| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২-১০. অট্ঠসতসুত্তাদিৰণ্ণনা
2-10. Aṭṭhasatasuttādivaṇṇanā
২৭০-২৭৮. ৰেদনানং অট্ঠাধিকং সতং, তস্স অট্ঠসতস্স তব্ভাৰস্স পরিযাযো কারণং এত্থ অত্থীতি অট্ঠসতপরিযাযো, সুত্তং। তেনাহ ‘‘অট্ঠসতস্স কারণভূত’’ন্তি। ধম্মকারণন্তি পরিযত্তিধম্মভূতং কারণং। কাযিকাতি পঞ্চদ্ৰারকাযিকা। তেনাহ ‘‘কামাৰচরেযেৰ লব্ভন্তী’’তি, কামভূমিকাতি অত্থো। অরূপাৰচরে নত্থি, তিভূমিকাতি অত্থো। তেনাহ – ‘‘অরূপে তিকচতুক্কজ্ঝানং উপ্পজ্জতি, তঞ্চ খো লোকুত্তরং, ন লোকিয’’ন্তি। ইতরা উপেক্খাৰেদনা। উপৰিচরন্তি উপেচ্চ পজ্জন্তীতি অত্থো। তংসম্পযুত্তানন্তি ৰিচারসম্পযুত্তানং।
270-278. Vedanānaṃ aṭṭhādhikaṃ sataṃ, tassa aṭṭhasatassa tabbhāvassa pariyāyo kāraṇaṃ ettha atthīti aṭṭhasatapariyāyo, suttaṃ. Tenāha ‘‘aṭṭhasatassa kāraṇabhūta’’nti. Dhammakāraṇanti pariyattidhammabhūtaṃ kāraṇaṃ. Kāyikāti pañcadvārakāyikā. Tenāha ‘‘kāmāvacareyeva labbhantī’’ti, kāmabhūmikāti attho. Arūpāvacare natthi, tibhūmikāti attho. Tenāha – ‘‘arūpe tikacatukkajjhānaṃ uppajjati, tañca kho lokuttaraṃ, na lokiya’’nti. Itarā upekkhāvedanā. Upavicaranti upecca pajjantīti attho. Taṃsampayuttānanti vicārasampayuttānaṃ.
পটিলাভতোতি পটিলদ্ধভাৰতো। সমনুপস্সতোতি পচ্চৰেক্খতো পস্সতো। অতীতং খণত্তযাতিক্কমেন অতিক্কন্তং, নিরুদ্ধপ্পত্তিযা নিরুদ্ধং, পকতিৰিজহনেন ৰিপরিণতং। সমনুস্সরতোতি চিন্তযতো। গেহস্সিতন্তি কামগুণনিস্সিতং। কামগুণা হি ইধ গেহনিস্সিতধম্মেন গেহপরিযাযেন ৰুত্তা।
Paṭilābhatoti paṭiladdhabhāvato. Samanupassatoti paccavekkhato passato. Atītaṃ khaṇattayātikkamena atikkantaṃ, niruddhappattiyā niruddhaṃ, pakativijahanena vipariṇataṃ. Samanussaratoti cintayato. Gehassitanti kāmaguṇanissitaṃ. Kāmaguṇā hi idha gehanissitadhammena gehapariyāyena vuttā.
