| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. ཨཊྛསཏསུཏྟཾ
2. Aṭṭhasatasuttaṃ
༢༧༠. ‘‘ཨཊྛསཏཔརིཡཱཡཾ ཝོ, བྷིཀྑཝེ, དྷམྨཔརིཡཱཡཾ དེསེསྶཱམི། ཏཾ སུཎཱཐ། ཀཏམོ ཙ, བྷིཀྑཝེ, ཨཊྛསཏཔརིཡཱཡོ, དྷམྨཔརིཡཱཡོ? དྭེཔི མཡཱ, བྷིཀྑཝེ, ཝེདནཱ ཝུཏྟཱ པརིཡཱཡེན; ཏིསྶོཔི མཡཱ ཝེདནཱ ཝུཏྟཱ པརིཡཱཡེན; པཉྩཔི མཡཱ ཝེདནཱ ཝུཏྟཱ པརིཡཱཡེན; ཚཔི མཡཱ ཝེདནཱ ཝུཏྟཱ པརིཡཱཡེན; ཨཊྛཱརསཱཔི མཡཱ ཝེདནཱ ཝུཏྟཱ པརིཡཱཡེན; ཚཏྟིཾསཱཔི མཡཱ ཝེདནཱ ཝུཏྟཱ པརིཡཱཡེན; ཨཊྛསཏམྤི མཡཱ ཝེདནཱ ཝུཏྟཱ པརིཡཱཡེན། ‘‘ཀཏམཱ ཙ, བྷིཀྑཝེ, དྭེ ཝེདནཱ? ཀཱཡིཀཱ ཙ ཙེཏསིཀཱ ཙ – ཨིམཱ ཝུཙྩནྟི, བྷིཀྑཝེ, དྭེ ཝེདནཱ། ཀཏམཱ ཙ, བྷིཀྑཝེ, ཏིསྶོ ཝེདནཱ? སུཁཱ ཝེདནཱ, དུཀྑཱ ཝེདནཱ, ཨདུཀྑམསུཁཱ ཝེདནཱ – ཨིམཱ ཝུཙྩནྟི, བྷིཀྑཝེ, ཏིསྶོ ཝེདནཱ། ཀཏམཱ ཙ, བྷིཀྑཝེ, པཉྩ ཝེདནཱ? སུཁིནྡྲིཡཾ, དུཀྑིནྡྲིཡཾ, སོམནསྶིནྡྲིཡཾ, དོམནསྶིནྡྲིཡཾ, ཨུཔེཀྑིནྡྲིཡཾ – ཨིམཱ ཝུཙྩནྟི, བྷིཀྑཝེ, པཉྩ ཝེདནཱ། ཀཏམཱ ཙ, བྷིཀྑཝེ, ཚ ཝེདནཱ? ཙཀྑུསམྥསྶཛཱ ཝེདནཱ…པེ॰… མནོསམྥསྶཛཱ ཝེདནཱ – ཨིམཱ ཝུཙྩནྟི, བྷིཀྑཝེ, ཚ ཝེདནཱ། ཀཏམཱ ཙ, བྷིཀྑཝེ, ཨཊྛཱརས ཝེདནཱ? ཚ སོམནསྶཱུཔཝིཙཱརཱ, ཚ དོམནསྶཱུཔཝིཙཱརཱ, ཚ ཨུཔེཀྑཱུཔཝིཙཱརཱ – ཨིམཱ ཝུཙྩནྟི, བྷིཀྑཝེ, ཨཊྛཱརས ཝེདནཱ། ཀཏམཱ ཙ, བྷིཀྑཝེ, ཚཏྟིཾས ཝེདནཱ? ཚ གེཧསིཏཱནི 1 སོམནསྶཱནི, ཚ ནེཀྑམྨསིཏཱནི 2 སོམནསྶཱནི, ཚ གེཧསིཏཱནི དོམནསྶཱནི, ཚ ནེཀྑམྨསིཏཱནི དོམནསྶཱནི, ཚ གེཧསིཏཱ ཨུཔེཀྑཱ , ཚ ནེཀྑམྨསིཏཱ ཨུཔེཀྑཱ – ཨིམཱ ཝུཙྩནྟི, བྷིཀྑཝེ, ཚཏྟིཾས ཝེདནཱ། ཀཏམཉྩ, བྷིཀྑཝེ, ཨཊྛསཏཾ ཝེདནཱ? ཨཏཱིཏཱ ཚཏྟིཾས ཝེདནཱ, ཨནཱགཏཱ ཚཏྟིཾས ཝེདནཱ, པཙྩུཔྤནྣཱ ཚཏྟིཾས ཝེདནཱ – ཨིམཱ ཝུཙྩནྟི, བྷིཀྑཝེ, ཨཊྛསཏཾ ཝེདནཱ། ཨཡཾ, བྷིཀྑཝེ, ཨཊྛསཏཔརིཡཱཡོ དྷམྨཔརིཡཱཡོ’’ཏི། དུཏིཡཾ།
