| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
அத்த²வஸவக்³கா³தி³வண்ணனா
Atthavasavaggādivaṇṇanā
498. ஏவங் கம்மவக்³க³வண்ணனங் த³ஸ்ஸெத்வா தஸ்ஸானந்தரே வுத்தாய ‘‘த்³வே அத்த²வஸே படிச்சா’’திஆதி³காய தே³ஸனாய அனுஸந்தி⁴ங் த³ஸ்ஸெந்தோ ஆஹ ‘‘இதா³னீ’’திஆதி³, இதா³னி ஆரத்³த⁴ந்தி ஸம்ப³ந்தோ⁴. யானி தானி ஸிக்கா²பதா³னீதி யோஜனா. தி³ட்ட²த⁴ம்மிகவேரானந்தி தி³ட்ட²த⁴ம்மே பவத்தத்தா ச விரமிதப்³ப³த்தா ச தி³ட்ட²த⁴ம்மிகானங் வேரானங். ஸங்வராயாதி எத்த² ஸங்புப்³போ³ வரதா⁴து பித³ஹனத்தோ², ஆயஸத்³தோ³ ச தத³த்தோ²தி ஆஹ ‘‘பித³ஹனத்தா²யா’’தி. விபாகது³க்க²ஸங்கா²தானந்தி பாணாதிபாதாதீ³னங் விபாகபூ⁴தானங் து³க்க²ஸங்கா²தானங். ஸம்பராயிகானந்தி ஸம்பராயே பவத்தானங். இதா⁴தி இமஸ்மிங் ஸிக்கா²பத³பஞ்ஞத்தானிஸங்ஸட்டா²னே. ‘‘வஜ்ஜனீயபா⁴வதோ’’தி இமினா வஜ்ஜேதப்³பா³னீதி வஜ்ஜானீதி வசனத்த²ங் த³ஸ்ஸேதி. பா⁴யந்தி ஏதேஹீதி ப⁴யானி. அக்க²மட்டே²னாதி அஸஹணீயட்டே²ன. ‘‘அகுஸலானீதி வுச்சந்தீ’’தி இமினா விபாகது³க்கா²னி ப²லூபசாரேன அகுஸலானி நாமாதி த³ஸ்ஸேதி. க³ணப³ந்த⁴பே⁴த³னத்தா²ய ஸிக்கா²பத³ங் பஞ்ஞத்தந்தி ஏவமேவ பாடோ². பொத்த²கேஸு பன ‘‘க³ணபோ⁴ஜனஸிக்கா²பத³ங் பஞ்ஞத்த’’ந்தி பாடோ² லிகி²தோ. ஸப்³ப³த்தா²தி ஸப்³ப³ஸ்மிங் அத்த²வஸவக்³கே³. யந்தி வசனங். எத்தா²தி இமஸ்மிங் வக்³கே³.
498. Evaṃ kammavaggavaṇṇanaṃ dassetvā tassānantare vuttāya ‘‘dve atthavase paṭiccā’’tiādikāya desanāya anusandhiṃ dassento āha ‘‘idānī’’tiādi, idāni āraddhanti sambandho. Yāni tāni sikkhāpadānīti yojanā. Diṭṭhadhammikaverānanti diṭṭhadhamme pavattattā ca viramitabbattā ca diṭṭhadhammikānaṃ verānaṃ. Saṃvarāyāti ettha saṃpubbo varadhātu pidahanattho, āyasaddo ca tadatthoti āha ‘‘pidahanatthāyā’’ti. Vipākadukkhasaṅkhātānanti pāṇātipātādīnaṃ vipākabhūtānaṃ dukkhasaṅkhātānaṃ. Samparāyikānanti samparāye pavattānaṃ. Idhāti imasmiṃ sikkhāpadapaññattānisaṃsaṭṭhāne. ‘‘Vajjanīyabhāvato’’ti iminā vajjetabbānīti vajjānīti vacanatthaṃ dasseti. Bhāyanti etehīti bhayāni. Akkhamaṭṭhenāti asahaṇīyaṭṭhena. ‘‘Akusalānīti vuccantī’’ti iminā vipākadukkhāni phalūpacārena akusalāni nāmāti dasseti. Gaṇabandhabhedanatthāya sikkhāpadaṃ paññattanti evameva pāṭho. Potthakesu pana ‘‘gaṇabhojanasikkhāpadaṃ paññatta’’nti pāṭho likhito. Sabbatthāti sabbasmiṃ atthavasavagge. Yanti vacanaṃ. Etthāti imasmiṃ vagge.