ৰিপরিণামৰিরাগনিরোধন্তি ৰিপরিণামনং ৰিরজ্জনলক্খণং নিরুজ্ঝনঞ্চ ৰিদিত্ৰা। পুব্বেতি অতীতে। এতরহীতি ইদানি ৰত্তমানা। সম্মপ্পঞ্ঞায পস্সতোতি ৰিপস্সনাপঞ্ঞায চেৰ মগ্গপঞ্ঞায চ যাথাৰতো পস্সতো। উস্সুক্কাপেতুন্তি ৰিপস্সনং পট্ঠপেত্ৰা মগ্গপটিৰেধং পাপেতুং। নিব্বানং উদ্দিস্স পৰত্তিতত্তা নেক্খম্মস্সিতসোমনস্সানি নাম। লোকামিসপটিসংযুত্তানন্তি কামগুণনিস্সিতানং। তদাযতনন্তি তং আযতনং তং কারণং অরহত্তং। অনুত্তরেসু ৰিমোক্খেসূতি অরিযফলধম্মেসু। পিহন্তি অধিগমিচ্ছং।
Vipariṇāmavirāganirodhanti vipariṇāmanaṃ virajjanalakkhaṇaṃ nirujjhanañca viditvā. Pubbeti atīte. Etarahīti idāni vattamānā. Sammappaññāya passatoti vipassanāpaññāya ceva maggapaññāya ca yāthāvato passato. Ussukkāpetunti vipassanaṃ paṭṭhapetvā maggapaṭivedhaṃ pāpetuṃ. Nibbānaṃ uddissa pavattitattā nekkhammassitasomanassāni nāma. Lokāmisapaṭisaṃyuttānanti kāmaguṇanissitānaṃ. Tadāyatananti taṃ āyatanaṃ taṃ kāraṇaṃ arahattaṃ. Anuttaresu vimokkhesūti ariyaphaladhammesu. Pihanti adhigamicchaṃ.
উপেক্খাতি সোমনস্সরহিতঅঞ্ঞাণুপেক্খা। বাল্যযোগতো বালস্স, ততো এৰ মূল়্হস্স পুথুজ্জনস্স। কিলেসোধীনং মগ্গোধীহি অজিতত্তা অনোধিজিনস্স। সত্তমভৰাদিতো উদ্ধং পৰত্তনৰিপাকস্স অজিতত্তা অৰিপাকজিনস্স। অনেকাদীনৰে ৰট্টে আদীনৰস্স অজাননেন অনাদীনৰদস্সাৰিনো। পটিপত্তিপটিৰেধবাহুসচ্চাভাৰেন অস্সুতৰতো পুথুজ্জনস্স। রূপং সা নাতিৰত্ততি ন অতিক্কমতি ঞাণসম্পযুত্তাভাৰতো। সব্বসঙ্গাহকোতি সব্বধম্মে সঙ্গণ্হনকো। ততিযাদীনি যাৰ দসমা হেট্ঠা ৰুত্তনযত্তা উত্তানত্থানেৰ।
Upekkhāti somanassarahitaaññāṇupekkhā. Bālyayogato bālassa, tato eva mūḷhassa puthujjanassa. Kilesodhīnaṃ maggodhīhi ajitattā anodhijinassa. Sattamabhavādito uddhaṃ pavattanavipākassa ajitattā avipākajinassa. Anekādīnave vaṭṭe ādīnavassa ajānanena anādīnavadassāvino. Paṭipattipaṭivedhabāhusaccābhāvena assutavato puthujjanassa. Rūpaṃ sā nātivattati na atikkamati ñāṇasampayuttābhāvato. Sabbasaṅgāhakoti sabbadhamme saṅgaṇhanako. Tatiyādīni yāva dasamā heṭṭhā vuttanayattā uttānatthāneva.
অট্ঠসতসুত্তাদিৰণ্ণনা নিট্ঠিতা।
Aṭṭhasatasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
২. অট্ঠসতসুত্তং • 2. Aṭṭhasatasuttaṃ
৩. অঞ্ঞতরভিক্খুসুত্তং • 3. Aññatarabhikkhusuttaṃ
৪. পুব্বসুত্তং • 4. Pubbasuttaṃ
৫. ঞাণসুত্তং • 5. Ñāṇasuttaṃ
৬. সম্বহুলভিক্খুসুত্তং • 6. Sambahulabhikkhusuttaṃ
৭. পঠমসমণব্রাহ্মণসুত্তং • 7. Paṭhamasamaṇabrāhmaṇasuttaṃ
৮. দুতিযসমণব্রাহ্মণসুত্তং • 8. Dutiyasamaṇabrāhmaṇasuttaṃ
৯. ততিযসমণব্রাহ্মণসুত্তং • 9. Tatiyasamaṇabrāhmaṇasuttaṃ
১০. সুদ্ধিকসুত্তং • 10. Suddhikasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২-১০. অট্ঠসতসুত্তাদিৰণ্ণনা • 2-10. Aṭṭhasatasuttādivaṇṇanā
