| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
அத்த²வஸவக்³கா³தி³வண்ணனா
Atthavasavaggādivaṇṇanā
498. இதா³னி யானி தானி தேஸங் கம்மானங் வத்து²பூ⁴தானி ஸிக்கா²பதா³னி, தேஸங் பஞ்ஞத்தியங் ஆனிஸங்ஸங் த³ஸ்ஸேதுங் ‘‘த்³வே அத்த²வஸே படிச்சா’’திஆதி³ ஆரத்³த⁴ங். தத்த² தி³ட்ட²த⁴ம்மிகானங் வேரானங் ஸங்வராயாதி பாணாதிபாதாதீ³னங் பஞ்சன்னங் தி³ட்ட²த⁴ம்மிகவேரானங் ஸங்வரத்தா²ய பித³ஹனத்தா²ய. ஸம்பராயிகானங் வேரானங் படிகா⁴தாயாதி விபாகது³க்க²ஸங்கா²தானங் ஸம்பராயிகவேரானங் படிகா⁴தத்தா²ய, ஸமுச்சே²த³னத்தா²ய அனுப்பஜ்ஜனத்தா²ய. தி³ட்ட²த⁴ம்மிகானங் வஜ்ஜானங் ஸங்வராயாதி தேஸங்யேவ பஞ்சன்னங் வேரானங் ஸங்வரத்தா²ய. ஸம்பராயிகானங் வஜ்ஜானந்தி தேஸங்யேவ விபாகது³க்கா²னங். விபாகது³க்கா²னேவ ஹி இத⁴ வஜ்ஜனீயபா⁴வதோ வஜ்ஜானீதி வுத்தானி. தி³ட்ட²த⁴ம்மிகானங் ப⁴யானந்தி க³ரஹா உபவாதோ³ தஜ்ஜனீயாதீ³னி கம்மானி உபோஸத²பவாரணானங் ட²பனங் அகித்திபகாஸனீயகம்மந்தி ஏதானி தி³ட்ட²த⁴ம்மிகப⁴யானி நாம, ஏதேஸங் ஸங்வரத்தா²ய. ஸம்பராயிகப⁴யானி பன விபாகது³க்கா²னியேவ , தேஸங் படிகா⁴தத்தா²ய. தி³ட்ட²த⁴ம்மிகானங் அகுஸலானந்தி பஞ்சவேரத³ஸஅகுஸலகம்மபத²ப்பபே⁴தா³னங் அகுஸலானங் ஸங்வரத்தா²ய. விபாகது³க்கா²னேவ பன அக்க²மட்டே²ன ஸம்பராயிகஅகுஸலானீதி வுச்சந்தி, தேஸங் படிகா⁴தத்தா²ய. கி³ஹீனங் அனுகம்பாயாதி அகா³ரிகானங் ஸத்³தா⁴ரக்க²ணவஸேன அனுகம்பனத்தா²ய. பாபிச்சா²னங் பக்கு²பச்சே²தா³யாதி பாபிச்ச²புக்³க³லானங் க³ணப³ந்த⁴பே⁴த³னத்தா²ய க³ணபோ⁴ஜனஸிக்கா²பத³ங் பஞ்ஞத்தங். ஸேஸங் ஸப்³ப³த்த² உத்தானமேவ. யஞ்ஹெத்த² வத்தப்³ப³ங் ஸியா, தங் ஸப்³ப³ங் பட²மபாராஜிகவண்ணனாயமேவ வுத்தந்தி.
