| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
উপোসথাদিপুচ্ছাৰিস্সজ্জনা
Uposathādipucchāvissajjanā
৩৩২. ‘‘উপোসথকম্মস্স কো আদী’’তিআদীনং পুচ্ছানং ৰিস্সজ্জনে সামগ্গী আদীতি ‘‘উপোসথং করিস্সামা’’তি সীমং সোধেত্ৰা ছন্দপারিসুদ্ধিং আহরিত্ৰা সন্নিপতিতানং কাযসামগ্গী আদি। কিরিযা মজ্ঝেতি পুব্বকিচ্চং কত্ৰা পাতিমোক্খওসারণকিরিযা মজ্ঝে। নিট্ঠানং পরিযোসানন্তি ‘‘তত্থ সব্বেহেৰ সমগ্গেহি সম্মোদমানেহি অৰিৰদমানেহি সিক্খিতব্ব’’ন্তি ইদং পাতিমোক্খনিট্ঠানং পরিযোসানং। পৰারণাকম্মস্স সামগ্গী আদীতি ‘‘পৰারণং করিস্সামা’’তি সীমং সোধেত্ৰা ছন্দপৰারণং আহরিত্ৰা সন্নিপতিতানং কাযসামগ্গী আদি। কিরিযা মজ্ঝেতি পৰারণাঞত্তি চ পৰারণাকথা চ মজ্ঝে, সঙ্ঘনৰকস্স ‘‘পস্সন্তো পটিকরিস্সামী’’তি ৰচনং পরিযোসানং। তজ্জনীযকম্মাদীসু ৰত্থু নাম যেন ৰত্থুনা কম্মারহো হোতি, তং ৰত্থু। পুগ্গলোতি যেন তং ৰত্থু কতং, সো পুগ্গলো। কম্মৰাচা পরিযোসানন্তি ‘‘কতং সঙ্ঘেন ইত্থন্নামস্স ভিক্খুনো তজ্জনীযকম্মং, খমতি সঙ্ঘস্স, তস্মা তুণ্হী, এৰমেতং ধারযামী’’তি এৰং তস্সা তস্সা কম্মৰাচায অৰসানৰচনং পরিযোসানং। সেসং সব্বত্থ উত্তানমেৰাতি
332. ‘‘Uposathakammassa ko ādī’’tiādīnaṃ pucchānaṃ vissajjane sāmaggī ādīti ‘‘uposathaṃ karissāmā’’ti sīmaṃ sodhetvā chandapārisuddhiṃ āharitvā sannipatitānaṃ kāyasāmaggī ādi. Kiriyā majjheti pubbakiccaṃ katvā pātimokkhaosāraṇakiriyā majjhe. Niṭṭhānaṃ pariyosānanti ‘‘tattha sabbeheva samaggehi sammodamānehi avivadamānehi sikkhitabba’’nti idaṃ pātimokkhaniṭṭhānaṃ pariyosānaṃ. Pavāraṇākammassa sāmaggī ādīti ‘‘pavāraṇaṃ karissāmā’’ti sīmaṃ sodhetvā chandapavāraṇaṃ āharitvā sannipatitānaṃ kāyasāmaggī ādi. Kiriyā majjheti pavāraṇāñatti ca pavāraṇākathā ca majjhe, saṅghanavakassa ‘‘passanto paṭikarissāmī’’ti vacanaṃ pariyosānaṃ. Tajjanīyakammādīsu vatthu nāma yena vatthunā kammāraho hoti, taṃ vatthu. Puggaloti yena taṃ vatthu kataṃ, so puggalo. Kammavācā pariyosānanti ‘‘kataṃ saṅghena itthannāmassa bhikkhuno tajjanīyakammaṃ, khamati saṅghassa, tasmā tuṇhī, evametaṃ dhārayāmī’’ti evaṃ tassā tassā kammavācāya avasānavacanaṃ pariyosānaṃ. Sesaṃ sabbattha uttānamevāti
উপোসথাদিপুচ্ছাৰিস্সজ্জনাৰণ্ণনা নিট্ঠিতা।
Uposathādipucchāvissajjanāvaṇṇanā niṭṭhitā.
অত্থৰসপকরণাৰণ্ণনা
Atthavasapakaraṇāvaṇṇanā
৩৩৪. অত্থৰসপকরণে – দস অত্থৰসেতিআদীসু যং ৰত্তব্বং তং পঠমপারাজিকৰণ্ণনাযমেৰ ৰুত্তং। যং সঙ্ঘসুট্ঠু তং সঙ্ঘফাসূতিআদীসু উপরিমং উপরিমং পদং হেট্ঠিমস্স হেট্ঠিমস্স পদস্স অত্থো।
334. Atthavasapakaraṇe – dasa atthavasetiādīsu yaṃ vattabbaṃ taṃ paṭhamapārājikavaṇṇanāyameva vuttaṃ. Yaṃ saṅghasuṭṭhu taṃ saṅghaphāsūtiādīsu uparimaṃ uparimaṃ padaṃ heṭṭhimassa heṭṭhimassa padassa attho.
