| Library / Tipiṭaka / ਤਿਪਿਟਕ • Tipiṭaka / ਚੂਲ਼વਗ੍ਗਪਾਲ਼ਿ • Cūḷavaggapāḷi |
ਅਟ੍ਠਾਰਸવਤ੍ਤਂ
Aṭṭhārasavattaṃ
੧੬. ‘‘ਨਿਯਸ੍ਸਕਮ੍ਮਕਤੇਨ , ਭਿਕ੍ਖવੇ, ਭਿਕ੍ਖੁਨਾ ਸਮ੍ਮਾ વਤ੍ਤਿਤਬ੍ਬਂ। ਤਤ੍ਰਾਯਂ ਸਮ੍ਮਾવਤ੍ਤਨਾ – ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ, ਨ ਭਿਕ੍ਖੁਨੋવਾਦਕਸਮ੍ਮੁਤਿ ਸਾਦਿਤਬ੍ਬਾ, ਸਮ੍ਮਤੇਨਪਿ ਭਿਕ੍ਖੁਨਿਯੋ ਨ ਓવਦਿਤਬ੍ਬਾ। ਯਾਯ ਆਪਤ੍ਤਿਯਾ ਸਙ੍ਘੇਨ ਨਿਯਸ੍ਸਕਮ੍ਮਂ ਕਤਂ ਹੋਤਿ ਸਾ ਆਪਤ੍ਤਿ ਨ ਆਪਜ੍ਜਿਤਬ੍ਬਾ, ਅਞ੍ਞਾ વਾ ਤਾਦਿਸਿਕਾ, ਤਤੋ વਾ ਪਾਪਿਟ੍ਠਤਰਾ; ਕਮ੍ਮਂ ਨ ਗਰਹਿਤਬ੍ਬਂ, ਕਮ੍ਮਿਕਾ ਨ ਗਰਹਿਤਬ੍ਬਾ। ਨ ਪਕਤਤ੍ਤਸ੍ਸ ਭਿਕ੍ਖੁਨੋ ਉਪੋਸਥੋ ਠਪੇਤਬ੍ਬੋ, ਨ ਪવਾਰਣਾ ਠਪੇਤਬ੍ਬਾ, ਨ ਸવਚਨੀਯਂ ਕਾਤਬ੍ਬਂ, ਨ ਅਨੁવਾਦੋ ਪਟ੍ਠਪੇਤਬ੍ਬੋ, ਨ ਓਕਾਸੋ ਕਾਰਾਪੇਤਬ੍ਬੋ, ਨ ਚੋਦੇਤਬ੍ਬੋ, ਨ ਸਾਰੇਤਬ੍ਬੋ, ਨ ਭਿਕ੍ਖੂਹਿ ਸਮ੍ਪਯੋਜੇਤਬ੍ਬ’’ਨ੍ਤਿ।
16. ‘‘Niyassakammakatena , bhikkhave, bhikkhunā sammā vattitabbaṃ. Tatrāyaṃ sammāvattanā – na upasampādetabbaṃ, na nissayo dātabbo, na sāmaṇero upaṭṭhāpetabbo, na bhikkhunovādakasammuti sāditabbā, sammatenapi bhikkhuniyo na ovaditabbā. Yāya āpattiyā saṅghena niyassakammaṃ kataṃ hoti sā āpatti na āpajjitabbā, aññā vā tādisikā, tato vā pāpiṭṭhatarā; kammaṃ na garahitabbaṃ, kammikā na garahitabbā. Na pakatattassa bhikkhuno uposatho ṭhapetabbo, na pavāraṇā ṭhapetabbā, na savacanīyaṃ kātabbaṃ, na anuvādo paṭṭhapetabbo, na okāso kārāpetabbo, na codetabbo, na sāretabbo, na bhikkhūhi sampayojetabba’’nti.
ਨਿਯਸ੍ਸਕਮ੍ਮੇ ਅਟ੍ਠਾਰਸવਤ੍ਤਂ ਨਿਟ੍ਠਿਤਂ।
Niyassakamme aṭṭhārasavattaṃ niṭṭhitaṃ.
੧੭. ਅਥ ਖੋ ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਅਕਾਸਿ – ਨਿਸ੍ਸਾਯ ਤੇ વਤ੍ਥਬ੍ਬਨ੍ਤਿ। ਸੋ ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਕਲ੍ਯਾਣਮਿਤ੍ਤੇ ਸੇવਮਾਨੋ ਭਜਮਾਨੋ ਪਯਿਰੁਪਾਸਮਾਨੋ ਉਦ੍ਦਿਸਾਪੇਨ੍ਤੋ ਪਰਿਪੁਚ੍ਛਨ੍ਤੋ ਬਹੁਸ੍ਸੁਤੋ ਹੋਤਿ, ਆਗਤਾਗਮੋ ਧਮ੍ਮਧਰੋ વਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ વਿਯਤ੍ਤੋ ਮੇਧਾવੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ। ਸਮ੍ਮਾ વਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ વਤ੍ਤਤਿ, ਭਿਕ੍ਖੂ ਉਪਸਙ੍ਕਮਿਤ੍વਾ ਏવਂ વਦੇਤਿ – ‘‘ਅਹਂ, ਆવੁਸੋ, ਸਙ੍ਘੇਨ ਨਿਯਸ੍ਸਕਮ੍ਮਕਤੋ ਸਮ੍ਮਾ વਤ੍ਤਾਮਿ, ਲੋਮਂ ਪਾਤੇਮਿ, ਨੇਤ੍ਥਾਰਂ વਤ੍ਤਾਮਿ। ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਿਕ੍ਖੂ ਭਗવਤੋ ਏਤਮਤ੍ਥਂ ਆਰੋਚੇਸੁਂ…ਪੇ॰…। ‘‘ਤੇਨ ਹਿ, ਭਿਕ੍ਖવੇ, ਸਙ੍ਘੋ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁ।
17. Atha kho saṅgho seyyasakassa bhikkhuno niyassakammaṃ akāsi – nissāya te vatthabbanti. So saṅghena niyassakammakato kalyāṇamitte sevamāno bhajamāno payirupāsamāno uddisāpento paripucchanto bahussuto hoti, āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo. Sammā vattati, lomaṃ pāteti, netthāraṃ vattati, bhikkhū upasaṅkamitvā evaṃ vadeti – ‘‘ahaṃ, āvuso, saṅghena niyassakammakato sammā vattāmi, lomaṃ pātemi, netthāraṃ vattāmi. Kathaṃ nu kho mayā paṭipajjitabba’’nti? Bhikkhū bhagavato etamatthaṃ ārocesuṃ…pe…. ‘‘Tena hi, bhikkhave, saṅgho seyyasakassa bhikkhuno niyassakammaṃ paṭippassambhetu.
