| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
অট্ঠারসৰত্থুকথা
Aṭṭhārasavatthukathā
৪৬৮. অধম্মং ধম্মোতিআদীনি অট্ঠারস ভেদকরৰত্থূনি সঙ্ঘভেদকক্খন্ধকে ৰণ্ণযিস্সাম।
468.Adhammaṃ dhammotiādīni aṭṭhārasa bhedakaravatthūni saṅghabhedakakkhandhake vaṇṇayissāma.
৪৭৫. তং উক্খিত্তকং ভিক্খুং ওসারেত্ৰাতি তং গহেত্ৰা সীমং গন্ত্ৰা আপত্তিং দেসাপেত্ৰা কম্মৰাচায ওসারেত্ৰা। তাৰদেৰ উপোসথোতি তংদিৰসমেৰ উপোসথক্খন্ধকে ৰুত্তনযেনেৰ সামগ্গীউপোসথো কাতব্বো।
475.Taṃukkhittakaṃ bhikkhuṃ osāretvāti taṃ gahetvā sīmaṃ gantvā āpattiṃ desāpetvā kammavācāya osāretvā. Tāvadeva uposathoti taṃdivasameva uposathakkhandhake vuttanayeneva sāmaggīuposatho kātabbo.
৪৭৬. অমূলা মূলং গন্ত্ৰাতি ন মূলা মূলং গন্ত্ৰা; তং ৰত্থুং অৰিনিচ্ছিনিত্ৰাতি অত্থো। অযং ৰুচ্চতি উপালি সঙ্ঘসামগ্গী অত্থাপেতা ব্যঞ্জনূপেতাতি অত্থতো অপগতা, ‘‘সঙ্ঘসামগ্গী’’তি ইমং পন ব্যঞ্জনমত্তং উপেতা।
476.Amūlā mūlaṃ gantvāti na mūlā mūlaṃ gantvā; taṃ vatthuṃ avinicchinitvāti attho. Ayaṃ vuccati upāli saṅghasāmaggī atthāpetā byañjanūpetāti atthato apagatā, ‘‘saṅghasāmaggī’’ti imaṃ pana byañjanamattaṃ upetā.
৪৭৭. সঙ্ঘস্স কিচ্চেসূতি সঙ্ঘস্স করণীযেসু উপ্পন্নেসু। মন্তনাসূতি ৰিনযমন্তনাসু। অত্থেসু জাতেসূতি ৰিনযঅত্থেসু উপ্পন্নেসু। ৰিনিচ্ছযেসূতি তেসংযেৰ অত্থানং ৰিনিচ্ছযেসু। মহত্থিকোতি মহাউপকারো। পগ্গহারহোতি পগ্গণ্হিতুং ৰুত্তো।
477.Saṅghassa kiccesūti saṅghassa karaṇīyesu uppannesu. Mantanāsūti vinayamantanāsu. Atthesu jātesūti vinayaatthesu uppannesu. Vinicchayesūti tesaṃyeva atthānaṃ vinicchayesu. Mahatthikoti mahāupakāro. Paggahārahoti paggaṇhituṃ vutto.
অনানুৰজ্জো পঠমেন সীলতোতিআদিম্হিযেৰ তাৰ সীলতো ন উপৰজ্জো। অৰেক্খিতাচারোতি অপেক্খিতাচারো; আলোকিতে ৰিলোকিতে সম্পজানকারীতিআদিনা নযেন উপপরিক্খিতাচারো। অট্ঠকথাসু পন ‘‘অপ্পটিচ্ছন্নাচারো’’তি ৰুত্তং।
Anānuvajjo paṭhamena sīlatotiādimhiyeva tāva sīlato na upavajjo. Avekkhitācāroti apekkhitācāro; ālokite vilokite sampajānakārītiādinā nayena upaparikkhitācāro. Aṭṭhakathāsu pana ‘‘appaṭicchannācāro’’ti vuttaṃ.
ৰিসয্হাতি অভিভৰিত্ৰা। অনুয্যুতং ভণন্তি অনুঞ্ঞাতং অনপগতং ভণন্তো। যস্মা হি সো অনুয্যুতং ভণতি, উসূযায ৰা অগতিগমনৰসেন ৰা কারণাপগতং ন ভণতি, তস্মা অত্থং ন হাপেতি। উসূযায পন অগতিগমনৰসেন ৰা ভণন্তো অত্থং হাপেতি, কারণং ন দেতি, তস্মা সো পরিসগতো ছম্ভতি চেৰ ৰেধতি চ। যো ঈদিসো ন হোতি, অযং ‘‘পগ্গহারহো’’তি দস্সেতি।
Visayhāti abhibhavitvā. Anuyyutaṃ bhaṇanti anuññātaṃ anapagataṃ bhaṇanto. Yasmā hi so anuyyutaṃ bhaṇati, usūyāya vā agatigamanavasena vā kāraṇāpagataṃ na bhaṇati, tasmā atthaṃ na hāpeti. Usūyāya pana agatigamanavasena vā bhaṇanto atthaṃ hāpeti, kāraṇaṃ na deti, tasmā so parisagato chambhati ceva vedhati ca. Yo īdiso na hoti, ayaṃ ‘‘paggahāraho’’ti dasseti.
