| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
39. අත්‌ථසන්‌දස්‌සනඤාණනිද්‌දෙසො
39. Atthasandassanañāṇaniddeso
90. කථං නානාධම්‌මප්‌පකාසනතා පඤ්‌ඤා අත්‌ථසන්‌දස්‌සනෙ ඤාණං? නානාධම්‌මාති පඤ්‌චක්‌ඛන්‌ධා, ද්‌වාදසායතනානි, අට්‌ඨාරස ධාතුයො, කුසලා ධම්‌මා, අකුසලා ධම්‌මා, අබ්‍යාකතා ධම්‌මා, කාමාවචරා ධම්‌මා, රූපාවචරා ධම්‌මා, අරූපාවචරා ධම්‌මා, අපරියාපන්‌නා ධම්‌මා.
90. Kathaṃ nānādhammappakāsanatā paññā atthasandassane ñāṇaṃ? Nānādhammāti pañcakkhandhā, dvādasāyatanāni, aṭṭhārasa dhātuyo, kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā.
පකාසනතාති රූපං අනිච්‌චතො පකාසෙති, රූපං දුක්‌ඛතො පකාසෙති, රූපං අනත්‌තතො පකාසෙති. වෙදනං…පෙ.… සඤ්‌ඤං… සඞ්‌ඛාරෙ… විඤ්‌ඤාණං… චක්‌ඛුං…පෙ.… ජරාමරණං අනිච්‌චතො පකාසෙති, ජරාමරණං දුක්‌ඛතො පකාසෙති, ජරාමරණං අනත්‌තතො පකාසෙති.
Pakāsanatāti rūpaṃ aniccato pakāseti, rūpaṃ dukkhato pakāseti, rūpaṃ anattato pakāseti. Vedanaṃ…pe… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato pakāseti, jarāmaraṇaṃ dukkhato pakāseti, jarāmaraṇaṃ anattato pakāseti.
අත්‌ථසන්‌දස්‌සනෙති කාමච්‌ඡන්‌දං පජහන්‌තො නෙක්‌ඛම්‌මත්‌ථං සන්‌දස්‌සෙති. බ්‍යාපාදං පජහන්‌තො අබ්‍යාපාදත්‌ථං සන්‌දස්‌සෙති. ථිනමිද්‌ධං පජහන්‌තො ආලොකසඤ්‌ඤත්‌ථං සන්‌දස්‌සෙති. උද්‌ධච්‌චං පජහන්‌තො අවික්‌ඛෙපත්‌ථං සන්‌දස්‌සෙති. විචිකිච්‌ඡං පජහන්‌තො ධම්‌මවවත්‌ථානත්‌ථං සන්‌දස්‌සෙති. අවිජ්‌ජං පජහන්‌තො ඤාණත්‌ථං සන්‌දස්‌සෙති. අරතිං පජහන්‌තො පාමොජ්‌ජත්‌ථං සන්‌දස්‌සෙති. නීවරණෙ පජහන්‌තො පඨමඣානත්‌ථං සන්‌දස්‌සෙති …පෙ.… සබ්‌බකිලෙසෙ පජහන්‌තො අරහත්‌තමග්‌ගත්‌ථං සන්‌දස්‌සෙති. තං ඤාතට්‌ඨෙන ඤාණං, පජානනට්‌ඨෙන පඤ්‌ඤා. තෙන වුච්‌චති – ‘‘නානාධම්‌මපකාසනතා පඤ්‌ඤා අත්‌ථසන්‌දස්‌සනෙ ඤාණං’’.
Atthasandassaneti kāmacchandaṃ pajahanto nekkhammatthaṃ sandasseti. Byāpādaṃ pajahanto abyāpādatthaṃ sandasseti. Thinamiddhaṃ pajahanto ālokasaññatthaṃ sandasseti. Uddhaccaṃ pajahanto avikkhepatthaṃ sandasseti. Vicikicchaṃ pajahanto dhammavavatthānatthaṃ sandasseti. Avijjaṃ pajahanto ñāṇatthaṃ sandasseti. Aratiṃ pajahanto pāmojjatthaṃ sandasseti. Nīvaraṇe pajahanto paṭhamajhānatthaṃ sandasseti …pe… sabbakilese pajahanto arahattamaggatthaṃ sandasseti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘nānādhammapakāsanatā paññā atthasandassane ñāṇaṃ’’.
අත්‌ථසන්‌දස්‌සනඤාණනිද්‌දෙසො නවතිංසතිමො.
Atthasandassanañāṇaniddeso navatiṃsatimo.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / 39. අත්‌ථසන්‌දස්‌සනඤාණනිද්‌දෙසවණ්‌ණනා • 39. Atthasandassanañāṇaniddesavaṇṇanā