498. Idāni yāni tāni tesaṃ kammānaṃ vatthubhūtāni sikkhāpadāni, tesaṃ paññattiyaṃ ānisaṃsaṃ dassetuṃ ‘‘dve atthavase paṭiccā’’tiādi āraddhaṃ. Tattha diṭṭhadhammikānaṃ verānaṃ saṃvarāyāti pāṇātipātādīnaṃ pañcannaṃ diṭṭhadhammikaverānaṃ saṃvaratthāya pidahanatthāya. Samparāyikānaṃ verānaṃ paṭighātāyāti vipākadukkhasaṅkhātānaṃ samparāyikaverānaṃ paṭighātatthāya, samucchedanatthāya anuppajjanatthāya. Diṭṭhadhammikānaṃ vajjānaṃ saṃvarāyāti tesaṃyeva pañcannaṃ verānaṃ saṃvaratthāya. Samparāyikānaṃ vajjānanti tesaṃyeva vipākadukkhānaṃ. Vipākadukkhāneva hi idha vajjanīyabhāvato vajjānīti vuttāni. Diṭṭhadhammikānaṃ bhayānanti garahā upavādo tajjanīyādīni kammāni uposathapavāraṇānaṃ ṭhapanaṃ akittipakāsanīyakammanti etāni diṭṭhadhammikabhayāni nāma, etesaṃ saṃvaratthāya. Samparāyikabhayāni pana vipākadukkhāniyeva , tesaṃ paṭighātatthāya. Diṭṭhadhammikānaṃ akusalānanti pañcaveradasaakusalakammapathappabhedānaṃ akusalānaṃ saṃvaratthāya. Vipākadukkhāneva pana akkhamaṭṭhena samparāyikaakusalānīti vuccanti, tesaṃ paṭighātatthāya. Gihīnaṃ anukampāyāti agārikānaṃ saddhārakkhaṇavasena anukampanatthāya. Pāpicchānaṃ pakkhupacchedāyāti pāpicchapuggalānaṃ gaṇabandhabhedanatthāya gaṇabhojanasikkhāpadaṃ paññattaṃ. Sesaṃ sabbattha uttānameva. Yañhettha vattabbaṃ siyā, taṃ sabbaṃ paṭhamapārājikavaṇṇanāyameva vuttanti.
ஸிக்கா²பதே³ஸு அத்த²வஸேன வண்ணனா நிட்டி²தா.
Sikkhāpadesu atthavasena vaṇṇanā niṭṭhitā.
499. பாதிமொக்கா²தீ³ஸு பாதிமொக்கு²த்³தே³ஸோதி பி⁴க்கூ²னங் பஞ்சவிதோ⁴ பி⁴க்கு²னீனங் சதுப்³பி³தோ⁴. பரிவாஸதா³னாதீ³ஸு ஓஸாரணீயங் பஞ்ஞத்தந்தி அட்டா²ரஸஸு வா தேசத்தாலீஸாய வா வத்தேஸு வத்தமானஸ்ஸ ஓஸாரணீயங் பஞ்ஞத்தங். யேன கம்மேன ஓஸாரீயதி, தங் கம்மங் பஞ்ஞத்தந்தி அத்தோ². நிஸ்ஸாரணீயங் பஞ்ஞத்தந்தி ப⁴ண்ட³னகாரகாத³யோ யேன கம்மேன நிஸ்ஸாரீயந்தி, தங் கம்மங் பஞ்ஞத்தந்தி அத்தோ².
499. Pātimokkhādīsu pātimokkhuddesoti bhikkhūnaṃ pañcavidho bhikkhunīnaṃ catubbidho. Parivāsadānādīsu osāraṇīyaṃ paññattanti aṭṭhārasasu vā tecattālīsāya vā vattesu vattamānassa osāraṇīyaṃ paññattaṃ. Yena kammena osārīyati, taṃ kammaṃ paññattanti attho. Nissāraṇīyaṃ paññattanti bhaṇḍanakārakādayo yena kammena nissārīyanti, taṃ kammaṃ paññattanti attho.
500. அபஞ்ஞத்தேதிஆதீ³ஸு அபஞ்ஞத்தே பஞ்ஞத்தந்தி ஸத்தாபத்திக்க²ந்தா⁴ ககுஸந்த⁴ஞ்ச ஸம்மாஸம்பு³த்³த⁴ங் கோணாக³மனஞ்ச கஸ்ஸபஞ்ச ஸம்மாஸம்பு³த்³த⁴ங் ட²பெத்வா அந்தரா கேனசி அபஞ்ஞத்தே ஸிக்கா²பதே³ பஞ்ஞத்தங் நாம. மக்கடிவத்து²ஆதி³வினீதகதா² ஸிக்கா²பதே³ பஞ்ஞத்தே அனுபஞ்ஞத்தங் நாம. ஸேஸங் ஸப்³ப³த்த² உத்தானமேவாதி.