কিঞ্চ ভিয্যো ‘‘তথেৰ পঞ্হ’’ন্তি গাথা, তস্সত্থো – যথা চ অনুয্যুতং ভণন্তো অত্থং ন হাপেতি, তথেৰ পরিসায মজ্ঝে পঞ্হং পুচ্ছিতো সমানো ন চেৰ পজ্ঝাযতি, ন চ মঙ্কু হোতি। যো হি অত্থং ন জানাতি, সো পজ্ঝাযতি। যো ৰত্তুং ন সক্কোতি, সো মঙ্কু হোতি। যো পন অত্থঞ্চ জানাতি, ৰত্তুঞ্চ সক্কোতি; সো ন পজ্ঝাযতি, ন মঙ্কু হোতি। কালাগতন্তি কথেতব্বযুত্তকালে আগতং। ব্যাকরণারহন্তি পঞ্হস্স অত্থানুলোমতায ব্যাকরণানুচ্ছৰিকং। ৰচোতি ৰদন্তো; এৰরূপং ৰচনং ভণন্তোতি অত্থো। রঞ্জেতীতি তোসেতি। ৰিঞ্ঞূপরিসন্তি ৰিঞ্ঞূনং পরিসং।
Kiñca bhiyyo ‘‘tatheva pañha’’nti gāthā, tassattho – yathā ca anuyyutaṃ bhaṇanto atthaṃ na hāpeti, tatheva parisāya majjhe pañhaṃ pucchito samāno na ceva pajjhāyati, na ca maṅku hoti. Yo hi atthaṃ na jānāti, so pajjhāyati. Yo vattuṃ na sakkoti, so maṅku hoti. Yo pana atthañca jānāti, vattuñca sakkoti; so na pajjhāyati, na maṅku hoti. Kālāgatanti kathetabbayuttakāle āgataṃ. Byākaraṇārahanti pañhassa atthānulomatāya byākaraṇānucchavikaṃ. Vacoti vadanto; evarūpaṃ vacanaṃ bhaṇantoti attho. Rañjetīti toseti. Viññūparisanti viññūnaṃ parisaṃ.
আচেরকম্হি চ সকেতি অত্তনো আচরিযৰাদে। অলং পমেতুন্তি ৰীমংসিতুং তং তং কারণং পঞ্ঞায তুলযিতুং সমত্থো। পগুণোতি কতপরিচযো লদ্ধাসেৰনো। কথেতৰেতি কথেতব্বে। ৰিরদ্ধিকোৰিদোতি ৰিরদ্ধট্ঠানকুসলো।
Ācerakamhica saketi attano ācariyavāde. Alaṃ pametunti vīmaṃsituṃ taṃ taṃ kāraṇaṃ paññāya tulayituṃ samattho. Paguṇoti kataparicayo laddhāsevano. Kathetaveti kathetabbe. Viraddhikovidoti viraddhaṭṭhānakusalo.
পচ্চত্থিকা যেন ৰজন্তীতি অযং গাথা যাদিসে কথেতব্বে পগুণো, তং দস্সেতুং ৰুত্তা। অযঞ্হেত্থ অত্থো – যাদিসেন কথিতেন পচ্চত্থিকা চ নিগ্গহং গচ্ছন্তি, মহাজনো চ সঞ্ঞপনং গচ্ছতি; সঞ্ঞত্তিং অৰবোধনং গচ্ছতীতি অত্থো। যঞ্চ কথেন্তো সকং আদাযং অত্তনো আচরিযৰাদং ন হাপেতি, যস্মিং ৰত্থুস্মিং অধিকরণং উপ্পন্নং, তদনুরূপং অনুপঘাতকরং পঞ্হং ব্যাকরমানো তাদিসে কথেতব্বে পগুণো হোতীতি।
Paccatthikā yena vajantīti ayaṃ gāthā yādise kathetabbe paguṇo, taṃ dassetuṃ vuttā. Ayañhettha attho – yādisena kathitena paccatthikā ca niggahaṃ gacchanti, mahājano ca saññapanaṃ gacchati; saññattiṃ avabodhanaṃ gacchatīti attho. Yañca kathento sakaṃ ādāyaṃ attano ācariyavādaṃ na hāpeti, yasmiṃ vatthusmiṃ adhikaraṇaṃ uppannaṃ, tadanurūpaṃ anupaghātakaraṃ pañhaṃ byākaramāno tādise kathetabbe paguṇo hotīti.
