| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
ಅತ್ಥವಸಪಕರಣವಣ್ಣನಾ
Atthavasapakaraṇavaṇṇanā
೩೩೪. ಅತ್ಥವಸಪಕರಣೇತಿ ಅವಯವಿಆಧಾರೋ। ದಸ ಅತ್ಥವಸೇತಿಆದೀಸೂತಿ ಅವಯವಾಧಾರೋ। ಯನ್ತಿ ವಚನಂ। ಉಪರಿಮಂ ಉಪರಿಮಂ ಪದನ್ತಿ ‘‘ಸಙ್ಘಫಾಸುತಾಯಾ’’ತಿಆದಿಕಂ ಉತ್ತರುತ್ತರಿ ವುತ್ತಂ ಪದಂ। ಹೇಟ್ಠಿಮಸ್ಸ ಹೇಟ್ಠಿಮಸ್ಸ ಪದಸ್ಸಾತಿ ‘‘ಸಙ್ಘಸುಟ್ಠುತಾಯಾ’’ತಿಆದಿಕಸ್ಸ ಅಧೋ ಅಧೋ ವುತ್ತಸ್ಸ ಪದಸ್ಸ।
334.Atthavasapakaraṇeti avayaviādhāro. Dasa atthavasetiādīsūti avayavādhāro. Yanti vacanaṃ. Uparimaṃ uparimaṃ padanti ‘‘saṅghaphāsutāyā’’tiādikaṃ uttaruttari vuttaṃ padaṃ. Heṭṭhimassa heṭṭhimassa padassāti ‘‘saṅghasuṭṭhutāyā’’tiādikassa adho adho vuttassa padassa.
ಯದೇತಂ ಪದಸತಂ ವುತ್ತನ್ತಿ ಯೋಜನಾ। ತತ್ಥಾತಿ ತಸ್ಮಿಂ ಪದಸತೇ, ನಿದ್ಧಾರಣೇ ಭುಮ್ಮಂ, ಅತ್ಥಸತನ್ತಿ ಅಭಿಧೇಯ್ಯಸತಂ। ಧಮ್ಮಸತನ್ತಿಅಭಿಧಾನಸತಂ, ಪಾಳಿಸತನ್ತಿ ಅತ್ಥೋ। ‘‘ಅತ್ಥಸತಂ ಧಮ್ಮಸತ’’ನ್ತಿ ಪದಾನಂ ಅತ್ಥನ್ತರವಿಕಪ್ಪಂ ದಸ್ಸೇನ್ತೋ ಆಹ ‘‘ಅಥ ವಾ’’ತಿಆದಿ। ತತ್ಥ ಯೇ ದಸ ಅತ್ಥವಸೇ ಪಟಿಚ್ಚ ಪಞ್ಞತ್ತಂ, ತೇಸಂ ದಸಅತ್ಥವಸಾನನ್ತಿ ಯೋಜನಾ, ಯೇ ದಸ ಅತ್ಥವಸೇ ಪುಬ್ಬೇ ವಣ್ಣಿತಾ, ತೇಸಂ ದಸಅತ್ಥವಸಾನನ್ತಿ ಯೋಜನಾ। ಪಠಮಪಾರಾಜಿಕವಣ್ಣನಾಯಂ (ಪಾರಾ॰ ಅಟ್ಠ॰ ೧.೩೯) ವಣ್ಣಿತಾತಿ ಸಮ್ಬನ್ಧೋ। ತತ್ಥಾತಿ ‘‘ಸಙ್ಘಸುಟ್ಠುತಾಯಾ’’ತಿಆದಿಪಾಠೇ। ಸುಟ್ಠು ದೇವಾತಿ ಸುಟ್ಠು ಮಹಾರಾಜ। ಹಿ ಯಸ್ಮಾ ಆಣಾಬಲಭೋಗಬಲಇಸ್ಸರಿಯಬಲೇಹಿ ದಿಬ್ಬತಿ, ತಸ್ಮಾ ದೇವೋತಿ ವುಚ್ಚತಿ। ಯೋ ಚಾತಿ ಗಹಟ್ಠೋ ವಾ ಪಬ್ಬಜಿತೋ ವಾ, ಸಮ್ಪಟಿಚ್ಛತೀತಿ ಸಮ್ಬನ್ಧೋ। ತಸ್ಮಾತಿ ಯಸ್ಮಾ ಹಿತಾಯ ಸುಖಾಯ ಹೋತಿ, ತಸ್ಮಾ। ಆನಿಸಂಸಂ ದಸ್ಸೇತ್ವಾ ಪಞ್ಞಪೇಸ್ಸಾಮೀತಿ ಸಮ್ಬನ್ಧೋ। ಅಭಿಭವಿತ್ವಾ ನ ಪಞ್ಞಪೇಸ್ಸಾಮೀತಿ ಯೋಜನಾ। ಇಧಾತಿ ಅತ್ಥವಸಪಕರಣೇ। ತದತ್ಥಜೋತಕಾನನ್ತಿ ಸೋಯೇವ ಅತ್ಥೋ ತದತ್ಥೋ, ತಸ್ಸ ಜೋತಕಾ ತದತ್ಥಜೋತಕಾ, ತೇಸಂ। ಇದಾನಿ ವೇದಿತಬ್ಬಾನೀತಿ ಸಮ್ಬನ್ಧೋ। ಅತ್ಥಂ ಜೋತೇನ್ತೀತಿ ಅತ್ಥಜೋತಕಾ, ಸದ್ದಾ। ನೀಹರಿತ್ವಾ, ನಿಯಮೇತ್ವಾ ವಾ ಅತ್ಥೋ ವುಚ್ಚತೇ ಇಮಾಹಿ ಸದ್ದಪಞ್ಞತ್ತೀಹೀತಿ ನಿರುತ್ತಿಯೋ।
