| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
அட்டா²ரஸவத்து²கதா²
Aṭṭhārasavatthukathā
468. அத⁴ம்மங் த⁴ம்மோதிஆதீ³னி அட்டா²ரஸ பே⁴த³கரவத்தூ²னி ஸங்க⁴பே⁴த³கக்க²ந்த⁴கே வண்ணயிஸ்ஸாம.
468.Adhammaṃ dhammotiādīni aṭṭhārasa bhedakaravatthūni saṅghabhedakakkhandhake vaṇṇayissāma.
475. தங் உக்கி²த்தகங் பி⁴க்கு²ங் ஓஸாரெத்வாதி தங் க³ஹெத்வா ஸீமங் க³ந்த்வா ஆபத்திங் தே³ஸாபெத்வா கம்மவாசாய ஓஸாரெத்வா. தாவதே³வ உபோஸதோ²தி தங்தி³வஸமேவ உபோஸத²க்க²ந்த⁴கே வுத்தனயேனேவ ஸாமக்³கீ³உபோஸதோ² காதப்³போ³.
475.Taṃukkhittakaṃ bhikkhuṃ osāretvāti taṃ gahetvā sīmaṃ gantvā āpattiṃ desāpetvā kammavācāya osāretvā. Tāvadeva uposathoti taṃdivasameva uposathakkhandhake vuttanayeneva sāmaggīuposatho kātabbo.
476. அமூலா மூலங் க³ந்த்வாதி ந மூலா மூலங் க³ந்த்வா; தங் வத்து²ங் அவினிச்சி²னித்வாதி அத்தோ². அயங் வுச்சதி உபாலி ஸங்க⁴ஸாமக்³கீ³ அத்தா²பேதா ப்³யஞ்ஜனூபேதாதி அத்த²தோ அபக³தா, ‘‘ஸங்க⁴ஸாமக்³கீ³’’தி இமங் பன ப்³யஞ்ஜனமத்தங் உபேதா.
476.Amūlā mūlaṃ gantvāti na mūlā mūlaṃ gantvā; taṃ vatthuṃ avinicchinitvāti attho. Ayaṃ vuccati upāli saṅghasāmaggī atthāpetā byañjanūpetāti atthato apagatā, ‘‘saṅghasāmaggī’’ti imaṃ pana byañjanamattaṃ upetā.
477. ஸங்க⁴ஸ்ஸ கிச்சேஸூதி ஸங்க⁴ஸ்ஸ கரணீயேஸு உப்பன்னேஸு. மந்தனாஸூதி வினயமந்தனாஸு. அத்தே²ஸு ஜாதேஸூதி வினயஅத்தே²ஸு உப்பன்னேஸு. வினிச்ச²யேஸூதி தேஸங்யேவ அத்தா²னங் வினிச்ச²யேஸு. மஹத்தி²கோதி மஹாஉபகாரோ. பக்³க³ஹாரஹோதி பக்³க³ண்ஹிதுங் வுத்தோ.
477.Saṅghassa kiccesūti saṅghassa karaṇīyesu uppannesu. Mantanāsūti vinayamantanāsu. Atthesu jātesūti vinayaatthesu uppannesu. Vinicchayesūti tesaṃyeva atthānaṃ vinicchayesu. Mahatthikoti mahāupakāro. Paggahārahoti paggaṇhituṃ vutto.
அனானுவஜ்ஜோ பட²மேன ஸீலதோதிஆதி³ம்ஹியேவ தாவ ஸீலதோ ந உபவஜ்ஜோ. அவெக்கி²தாசாரோதி அபெக்கி²தாசாரோ; ஆலோகிதே விலோகிதே ஸம்பஜானகாரீதிஆதி³னா நயேன உபபரிக்கி²தாசாரோ. அட்ட²கதா²ஸு பன ‘‘அப்படிச்ச²ன்னாசாரோ’’தி வுத்தங்.
Anānuvajjo paṭhamena sīlatotiādimhiyeva tāva sīlato na upavajjo. Avekkhitācāroti apekkhitācāro; ālokite vilokite sampajānakārītiādinā nayena upaparikkhitācāro. Aṭṭhakathāsu pana ‘‘appaṭicchannācāro’’ti vuttaṃ.