অত্থসতং ধম্মসতন্তিআদিম্হি পন যদেতং দসসু পদেসু একেকং মূলং কত্ৰা দসক্খত্তুং যোজনায পদসতং ৰুত্তং। তত্থ পচ্ছিমস্স পচ্ছিমস্স পদস্স ৰসেন অত্থসতং পুরিমস্স পুরিমস্স ৰসেন ধম্মসতং ৰেদিতব্বং। অথ ৰা যে দস অত্থৰসে পটিচ্চ তথাগতেন সাৰকানং সিক্খাপদং পঞ্ঞত্তং, যে পুব্বে পঠমপারাজিকৰণ্ণনাযং ‘‘তত্থ সঙ্ঘসুট্ঠুতা নাম সঙ্ঘস্স সুট্ঠুভাৰো ‘সুট্ঠু দেৰা’তি আগতট্ঠানে ৰিয ‘সুট্ঠু ভন্তে’তি ৰচনসম্পটিচ্ছনভাৰো, যো চ তথাগতস্স ৰচনং সম্পটিচ্ছতি, তস্স তং দীঘরত্তং হিতায সুখায হোতি, তস্মা সঙ্ঘস্স ‘সুট্ঠু ভন্তে’তি মম ৰচনসম্পটিচ্ছনত্থং পঞ্ঞপেস্সামি অসম্পটিচ্ছনে আদীনৰং সম্পটিচ্ছনে চ আনিসংসং দস্সেত্ৰা ন বলক্কারেন অভিভৰিত্ৰাতি এতমত্থং আৰিকরোন্তো আহ – সঙ্ঘসুট্ঠুতাযা’’তি এৰমাদিনা নযেন ৰণ্ণিতা, তেসং ইধ দসক্খত্তুং আগতত্তা অত্থসতং তদত্থজোতকানঞ্চ পদানং ৰসেন ধম্মসতং ৰেদিতব্বং। ইদানি অত্থজোতকানং নিরুত্তীনং ৰসেন নিরুত্তিসতং, ধম্মভূতানং নিরুত্তীনং ৰসেন নিরুত্তিসতন্তি দ্ৰে নিরুত্তিসতানি, অত্থসতে ঞাণসতং, ধম্মসতে ঞাণসতং, দ্ৰীসু নিরুত্তিসতেসু দ্ৰে ঞাণসতানীতি চত্তারি ঞাণসতানি চ ৰেদিতব্বানি।
Atthasataṃdhammasatantiādimhi pana yadetaṃ dasasu padesu ekekaṃ mūlaṃ katvā dasakkhattuṃ yojanāya padasataṃ vuttaṃ. Tattha pacchimassa pacchimassa padassa vasena atthasataṃ purimassa purimassa vasena dhammasataṃ veditabbaṃ. Atha vā ye dasa atthavase paṭicca tathāgatena sāvakānaṃ sikkhāpadaṃ paññattaṃ, ye pubbe paṭhamapārājikavaṇṇanāyaṃ ‘‘tattha saṅghasuṭṭhutā nāma saṅghassa suṭṭhubhāvo ‘suṭṭhu devā’ti āgataṭṭhāne viya ‘suṭṭhu bhante’ti vacanasampaṭicchanabhāvo, yo ca tathāgatassa vacanaṃ sampaṭicchati, tassa taṃ dīgharattaṃ hitāya sukhāya hoti, tasmā saṅghassa ‘suṭṭhu bhante’ti mama vacanasampaṭicchanatthaṃ paññapessāmi asampaṭicchane ādīnavaṃ sampaṭicchane ca ānisaṃsaṃ dassetvā na balakkārena abhibhavitvāti etamatthaṃ āvikaronto āha – saṅghasuṭṭhutāyā’’ti evamādinā nayena vaṇṇitā, tesaṃ idha dasakkhattuṃ āgatattā atthasataṃ tadatthajotakānañca padānaṃ vasena dhammasataṃ veditabbaṃ. Idāni atthajotakānaṃ niruttīnaṃ vasena niruttisataṃ, dhammabhūtānaṃ niruttīnaṃ vasena niruttisatanti dve niruttisatāni, atthasate ñāṇasataṃ, dhammasate ñāṇasataṃ, dvīsu niruttisatesu dve ñāṇasatānīti cattāri ñāṇasatāni ca veditabbāni.
‘‘অত্থসতং ধম্মসতং, দ্ৰে নিরুত্তিসতানি।
‘‘Atthasataṃ dhammasataṃ, dve niruttisatāni;
চত্তারি ঞাণসতানি, অত্থৰসে পকরণে’’তি॥
Cattāri ñāṇasatāni, atthavase pakaraṇe’’ti.
ইতি হি যং ৰুত্তং, ইদমেতং পটিচ্চ ৰুত্তন্তি।
Iti hi yaṃ vuttaṃ, idametaṃ paṭicca vuttanti.
ইতি সমন্তপাসাদিকায ৰিনযসংৰণ্ণনায
Iti samantapāsādikāya vinayasaṃvaṇṇanāya
মহাৰগ্গৰণ্ণনা নিট্ঠিতা।
Mahāvaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi
আদিমজ্ঝন্তপুচ্ছনং • Ādimajjhantapucchanaṃ
অত্থৰসপকরণং • Atthavasapakaraṇaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অত্থৰসপকরণৰণ্ণনা • Atthavasapakaraṇavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
উপোসথাদিপুচ্ছাৰিস্সজ্জনাৰণ্ণনা • Uposathādipucchāvissajjanāvaṇṇanā
অত্থৰসপকরণৰণ্ণনা • Atthavasapakaraṇavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উপোসথাদিপুচ্ছাৰিস্সজ্জনাৰণ্ণনা • Uposathādipucchāvissajjanāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
উপোসথাদিপুচ্ছাৰিস্সজ্জনা • Uposathādipucchāvissajjanā
অত্থৰসপকরণৰণ্ণনা • Atthavasapakaraṇavaṇṇanā