270. ‘‘Aṭṭhasatapariyāyaṃ vo, bhikkhave, dhammapariyāyaṃ desessāmi. Taṃ suṇātha. Katamo ca, bhikkhave, aṭṭhasatapariyāyo, dhammapariyāyo? Dvepi mayā, bhikkhave, vedanā vuttā pariyāyena; tissopi mayā vedanā vuttā pariyāyena; pañcapi mayā vedanā vuttā pariyāyena; chapi mayā vedanā vuttā pariyāyena; aṭṭhārasāpi mayā vedanā vuttā pariyāyena; chattiṃsāpi mayā vedanā vuttā pariyāyena; aṭṭhasatampi mayā vedanā vuttā pariyāyena. ‘‘Katamā ca, bhikkhave, dve vedanā? Kāyikā ca cetasikā ca – imā vuccanti, bhikkhave, dve vedanā. Katamā ca, bhikkhave, tisso vedanā? Sukhā vedanā, dukkhā vedanā, adukkhamasukhā vedanā – imā vuccanti, bhikkhave, tisso vedanā. Katamā ca, bhikkhave, pañca vedanā? Sukhindriyaṃ, dukkhindriyaṃ, somanassindriyaṃ, domanassindriyaṃ, upekkhindriyaṃ – imā vuccanti, bhikkhave, pañca vedanā. Katamā ca, bhikkhave, cha vedanā? Cakkhusamphassajā vedanā…pe… manosamphassajā vedanā – imā vuccanti, bhikkhave, cha vedanā. Katamā ca, bhikkhave, aṭṭhārasa vedanā? Cha somanassūpavicārā, cha domanassūpavicārā, cha upekkhūpavicārā – imā vuccanti, bhikkhave, aṭṭhārasa vedanā. Katamā ca, bhikkhave, chattiṃsa vedanā? Cha gehasitāni 3 somanassāni, cha nekkhammasitāni 4 somanassāni, cha gehasitāni domanassāni, cha nekkhammasitāni domanassāni, cha gehasitā upekkhā , cha nekkhammasitā upekkhā – imā vuccanti, bhikkhave, chattiṃsa vedanā. Katamañca, bhikkhave, aṭṭhasataṃ vedanā? Atītā chattiṃsa vedanā, anāgatā chattiṃsa vedanā, paccuppannā chattiṃsa vedanā – imā vuccanti, bhikkhave, aṭṭhasataṃ vedanā. Ayaṃ, bhikkhave, aṭṭhasatapariyāyo dhammapariyāyo’’ti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢-༡༠. ཨཊྛསཏསུཏྟཱདིཝཎྞནཱ • 2-10. Aṭṭhasatasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢-༡༠. ཨཊྛསཏསུཏྟཱདིཝཎྞནཱ • 2-10. Aṭṭhasatasuttādivaṇṇanā
