| Library / Tipiṭaka / ཏིཔིཊཀ • Tipiṭaka / པརིཝཱར-ཨཊྛཀཐཱ • Parivāra-aṭṭhakathā |
ཨུཔོསཐཱདིཔུཙྪཱཝིསྶཛྫནཱ
Uposathādipucchāvissajjanā
༣༣༢. ‘‘ཨུཔོསཐཀམྨསྶ ཀོ ཨཱདཱི’’ཏིཨཱདཱིནཾ པུཙྪཱནཾ ཝིསྶཛྫནེ སཱམགྒཱི ཨཱདཱིཏི ‘‘ཨུཔོསཐཾ ཀརིསྶཱམཱ’’ཏི སཱིམཾ སོདྷེཏྭཱ ཚནྡཔཱརིསུདྡྷིཾ ཨཱཧརིཏྭཱ སནྣིཔཏིཏཱནཾ ཀཱཡསཱམགྒཱི ཨཱདི། ཀིརིཡཱ མཛ྄ཛྷེཏི པུབྦཀིཙྩཾ ཀཏྭཱ པཱཏིམོཀྑཨོསཱརཎཀིརིཡཱ མཛ྄ཛྷེ། ནིཊྛཱནཾ པརིཡོསཱནནྟི ‘‘ཏཏྠ སབྦེཧེཝ སམགྒེཧི སམྨོདམཱནེཧི ཨཝིཝདམཱནེཧི སིཀྑིཏབྦ’’ནྟི ཨིདཾ པཱཏིམོཀྑནིཊྛཱནཾ པརིཡོསཱནཾ། པཝཱརཎཱཀམྨསྶ སཱམགྒཱི ཨཱདཱིཏི ‘‘པཝཱརཎཾ ཀརིསྶཱམཱ’’ཏི སཱིམཾ སོདྷེཏྭཱ ཚནྡཔཝཱརཎཾ ཨཱཧརིཏྭཱ སནྣིཔཏིཏཱནཾ ཀཱཡསཱམགྒཱི ཨཱདི། ཀིརིཡཱ མཛ྄ཛྷེཏི པཝཱརཎཱཉཏྟི ཙ པཝཱརཎཱཀཐཱ ཙ མཛ྄ཛྷེ, སངྒྷནཝཀསྶ ‘‘པསྶནྟོ པཊིཀརིསྶཱམཱི’’ཏི ཝཙནཾ པརིཡོསཱནཾ། ཏཛྫནཱིཡཀམྨཱདཱིསུ ཝཏྠུ ནཱམ ཡེན ཝཏྠུནཱ ཀམྨཱརཧོ ཧོཏི, ཏཾ ཝཏྠུ། པུགྒལོཏི ཡེན ཏཾ ཝཏྠུ ཀཏཾ, སོ པུགྒལོ། ཀམྨཝཱཙཱ པརིཡོསཱནནྟི ‘‘ཀཏཾ སངྒྷེན ཨིཏྠནྣཱམསྶ བྷིཀྑུནོ ཏཛྫནཱིཡཀམྨཾ, ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི ཨེཝཾ ཏསྶཱ ཏསྶཱ ཀམྨཝཱཙཱཡ ཨཝསཱནཝཙནཾ པརིཡོསཱནཾ། སེསཾ སབྦཏྠ ཨུཏྟཱནམེཝཱཏི
332. ‘‘Uposathakammassa ko ādī’’tiādīnaṃ pucchānaṃ vissajjane sāmaggī ādīti ‘‘uposathaṃ karissāmā’’ti sīmaṃ sodhetvā chandapārisuddhiṃ āharitvā sannipatitānaṃ kāyasāmaggī ādi. Kiriyā majjheti pubbakiccaṃ katvā pātimokkhaosāraṇakiriyā majjhe. Niṭṭhānaṃ pariyosānanti ‘‘tattha sabbeheva samaggehi sammodamānehi avivadamānehi sikkhitabba’’nti idaṃ pātimokkhaniṭṭhānaṃ pariyosānaṃ. Pavāraṇākammassa sāmaggī ādīti ‘‘pavāraṇaṃ karissāmā’’ti sīmaṃ sodhetvā chandapavāraṇaṃ āharitvā sannipatitānaṃ kāyasāmaggī ādi. Kiriyā majjheti pavāraṇāñatti ca pavāraṇākathā ca majjhe, saṅghanavakassa ‘‘passanto paṭikarissāmī’’ti vacanaṃ pariyosānaṃ. Tajjanīyakammādīsu vatthu nāma yena vatthunā kammāraho hoti, taṃ vatthu. Puggaloti yena taṃ vatthu kataṃ, so puggalo. Kammavācā pariyosānanti ‘‘kataṃ saṅghena itthannāmassa bhikkhuno tajjanīyakammaṃ, khamati saṅghassa, tasmā tuṇhī, evametaṃ dhārayāmī’’ti evaṃ tassā tassā kammavācāya avasānavacanaṃ pariyosānaṃ. Sesaṃ sabbattha uttānamevāti
ཨུཔོསཐཱདིཔུཙྪཱཝིསྶཛྫནཱཝཎྞནཱ ནིཊྛིཏཱ།
Uposathādipucchāvissajjanāvaṇṇanā niṭṭhitā.
