| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೭. ಅತ್ಥಸನ್ದಸ್ಸಕತ್ಥೇರಅಪದಾನವಣ್ಣನಾ
7. Atthasandassakattheraapadānavaṇṇanā
ವಿಸಾಲಮಾಳೇ ಆಸೀನೋತಿಆದಿಕಂ ಆಯಸ್ಮತೋ ಅತ್ಥಸನ್ದಸ್ಸಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ಅನೇಕೇಸು ಅತ್ತಭಾವೇಸು ಕತಪುಞ್ಞೂಪಚಯೋ ಪದುಮುತ್ತರಸ್ಸ ಭಗವತೋ ಕಾಲೇ ಬ್ರಾಹ್ಮಣಕುಲೇ ನಿಬ್ಬತ್ತೋ ವುದ್ಧಿಮನ್ವಾಯ ಸಕಸಿಪ್ಪೇಸು ನಿಪ್ಫತ್ತಿಂ ಪತ್ತೋ ತತ್ಥ ಸಾರಂ ಅಪಸ್ಸನ್ತೋ ಗೇಹಂ ಪಹಾಯ ಹಿಮವನ್ತಂ ಗನ್ತ್ವಾ ರಮಣೀಯೇ ಠಾನೇ ಪಣ್ಣಸಾಲಂ ಕತ್ವಾ ಪಟಿವಸತಿ, ತದಾ ಸತ್ತಾನುಕಮ್ಪಾಯ ಹಿಮವನ್ತಮಾಗತಂ ಪದುಮುತ್ತರಭಗವನ್ತಂ ದಿಸ್ವಾ ಪಸನ್ನಮಾನಸೋ ಪಞ್ಚಙ್ಗಸಮನ್ನಾಗತೋ ವನ್ದಿತ್ವಾ ಥುತಿವಚನೇಹಿ ಥೋಮೇಸಿ। ಸೋ ತೇನ ಪುಞ್ಞೇನ ಯಾವತಾಯುಕಂ ಕತ್ವಾ ಕಾಲಙ್ಕತ್ವಾ ಬ್ರಹ್ಮಲೋಕೂಪಗೋ ಅಹೋಸಿ। ಸೋ ಅಪರಭಾಗೇ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಸತ್ಥು ಧಮ್ಮದೇಸನಂ ಸುತ್ವಾ ಪಟಿಲದ್ಧಸದ್ಧೋ ಪಬ್ಬಜಿತ್ವಾ ಅರಹತ್ತಂ ಪಾಪುಣಿ।
Visālamāḷe āsīnotiādikaṃ āyasmato atthasandassakattherassa apadānaṃ. Ayampi purimabuddhesu katādhikāro anekesu attabhāvesu katapuññūpacayo padumuttarassa bhagavato kāle brāhmaṇakule nibbatto vuddhimanvāya sakasippesu nipphattiṃ patto tattha sāraṃ apassanto gehaṃ pahāya himavantaṃ gantvā ramaṇīye ṭhāne paṇṇasālaṃ katvā paṭivasati, tadā sattānukampāya himavantamāgataṃ padumuttarabhagavantaṃ disvā pasannamānaso pañcaṅgasamannāgato vanditvā thutivacanehi thomesi. So tena puññena yāvatāyukaṃ katvā kālaṅkatvā brahmalokūpago ahosi. So aparabhāge imasmiṃ buddhuppāde kulagehe nibbatto viññutaṃ patto satthu dhammadesanaṃ sutvā paṭiladdhasaddho pabbajitvā arahattaṃ pāpuṇi.
೪೭. ಸೋ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ವಿಸಾಲಮಾಳೇ ಆಸೀನೋತಿಆದಿಮಾಹ। ತತ್ಥ ವಿಸಾಲಮಾಳೇತಿ ವಿಸಾಲಂ ಪತ್ಥಟಂ ವಿತ್ಥಿಣ್ಣಂ ಮಹನ್ತಂ ಮಾಳಂ ವಿಸಾಲಮಾಳಂ, ತಸ್ಮಿಂ ವಿಸಾಲಮಾಳೇ ಆಸೀನೋ ನಿಸಿನ್ನೋ ಅಹಂ ಲೋಕನಾಯಕಂ ಅದ್ದಸನ್ತಿ ಸಮ್ಬನ್ಧೋ। ತೇಸಂ ಸುವಿಞ್ಞೇಯ್ಯಮೇವಾತಿ।
47. So attano pubbakammaṃ saritvā somanassajāto pubbacaritāpadānaṃ pakāsento visālamāḷe āsīnotiādimāha. Tattha visālamāḷeti visālaṃ patthaṭaṃ vitthiṇṇaṃ mahantaṃ māḷaṃ visālamāḷaṃ, tasmiṃ visālamāḷe āsīno nisinno ahaṃ lokanāyakaṃ addasanti sambandho. Tesaṃ suviññeyyamevāti.
ಅತ್ಥಸನ್ದಸ್ಸಕತ್ಥೇರಅಪದಾನವಣ್ಣನಾ ಸಮತ್ತಾ।
Atthasandassakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೭. ಅತ್ಥಸನ್ದಸ್ಸಕತ್ಥೇರಅಪದಾನಂ • 7. Atthasandassakattheraapadānaṃ
