| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
உபோஸதா²தி³புச்சா²விஸ்ஸஜ்ஜனா
Uposathādipucchāvissajjanā
332. ‘‘உபோஸத²கம்மஸ்ஸ கோ ஆதீ³’’திஆதீ³னங் புச்சா²னங் விஸ்ஸஜ்ஜனே ஸாமக்³கீ³ ஆதீ³தி ‘‘உபோஸத²ங் கரிஸ்ஸாமா’’தி ஸீமங் ஸோதெ⁴த்வா ச²ந்த³பாரிஸுத்³தி⁴ங் ஆஹரித்வா ஸன்னிபதிதானங் காயஸாமக்³கீ³ ஆதி³. கிரியா மஜ்ஜே²தி புப்³ப³கிச்சங் கத்வா பாதிமொக்க²ஓஸாரணகிரியா மஜ்ஜே². நிட்டா²னங் பரியோஸானந்தி ‘‘தத்த² ஸப்³பே³ஹேவ ஸமக்³கே³ஹி ஸம்மோத³மானேஹி அவிவத³மானேஹி ஸிக்கி²தப்³ப³’’ந்தி இத³ங் பாதிமொக்க²னிட்டா²னங் பரியோஸானங். பவாரணாகம்மஸ்ஸ ஸாமக்³கீ³ ஆதீ³தி ‘‘பவாரணங் கரிஸ்ஸாமா’’தி ஸீமங் ஸோதெ⁴த்வா ச²ந்த³பவாரணங் ஆஹரித்வா ஸன்னிபதிதானங் காயஸாமக்³கீ³ ஆதி³. கிரியா மஜ்ஜே²தி பவாரணாஞத்தி ச பவாரணாகதா² ச மஜ்ஜே², ஸங்க⁴னவகஸ்ஸ ‘‘பஸ்ஸந்தோ படிகரிஸ்ஸாமீ’’தி வசனங் பரியோஸானங். தஜ்ஜனீயகம்மாதீ³ஸு வத்து² நாம யேன வத்து²னா கம்மாரஹோ ஹோதி, தங் வத்து². புக்³க³லோதி யேன தங் வத்து² கதங், ஸோ புக்³க³லோ. கம்மவாசா பரியோஸானந்தி ‘‘கதங் ஸங்கே⁴ன இத்த²ன்னாமஸ்ஸ பி⁴க்கு²னோ தஜ்ஜனீயகம்மங், க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி ஏவங் தஸ்ஸா தஸ்ஸா கம்மவாசாய அவஸானவசனங் பரியோஸானங். ஸேஸங் ஸப்³ப³த்த² உத்தானமேவாதி
332. ‘‘Uposathakammassa ko ādī’’tiādīnaṃ pucchānaṃ vissajjane sāmaggī ādīti ‘‘uposathaṃ karissāmā’’ti sīmaṃ sodhetvā chandapārisuddhiṃ āharitvā sannipatitānaṃ kāyasāmaggī ādi. Kiriyā majjheti pubbakiccaṃ katvā pātimokkhaosāraṇakiriyā majjhe. Niṭṭhānaṃ pariyosānanti ‘‘tattha sabbeheva samaggehi sammodamānehi avivadamānehi sikkhitabba’’nti idaṃ pātimokkhaniṭṭhānaṃ pariyosānaṃ. Pavāraṇākammassa sāmaggī ādīti ‘‘pavāraṇaṃ karissāmā’’ti sīmaṃ sodhetvā chandapavāraṇaṃ āharitvā sannipatitānaṃ kāyasāmaggī ādi. Kiriyā majjheti pavāraṇāñatti ca pavāraṇākathā ca majjhe, saṅghanavakassa ‘‘passanto paṭikarissāmī’’ti vacanaṃ pariyosānaṃ. Tajjanīyakammādīsu vatthu nāma yena vatthunā kammāraho hoti, taṃ vatthu. Puggaloti yena taṃ vatthu kataṃ, so puggalo. Kammavācā pariyosānanti ‘‘kataṃ saṅghena itthannāmassa bhikkhuno tajjanīyakammaṃ, khamati saṅghassa, tasmā tuṇhī, evametaṃ dhārayāmī’’ti evaṃ tassā tassā kammavācāya avasānavacanaṃ pariyosānaṃ. Sesaṃ sabbattha uttānamevāti
உபோஸதா²தி³புச்சா²விஸ்ஸஜ்ஜனாவண்ணனா நிட்டி²தா.