ཨཏྠཝསཔཀརཎཱཝཎྞནཱ
Atthavasapakaraṇāvaṇṇanā
༣༣༤. ཨཏྠཝསཔཀརཎེ – དས ཨཏྠཝསེཏིཨཱདཱིསུ ཡཾ ཝཏྟབྦཾ ཏཾ པཋམཔཱརཱཛིཀཝཎྞནཱཡམེཝ ཝུཏྟཾ། ཡཾ སངྒྷསུཊྛུ ཏཾ སངྒྷཕཱསཱུཏིཨཱདཱིསུ ཨུཔརིམཾ ཨུཔརིམཾ པདཾ ཧེཊྛིམསྶ ཧེཊྛིམསྶ པདསྶ ཨཏྠོ།
334. Atthavasapakaraṇe – dasa atthavasetiādīsu yaṃ vattabbaṃ taṃ paṭhamapārājikavaṇṇanāyameva vuttaṃ. Yaṃ saṅghasuṭṭhu taṃ saṅghaphāsūtiādīsu uparimaṃ uparimaṃ padaṃ heṭṭhimassa heṭṭhimassa padassa attho.
ཨཏྠསཏཾ དྷམྨསཏནྟིཨཱདིམྷི པན ཡདེཏཾ དསསུ པདེསུ ཨེཀེཀཾ མཱུལཾ ཀཏྭཱ དསཀྑཏྟུཾ ཡོཛནཱཡ པདསཏཾ ཝུཏྟཾ། ཏཏྠ པཙྪིམསྶ པཙྪིམསྶ པདསྶ ཝསེན ཨཏྠསཏཾ པུརིམསྶ པུརིམསྶ ཝསེན དྷམྨསཏཾ ཝེདིཏབྦཾ། ཨཐ ཝཱ ཡེ དས ཨཏྠཝསེ པཊིཙྩ ཏཐཱགཏེན སཱཝཀཱནཾ སིཀྑཱཔདཾ པཉྙཏྟཾ, ཡེ པུབྦེ པཋམཔཱརཱཛིཀཝཎྞནཱཡཾ ‘‘ཏཏྠ སངྒྷསུཊྛུཏཱ ནཱམ སངྒྷསྶ སུཊྛུབྷཱཝོ ‘སུཊྛུ དེཝཱ’ཏི ཨཱགཏཊྛཱནེ ཝིཡ ‘སུཊྛུ བྷནྟེ’ཏི ཝཙནསམྤཊིཙྪནབྷཱཝོ, ཡོ ཙ ཏཐཱགཏསྶ ཝཙནཾ སམྤཊིཙྪཏི, ཏསྶ ཏཾ དཱིགྷརཏྟཾ ཧིཏཱཡ སུཁཱཡ ཧོཏི, ཏསྨཱ སངྒྷསྶ ‘སུཊྛུ བྷནྟེ’ཏི མམ ཝཙནསམྤཊིཙྪནཏྠཾ པཉྙཔེསྶཱམི ཨསམྤཊིཙྪནེ ཨཱདཱིནཝཾ སམྤཊིཙྪནེ ཙ ཨཱནིསཾསཾ དསྶེཏྭཱ ན བལཀྐཱརེན ཨབྷིབྷཝིཏྭཱཏི ཨེཏམཏྠཾ ཨཱཝིཀརོནྟོ ཨཱཧ – སངྒྷསུཊྛུཏཱཡཱ’’ཏི ཨེཝམཱདིནཱ ནཡེན ཝཎྞིཏཱ, ཏེསཾ ཨིདྷ དསཀྑཏྟུཾ ཨཱགཏཏྟཱ ཨཏྠསཏཾ ཏདཏྠཛོཏཀཱནཉྩ པདཱནཾ ཝསེན དྷམྨསཏཾ ཝེདིཏབྦཾ། ཨིདཱནི ཨཏྠཛོཏཀཱནཾ ནིརུཏྟཱིནཾ ཝསེན ནིརུཏྟིསཏཾ, དྷམྨབྷཱུཏཱནཾ ནིརུཏྟཱིནཾ ཝསེན ནིརུཏྟིསཏནྟི དྭེ ནིརུཏྟིསཏཱནི, ཨཏྠསཏེ ཉཱཎསཏཾ, དྷམྨསཏེ ཉཱཎསཏཾ, དྭཱིསུ ནིརུཏྟིསཏེསུ དྭེ ཉཱཎསཏཱནཱིཏི ཙཏྟཱརི ཉཱཎསཏཱནི ཙ ཝེདིཏབྦཱནི།
Atthasataṃdhammasatantiādimhi pana yadetaṃ dasasu padesu ekekaṃ mūlaṃ katvā dasakkhattuṃ yojanāya padasataṃ vuttaṃ. Tattha pacchimassa pacchimassa padassa vasena atthasataṃ purimassa purimassa vasena dhammasataṃ veditabbaṃ. Atha vā ye dasa atthavase paṭicca tathāgatena sāvakānaṃ sikkhāpadaṃ paññattaṃ, ye pubbe paṭhamapārājikavaṇṇanāyaṃ ‘‘tattha saṅghasuṭṭhutā nāma saṅghassa suṭṭhubhāvo ‘suṭṭhu devā’ti