| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༣༩. ཨཏྠསནྡསྶནཉཱཎནིདྡེསོ
39. Atthasandassanañāṇaniddeso
༩༠. ཀཐཾ ནཱནཱདྷམྨཔྤཀཱསནཏཱ པཉྙཱ ཨཏྠསནྡསྶནེ ཉཱཎཾ? ནཱནཱདྷམྨཱཏི པཉྩཀྑནྡྷཱ, དྭཱདསཱཡཏནཱནི, ཨཊྛཱརས དྷཱཏུཡོ, ཀུསལཱ དྷམྨཱ, ཨཀུསལཱ དྷམྨཱ, ཨབྱཱཀཏཱ དྷམྨཱ, ཀཱམཱཝཙརཱ དྷམྨཱ, རཱུཔཱཝཙརཱ དྷམྨཱ, ཨརཱུཔཱཝཙརཱ དྷམྨཱ, ཨཔརིཡཱཔནྣཱ དྷམྨཱ།
90. Kathaṃ nānādhammappakāsanatā paññā atthasandassane ñāṇaṃ? Nānādhammāti pañcakkhandhā, dvādasāyatanāni, aṭṭhārasa dhātuyo, kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā.
པཀཱསནཏཱཏི རཱུཔཾ ཨནིཙྩཏོ པཀཱསེཏི, རཱུཔཾ དུཀྑཏོ པཀཱསེཏི, རཱུཔཾ ཨནཏྟཏོ པཀཱསེཏི། ཝེདནཾ…པེ॰… སཉྙཾ… སངྑཱརེ… ཝིཉྙཱཎཾ… ཙཀྑུཾ…པེ॰… ཛརཱམརཎཾ ཨནིཙྩཏོ པཀཱསེཏི, ཛརཱམརཎཾ དུཀྑཏོ པཀཱསེཏི, ཛརཱམརཎཾ ཨནཏྟཏོ པཀཱསེཏི།
Pakāsanatāti rūpaṃ aniccato pakāseti, rūpaṃ dukkhato pakāseti, rūpaṃ anattato pakāseti. Vedanaṃ…pe… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato pakāseti, jarāmaraṇaṃ dukkhato pakāseti, jarāmaraṇaṃ anattato pakāseti.
ཨཏྠསནྡསྶནེཏི ཀཱམཙྪནྡཾ པཛཧནྟོ ནེཀྑམྨཏྠཾ སནྡསྶེཏི། བྱཱཔཱདཾ པཛཧནྟོ ཨབྱཱཔཱདཏྠཾ སནྡསྶེཏི། ཐིནམིདྡྷཾ པཛཧནྟོ ཨཱལོཀསཉྙཏྠཾ སནྡསྶེཏི། ཨུདྡྷཙྩཾ པཛཧནྟོ ཨཝིཀྑེཔཏྠཾ སནྡསྶེཏི། ཝིཙིཀིཙྪཾ པཛཧནྟོ དྷམྨཝཝཏྠཱནཏྠཾ སནྡསྶེཏི། ཨཝིཛྫཾ པཛཧནྟོ ཉཱཎཏྠཾ སནྡསྶེཏི། ཨརཏིཾ པཛཧནྟོ པཱམོཛྫཏྠཾ སནྡསྶེཏི། ནཱིཝརཎེ པཛཧནྟོ པཋམཛྷཱནཏྠཾ སནྡསྶེཏི …པེ॰… སབྦཀིལེསེ པཛཧནྟོ ཨརཧཏྟམགྒཏྠཾ སནྡསྶེཏི། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘ནཱནཱདྷམྨཔཀཱསནཏཱ པཉྙཱ ཨཏྠསནྡསྶནེ ཉཱཎཾ’’།
Atthasandassaneti kāmacchandaṃ pajahanto nekkhammatthaṃ sandasseti. Byāpādaṃ pajahanto abyāpādatthaṃ sandasseti. Thinamiddhaṃ pajahanto ālokasaññatthaṃ sandasseti. Uddhaccaṃ pajahanto avikkhepatthaṃ sandasseti. Vicikicchaṃ pajahanto dhammavavatthānatthaṃ sandasseti. Avijjaṃ pajahanto ñāṇatthaṃ sandasseti. Aratiṃ pajahanto pāmojjatthaṃ sandasseti. Nīvaraṇe pajahanto paṭhamajhānatthaṃ sandasseti …pe… sabbakilese pajahanto arahattamaggatthaṃ sandasseti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘nānādhammapakāsanatā paññā atthasandassane ñāṇaṃ’’.
ཨཏྠསནྡསྶནཉཱཎནིདྡེསོ ནཝཏིཾསཏིམོ།
Atthasandassanañāṇaniddeso navatiṃsatimo.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༣༩. ཨཏྠསནྡསྶནཉཱཎནིདྡེསཝཎྞནཱ • 39. Atthasandassanañāṇaniddesavaṇṇanā
