| Library / Tipiṭaka / д̇ибидага • Tipiṭaka / жуул̣аваг̇г̇абаал̣и • Cūḷavaggapāḷi |
адтаарасавад̇д̇ам̣
Aṭṭhārasavattaṃ
16. ‘‘нияассагаммагад̇зна , бхигкавз, бхигкунаа саммаа вад̇д̇ид̇аб̣б̣ам̣. д̇ад̇рааяам̣ саммаавад̇д̇анаа – на убасамбаад̣̇зд̇аб̣б̣ам̣, на ниссаяо д̣̇аад̇аб̣б̣о, на сааман̣зро убадтаабзд̇аб̣б̣о, на бхигкуноваад̣̇агасаммуд̇и саад̣̇ид̇аб̣б̣аа, саммад̇знаби бхигкунияо на овад̣̇ид̇аб̣б̣аа. яааяа аабад̇д̇ияаа сан̇гхзна нияассагаммам̣ гад̇ам̣ ход̇и саа аабад̇д̇и на аабаж̇ж̇ид̇аб̣б̣аа, ан̃н̃аа ваа д̇аад̣̇исигаа, д̇ад̇о ваа баабидтад̇араа; гаммам̣ на г̇арахид̇аб̣б̣ам̣, гаммигаа на г̇арахид̇аб̣б̣аа. на багад̇ад̇д̇асса бхигкуно убосат̇о табзд̇аб̣б̣о, на бавааран̣аа табзд̇аб̣б̣аа, на саважанийяам̣ гаад̇аб̣б̣ам̣, на ануваад̣̇о бадтабзд̇аб̣б̣о, на огаасо гаараабзд̇аб̣б̣о, на жод̣̇зд̇аб̣б̣о, на саарзд̇аб̣б̣о, на бхигкуухи самбаяож̇зд̇аб̣б̣а’’нд̇и.
16. ‘‘Niyassakammakatena , bhikkhave, bhikkhunā sammā vattitabbaṃ. Tatrāyaṃ sammāvattanā – na upasampādetabbaṃ, na nissayo dātabbo, na sāmaṇero upaṭṭhāpetabbo, na bhikkhunovādakasammuti sāditabbā, sammatenapi bhikkhuniyo na ovaditabbā. Yāya āpattiyā saṅghena niyassakammaṃ kataṃ hoti sā āpatti na āpajjitabbā, aññā vā tādisikā, tato vā pāpiṭṭhatarā; kammaṃ na garahitabbaṃ, kammikā na garahitabbā. Na pakatattassa bhikkhuno uposatho ṭhapetabbo, na pavāraṇā ṭhapetabbā, na savacanīyaṃ kātabbaṃ, na anuvādo paṭṭhapetabbo, na okāso kārāpetabbo, na codetabbo, na sāretabbo, na bhikkhūhi sampayojetabba’’nti.
нияассагаммз адтаарасавад̇д̇ам̣ нидтид̇ам̣.
Niyassakamme aṭṭhārasavattaṃ niṭṭhitaṃ.
17. ат̇а ко сан̇гхо сзяяасагасса бхигкуно нияассагаммам̣ агааси – ниссааяа д̇з вад̇т̇аб̣б̣анд̇и. со сан̇гхзна нияассагаммагад̇о галяаан̣амид̇д̇з сзвамаано бхаж̇амаано баяирубаасамаано уд̣̇д̣̇исаабзнд̇о барибужчанд̇о б̣ахуссуд̇о ход̇и, ааг̇ад̇ааг̇амо д̇хаммад̇харо винаяад̇харо маад̇игаад̇харо бан̣д̣ид̇о вияад̇д̇о мзд̇хаавий лаж̇ж̇ий гуггужжаго сигкаагаамо. саммаа вад̇д̇ад̇и, ломам̣ баад̇зд̇и, нзд̇т̇аарам̣ вад̇д̇ад̇и, бхигкуу убасан̇гамид̇ваа звам̣ вад̣̇зд̇и – ‘‘ахам̣, аавусо, сан̇гхзна нияассагаммагад̇о саммаа вад̇д̇аами, ломам̣ баад̇зми, нзд̇т̇аарам̣ вад̇д̇аами. гат̇ам̣ ну ко маяаа бадибаж̇ж̇ид̇аб̣б̣а’’нд̇и? бхигкуу бхаг̇авад̇о зд̇амад̇т̇ам̣ аарожзсум̣…бз…. ‘‘д̇зна хи, бхигкавз, сан̇гхо сзяяасагасса бхигкуно нияассагаммам̣ бадиббассамбхзд̇у.
17. Atha kho saṅgho seyyasakassa bhikkhuno niyassakammaṃ akāsi – nissāya te vatthabbanti. So saṅghena niyassakammakato kalyāṇamitte sevamāno bhajamāno payirupāsamāno uddisāpento paripucchanto bahussuto hoti, āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. Sammā vattati, lomaṃ pāteti, netthāraṃ vattati, bhikkhū upasaṅkamitvā evaṃ vadeti – ‘‘ahaṃ, āvuso, saṅghena niyassakammakato sammā vattāmi, lomaṃ pātemi, netthāraṃ vattāmi. Kathaṃ nu kho mayā paṭipajjitabba’’nti? Bhikkhū bhagavato etamatthaṃ ārocesuṃ…pe…. ‘‘Tena hi, bhikkhave, saṅgho seyyasakassa bhikkhuno niyassakammaṃ paṭippassambhetu.
