| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
39. அத்த²ஸந்த³ஸ்ஸனஞாணனித்³தே³ஸோ
39. Atthasandassanañāṇaniddeso
90. கத²ங் நானாத⁴ம்மப்பகாஸனதா பஞ்ஞா அத்த²ஸந்த³ஸ்ஸனே ஞாணங்? நானாத⁴ம்மாதி பஞ்சக்க²ந்தா⁴, த்³வாத³ஸாயதனானி, அட்டா²ரஸ தா⁴துயோ, குஸலா த⁴ம்மா, அகுஸலா த⁴ம்மா, அப்³யாகதா த⁴ம்மா, காமாவசரா த⁴ம்மா, ரூபாவசரா த⁴ம்மா, அரூபாவசரா த⁴ம்மா, அபரியாபன்னா த⁴ம்மா.
90. Kathaṃ nānādhammappakāsanatā paññā atthasandassane ñāṇaṃ? Nānādhammāti pañcakkhandhā, dvādasāyatanāni, aṭṭhārasa dhātuyo, kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā.
பகாஸனதாதி ரூபங் அனிச்சதோ பகாஸேதி, ரூபங் து³க்க²தோ பகாஸேதி, ரூபங் அனத்ததோ பகாஸேதி. வேத³னங்…பே॰… ஸஞ்ஞங்… ஸங்கா²ரே… விஞ்ஞாணங்… சக்கு²ங்…பே॰… ஜராமரணங் அனிச்சதோ பகாஸேதி, ஜராமரணங் து³க்க²தோ பகாஸேதி, ஜராமரணங் அனத்ததோ பகாஸேதி.
Pakāsanatāti rūpaṃ aniccato pakāseti, rūpaṃ dukkhato pakāseti, rūpaṃ anattato pakāseti. Vedanaṃ…pe… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato pakāseti, jarāmaraṇaṃ dukkhato pakāseti, jarāmaraṇaṃ anattato pakāseti.
அத்த²ஸந்த³ஸ்ஸனேதி காமச்ச²ந்த³ங் பஜஹந்தோ நெக்க²ம்மத்த²ங் ஸந்த³ஸ்ஸேதி. ப்³யாபாத³ங் பஜஹந்தோ அப்³யாபாத³த்த²ங் ஸந்த³ஸ்ஸேதி. தி²னமித்³த⁴ங் பஜஹந்தோ ஆலோகஸஞ்ஞத்த²ங் ஸந்த³ஸ்ஸேதி. உத்³த⁴ச்சங் பஜஹந்தோ அவிக்கே²பத்த²ங் ஸந்த³ஸ்ஸேதி. விசிகிச்ச²ங் பஜஹந்தோ த⁴ம்மவவத்தா²னத்த²ங் ஸந்த³ஸ்ஸேதி. அவிஜ்ஜங் பஜஹந்தோ ஞாணத்த²ங் ஸந்த³ஸ்ஸேதி. அரதிங் பஜஹந்தோ பாமோஜ்ஜத்த²ங் ஸந்த³ஸ்ஸேதி. நீவரணே பஜஹந்தோ பட²மஜா²னத்த²ங் ஸந்த³ஸ்ஸேதி …பே॰… ஸப்³ப³கிலேஸே பஜஹந்தோ அரஹத்தமக்³க³த்த²ங் ஸந்த³ஸ்ஸேதி. தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘நானாத⁴ம்மபகாஸனதா பஞ்ஞா அத்த²ஸந்த³ஸ்ஸனே ஞாணங்’’.
Atthasandassaneti kāmacchandaṃ pajahanto nekkhammatthaṃ sandasseti. Byāpādaṃ pajahanto abyāpādatthaṃ sandasseti. Thinamiddhaṃ pajahanto ālokasaññatthaṃ sandasseti. Uddhaccaṃ pajahanto avikkhepatthaṃ sandasseti. Vicikicchaṃ pajahanto dhammavavatthānatthaṃ sandasseti. Avijjaṃ pajahanto ñāṇatthaṃ sandasseti. Aratiṃ pajahanto pāmojjatthaṃ sandasseti. Nīvaraṇe pajahanto paṭhamajhānatthaṃ sandasseti …pe… sabbakilese pajahanto arahattamaggatthaṃ sandasseti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘nānādhammapakāsanatā paññā atthasandassane ñāṇaṃ’’.
அத்த²ஸந்த³ஸ்ஸனஞாணனித்³தே³ஸோ நவதிங்ஸதிமோ.
Atthasandassanañāṇaniddeso navatiṃsatimo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 39. அத்த²ஸந்த³ஸ்ஸனஞாணனித்³தே³ஸவண்ணனா • 39. Atthasandassanañāṇaniddesavaṇṇanā
