| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
276. அட்டா²ரஸவத்து²கதா²
276. Aṭṭhārasavatthukathā
471. ‘‘லத்³தி⁴க்³க³ஹண’’ந்தி இமினா ஆதீ³யதே ஆதா³யோதி வசனத்த²ங் த³ஸ்ஸேதி.
471. ‘‘Laddhiggahaṇa’’nti iminā ādīyate ādāyoti vacanatthaṃ dasseti.
475. தங் தி³வஸமேவாதி தஸ்மிங் ஸங்க⁴ஸாமக்³கி³கரணதி³வஸேயேவ.
475.Taṃ divasamevāti tasmiṃ saṅghasāmaggikaraṇadivaseyeva.
476. ந மூலா மூலங் க³ந்த்வாதி மூலதோ மூலங் ந க³ந்த்வாவ. ‘‘அத்த²தோ அபக³தா’’தி இமினா அத்த²தோ அபேதா அத்தா²பேதாதி வசனத்த²ங் த³ஸ்ஸேதி. ‘‘ப்³யஞ்ஜனமத்தங் உபேதா’’தி இமினா ப்³யஞ்ஜனமத்தங் உபேதா உபக³தா ப்³யஞ்ஜனூபேதாதி வசனத்த²ங் த³ஸ்ஸேதி.
476.Na mūlā mūlaṃ gantvāti mūlato mūlaṃ na gantvāva. ‘‘Atthato apagatā’’ti iminā atthato apetā atthāpetāti vacanatthaṃ dasseti. ‘‘Byañjanamattaṃ upetā’’ti iminā byañjanamattaṃ upetā upagatā byañjanūpetāti vacanatthaṃ dasseti.
477. அத்தே²ஸு ஜாதேஸூதி எத்த² ஜாதஸத்³தோ³ உப்பன்னபரியாயோதி ஆஹ ‘‘வினயஅத்தே²ஸு உப்பன்னேஸூ’’தி. தஞ்ச பத³ங் ‘‘ஸங்க⁴ஸ்ஸ கிச்சேஸூ’’திஆதீ³ஸு ஸப்³ப³பதே³ஸு யோஜேதப்³ப³ங். மஹத்தி²கோதி மஹந்தோ உபகாரஸங்கா²தோ அத்தோ² இமஸ்ஸாதி மஹத்தி²கோதி த³ஸ்ஸந்தோ ஆஹ ‘‘மஹாஉபகாரோ’’தி.
477.Atthesu jātesūti ettha jātasaddo uppannapariyāyoti āha ‘‘vinayaatthesu uppannesū’’ti. Tañca padaṃ ‘‘saṅghassa kiccesū’’tiādīsu sabbapadesu yojetabbaṃ. Mahatthikoti mahanto upakārasaṅkhāto attho imassāti mahatthikoti dassanto āha ‘‘mahāupakāro’’ti.
அனானுவஜ்ஜோ பட²மேனாதி எத்த² பட²மஸத்³தோ³ தாவபரியாயோதி த³ஸ்ஸெந்தோ ஆஹ ‘‘தாவா’’தி. ஸீலதோதி ஸீலேன. உபெக்கி²தாசாரோதி உபபத்திதோ இக்கி²தாசாரோ. ‘‘அபெக்கி²தாசாரோ’’திபி பாடோ². உபபரிக்கி²தாசாரோதி உபபரிக்கி²தோ ஆசாரோ ஏதஸ்ஸாதி உபபரிக்கி²தாசாரோ.
Anānuvajjo paṭhamenāti ettha paṭhamasaddo tāvapariyāyoti dassento āha ‘‘tāvā’’ti. Sīlatoti sīlena. Upekkhitācāroti upapattito ikkhitācāro. ‘‘Apekkhitācāro’’tipi pāṭho. Upaparikkhitācāroti upaparikkhito ācāro etassāti upaparikkhitācāro.