Uposathādipucchāvissajjanāvaṇṇanā niṭṭhitā.
அத்த²வஸபகரணாவண்ணனா
Atthavasapakaraṇāvaṇṇanā
334. அத்த²வஸபகரணே – த³ஸ அத்த²வஸேதிஆதீ³ஸு யங் வத்தப்³ப³ங் தங் பட²மபாராஜிகவண்ணனாயமேவ வுத்தங். யங் ஸங்க⁴ஸுட்டு² தங் ஸங்க⁴பா²ஸூதிஆதீ³ஸு உபரிமங் உபரிமங் பத³ங் ஹெட்டி²மஸ்ஸ ஹெட்டி²மஸ்ஸ பத³ஸ்ஸ அத்தோ².
334. Atthavasapakaraṇe – dasa atthavasetiādīsu yaṃ vattabbaṃ taṃ paṭhamapārājikavaṇṇanāyameva vuttaṃ. Yaṃ saṅghasuṭṭhu taṃ saṅghaphāsūtiādīsu uparimaṃ uparimaṃ padaṃ heṭṭhimassa heṭṭhimassa padassa attho.
அத்த²ஸதங் த⁴ம்மஸதந்திஆதி³ம்ஹி பன யதே³தங் த³ஸஸு பதே³ஸு ஏகேகங் மூலங் கத்வா த³ஸக்க²த்துங் யோஜனாய பத³ஸதங் வுத்தங். தத்த² பச்சி²மஸ்ஸ பச்சி²மஸ்ஸ பத³ஸ்ஸ வஸேன அத்த²ஸதங் புரிமஸ்ஸ புரிமஸ்ஸ வஸேன த⁴ம்மஸதங் வேதி³தப்³ப³ங். அத² வா யே த³ஸ அத்த²வஸே படிச்ச ததா²க³தேன ஸாவகானங் ஸிக்கா²பத³ங் பஞ்ஞத்தங், யே புப்³பே³ பட²மபாராஜிகவண்ணனாயங் ‘‘தத்த² ஸங்க⁴ஸுட்டு²தா நாம ஸங்க⁴ஸ்ஸ ஸுட்டு²பா⁴வோ ‘ஸுட்டு² தே³வா’தி ஆக³தட்டா²னே விய ‘ஸுட்டு² ப⁴ந்தே’தி வசனஸம்படிச்ச²னபா⁴வோ, யோ ச ததா²க³தஸ்ஸ வசனங் ஸம்படிச்ச²தி, தஸ்ஸ தங் தீ³க⁴ரத்தங் ஹிதாய ஸுகா²ய ஹோதி, தஸ்மா ஸங்க⁴ஸ்ஸ ‘ஸுட்டு² ப⁴ந்தே’தி மம வசனஸம்படிச்ச²னத்த²ங் பஞ்ஞபெஸ்ஸாமி அஸம்படிச்ச²னே ஆதீ³னவங் ஸம்படிச்ச²னே ச ஆனிஸங்ஸங் த³ஸ்ஸெத்வா ந ப³லக்காரேன அபி⁴ப⁴வித்வாதி ஏதமத்த²ங் ஆவிகரொந்தோ ஆஹ – ஸங்க⁴ஸுட்டு²தாயா’’தி ஏவமாதி³னா நயேன வண்ணிதா, தேஸங் இத⁴ த³ஸக்க²த்துங் ஆக³தத்தா அத்த²ஸதங் தத³த்த²ஜோதகானஞ்ச பதா³னங் வஸேன த⁴ம்மஸதங் வேதி³தப்³ப³ங். இதா³னி அத்த²ஜோதகானங் நிருத்தீனங் வஸேன நிருத்திஸதங், த⁴ம்மபூ⁴தானங் நிருத்தீனங் வஸேன நிருத்திஸதந்தி த்³வே நிருத்திஸதானி, அத்த²ஸதே ஞாணஸதங், த⁴ம்மஸதே ஞாணஸதங், த்³வீஸு நிருத்திஸதேஸு த்³வே ஞாணஸதானீதி சத்தாரி ஞாணஸதானி ச வேதி³தப்³பா³னி.