দূতেয্যকম্মেসু অলন্তি অট্ঠহি দূতঙ্গেহি সমন্নাগতত্তা সঙ্ঘস্স দূতেয্যকম্মেসু সমত্থো। সুট্ঠু উগ্গণ্হাতীতি সমুগ্গহো। ইদং ৰুত্তং হোতি – যথা নাম আহুনং আহুতিপিণ্ডং সমুগ্গণ্হন্তি, এৰং পীতিসোমনস্সজাতেনেৰ চেতসা সঙ্ঘস্স কিচ্চেসু সমুগ্গহো, সঙ্ঘস্সকিচ্চেসু তস্স তস্স কিচ্চস্স পটিগ্গাহকোতি অত্থো। করং ৰচোতি ৰচনং করোন্তো। ন তেন মঞ্ঞতীতি তেন ৰচনকরণেন ‘‘অহং করোমি, সঙ্ঘভারং নিত্থরামী’’তি ন মানাতিমানং জপ্পেতি।
Dūteyyakammesu alanti aṭṭhahi dūtaṅgehi samannāgatattā saṅghassa dūteyyakammesu samattho. Suṭṭhu uggaṇhātīti samuggaho. Idaṃ vuttaṃ hoti – yathā nāma āhunaṃ āhutipiṇḍaṃ samuggaṇhanti, evaṃ pītisomanassajāteneva cetasā saṅghassa kiccesu samuggaho, saṅghassakiccesu tassa tassa kiccassa paṭiggāhakoti attho. Karaṃ vacoti vacanaṃ karonto. Na tena maññatīti tena vacanakaraṇena ‘‘ahaṃ karomi, saṅghabhāraṃ nittharāmī’’ti na mānātimānaṃ jappeti.
আপজ্জতি যাৰতকেসু ৰত্থূসূতি যত্তকেসু ৰত্থূসু আপত্তিং আপজ্জমানো আপজ্জতি। হোতি যথা চ ৰুট্ঠিতীতি তস্সা চ আপত্তিযা যথা ৰুট্ঠানং হোতি। এতে ৰিভঙ্গাতি যেসু ৰত্থূসু আপজ্জতি, যথা চ ৰুট্ঠানং হোতি, ইমেসং অত্থানং জোতকা এতে ৰিভঙ্গা। উভযস্সাতি উভযে অস্স। স্ৰাগতাতি সুট্ঠু আগতা। আপত্তিৰুট্ঠানপদস্স কোৰিদোতি আপত্তিৰুট্ঠানকারণকুসলো।
Āpajjati yāvatakesu vatthūsūti yattakesu vatthūsu āpattiṃ āpajjamāno āpajjati. Hoti yathā ca vuṭṭhitīti tassā ca āpattiyā yathā vuṭṭhānaṃ hoti. Ete vibhaṅgāti yesu vatthūsu āpajjati, yathā ca vuṭṭhānaṃ hoti, imesaṃ atthānaṃ jotakā ete vibhaṅgā. Ubhayassāti ubhaye assa. Svāgatāti suṭṭhu āgatā. Āpattivuṭṭhānapadassa kovidoti āpattivuṭṭhānakāraṇakusalo.
যানি চাচরন্তি যানি চ ভণ্ডনকারণাদীনি আচরন্তো তজ্জনীযকম্মাদিৰসেন নিস্সারণং গচ্ছতি। ওসারণং তংৰুসিতস্স জন্তুনোতি তং ৰত্তং ৰুসিতস্স জন্তুনো, যা ওসারণা কাতব্বা, এতম্পি জানাতি। সেসং সব্বত্থ উত্তানমেৰাতি।
Yāni cācaranti yāni ca bhaṇḍanakāraṇādīni ācaranto tajjanīyakammādivasena nissāraṇaṃ gacchati. Osāraṇaṃ taṃvusitassa jantunoti taṃ vattaṃ vusitassa jantuno, yā osāraṇā kātabbā, etampi jānāti. Sesaṃ sabbattha uttānamevāti.
কোসম্বকক্খন্ধকৰণ্ণনা নিট্ঠিতা।
Kosambakakkhandhakavaṇṇanā niṭṭhitā.
সমন্তপাসাদিকায ৰিনযসংৰণ্ণনায
Samantapāsādikāya vinayasaṃvaṇṇanāya
মহাৰগ্গৰণ্ণনা সমত্তা।
Mahāvaggavaṇṇanā samattā.
মহাৰগ্গ-অট্ঠকথা নিট্ঠিতা।
Mahāvagga-aṭṭhakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
২৭৬. অট্ঠারসৰত্থুকথা • 276. Aṭṭhārasavatthukathā
২৭৮. সঙ্ঘসামগ্গীকথা • 278. Saṅghasāmaggīkathā
২৭৯. উপালিসঙ্ঘসামগ্গীপুচ্ছা • 279. Upālisaṅghasāmaggīpucchā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / উপালিসঙ্ঘসামগ্গীপুচ্ছাৰণ্ণনা • Upālisaṅghasāmaggīpucchāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সঙ্ঘসামগ্গীকথাৰণ্ণনা • Saṅghasāmaggīkathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অট্ঠারসৰত্থুকথাৰণ্ণনা • Aṭṭhārasavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২৭৬. অট্ঠারসৰত্থুকথা • 276. Aṭṭhārasavatthukathā