இதி அத்த²வஸவக்³க³வண்ணனாய யோஜனா ஸமத்தா.
Iti atthavasavaggavaṇṇanāya yojanā samattā.
499. வத்தேஸு வத்தமானோ புக்³க³லோ ஓஸாரீயதி அனேனாதி ஓஸாரணீயங், கம்மங். தேன வுத்தங் ‘‘யேன கம்மேன ஓஸாரீயதி, தங் கம்மங் பஞ்ஞத்த’’ந்தி. ‘‘யேன கம்மேனா’’திஆதி³னா ப⁴ண்ட³னகாரகாத³யோ நிஸ்ஸாரீயந்தி அனேன கம்மேனாதி நிஸ்ஸாரணீயந்தி வசனத்த²ங் த³ஸ்ஸேதி.
499. Vattesu vattamāno puggalo osārīyati anenāti osāraṇīyaṃ, kammaṃ. Tena vuttaṃ ‘‘yena kammena osārīyati, taṃ kammaṃ paññatta’’nti. ‘‘Yena kammenā’’tiādinā bhaṇḍanakārakādayo nissārīyanti anena kammenāti nissāraṇīyanti vacanatthaṃ dasseti.
500. ஸத்தாபத்திக்க²ந்தா⁴ பஞ்ஞத்தங் நாமாதி ஸம்ப³ந்தோ⁴. அந்தராதி ககுஸந்தா⁴தீ³னங் திண்ணங் பு³த்³தா⁴னஞ்ச அம்ஹாகங் ப⁴க³வதோ ச அந்தரே. ‘‘ஸிக்கா²பதே³’’தி இமினா ‘‘அபஞ்ஞத்தே’’தி பத³ஸ்ஸ அத்த²ங் த³ஸ்ஸேதி. மக்கடீவத்து²ஆதி³வினீதகதா² அனுபஞ்ஞத்தங் நாமாதி ஸம்ப³ந்தோ⁴. ‘‘ஸிக்கா²பதே³’’தி இமினா ‘‘பஞ்ஞத்தே’’தி பத³ஸ்ஸ அத்த²ங் த³ஸ்ஸேதி. ஸப்³ப³த்தா²தி ஸப்³ப³ஸ்மிங் ஆனிஸங்ஸவக்³கே³.
500. Sattāpattikkhandhā paññattaṃ nāmāti sambandho. Antarāti kakusandhādīnaṃ tiṇṇaṃ buddhānañca amhākaṃ bhagavato ca antare. ‘‘Sikkhāpade’’ti iminā ‘‘apaññatte’’ti padassa atthaṃ dasseti. Makkaṭīvatthuādivinītakathā anupaññattaṃ nāmāti sambandho. ‘‘Sikkhāpade’’ti iminā ‘‘paññatte’’ti padassa atthaṃ dasseti. Sabbatthāti sabbasmiṃ ānisaṃsavagge.
இதி ஆனிஸங்ஸவக்³க³வண்ணனாய யோஜனா ஸமத்தா.
Iti ānisaṃsavaggavaṇṇanāya yojanā samattā.
501. ஸப்³ப³ஸிக்கா²பதா³னங் ஸங்க³ஹந்தி ஸம்ப³ந்தோ⁴. தத்தா²தி ‘‘நவ ஸங்க³ஹா’’திஆதி³பாடே² ஏவமத்தோ² வேதி³தப்³போ³தி யோஜனா. ‘‘வத்து²னா ஸங்க³ஹோ’’தி இமினா ‘‘வத்து²ஸ்மிங், வத்தூ²னங் ஸங்க³ஹோ’’தி அத்த²ங் நிவாரேதி. எத்தா²தி ‘‘வத்து²ஸங்க³ஹோ’’திஆதி³பாடே². ஹீதி வித்தா²ரோ. யஸ்மா நத்தீ²தி ஸம்ப³ந்தோ⁴. ஸப்³பா³னீதி ஸிக்கா²பதா³னி. ‘‘ஸங்க³ஹிதானீ’’தி இமினா ஸங்க³ஹிதப்³போ³தி ஸங்க³ஹோதி நிப்³ப³சனங் த³ஸ்ஸேதி. ஏவங் தாவாதிஆதி³ நிக³மனங்.