விஸய்ஹாதி எத்த² விபுப்³போ³ ஸஹதா⁴து அபி⁴ப⁴வனத்தோ², த்வாபச்சயோ ச ஹோதீதி த³ஸ்ஸெந்தோ ஆஹ ‘‘அபி⁴ப⁴வித்வா’’தி. அனபக³தந்தி காரணதோ அனபேதங். ப⁴ணந்தோ பி⁴க்கூ²தி ஸம்ப³ந்தோ⁴. தமத்த²ங் த³ஸ்ஸெந்தோ ஆஹ ‘‘யஸ்மா ஹீ’’திஆதி³. ஸோதி பி⁴க்கு², ந ஹாபேதீதி ஸம்ப³ந்தோ⁴. ‘‘உஸூயாயா’’தி இமினா தோ³ஸாக³திக³மனஸ்ஸ க³ஹிதத்தா ‘‘அக³திக³மனவஸேனா’’தி இமினா பாரிஸேஸனயேன அவஸேஸஅக³திக³மனமேவாதி⁴ப்பேதங். ஸோதி பி⁴க்கு². ச²ம்ப⁴தி சேவாதி த²ம்ப⁴தி சேவ, த²த்³த⁴ங் கரோதி சேவாதி அத்தோ². வேத⁴தி சாதி கம்பதி ச. யோ சாதி பி⁴க்கு² பன. ஈதி³ஸோதி உஸூயாய வா அக³திக³மனேன வா ப⁴ணனஸங்கா²தோ ஏதி³ஸோ ந ஹோதி.
Visayhāti ettha vipubbo sahadhātu abhibhavanattho, tvāpaccayo ca hotīti dassento āha ‘‘abhibhavitvā’’ti. Anapagatanti kāraṇato anapetaṃ. Bhaṇanto bhikkhūti sambandho. Tamatthaṃ dassento āha ‘‘yasmā hī’’tiādi. Soti bhikkhu, na hāpetīti sambandho. ‘‘Usūyāyā’’ti iminā dosāgatigamanassa gahitattā ‘‘agatigamanavasenā’’ti iminā pārisesanayena avasesaagatigamanamevādhippetaṃ. Soti bhikkhu. Chambhati cevāti thambhati ceva, thaddhaṃ karoti cevāti attho. Vedhati cāti kampati ca. Yo cāti bhikkhu pana. Īdisoti usūyāya vā agatigamanena vā bhaṇanasaṅkhāto ediso na hoti.
கிஞ்ச பி⁴ய்யோதி நிபாதஸமுதா³யோ, ததோ வுத்ததோ அதிரேகங் கதே²தப்³ப³ங் கிங் பனாதி அத்தோ². தஸ்ஸா கா³தா²ய அத்தோ² வேதி³தப்³போ³தி யோஜனா. யோதி பி⁴க்கு². ஹீதி ஸச்சங். காலாக³தந்தி ஏத்த² க³ஹேதப்³ப³காலஞ்ச ஸத்தமீதப்புரிஸஸமாஸஞ்ச த³ஸ்ஸெந்தோ ஆஹ ‘‘கதே²தப்³ப³யுத்தகாலே ஆக³த’’ந்தி. வசோதி பத³ங் ந வசனபதா⁴னங், வசனவந்தபுக்³க³லோயேவ பதா⁴னந்தி த³ஸ்ஸெந்தோ ஆஹ ‘‘வத³ந்தோ’’தி.
Kiñca bhiyyoti nipātasamudāyo, tato vuttato atirekaṃ kathetabbaṃ kiṃ panāti attho. Tassā gāthāya attho veditabboti yojanā. Yoti bhikkhu. Hīti saccaṃ. Kālāgatanti ettha gahetabbakālañca sattamītappurisasamāsañca dassento āha ‘‘kathetabbayuttakāle āgata’’nti. Vacoti padaṃ na vacanapadhānaṃ, vacanavantapuggaloyeva padhānanti dassento āha ‘‘vadanto’’ti.