āgataṭṭhāne viya ‘suṭṭhu bhante’ti vacanasampaṭicchanabhāvo, yo ca tathāgatassa vacanaṃ sampaṭicchati, tassa taṃ dīgharattaṃ hitāya sukhāya hoti, tasmā saṅghassa ‘suṭṭhu bhante’ti mama vacanasampaṭicchanatthaṃ paññapessāmi asampaṭicchane ādīnavaṃ sampaṭicchane ca ānisaṃsaṃ dassetvā na balakkārena abhibhavitvāti etamatthaṃ āvikaronto āha – saṅghasuṭṭhutāyā’’ti evamādinā nayena vaṇṇitā, tesaṃ idha dasakkhattuṃ āgatattā atthasataṃ tadatthajotakānañca padānaṃ vasena dhammasataṃ veditabbaṃ. Idāni atthajotakānaṃ niruttīnaṃ vasena niruttisataṃ, dhammabhūtānaṃ niruttīnaṃ vasena niruttisatanti dve niruttisatāni, atthasate ñāṇasataṃ, dhammasate ñāṇasataṃ, dvīsu niruttisatesu dve ñāṇasatānīti cattāri ñāṇasatāni ca veditabbāni.
‘‘ཨཏྠསཏཾ དྷམྨསཏཾ, དྭེ ནིརུཏྟིསཏཱནི།
‘‘Atthasataṃ dhammasataṃ, dve niruttisatāni;
ཙཏྟཱརི ཉཱཎསཏཱནི, ཨཏྠཝསེ པཀརཎེ’’ཏི༎
Cattāri ñāṇasatāni, atthavase pakaraṇe’’ti.
ཨིཏི ཧི ཡཾ ཝུཏྟཾ, ཨིདམེཏཾ པཊིཙྩ ཝུཏྟནྟི།
Iti hi yaṃ vuttaṃ, idametaṃ paṭicca vuttanti.
ཨིཏི སམནྟཔཱསཱདིཀཱཡ ཝིནཡསཾཝཎྞནཱཡ
Iti samantapāsādikāya vinayasaṃvaṇṇanāya
མཧཱཝགྒཝཎྞནཱ ནིཊྛིཏཱ།
Mahāvaggavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi
ཨཱདིམཛ྄ཛྷནྟཔུཙྪནཾ • Ādimajjhantapucchanaṃ
ཨཏྠཝསཔཀརཎཾ • Atthavasapakaraṇaṃ
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨཏྠཝསཔཀརཎཝཎྞནཱ • Atthavasapakaraṇavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā
ཨུཔོསཐཱདིཔུཙྪཱཝིསྶཛྫནཱཝཎྞནཱ • Uposathādipucchāvissajjanāvaṇṇanā
ཨཏྠཝསཔཀརཎཝཎྞནཱ • Atthavasapakaraṇavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨུཔོསཐཱདིཔུཙྪཱཝིསྶཛྫནཱཝཎྞནཱ • Uposathādipucchāvissajjanāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi
ཨུཔོསཐཱདིཔུཙྪཱཝིསྶཛྫནཱ • Uposathādipucchāvissajjanā
ཨཏྠཝསཔཀརཎཝཎྞནཱ • Atthavasapakaraṇavaṇṇanā
