் ஹோதி ஸா ஆபத்தி ந ஆபஜ்ஜிதப்³பா³, அஞ்ஞா வா தாதி³ஸிகா, ததோ வா பாபிட்ட²தரா; கம்மங் ந க³ரஹிதப்³ப³ங், கம்மிகா ந க³ரஹிதப்³பா³. ந பகதத்தஸ்ஸ பி⁴க்கு²னோ உபோஸதோ² ட²பேதப்³போ³, ந பவாரணா ட²பேதப்³பா³, ந ஸவசனீயங் காதப்³ப³ங், ந அனுவாதோ³ பட்ட²பேதப்³போ³, ந ஓகாஸோ காராபேதப்³போ³, ந சோதே³தப்³போ³, ந ஸாரேதப்³போ³, ந பி⁴க்கூ²ஹி ஸம்பயோஜேதப்³ப³’’ந்தி.
16. ‘‘Niyassakammakatena , bhikkhave, bhikkhunā sammā vattitabbaṃ. Tatrāyaṃ sammāvattanā – na upasampādetabbaṃ, na nissayo dātabbo, na sāmaṇero upaṭṭhāpetabbo, na bhikkhunovādakasammuti sāditabbā, sammatenapi bhikkhuniyo na ovaditabbā. Yāya āpattiyā saṅghena niyassakammaṃ kataṃ hoti sā āpatti na āpajjitabbā, aññā vā tādisikā, tato vā pāpiṭṭhatarā; kammaṃ na garahitabbaṃ, kammikā na garahitabbā. Na pakatattassa bhikkhuno uposatho ṭhapetabbo, na pavāraṇā ṭhapetabbā, na savacanīyaṃ kātabbaṃ, na anuvādo paṭṭhapetabbo, na okāso kārāpetabbo, na codetabbo, na sāretabbo, na bhikkhūhi sampayojetabba’’nti.
நியஸ்ஸகம்மே அட்டா²ரஸவத்தங் நிட்டி²தங்.
Niyassakamme aṭṭhārasavattaṃ niṭṭhitaṃ.
17. அத² கோ² ஸங்கோ⁴ ஸெய்யஸகஸ்ஸ பி⁴க்கு²னோ நியஸ்ஸகம்மங் அகாஸி – நிஸ்ஸாய தே வத்த²ப்³ப³ந்தி. ஸோ ஸங்கே⁴ன நியஸ்ஸகம்மகதோ கல்யாணமித்தே ஸேவமானோ ப⁴ஜமானோ பயிருபாஸமானோ உத்³தி³ஸாபெந்தோ பரிபுச்ச²ந்தோ ப³ஹுஸ்ஸுதோ ஹோதி, ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ வியத்தோ மேதா⁴வீ லஜ்ஜீ குக்குச்சகோ ஸிக்கா²காமோ. ஸம்மா வத்ததி, லோமங் பாதேதி, நெத்தா²ரங் வத்ததி, பி⁴க்கூ² உபஸங்கமித்வா ஏவங் வதே³தி – ‘‘அஹங், ஆவுஸோ, ஸங்கே⁴ன நியஸ்ஸகம்மகதோ ஸம்மா வத்தாமி, லோமங் பாதேமி, நெத்தா²ரங் வத்தாமி. கத²ங் நு கோ² மயா படிபஜ்ஜிதப்³ப³’’ந்தி? பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰…. ‘‘தேன ஹி, பி⁴க்க²வே, ஸங்கோ⁴ ஸெய்யஸகஸ்ஸ பி⁴க்கு²னோ நியஸ்ஸகம்மங் படிப்பஸ்ஸம்பே⁴து.
17. Atha kho saṅgho seyyasakassa bhikkhuno niyassakammaṃ akāsi – nissāya te vatthabbanti. So saṅghena niyassakammakato kalyāṇamitte sevamāno bhajamāno payirupāsamāno uddisāpento paripucchanto bahussuto hoti, āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. Sammā vattati, lomaṃ pāteti, netthāraṃ vattati, bhikkhū upasaṅkamitvā evaṃ vadeti – ‘‘ahaṃ, āvuso, saṅghena niyassakammakato sammā vattāmi, lomaṃ pātemi, netthāraṃ vattāmi. Kathaṃ nu kho mayā paṭipajjitabba’’nti? Bhikkhū bhagavato etamatthaṃ ārocesuṃ…pe…. ‘‘Tena hi, bhikkhave, saṅgho seyyasakassa bhikkhuno niyassakammaṃ paṭippassambhetu.