விஸய்ஹாதி அபி⁴ப⁴வித்வா. அனுய்யுதங் ப⁴ணந்தி அனுஞ்ஞாதங் அனபக³தங் ப⁴ணந்தோ. யஸ்மா ஹி ஸோ அனுய்யுதங் ப⁴ணதி, உஸூயாய வா அக³திக³மனவஸேன வா காரணாபக³தங் ந ப⁴ணதி, தஸ்மா அத்த²ங் ந ஹாபேதி. உஸூயாய பன அக³திக³மனவஸேன வா ப⁴ணந்தோ அத்த²ங் ஹாபேதி, காரணங் ந தே³தி, தஸ்மா ஸோ பரிஸக³தோ ச²ம்ப⁴தி சேவ வேத⁴தி ச. யோ ஈதி³ஸோ ந ஹோதி, அயங் ‘‘பக்³க³ஹாரஹோ’’தி த³ஸ்ஸேதி.
Visayhāti abhibhavitvā. Anuyyutaṃ bhaṇanti anuññātaṃ anapagataṃ bhaṇanto. Yasmā hi so anuyyutaṃ bhaṇati, usūyāya vā agatigamanavasena vā kāraṇāpagataṃ na bhaṇati, tasmā atthaṃ na hāpeti. Usūyāya pana agatigamanavasena vā bhaṇanto atthaṃ hāpeti, kāraṇaṃ na deti, tasmā so parisagato chambhati ceva vedhati ca. Yo īdiso na hoti, ayaṃ ‘‘paggahāraho’’ti dasseti.
கிஞ்ச பி⁴ய்யோ ‘‘ததே²வ பஞ்ஹ’’ந்தி கா³தா², தஸ்ஸத்தோ² – யதா² ச அனுய்யுதங் ப⁴ணந்தோ அத்த²ங் ந ஹாபேதி, ததே²வ பரிஸாய மஜ்ஜே² பஞ்ஹங் புச்சி²தோ ஸமானோ ந சேவ பஜ்ஜா²யதி, ந ச மங்கு ஹோதி. யோ ஹி அத்த²ங் ந ஜானாதி, ஸோ பஜ்ஜா²யதி. யோ வத்துங் ந ஸக்கோதி, ஸோ மங்கு ஹோதி. யோ பன அத்த²ஞ்ச ஜானாதி, வத்துஞ்ச ஸக்கோதி; ஸோ ந பஜ்ஜா²யதி, ந மங்கு ஹோதி. காலாக³தந்தி கதே²தப்³ப³யுத்தகாலே ஆக³தங். ப்³யாகரணாரஹந்தி பஞ்ஹஸ்ஸ அத்தா²னுலோமதாய ப்³யாகரணானுச்ச²விகங். வசோதி வத³ந்தோ; ஏவரூபங் வசனங் ப⁴ணந்தோதி அத்தோ². ரஞ்ஜேதீதி தோஸேதி. விஞ்ஞூபரிஸந்தி விஞ்ஞூனங் பரிஸங்.
Kiñca bhiyyo ‘‘tatheva pañha’’nti gāthā, tassattho – yathā ca anuyyutaṃ bhaṇanto atthaṃ na hāpeti, tatheva parisāya majjhe pañhaṃ pucchito samāno na ceva pajjhāyati, na ca maṅku hoti. Yo hi atthaṃ na jānāti, so pajjhāyati. Yo vattuṃ na sakkoti, so maṅku hoti. Yo pana atthañca jānāti, vattuñca sakkoti; so na pajjhāyati, na maṅku hoti. Kālāgatanti kathetabbayuttakāle āgataṃ. Byākaraṇārahanti pañhassa atthānulomatāya byākaraṇānucchavikaṃ. Vacoti vadanto; evarūpaṃ vacanaṃ bhaṇantoti attho. Rañjetīti toseti. Viññūparisanti viññūnaṃ parisaṃ.
ஆசேரகம்ஹி ச ஸகேதி அத்தனோ ஆசரியவாதே³. அலங் பமேதுந்தி வீமங்ஸிதுங் தங் தங் காரணங் பஞ்ஞாய துலயிதுங் ஸமத்தோ². பகு³ணோதி கதபரிசயோ லத்³தா⁴ஸேவனோ. கதே²தவேதி கதே²தப்³பே³. விரத்³தி⁴கோவிதோ³தி விரத்³த⁴ட்டா²னகுஸலோ.
