| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৩৯. অত্থসন্দস্সনঞাণনিদ্দেসো
39. Atthasandassanañāṇaniddeso
৯০. কথং নানাধম্মপ্পকাসনতা পঞ্ঞা অত্থসন্দস্সনে ঞাণং? নানাধম্মাতি পঞ্চক্খন্ধা, দ্ৰাদসাযতনানি, অট্ঠারস ধাতুযো, কুসলা ধম্মা, অকুসলা ধম্মা, অব্যাকতা ধম্মা, কামাৰচরা ধম্মা, রূপাৰচরা ধম্মা, অরূপাৰচরা ধম্মা, অপরিযাপন্না ধম্মা।
90. Kathaṃ nānādhammappakāsanatā paññā atthasandassane ñāṇaṃ? Nānādhammāti pañcakkhandhā, dvādasāyatanāni, aṭṭhārasa dhātuyo, kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā.
পকাসনতাতি রূপং অনিচ্চতো পকাসেতি, রূপং দুক্খতো পকাসেতি, রূপং অনত্ততো পকাসেতি। ৰেদনং…পে॰… সঞ্ঞং… সঙ্খারে… ৰিঞ্ঞাণং… চক্খুং…পে॰… জরামরণং অনিচ্চতো পকাসেতি, জরামরণং দুক্খতো পকাসেতি, জরামরণং অনত্ততো পকাসেতি।
Pakāsanatāti rūpaṃ aniccato pakāseti, rūpaṃ dukkhato pakāseti, rūpaṃ anattato pakāseti. Vedanaṃ…pe… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato pakāseti, jarāmaraṇaṃ dukkhato pakāseti, jarāmaraṇaṃ anattato pakāseti.
অত্থসন্দস্সনেতি কামচ্ছন্দং পজহন্তো নেক্খম্মত্থং সন্দস্সেতি। ব্যাপাদং পজহন্তো অব্যাপাদত্থং সন্দস্সেতি। থিনমিদ্ধং পজহন্তো আলোকসঞ্ঞত্থং সন্দস্সেতি। উদ্ধচ্চং পজহন্তো অৰিক্খেপত্থং সন্দস্সেতি। ৰিচিকিচ্ছং পজহন্তো ধম্মৰৰত্থানত্থং সন্দস্সেতি। অৰিজ্জং পজহন্তো ঞাণত্থং সন্দস্সেতি। অরতিং পজহন্তো পামোজ্জত্থং সন্দস্সেতি। নীৰরণে পজহন্তো পঠমঝানত্থং সন্দস্সেতি …পে॰… সব্বকিলেসে পজহন্তো অরহত্তমগ্গত্থং সন্দস্সেতি। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘নানাধম্মপকাসনতা পঞ্ঞা অত্থসন্দস্সনে ঞাণং’’।
Atthasandassaneti kāmacchandaṃ pajahanto nekkhammatthaṃ sandasseti. Byāpādaṃ pajahanto abyāpādatthaṃ sandasseti. Thinamiddhaṃ pajahanto ālokasaññatthaṃ sandasseti. Uddhaccaṃ pajahanto avikkhepatthaṃ sandasseti. Vicikicchaṃ pajahanto dhammavavatthānatthaṃ sandasseti. Avijjaṃ pajahanto ñāṇatthaṃ sandasseti. Aratiṃ pajahanto pāmojjatthaṃ sandasseti. Nīvaraṇe pajahanto paṭhamajhānatthaṃ sandasseti …pe… sabbakilese pajahanto arahattamaggatthaṃ sandasseti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘nānādhammapakāsanatā paññā atthasandassane ñāṇaṃ’’.
অত্থসন্দস্সনঞাণনিদ্দেসো নৰতিংসতিমো।
Atthasandassanañāṇaniddeso navatiṃsatimo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৩৯. অত্থসন্দস্সনঞাণনিদ্দেসৰণ্ণনা • 39. Atthasandassanañāṇaniddesavaṇṇanā
