| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৭. অত্থসন্দস্সকত্থেরঅপদানৰণ্ণনা
7. Atthasandassakattheraapadānavaṇṇanā
ৰিসালমাল়ে আসীনোতিআদিকং আযস্মতো অত্থসন্দস্সকত্থেরস্স অপদানং। অযম্পি পুরিমবুদ্ধেসু কতাধিকারো অনেকেসু অত্তভাৰেসু কতপুঞ্ঞূপচযো পদুমুত্তরস্স ভগৰতো কালে ব্রাহ্মণকুলে নিব্বত্তো ৰুদ্ধিমন্ৰায সকসিপ্পেসু নিপ্ফত্তিং পত্তো তত্থ সারং অপস্সন্তো গেহং পহায হিমৰন্তং গন্ত্ৰা রমণীযে ঠানে পণ্ণসালং কত্ৰা পটিৰসতি, তদা সত্তানুকম্পায হিমৰন্তমাগতং পদুমুত্তরভগৰন্তং দিস্ৰা পসন্নমানসো পঞ্চঙ্গসমন্নাগতো ৰন্দিত্ৰা থুতিৰচনেহি থোমেসি। সো তেন পুঞ্ঞেন যাৰতাযুকং কত্ৰা কালঙ্কত্ৰা ব্রহ্মলোকূপগো অহোসি। সো অপরভাগে ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো সত্থু ধম্মদেসনং সুত্ৰা পটিলদ্ধসদ্ধো পব্বজিত্ৰা অরহত্তং পাপুণি।
Visālamāḷe āsīnotiādikaṃ āyasmato atthasandassakattherassa apadānaṃ. Ayampi purimabuddhesu katādhikāro anekesu attabhāvesu katapuññūpacayo padumuttarassa bhagavato kāle brāhmaṇakule nibbatto vuddhimanvāya sakasippesu nipphattiṃ patto tattha sāraṃ apassanto gehaṃ pahāya himavantaṃ gantvā ramaṇīye ṭhāne paṇṇasālaṃ katvā paṭivasati, tadā sattānukampāya himavantamāgataṃ padumuttarabhagavantaṃ disvā pasannamānaso pañcaṅgasamannāgato vanditvā thutivacanehi thomesi. So tena puññena yāvatāyukaṃ katvā kālaṅkatvā brahmalokūpago ahosi. So aparabhāge imasmiṃ buddhuppāde kulagehe nibbatto viññutaṃ patto satthu dhammadesanaṃ sutvā paṭiladdhasaddho pabbajitvā arahattaṃ pāpuṇi.
৪৭. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিসালমাল়ে আসীনোতিআদিমাহ। তত্থ ৰিসালমাল়েতি ৰিসালং পত্থটং ৰিত্থিণ্ণং মহন্তং মাল়ং ৰিসালমাল়ং, তস্মিং ৰিসালমাল়ে আসীনো নিসিন্নো অহং লোকনাযকং অদ্দসন্তি সম্বন্ধো। তেসং সুৰিঞ্ঞেয্যমেৰাতি।
47. So attano pubbakammaṃ saritvā somanassajāto pubbacaritāpadānaṃ pakāsento visālamāḷe āsīnotiādimāha. Tattha visālamāḷeti visālaṃ patthaṭaṃ vitthiṇṇaṃ mahantaṃ māḷaṃ visālamāḷaṃ, tasmiṃ visālamāḷe āsīno nisinno ahaṃ lokanāyakaṃ addasanti sambandho. Tesaṃ suviññeyyamevāti.
অত্থসন্দস্সকত্থেরঅপদানৰণ্ণনা সমত্তা।
Atthasandassakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৭. অত্থসন্দস্সকত্থেরঅপদানং • 7. Atthasandassakattheraapadānaṃ
