| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
অত্থৰসপকরণৰণ্ণনা
Atthavasapakaraṇavaṇṇanā
৩৩৪. অত্থৰসপকরণেতি অৰযৰিআধারো। দস অত্থৰসেতিআদীসূতি অৰযৰাধারো। যন্তি ৰচনং। উপরিমং উপরিমং পদন্তি ‘‘সঙ্ঘফাসুতাযা’’তিআদিকং উত্তরুত্তরি ৰুত্তং পদং। হেট্ঠিমস্স হেট্ঠিমস্স পদস্সাতি ‘‘সঙ্ঘসুট্ঠুতাযা’’তিআদিকস্স অধো অধো ৰুত্তস্স পদস্স।
334.Atthavasapakaraṇeti avayaviādhāro. Dasa atthavasetiādīsūti avayavādhāro. Yanti vacanaṃ. Uparimaṃ uparimaṃ padanti ‘‘saṅghaphāsutāyā’’tiādikaṃ uttaruttari vuttaṃ padaṃ. Heṭṭhimassa heṭṭhimassa padassāti ‘‘saṅghasuṭṭhutāyā’’tiādikassa adho adho vuttassa padassa.
যদেতং পদসতং ৰুত্তন্তি যোজনা। তত্থাতি তস্মিং পদসতে, নিদ্ধারণে ভুম্মং, অত্থসতন্তি অভিধেয্যসতং। ধম্মসতন্তিঅভিধানসতং, পাল়িসতন্তি অত্থো। ‘‘অত্থসতং ধম্মসত’’ন্তি পদানং অত্থন্তরৰিকপ্পং দস্সেন্তো আহ ‘‘অথ ৰা’’তিআদি। তত্থ যে দস অত্থৰসে পটিচ্চ পঞ্ঞত্তং, তেসং দসঅত্থৰসানন্তি যোজনা, যে দস অত্থৰসে পুব্বে ৰণ্ণিতা, তেসং দসঅত্থৰসানন্তি যোজনা। পঠমপারাজিকৰণ্ণনাযং (পারা॰ অট্ঠ॰ ১.৩৯) ৰণ্ণিতাতি সম্বন্ধো। তত্থাতি ‘‘সঙ্ঘসুট্ঠুতাযা’’তিআদিপাঠে। সুট্ঠু দেৰাতি সুট্ঠু মহারাজ। হি যস্মা আণাবলভোগবলইস্সরিযবলেহি দিব্বতি, তস্মা দেৰোতি ৰুচ্চতি। যো চাতি গহট্ঠো ৰা পব্বজিতো ৰা, সম্পটিচ্ছতীতি সম্বন্ধো। তস্মাতি যস্মা হিতায সুখায হোতি, তস্মা। আনিসংসং দস্সেত্ৰা পঞ্ঞপেস্সামীতি সম্বন্ধো। অভিভৰিত্ৰা ন পঞ্ঞপেস্সামীতি যোজনা। ইধাতি অত্থৰসপকরণে। তদত্থজোতকানন্তি সোযেৰ অত্থো তদত্থো, তস্স জোতকা তদত্থজোতকা, তেসং। ইদানি ৰেদিতব্বানীতি সম্বন্ধো। অত্থং জোতেন্তীতি অত্থজোতকা, সদ্দা। নীহরিত্ৰা, নিযমেত্ৰা ৰা অত্থো ৰুচ্চতে ইমাহি সদ্দপঞ্ঞত্তীহীতি নিরুত্তিযো।
Yadetaṃ padasataṃ vuttanti yojanā. Tatthāti tasmiṃ padasate, niddhāraṇe bhummaṃ, atthasatanti abhidheyyasataṃ. Dhammasatantiabhidhānasataṃ, pāḷisatanti attho. ‘‘Atthasataṃ dhammasata’’nti padānaṃ atthantaravikappaṃ dassento āha ‘‘atha vā’’tiādi. Tattha ye dasa atthavase paṭicca paññattaṃ, tesaṃ dasaatthavasānanti yojanā, ye dasa atthavase pubbe vaṇṇitā, tesaṃ dasaatthavasānanti yojanā. Paṭhamapārājikavaṇṇanāyaṃ (pārā. aṭṭha. 1.39) vaṇṇitāti sambandho. Tatthāti ‘‘saṅghasuṭṭhutāyā’’tiādipāṭhe. Suṭṭhu devāti suṭṭhu mahārāja. Hi yasmā āṇābalabhogabalaissariyabalehi dibbati, tasmā devoti vuccati. Yo cāti gahaṭṭho vā pabbajito vā, sampaṭicchatīti sambandho. Tasmāti yasmā hitāya sukhāya hoti, tasmā. Ānisaṃsaṃ dassetvā paññapessāmīti sambandho. Abhibhavitvā na paññapessāmīti yojanā. Idhāti atthavasapakaraṇe. Tadatthajotakānanti soyeva attho tadattho, tassa jotakā tadatthajotakā, tesaṃ. Idāni veditabbānīti sambandho. Atthaṃ jotentīti atthajotakā, saddā. Nīharitvā, niyametvā vā attho vuccate imāhi saddapaññattīhīti niruttiyo.
অত্থসতন্তি গাথাযং অত্থৰসে পকরণে অত্থসতং ৰেদিতব্বন্তিআদিনা যোজনা কাতব্বা। ইতি হীতি ইতি এৰ। হিসদ্দো হি এৰসদ্দত্থো। ইদন্তি ‘‘অত্থসত’’ন্তিআদিৰচনং, ৰুত্তন্তি সম্বন্ধো। এতন্তি যথাৰুত্তং অত্থং পটিচ্চাতি সম্বন্ধো।
Atthasatanti gāthāyaṃ atthavase pakaraṇe atthasataṃ veditabbantiādinā yojanā kātabbā. Iti hīti iti eva. Hisaddo hi evasaddattho. Idanti ‘‘atthasata’’ntiādivacanaṃ, vuttanti sambandho. Etanti yathāvuttaṃ atthaṃ paṭiccāti sambandho.
ইতি সমন্তপাসাদিকায ৰিনযসংৰণ্ণনায
Iti samantapāsādikāya vinayasaṃvaṇṇanāya
মহাৰগ্গৰণ্ণনায
Mahāvaggavaṇṇanāya
যোজনা সমত্তা।
Yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / অত্থৰসপকরণং • Atthavasapakaraṇaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / অত্থৰসপকরণাৰণ্ণনা • Atthavasapakaraṇāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অত্থৰসপকরণৰণ্ণনা • Atthavasapakaraṇavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অত্থৰসপকরণৰণ্ণনা • Atthavasapakaraṇavaṇṇanā