501. Sabbasikkhāpadānaṃ saṅgahanti sambandho. Tatthāti ‘‘nava saṅgahā’’tiādipāṭhe evamattho veditabboti yojanā. ‘‘Vatthunā saṅgaho’’ti iminā ‘‘vatthusmiṃ, vatthūnaṃ saṅgaho’’ti atthaṃ nivāreti. Etthāti ‘‘vatthusaṅgaho’’tiādipāṭhe. Hīti vitthāro. Yasmā natthīti sambandho. Sabbānīti sikkhāpadāni. ‘‘Saṅgahitānī’’ti iminā saṅgahitabboti saṅgahoti nibbacanaṃ dasseti. Evaṃ tāvātiādi nigamanaṃ.
யஸ்மா பன ஸங்க³ஹிதாதி ஸம்ப³ந்தோ⁴.
Yasmā pana saṅgahitāti sambandho.
ஏவமெத்தா²திஆதி³னா க²ந்த⁴ஸமுட்டா²னஅதி⁴கரணஸமதே² ஸம்பிண்டெ³த்வா நிக³மனங் த³ஸ்ஸேதி. எத்தா²தி ஸங்க³ஹவக்³கே³.
Evametthātiādinā khandhasamuṭṭhānaadhikaraṇasamathe sampiṇḍetvā nigamanaṃ dasseti. Etthāti saṅgahavagge.
இதி ஸமந்தபாஸாதி³காய வினயஸங்வண்ணனாய
Iti samantapāsādikāya vinayasaṃvaṇṇanāya
நவஸங்க³ஹிதவண்ணனாய யோஜனா ஸமத்தா.
Navasaṅgahitavaṇṇanāya yojanā samattā.
நிட்டி²தாதி நிட்ட²ங் நிப்ப²த்திங் இதா க³தாதி நிட்டி²தா, அத² வா நிட்டே² நிப்ப²த்தியங் இதா டி²தாதி நிட்டி²தா. சஸத்³தோ³ அவதா⁴ரணத்தோ², நிட்டி²தா ஏவாதி ஹி அத்தோ². அனுத்தானத்த²பத³வண்ணனாதி அனுத்தானானங் அத்த²வந்தபதா³னங், அத்தா²னஞ்ச பதா³னஞ்ச வண்ணனா.
Niṭṭhitāti niṭṭhaṃ nipphattiṃ itā gatāti niṭṭhitā, atha vā niṭṭhe nipphattiyaṃ itā ṭhitāti niṭṭhitā. Casaddo avadhāraṇattho, niṭṭhitā evāti hi attho. Anuttānatthapadavaṇṇanāti anuttānānaṃ atthavantapadānaṃ, atthānañca padānañca vaṇṇanā.
இதி பரிவாரவண்ணனாய யோஜனா ஸமத்தா.
Iti parivāravaṇṇanāya yojanā samattā.
நிட்டி²தா ச பாசித்யாதி³வண்ணனாய யோஜனாதி.
Niṭṭhitā ca pācityādivaṇṇanāya yojanāti.
ஜாதி³லஞ்சி²தனாமேனநேகானங் வாசிதோ மயா;
Jādilañchitanāmenanekānaṃ vācito mayā;
பரிவாரவினயஸ்ஸ, ஸமத்தோ யோஜனானயோ.
Parivāravinayassa, samatto yojanānayo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi
2. அத்த²வஸவக்³கோ³ • 2. Atthavasavaggo
3. பஞ்ஞத்தவக்³கோ³ • 3. Paññattavaggo
4. அபஞ்ஞத்தே பஞ்ஞத்தவக்³கோ³ • 4. Apaññatte paññattavaggo
5. நவஸங்க³ஹவக்³கோ³ • 5. Navasaṅgahavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / அத்த²வஸவக்³கா³தி³வண்ணனா • Atthavasavaggādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அபஞ்ஞத்தே பஞ்ஞத்தவக்³க³வண்ணனா • Apaññatte paññattavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அபஞ்ஞத்தேபஞ்ஞத்தவக்³க³வண்ணனா • Apaññattepaññattavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அத்த²வஸவக்³கா³தி³வண்ணனா • Atthavasavaggādivaṇṇanā