Atthasataṃdhammasatantiādimhi pana yadetaṃ dasasu padesu ekekaṃ mūlaṃ katvā dasakkhattuṃ yojanāya padasataṃ vuttaṃ. Tattha pacchimassa pacchimassa padassa vasena atthasataṃ purimassa purimassa vasena dhammasataṃ veditabbaṃ. Atha vā ye dasa atthavase paṭicca tathāgatena sāvakānaṃ sikkhāpadaṃ paññattaṃ, ye pubbe paṭhamapārājikavaṇṇanāyaṃ ‘‘tattha saṅghasuṭṭhutā nāma saṅghassa suṭṭhubhāvo ‘suṭṭhu devā’ti āgataṭṭhāne viya ‘suṭṭhu bhante’ti vacanasampaṭicchanabhāvo, yo ca tathāgatassa vacanaṃ sampaṭicchati, tassa taṃ dīgharattaṃ hitāya sukhāya hoti, tasmā saṅghassa ‘suṭṭhu bhante’ti mama vacanasampaṭicchanatthaṃ paññapessāmi asampaṭicchane ādīnavaṃ sampaṭicchane ca ānisaṃsaṃ dassetvā na balakkārena abhibhavitvāti etamatthaṃ āvikaronto āha – saṅghasuṭṭhutāyā’’ti evamādinā nayena vaṇṇitā, tesaṃ idha dasakkhattuṃ āgatattā atthasataṃ tadatthajotakānañca padānaṃ vasena dhammasataṃ veditabbaṃ. Idāni atthajotakānaṃ niruttīnaṃ vasena niruttisataṃ, dhammabhūtānaṃ niruttīnaṃ vasena niruttisatanti dve niruttisatāni, atthasate ñāṇasataṃ, dhammasate ñāṇasataṃ, dvīsu niruttisatesu dve ñāṇasatānīti cattāri ñāṇasatāni ca veditabbāni.
‘‘அத்த²ஸதங் த⁴ம்மஸதங், த்³வே நிருத்திஸதானி;
‘‘Atthasataṃ dhammasataṃ, dve niruttisatāni;
சத்தாரி ஞாணஸதானி, அத்த²வஸே பகரணே’’தி.
Cattāri ñāṇasatāni, atthavase pakaraṇe’’ti.
இதி ஹி யங் வுத்தங், இத³மேதங் படிச்ச வுத்தந்தி.
Iti hi yaṃ vuttaṃ, idametaṃ paṭicca vuttanti.
இதி ஸமந்தபாஸாதி³காய வினயஸங்வண்ணனாய
Iti samantapāsādikāya vinayasaṃvaṇṇanāya
மஹாவக்³க³வண்ணனா நிட்டி²தா.
Mahāvaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi
ஆதி³மஜ்ஜ²ந்தபுச்ச²னங் • Ādimajjhantapucchanaṃ
அத்த²வஸபகரணங் • Atthavasapakaraṇaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அத்த²வஸபகரணவண்ணனா • Atthavasapakaraṇavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
உபோஸதா²தி³புச்சா²விஸ்ஸஜ்ஜனாவண்ணனா • Uposathādipucchāvissajjanāvaṇṇanā
அத்த²வஸபகரணவண்ணனா • Atthavasapakaraṇavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / உபோஸதா²தி³புச்சா²விஸ்ஸஜ்ஜனாவண்ணனா • Uposathādipucchāvissajjanāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi
உபோஸதா²தி³புச்சா²விஸ்ஸஜ்ஜனா • Uposathādipucchāvissajjanā
அத்த²வஸபகரணவண்ணனா • Atthavasapakaraṇavaṇṇanā