ஆசேரகம்ஹி ச ஸகேதி எத்த² ஆசரியஸ்ஸ ஏஸோ ஆசேரகோ, ஸஸ்ஸ அத்தனோ ஏஸோ ஸகோதி வசனத்த²ங் த³ஸ்ஸெந்தோ ஆஹ ‘‘அத்தனோ ஆசரியவாதே³’’தி. கா³தா²பா⁴வதோ ஆசரியஸத்³த³ஸ்ஸ ஆசேராதே³ஸோ காதப்³போ³. ‘‘வாதே³’’தி இமினா இத³மத்தே² பவத்தஸ்ஸ ணிகபச்சயஸ்ஸ ஸரூபங் த³ஸ்ஸேதி. அலங் பமேதுந்தி எத்த² அலங்ஸத்³தோ³ ஸமத்த²த்தோ², பமஸத்³தோ³துலனத்தோ²தி ஆஹ ‘‘துலயிதுங் ஸமத்தோ²’’தி. கதே²தவேதி எத்த² தவேஸத்³தோ³ அஞ்ஞத்த² யேபு⁴ய்யேன பா⁴வவாசகோ, இத⁴ பன கம்மவாசகோதி ஆஹ ‘‘கதே²தப்³பே³’’தி. விரத்³த⁴ட்டா²னகுஸலோதி விரத்³த⁴ட்டா²னே குஸலோ.
Ācerakamhi ca saketi ettha ācariyassa eso ācerako, sassa attano eso sakoti vacanatthaṃ dassento āha ‘‘attano ācariyavāde’’ti. Gāthābhāvato ācariyasaddassa ācerādeso kātabbo. ‘‘Vāde’’ti iminā idamatthe pavattassa ṇikapaccayassa sarūpaṃ dasseti. Alaṃ pametunti ettha alaṃsaddo samatthattho, pamasaddotulanatthoti āha ‘‘tulayituṃ samattho’’ti. Kathetaveti ettha tavesaddo aññattha yebhuyyena bhāvavācako, idha pana kammavācakoti āha ‘‘kathetabbe’’ti. Viraddhaṭṭhānakusaloti viraddhaṭṭhāne kusalo.
அயங் கா³தா² வுத்தாதி ஸம்ப³ந்தோ⁴. தந்தி கதே²தப்³ப³ங். அயங் ஹெத்த²த்தோ²தி அயங் ஏவ எத்த² கா³தா²யங் அத்தோ²தி யோஜனா. ‘‘க³ச்ச²ந்தீ’’தி இமினா வஜந்தீதி எத்த² வஜதா⁴துயா க³த்யத்த²ங் த³ஸ்ஸேதி. ‘‘அத்தனோ ஆசரியவாத³’’ந்தி இமினா ‘‘ஸகங் ஆதா³ய’’ந்தி பத³ஸ்ஸ அத்த²ங் த³ஸ்ஸேதி. ஆசரியவாதோ³ ஹி ஆதா³தப்³ப³தோ க³ஹேதப்³ப³தோ ஆதா³யந்தி வுத்தோ. தத³னுரூபந்தி தஸ்ஸ வத்து²ஸ்ஸ அனுரூபங். ப்³யாகரமானோ பி⁴க்கூ²தி ஸம்ப³ந்தோ⁴. அட்ட²ஹி தூ³தங்கே³ஹீதி ‘‘ஸோதா ச ஹோதி, ஸாவேதா ச, உக்³க³ஹேதா ச, தா⁴ரேதா ச, விஞ்ஞாதா ச, விஞ்ஞாபேதா, ச குஸலோ ச ஸஹிதாஸஹிதஸ்ஸ, நோ ச கலஹகாரகோ’’தி (சூளவ॰ 347; அ॰ நி॰ 8.16) ஏவங் வுத்தேஹி அட்ட²ஹி தூ³தஸ்ஸ அங்கே³ஹி. கஸ்ஸ தூ³தெய்யகம்மந்தி ஆஹ ‘‘ஸங்க⁴ஸ்ஸா’’தி. தூ³தஸ்ஸ ஏதானி தூ³தெய்யானி, தானியேவ கம்மானி தூ³தெய்யகம்மானி, தேஸு. இத³ந்தி அத்த²ஜாகங், வுத்தங் ஹோதீதி யோஜனா. அத² வா இத³ந்தி அயமத்தோ². வுத்தங் ஹோதீதி வுத்தோ ஹோதி. பச்சி²மனயே லிங்க³விபல்லாஸோதி த³ட்ட²ப்³போ³. ஆனெத்வா ஹவந்தி பூஜெந்தீதி ஆஹவோ தா³யகா, தேஸங் ஆஹூனங். ஆனெத்வா ஹுனிதப்³ப³ங் பூஜேதப்³ப³ந்தி ஆஹுதி, தங் ஆஹுதிங். ஸங்க⁴ஸ்ஸ கிச்சேஸூதி நித்³தா⁴ரணே பு⁴ம்மங். தேன வுத்தங் ‘‘தஸ்ஸ தஸ்ஸ கிச்சஸ்ஸா’’தி. கரவசோதி எத்த² ‘‘வசோகரோ’’தி வத்தப்³பே³ கா³தா²பா⁴வதோ பத³விபரியாயவஸேன ‘‘கரவசோ’’தி வுத்தோதி ஆஹ ‘‘வசனங் கரொந்தோ’’தி. ‘‘வசனகரணேனா’’தி இமினா ‘‘ந தேன மஞ்ஞதீ’’தி எத்த² தஸத்³த³ஸ்ஸ விஸயங் த³ஸ்ஸேதி.