500. Apaññattetiādīsu apaññatte paññattanti sattāpattikkhandhā kakusandhañca sammāsambuddhaṃ koṇāgamanañca kassapañca sammāsambuddhaṃ ṭhapetvā antarā kenaci apaññatte sikkhāpade paññattaṃ nāma. Makkaṭivatthuādivinītakathā sikkhāpade paññatte anupaññattaṃ nāma. Sesaṃ sabbattha uttānamevāti.
ஆனிஸங்ஸவக்³க³வண்ணனா நிட்டி²தா.
Ānisaṃsavaggavaṇṇanā niṭṭhitā.
501. இதா³னி ஸப்³ப³ஸிக்கா²பதா³னங் ஏகேகேன ஆகாரேன நவதா⁴ ஸங்க³ஹங் த³ஸ்ஸேதுங் ‘‘நவ ஸங்க³ஹா’’திஆதி³மாஹ. தத்த² வத்து²ஸங்க³ஹோதி வத்து²னா ஸங்க³ஹோ. ஏவங் ஸேஸேஸுபி பத³த்தோ² வேதி³தப்³போ³. அயங் பனெத்த² அத்த²யோஜனா – யஸ்மா ஹி ஏகஸிக்கா²பத³ம்பி அவத்து²ஸ்மிங் பஞ்ஞத்தங் நத்தி², தஸ்மா ஸப்³பா³னி வத்து²னா ஸங்க³ஹிதானீதி ஏவங் தாவ வத்து²ஸங்க³ஹோ வேதி³தப்³போ³.
501. Idāni sabbasikkhāpadānaṃ ekekena ākārena navadhā saṅgahaṃ dassetuṃ ‘‘nava saṅgahā’’tiādimāha. Tattha vatthusaṅgahoti vatthunā saṅgaho. Evaṃ sesesupi padattho veditabbo. Ayaṃ panettha atthayojanā – yasmā hi ekasikkhāpadampi avatthusmiṃ paññattaṃ natthi, tasmā sabbāni vatthunā saṅgahitānīti evaṃ tāva vatthusaṅgaho veditabbo.
யஸ்மா பன த்³வே ஆபத்திக்க²ந்தா⁴ ஸீலவிபத்தியா ஸங்க³ஹிதா, பஞ்சாபத்திக்க²ந்தா⁴ ஆசாரவிபத்தியா, ச² ஸிக்கா²பதா³னி ஆஜீவவிபத்தியா ஸங்க³ஹிதானி, தஸ்மா ஸப்³பா³னிபி விபத்தியா ஸங்க³ஹிதானீதி ஏவங் விபத்திஸங்க³ஹோ வேதி³தப்³போ³.
Yasmā pana dve āpattikkhandhā sīlavipattiyā saṅgahitā, pañcāpattikkhandhā ācāravipattiyā, cha sikkhāpadāni ājīvavipattiyā saṅgahitāni, tasmā sabbānipi vipattiyā saṅgahitānīti evaṃ vipattisaṅgaho veditabbo.
யஸ்மா பன ஸத்தஹாபத்தீஹி முத்தங் ஏகஸிக்கா²பத³ம்பி நத்தி², தஸ்மா ஸப்³பா³னி ஆபத்தியா ஸங்க³ஹிதானீதி ஏவங் ஆபத்திஸங்க³ஹோ வேதி³தப்³போ³.
Yasmā pana sattahāpattīhi muttaṃ ekasikkhāpadampi natthi, tasmā sabbāni āpattiyā saṅgahitānīti evaṃ āpattisaṅgaho veditabbo.