Ācerakamhica saketi attano ācariyavāde. Alaṃ pametunti vīmaṃsituṃ taṃ taṃ kāraṇaṃ paññāya tulayituṃ samattho. Paguṇoti kataparicayo laddhāsevano. Kathetaveti kathetabbe. Viraddhikovidoti viraddhaṭṭhānakusalo.
பச்சத்தி²கா யேன வஜந்தீதி அயங் கா³தா² யாதி³ஸே கதே²தப்³பே³ பகு³ணோ, தங் த³ஸ்ஸேதுங் வுத்தா. அயஞ்ஹெத்த² அத்தோ² – யாதி³ஸேன கதி²தேன பச்சத்தி²கா ச நிக்³க³ஹங் க³ச்ச²ந்தி, மஹாஜனோ ச ஸஞ்ஞபனங் க³ச்ச²தி; ஸஞ்ஞத்திங் அவபோ³த⁴னங் க³ச்ச²தீதி அத்தோ². யஞ்ச கதெ²ந்தோ ஸகங் ஆதா³யங் அத்தனோ ஆசரியவாத³ங் ந ஹாபேதி, யஸ்மிங் வத்து²ஸ்மிங் அதி⁴கரணங் உப்பன்னங், தத³னுரூபங் அனுபகா⁴தகரங் பஞ்ஹங் ப்³யாகரமானோ தாதி³ஸே கதே²தப்³பே³ பகு³ணோ ஹோதீதி.
Paccatthikā yena vajantīti ayaṃ gāthā yādise kathetabbe paguṇo, taṃ dassetuṃ vuttā. Ayañhettha attho – yādisena kathitena paccatthikā ca niggahaṃ gacchanti, mahājano ca saññapanaṃ gacchati; saññattiṃ avabodhanaṃ gacchatīti attho. Yañca kathento sakaṃ ādāyaṃ attano ācariyavādaṃ na hāpeti, yasmiṃ vatthusmiṃ adhikaraṇaṃ uppannaṃ, tadanurūpaṃ anupaghātakaraṃ pañhaṃ byākaramāno tādise kathetabbe paguṇo hotīti.
தூ³தெய்யகம்மேஸு அலந்தி அட்ட²ஹி தூ³தங்கே³ஹி ஸமன்னாக³தத்தா ஸங்க⁴ஸ்ஸ தூ³தெய்யகம்மேஸு ஸமத்தோ². ஸுட்டு² உக்³க³ண்ஹாதீதி ஸமுக்³க³ஹோ. இத³ங் வுத்தங் ஹோதி – யதா² நாம ஆஹுனங் ஆஹுதிபிண்ட³ங் ஸமுக்³க³ண்ஹந்தி, ஏவங் பீதிஸோமனஸ்ஸஜாதேனேவ சேதஸா ஸங்க⁴ஸ்ஸ கிச்சேஸு ஸமுக்³க³ஹோ, ஸங்க⁴ஸ்ஸகிச்சேஸு தஸ்ஸ தஸ்ஸ கிச்சஸ்ஸ படிக்³கா³ஹகோதி அத்தோ². கரங் வசோதி வசனங் கரொந்தோ. ந தேன மஞ்ஞதீதி தேன வசனகரணேன ‘‘அஹங் கரோமி, ஸங்க⁴பா⁴ரங் நித்த²ராமீ’’தி ந மானாதிமானங் ஜப்பேதி.
Dūteyyakammesu alanti aṭṭhahi dūtaṅgehi samannāgatattā saṅghassa dūteyyakammesu samattho. Suṭṭhu uggaṇhātīti samuggaho. Idaṃ vuttaṃ hoti – yathā nāma āhunaṃ āhutipiṇḍaṃ samuggaṇhanti, evaṃ pītisomanassajāteneva cetasā saṅghassa kiccesu samuggaho, saṅghassakiccesu tassa tassa kiccassa paṭiggāhakoti attho. Karaṃ vacoti vacanaṃ karonto. Na tena maññatīti tena vacanakaraṇena ‘‘ahaṃ karomi, saṅghabhāraṃ nittharāmī’’ti na mānātimānaṃ jappeti.