Yadetaṃ padasataṃ vuttanti yojanā. Tatthāti tasmiṃ padasate, niddhāraṇe bhummaṃ, atthasatanti abhidheyyasataṃ. Dhammasatantiabhidhānasataṃ, pāḷisatanti attho. ‘‘Atthasataṃ dhammasata’’nti padānaṃ atthantaravikappaṃ dassento āha ‘‘atha vā’’tiādi. Tattha ye dasa atthavase paṭicca paññattaṃ, tesaṃ dasaatthavasānanti yojanā, ye dasa atthavase pubbe vaṇṇitā, tesaṃ dasaatthavasānanti yojanā. Paṭhamapārājikavaṇṇanāyaṃ (pārā. aṭṭha. 1.39) vaṇṇitāti sambandho. Tatthāti ‘‘saṅghasuṭṭhutāyā’’tiādipāṭhe. Suṭṭhu devāti suṭṭhu mahārāja. Hi yasmā āṇābalabhogabalaissariyabalehi dibbati, tasmā devoti vuccati. Yo cāti gahaṭṭho vā pabbajito vā, sampaṭicchatīti sambandho. Tasmāti yasmā hitāya sukhāya hoti, tasmā. Ānisaṃsaṃ dassetvā paññapessāmīti sambandho. Abhibhavitvā na paññapessāmīti yojanā. Idhāti atthavasapakaraṇe. Tadatthajotakānanti soyeva attho tadattho, tassa jotakā tadatthajotakā, tesaṃ. Idāni veditabbānīti sambandho. Atthaṃ jotentīti atthajotakā, saddā. Nīharitvā, niyametvā vā attho vuccate imāhi saddapaññattīhīti niruttiyo.
ಅತ್ಥಸತನ್ತಿ ಗಾಥಾಯಂ ಅತ್ಥವಸೇ ಪಕರಣೇ ಅತ್ಥಸತಂ ವೇದಿತಬ್ಬನ್ತಿಆದಿನಾ ಯೋಜನಾ ಕಾತಬ್ಬಾ। ಇತಿ ಹೀತಿ ಇತಿ ಏವ। ಹಿಸದ್ದೋ ಹಿ ಏವಸದ್ದತ್ಥೋ। ಇದನ್ತಿ ‘‘ಅತ್ಥಸತ’’ನ್ತಿಆದಿವಚನಂ, ವುತ್ತನ್ತಿ ಸಮ್ಬನ್ಧೋ। ಏತನ್ತಿ ಯಥಾವುತ್ತಂ ಅತ್ಥಂ ಪಟಿಚ್ಚಾತಿ ಸಮ್ಬನ್ಧೋ।
Atthasatanti gāthāyaṃ atthavase pakaraṇe atthasataṃ veditabbantiādinā yojanā kātabbā. Iti hīti iti eva. Hisaddo hi evasaddattho. Idanti ‘‘atthasata’’ntiādivacanaṃ, vuttanti sambandho. Etanti yathāvuttaṃ atthaṃ paṭiccāti sambandho.
ಇತಿ ಸಮನ್ತಪಾಸಾದಿಕಾಯ ವಿನಯಸಂವಣ್ಣನಾಯ
Iti samantapāsādikāya vinayasaṃvaṇṇanāya
ಮಹಾವಗ್ಗವಣ್ಣನಾಯ
Mahāvaggavaṇṇanāya
ಯೋಜನಾ ಸಮತ್ತಾ।
Yojanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi / ಅತ್ಥವಸಪಕರಣಂ • Atthavasapakaraṇaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಅತ್ಥವಸಪಕರಣಾವಣ್ಣನಾ • Atthavasapakaraṇāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅತ್ಥವಸಪಕರಣವಣ್ಣನಾ • Atthavasapakaraṇavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅತ್ಥವಸಪಕರಣವಣ್ಣನಾ • Atthavasapakaraṇavaṇṇanā
