| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
ཨཊྛཱརསཝཏྟཾ
Aṭṭhārasavattaṃ
༢༨. ‘‘པབྦཱཛནཱིཡཀམྨཀཏེན , བྷིཀྑཝེ, བྷིཀྑུནཱ སམྨཱ ཝཏྟིཏབྦཾ། ཏཏྲཱཡཾ སམྨཱཝཏྟནཱ – ན ཨུཔསམྤཱདེཏབྦཾ, ན ནིསྶཡོ དཱཏབྦོ, ན སཱམཎེརོ ཨུཔཊྛཱཔེཏབྦོ, ན བྷིཀྑུནོཝཱདཀསམྨུཏི སཱདིཏབྦཱ, སམྨཏེནཔི བྷིཀྑུནིཡོ ན ཨོཝདིཏབྦཱ། ཡཱཡ ཨཱཔཏྟིཡཱ སངྒྷེན པབྦཱཛནཱིཡཀམྨཾ ཀཏཾ ཧོཏི སཱ ཨཱཔཏྟི ན ཨཱཔཛྫིཏབྦཱ, ཨཉྙཱ ཝཱ ཏཱདིསིཀཱ , ཏཏོ ཝཱ པཱཔིཊྛཏརཱ; ཀམྨཾ ན གརཧིཏབྦཾ, ཀམྨིཀཱ ན གརཧིཏབྦཱ། ན པཀཏཏྟསྶ བྷིཀྑུནོ ཨུཔོསཐོ ཋཔེཏབྦོ, ན པཝཱརཎཱ ཋཔེཏབྦཱ, ན སཝཙནཱིཡཾ ཀཱཏབྦཾ, ན ཨནུཝཱདོ པཊྛཔེཏབྦོ, ན ཨོཀཱསོ ཀཱརེཏབྦོ, ན ཙོདེཏབྦོ, ན སཱརེཏབྦོ, ན བྷིཀྑཱུཧི སམྤཡོཛེཏབྦ’’ནྟི།
28. ‘‘Pabbājanīyakammakatena , bhikkhave, bhikkhunā sammā vattitabbaṃ. Tatrāyaṃ sammāvattanā – na upasampādetabbaṃ, na nissayo dātabbo, na sāmaṇero upaṭṭhāpetabbo, na bhikkhunovādakasammuti sāditabbā, sammatenapi bhikkhuniyo na ovaditabbā. Yāya āpattiyā saṅghena pabbājanīyakammaṃ kataṃ hoti sā āpatti na āpajjitabbā, aññā vā tādisikā , tato vā pāpiṭṭhatarā; kammaṃ na garahitabbaṃ, kammikā na garahitabbā. Na pakatattassa bhikkhuno uposatho ṭhapetabbo, na pavāraṇā ṭhapetabbā, na savacanīyaṃ kātabbaṃ, na anuvādo paṭṭhapetabbo, na okāso kāretabbo, na codetabbo, na sāretabbo, na bhikkhūhi sampayojetabba’’nti.
པབྦཱཛནཱིཡཀམྨེ ཨཊྛཱརསཝཏྟཾ ནིཊྛིཏཾ།
Pabbājanīyakamme aṭṭhārasavattaṃ niṭṭhitaṃ.
༢༩. ཨཐ ཁོ སཱརིཔུཏྟམོགྒལླཱནཔྤམུཁོ བྷིཀྑུསངྒྷོ ཀཱིཊཱགིརིཾ གནྟྭཱ ཨསྶཛིཔུནབྦསུཀཱནཾ བྷིཀྑཱུནཾ ཀཱིཊཱགིརིསྨཱ པབྦཱཛནཱིཡཀམྨཾ ཨཀཱསི – ན ཨསྶཛིཔུནབྦསུཀེཧི བྷིཀྑཱུཧི ཀཱིཊཱགིརིསྨིཾ ཝཏྠབྦནྟི། ཏེ སངྒྷེན པབྦཱཛནཱིཡཀམྨཀཏཱ ན སམྨཱ ཝཏྟནྟི, ན ལོམཾ པཱཏེནྟི, ན ནེཏྠཱརཾ ཝཏྟནྟི; ན བྷིཀྑཱུ ཁམཱཔེནྟི, ཨཀྐོསནྟི, པརིབྷཱསནྟི; ཚནྡགཱམིཏཱ དོསགཱམིཏཱ མོཧགཱམིཏཱ བྷཡགཱམིཏཱ པཱཔེནྟི; པཀྐམནྟིཔི, ཝིབྦྷམནྟིཔི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨསྶཛིཔུནབྦསུཀཱ བྷིཀྑཱུ སངྒྷེན པབྦཱཛནཱིཡཀམྨཀཏཱ ན སམྨཱ ཝཏྟིསྶནྟི, ན ལོམཾ པཱཏེསྶནྟི, ན ནེཏྠཱརཾ ཝཏྟིསྶནྟི; ན བྷིཀྑཱུ ཁམཱཔེསྶནྟི, ཨཀྐོསིསྶནྟི, པརིབྷཱསིསྶནྟི; ཚནྡགཱམིཏཱ དོསགཱམིཏཱ མོཧགཱམིཏཱ བྷཡགཱམིཏཱ པཱཔེསྶནྟི; པཀྐམིསྶནྟིཔི, ཝིབྦྷམིསྶནྟིཔཱི’’ཏི། ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ།