Ayaṃ gāthā vuttāti sambandho. Tanti kathetabbaṃ. Ayaṃ hetthatthoti ayaṃ eva ettha gāthāyaṃ atthoti yojanā. ‘‘Gacchantī’’ti iminā vajantīti ettha vajadhātuyā gatyatthaṃ dasseti. ‘‘Attano ācariyavāda’’nti iminā ‘‘sakaṃ ādāya’’nti padassa atthaṃ dasseti. Ācariyavādo hi ādātabbato gahetabbato ādāyanti vutto. Tadanurūpanti tassa vatthussa anurūpaṃ. Byākaramāno bhikkhūti sambandho. Aṭṭhahi dūtaṅgehīti ‘‘sotā ca hoti, sāvetā ca, uggahetā ca, dhāretā ca, viññātā ca, viññāpetā, ca kusalo ca sahitāsahitassa, no ca kalahakārako’’ti (cūḷava. 347; a. ni. 8.16) evaṃ vuttehi aṭṭhahi dūtassa aṅgehi. Kassa dūteyyakammanti āha ‘‘saṅghassā’’ti. Dūtassa etāni dūteyyāni, tāniyeva kammāni dūteyyakammāni, tesu. Idanti atthajākaṃ, vuttaṃ hotīti yojanā. Atha vā idanti ayamattho. Vuttaṃ hotīti vutto hoti. Pacchimanaye liṅgavipallāsoti daṭṭhabbo. Ānetvā havanti pūjentīti āhavo dāyakā, tesaṃ āhūnaṃ. Ānetvā hunitabbaṃ pūjetabbanti āhuti, taṃ āhutiṃ. Saṅghassa kiccesūti niddhāraṇe bhummaṃ. Tena vuttaṃ ‘‘tassa tassa kiccassā’’ti. Karavacoti ettha ‘‘vacokaro’’ti vattabbe gāthābhāvato padavipariyāyavasena ‘‘karavaco’’ti vuttoti āha ‘‘vacanaṃ karonto’’ti. ‘‘Vacanakaraṇenā’’ti iminā ‘‘na tena maññatī’’ti ettha tasaddassa visayaṃ dasseti.
ஆபஜ்ஜமானோ பி⁴க்கு² ஆபத்தி ஹோதீதி யோஜனா. தஸ்ஸா சாதி எத்த² ஸ்மாவசனஸ்ஸ ஸ்ஸாதே³ஸோ காதப்³போ³. யதா²தி யேனாகாரேன, வினயகம்மாகாரேனாதி அத்தோ². யேஸூதி யத்தகேஸு வத்தூ²ஸு. உப⁴யே ஏதே விப⁴ங்கா³தி ஸம்ப³ந்தோ⁴. அஸ்ஸாதி பி⁴க்கு²ஸ்ஸ. ஆபத்திவுட்டா²னபத³ஸ்ஸாதி பத³ஸத்³தோ³ காரணத்தோ², பு⁴ம்மத்தே² ஸாமிவசனோ ச ஹோதீதி ஆஹ ‘‘ஆபத்திவுட்டா²னகாரணே’’தி. ‘‘குஸலோ’’தி இமினா சே²கோ பண்டி³தோ, குச்சி²தங் பாபங் வித³தி ஜானாதீதி கோவிதோ³தி வசனத்தே²ன கோவிதோ³ நாமாதி த³ஸ்ஸேதி.