ஸப்³பா³னி ச ஸத்தஸு நக³ரேஸு பஞ்ஞத்தானீதி நிதா³னேன ஸங்க³ஹிதானீதி ஏவங் நிதா³னஸங்க³ஹோ வேதி³தப்³போ³.
Sabbāni ca sattasu nagaresu paññattānīti nidānena saṅgahitānīti evaṃ nidānasaṅgaho veditabbo.
யஸ்மா பன ஏகஸிக்கா²பத³ம்பி அஜ்ஜா²சாரிகபுக்³க³லே அஸதி பஞ்ஞத்தங் நத்தி², தஸ்மா ஸப்³பா³னி புக்³க³லேன ஸங்க³ஹிதானீதி ஏவங் புக்³க³லஸங்க³ஹோ வேதி³தப்³போ³.
Yasmā pana ekasikkhāpadampi ajjhācārikapuggale asati paññattaṃ natthi, tasmā sabbāni puggalena saṅgahitānīti evaṃ puggalasaṅgaho veditabbo.
ஸப்³பா³னி பன பஞ்சஹி சேவ ஸத்தஹி ச ஆபத்திக்க²ந்தே⁴ஹி ஸங்க³ஹிதானி, ஸப்³பா³னி ந வினா ச²ஹி ஸமுட்டா²னேஹி ஸமுட்ட²ந்தீதி ஸமுட்டா²னேன ஸங்க³ஹிதானி. ஸப்³பா³னி ச சதூஸு அதி⁴கரணேஸு ஆபத்தாதி⁴கரணேன ஸங்க³ஹிதானி. ஸப்³பா³னி ஸத்தஹி ஸமதே²ஹி ஸமத²ங் க³ச்ச²ந்தீதி ஸமதே²ஹி ஸங்க³ஹிதானி. ஏவமெத்த² க²ந்த⁴ஸமுட்டா²னஅதி⁴கரணஸமத²ஸங்க³ஹாபி வேதி³தப்³பா³. ஸேஸங் புப்³பே³ வுத்தனயமேவாதி.
Sabbāni pana pañcahi ceva sattahi ca āpattikkhandhehi saṅgahitāni, sabbāni na vinā chahi samuṭṭhānehi samuṭṭhantīti samuṭṭhānena saṅgahitāni. Sabbāni ca catūsu adhikaraṇesu āpattādhikaraṇena saṅgahitāni. Sabbāni sattahi samathehi samathaṃ gacchantīti samathehi saṅgahitāni. Evamettha khandhasamuṭṭhānaadhikaraṇasamathasaṅgahāpi veditabbā. Sesaṃ pubbe vuttanayamevāti.
ஸமந்தபாஸாதி³காய வினயஸங்வண்ணனாய
Samantapāsādikāya vinayasaṃvaṇṇanāya
நவஸங்க³ஹிதவக்³க³வண்ணனா நிட்டி²தா.
Navasaṅgahitavaggavaṇṇanā niṭṭhitā.
நிட்டி²தா ச பரிவாரஸ்ஸ அனுத்தானத்த²பத³வண்ணனாதி.
Niṭṭhitā ca parivārassa anuttānatthapadavaṇṇanāti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi
2. அத்த²வஸவக்³கோ³ • 2. Atthavasavaggo
3. பஞ்ஞத்தவக்³கோ³ • 3. Paññattavaggo
4. அபஞ்ஞத்தே பஞ்ஞத்தவக்³கோ³ • 4. Apaññatte paññattavaggo
5. நவஸங்க³ஹவக்³கோ³ • 5. Navasaṅgahavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அபஞ்ஞத்தே பஞ்ஞத்தவக்³க³வண்ணனா • Apaññatte paññattavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அபஞ்ஞத்தேபஞ்ஞத்தவக்³க³வண்ணனா • Apaññattepaññattavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அத்த²வஸவக்³கா³தி³வண்ணனா • Atthavasavaggādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அத்த²வஸவக்³கா³தி³வண்ணனா • Atthavasavaggādivaṇṇanā