ஆபஜ்ஜதி யாவதகேஸு வத்தூ²ஸூதி யத்தகேஸு வத்தூ²ஸு ஆபத்திங் ஆபஜ்ஜமானோ ஆபஜ்ஜதி. ஹோதி யதா² ச வுட்டி²தீதி தஸ்ஸா ச ஆபத்தியா யதா² வுட்டா²னங் ஹோதி. ஏதே விப⁴ங்கா³தி யேஸு வத்தூ²ஸு ஆபஜ்ஜதி, யதா² ச வுட்டா²னங் ஹோதி, இமேஸங் அத்தா²னங் ஜோதகா ஏதே விப⁴ங்கா³. உப⁴யஸ்ஸாதி உப⁴யே அஸ்ஸ. ஸ்வாக³தாதி ஸுட்டு² ஆக³தா. ஆபத்திவுட்டா²னபத³ஸ்ஸ கோவிதோ³தி ஆபத்திவுட்டா²னகாரணகுஸலோ.
Āpajjati yāvatakesu vatthūsūti yattakesu vatthūsu āpattiṃ āpajjamāno āpajjati. Hoti yathā ca vuṭṭhitīti tassā ca āpattiyā yathā vuṭṭhānaṃ hoti. Ete vibhaṅgāti yesu vatthūsu āpajjati, yathā ca vuṭṭhānaṃ hoti, imesaṃ atthānaṃ jotakā ete vibhaṅgā. Ubhayassāti ubhaye assa. Svāgatāti suṭṭhu āgatā. Āpattivuṭṭhānapadassa kovidoti āpattivuṭṭhānakāraṇakusalo.
யானி சாசரந்தி யானி ச ப⁴ண்ட³னகாரணாதீ³னி ஆசரந்தோ தஜ்ஜனீயகம்மாதி³வஸேன நிஸ்ஸாரணங் க³ச்ச²தி. ஓஸாரணங் தங்வுஸிதஸ்ஸ ஜந்துனோதி தங் வத்தங் வுஸிதஸ்ஸ ஜந்துனோ, யா ஓஸாரணா காதப்³பா³, ஏதம்பி ஜானாதி. ஸேஸங் ஸப்³ப³த்த² உத்தானமேவாதி.
Yāni cācaranti yāni ca bhaṇḍanakāraṇādīni ācaranto tajjanīyakammādivasena nissāraṇaṃ gacchati. Osāraṇaṃ taṃvusitassa jantunoti taṃ vattaṃ vusitassa jantuno, yā osāraṇā kātabbā, etampi jānāti. Sesaṃ sabbattha uttānamevāti.
கோஸம்ப³கக்க²ந்த⁴கவண்ணனா நிட்டி²தா.
Kosambakakkhandhakavaṇṇanā niṭṭhitā.
ஸமந்தபாஸாதி³காய வினயஸங்வண்ணனாய
Samantapāsādikāya vinayasaṃvaṇṇanāya
மஹாவக்³க³வண்ணனா ஸமத்தா.
Mahāvaggavaṇṇanā samattā.
மஹாவக்³க³-அட்ட²கதா² நிட்டி²தா.
Mahāvagga-aṭṭhakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
276. அட்டா²ரஸவத்து²கதா² • 276. Aṭṭhārasavatthukathā
278. ஸங்க⁴ஸாமக்³கீ³கதா² • 278. Saṅghasāmaggīkathā
279. உபாலிஸங்க⁴ஸாமக்³கீ³புச்சா² • 279. Upālisaṅghasāmaggīpucchā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபாலிஸங்க⁴ஸாமக்³கீ³புச்சா²வண்ணனா • Upālisaṅghasāmaggīpucchāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸங்க⁴ஸாமக்³கீ³கதா²வண்ணனா • Saṅghasāmaggīkathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அட்டா²ரஸவத்து²கதா²வண்ணனா • Aṭṭhārasavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 276. அட்டா²ரஸவத்து²கதா² • 276. Aṭṭhārasavatthukathā