Āpajjamāno bhikkhu āpatti hotīti yojanā. Tassā cāti ettha smāvacanassa ssādeso kātabbo. Yathāti yenākārena, vinayakammākārenāti attho. Yesūti yattakesu vatthūsu. Ubhaye ete vibhaṅgāti sambandho. Assāti bhikkhussa. Āpattivuṭṭhānapadassāti padasaddo kāraṇattho, bhummatthe sāmivacano ca hotīti āha ‘‘āpattivuṭṭhānakāraṇe’’ti. ‘‘Kusalo’’ti iminā cheko paṇḍito, kucchitaṃ pāpaṃ vidati jānātīti kovidoti vacanatthena kovido nāmāti dasseti.
ஆசரந்தோ பி⁴க்கு² க³ச்ச²தீதி யோஜனா. ‘‘வத்த’’ந்தி இமினா ஓஸாரணங் தந்தி எத்த² தஸத்³த³ஸ்ஸ விஸயங் த³ஸ்ஸேதி. ‘‘யா’’தி இமினா ஏதம்பீதி எத்த² ஏதஸத்³த³ஸ்ஸ அனியமனித்³தே³ஸபா⁴வங் த³ஸ்ஸேதி. ஸப்³ப³த்தா²தி ஸப்³ப³ஸ்மிங் கோஸம்ப³கக்க²ந்த⁴கே.
Ācaranto bhikkhu gacchatīti yojanā. ‘‘Vatta’’nti iminā osāraṇaṃ tanti ettha tasaddassa visayaṃ dasseti. ‘‘Yā’’ti iminā etampīti ettha etasaddassa aniyamaniddesabhāvaṃ dasseti. Sabbatthāti sabbasmiṃ kosambakakkhandhake.
இதி கோஸம்ப³கக்க²ந்த⁴கவண்ணனாய யோஜனா ஸமத்தா.
Iti kosambakakkhandhakavaṇṇanāya yojanā samattā.
இதி ஸமந்தபாஸாதி³காய வினயஸங்வண்ணனாய
Iti samantapāsādikāya vinayasaṃvaṇṇanāya
மஹாவக்³க³வண்ணனாய
Mahāvaggavaṇṇanāya
யோஜனா ஸமத்தா.
Yojanā samattā.
ஜாதி³லஞ்சி²தனாமேன, நேகானங் வாசிதோ மயா;
Jādilañchitanāmena, nekānaṃ vācito mayā;
மஹாவக்³க³க²ந்த⁴கஸ்ஸ, ஸமத்தோ யோஜனானயோதி.
Mahāvaggakhandhakassa, samatto yojanānayoti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
276. அட்டா²ரஸவத்து²கதா² • 276. Aṭṭhārasavatthukathā
278. ஸங்க⁴ஸாமக்³கீ³கதா² • 278. Saṅghasāmaggīkathā
279. உபாலிஸங்க⁴ஸாமக்³கீ³புச்சா² • 279. Upālisaṅghasāmaggīpucchā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அட்டா²ரஸவத்து²கதா² • Aṭṭhārasavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / உபாலிஸங்க⁴ஸாமக்³கீ³புச்சா²வண்ணனா • Upālisaṅghasāmaggīpucchāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸங்க⁴ஸாமக்³கீ³கதா²வண்ணனா • Saṅghasāmaggīkathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அட்டா²ரஸவத்து²கதா²வண்ணனா • Aṭṭhārasavatthukathāvaṇṇanā