29. Atha kho sāriputtamoggallānappamukho bhikkhusaṅgho kīṭāgiriṃ gantvā assajipunabbasukānaṃ bhikkhūnaṃ kīṭāgirismā pabbājanīyakammaṃ akāsi – na assajipunabbasukehi bhikkhūhi kīṭāgirismiṃ vatthabbanti. Te saṅghena pabbājanīyakammakatā na sammā vattanti, na lomaṃ pātenti, na netthāraṃ vattanti; na bhikkhū khamāpenti, akkosanti, paribhāsanti; chandagāmitā dosagāmitā mohagāmitā bhayagāmitā pāpenti; pakkamantipi, vibbhamantipi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma assajipunabbasukā bhikkhū saṅghena pabbājanīyakammakatā na sammā vattissanti, na lomaṃ pātessanti, na netthāraṃ vattissanti; na bhikkhū khamāpessanti, akkosissanti, paribhāsissanti; chandagāmitā dosagāmitā mohagāmitā bhayagāmitā pāpessanti; pakkamissantipi, vibbhamissantipī’’ti. Atha kho te bhikkhū bhagavato etamatthaṃ ārocesuṃ.
ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ བྷིཀྑུསངྒྷཾ སནྣིཔཱཏཱཔེཏྭཱ བྷིཀྑཱུ པཊིཔུཙྪི – ‘‘སཙྩཾ ཀིར, བྷིཀྑཝེ, ཨསྶཛིཔུནབྦསུཀཱ བྷིཀྑཱུ སངྒྷེན པབྦཱཛནཱིཡཀམྨཀཏཱ ན སམྨཱ ཝཏྟནྟི, ན ལོམཾ པཱཏེནྟི, ན ནེཏྠཱརཾ ཝཏྟནྟི; ན བྷིཀྑཱུ ཁམཱཔེནྟི, ཨཀྐོསནྟི, པརིབྷཱསནྟི; ཚནྡགཱམིཏཱ དོསགཱམིཏཱ མོཧགཱམིཏཱ བྷཡགཱམིཏཱ པཱཔེནྟི; པཀྐམནྟིཔི, ཝིབྦྷམནྟིཔཱི’’ཏི? ‘‘སཙྩཾ བྷགཝཱ’’ཏི། ཝིགརཧི བུདྡྷོ བྷགཝཱ – ‘‘ཨནནུཙྪཝིཀཾ …པེ॰… ཀཐཉྷི ནཱམ ཏེ, བྷིཀྑཝེ, མོགྷཔུརིསཱ སངྒྷེན པབྦཱཛནཱིཡཀམྨཀཏཱ ན སམྨཱ ཝཏྟིསྶནྟི, ན ལོམཾ པཱཏེསྶནྟི, ན ནེཏྠཱརཾ ཝཏྟིསྶནྟི; ན བྷིཀྑཱུ ཁམཱཔེསྶནྟི, ཨཀྐོསིསྶནྟི, པརིབྷཱསིསྶནྟི; ཚནྡགཱམིཏཱ དོསགཱམིཏཱ མོཧགཱམིཏཱ བྷཡགཱམིཏཱ པཱཔེསྶནྟི; པཀྐམིསྶནྟིཔི, ཝིབྦྷམིསྶནྟིཔི། ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཏེན ཧི, བྷིཀྑཝེ, སངྒྷོ པབྦཱཛནཱིཡཀམྨཾ པཊིཔྤསྶམྦྷེཏུ།
Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, assajipunabbasukā bhikkhū saṅghena pabbājanīyakammakatā na sammā vattanti, na lomaṃ pātenti, na netthāraṃ vattanti; na bhikkhū khamāpenti, akkosanti, paribhāsanti; chandagāmitā dosagāmitā mohagāmitā bhayagāmitā pāpenti; pakkamantipi, vibbhamantipī’’ti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ …pe… kathañhi nāma te, bhikkhave, moghapurisā saṅghena pabbājanīyakammakatā na sammā vattissanti, na lomaṃ pātessanti, na netthāraṃ vattissanti; na bhikkhū khamāpessanti, akkosissanti, paribhāsissanti; chandagāmitā dosagāmitā mohagāmitā bhayagāmitā pāpessanti; pakkamissantipi, vibbhamissantipi. Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho pabbājanīyakammaṃ paṭippassambhetu.
Related texts:
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / པབྦཱཛནཱིཡཀམྨཀཐཱཝཎྞནཱ • Pabbājanīyakammakathāvaṇṇanā
