| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
অত্থৰসৰগ্গাদিৰণ্ণনা
Atthavasavaggādivaṇṇanā
৪৯৮. ইদানি যানি তানি তেসং কম্মানং ৰত্থুভূতানি সিক্খাপদানি, তেসং পঞ্ঞত্তিযং আনিসংসং দস্সেতুং ‘‘দ্ৰে অত্থৰসে পটিচ্চা’’তিআদি আরদ্ধং। তত্থ দিট্ঠধম্মিকানং ৰেরানং সংৰরাযাতি পাণাতিপাতাদীনং পঞ্চন্নং দিট্ঠধম্মিকৰেরানং সংৰরত্থায পিদহনত্থায। সম্পরাযিকানং ৰেরানং পটিঘাতাযাতি ৰিপাকদুক্খসঙ্খাতানং সম্পরাযিকৰেরানং পটিঘাতত্থায, সমুচ্ছেদনত্থায অনুপ্পজ্জনত্থায। দিট্ঠধম্মিকানং ৰজ্জানং সংৰরাযাতি তেসংযেৰ পঞ্চন্নং ৰেরানং সংৰরত্থায। সম্পরাযিকানং ৰজ্জানন্তি তেসংযেৰ ৰিপাকদুক্খানং। ৰিপাকদুক্খানেৰ হি ইধ ৰজ্জনীযভাৰতো ৰজ্জানীতি ৰুত্তানি। দিট্ঠধম্মিকানং ভযানন্তি গরহা উপৰাদো তজ্জনীযাদীনি কম্মানি উপোসথপৰারণানং ঠপনং অকিত্তিপকাসনীযকম্মন্তি এতানি দিট্ঠধম্মিকভযানি নাম, এতেসং সংৰরত্থায। সম্পরাযিকভযানি পন ৰিপাকদুক্খানিযেৰ , তেসং পটিঘাতত্থায। দিট্ঠধম্মিকানং অকুসলানন্তি পঞ্চৰেরদসঅকুসলকম্মপথপ্পভেদানং অকুসলানং সংৰরত্থায। ৰিপাকদুক্খানেৰ পন অক্খমট্ঠেন সম্পরাযিকঅকুসলানীতি ৰুচ্চন্তি, তেসং পটিঘাতত্থায। গিহীনং অনুকম্পাযাতি অগারিকানং সদ্ধারক্খণৰসেন অনুকম্পনত্থায। পাপিচ্ছানং পক্খুপচ্ছেদাযাতি পাপিচ্ছপুগ্গলানং গণবন্ধভেদনত্থায গণভোজনসিক্খাপদং পঞ্ঞত্তং। সেসং সব্বত্থ উত্তানমেৰ। যঞ্হেত্থ ৰত্তব্বং সিযা, তং সব্বং পঠমপারাজিকৰণ্ণনাযমেৰ ৰুত্তন্তি।
498. Idāni yāni tāni tesaṃ kammānaṃ vatthubhūtāni sikkhāpadāni, tesaṃ paññattiyaṃ ānisaṃsaṃ dassetuṃ ‘‘dve atthavase paṭiccā’’tiādi āraddhaṃ. Tattha diṭṭhadhammikānaṃ verānaṃ saṃvarāyāti pāṇātipātādīnaṃ pañcannaṃ diṭṭhadhammikaverānaṃ saṃvaratthāya pidahanatthāya. Samparāyikānaṃ verānaṃ paṭighātāyāti vipākadukkhasaṅkhātānaṃ samparāyikaverānaṃ paṭighātatthāya, samucchedanatthāya anuppajjanatthāya. Diṭṭhadhammikānaṃ vajjānaṃ saṃvarāyāti tesaṃyeva pañcannaṃ verānaṃ saṃvaratthāya. Samparāyikānaṃ vajjānanti tesaṃyeva vipākadukkhānaṃ. Vipākadukkhāneva hi idha vajjanīyabhāvato vajjānīti vuttāni. Diṭṭhadhammikānaṃ bhayānanti garahā upavādo tajjanīyādīni kammāni uposathapavāraṇānaṃ ṭhapanaṃ akittipakāsanīyakammanti etāni diṭṭhadhammikabhayāni nāma, etesaṃ saṃvaratthāya. Samparāyikabhayāni pana vipākadukkhāniyeva , tesaṃ paṭighātatthāya. Diṭṭhadhammikānaṃ akusalānanti pañcaveradasaakusalakammapathappabhedānaṃ akusalānaṃ saṃvaratthāya. Vipākadukkhāneva pana akkhamaṭṭhena samparāyikaakusalānīti vuccanti, tesaṃ paṭighātatthāya. Gihīnaṃ anukampāyāti agārikānaṃ saddhārakkhaṇavasena anukampanatthāya. Pāpicchānaṃ pakkhupacchedāyāti pāpicchapuggalānaṃ gaṇabandhabhedanatthāya gaṇabhojanasikkhāpadaṃ paññattaṃ. Sesaṃ sabbattha uttānameva. Yañhettha vattabbaṃ siyā, taṃ sabbaṃ paṭhamapārājikavaṇṇanāyameva vuttanti.
সিক্খাপদেসু অত্থৰসেন ৰণ্ণনা নিট্ঠিতা।
Sikkhāpadesu atthavasena vaṇṇanā niṭṭhitā.
৪৯৯. পাতিমোক্খাদীসু পাতিমোক্খুদ্দেসোতি ভিক্খূনং পঞ্চৰিধো ভিক্খুনীনং চতুব্বিধো। পরিৰাসদানাদীসু ওসারণীযং পঞ্ঞত্তন্তি অট্ঠারসসু ৰা তেচত্তালীসায ৰা ৰত্তেসু ৰত্তমানস্স ওসারণীযং পঞ্ঞত্তং। যেন কম্মেন ওসারীযতি, তং কম্মং পঞ্ঞত্তন্তি অত্থো। নিস্সারণীযং পঞ্ঞত্তন্তি ভণ্ডনকারকাদযো যেন কম্মেন নিস্সারীযন্তি, তং কম্মং পঞ্ঞত্তন্তি অত্থো।
499. Pātimokkhādīsu pātimokkhuddesoti bhikkhūnaṃ pañcavidho bhikkhunīnaṃ catubbidho. Parivāsadānādīsu osāraṇīyaṃ paññattanti aṭṭhārasasu vā tecattālīsāya vā vattesu vattamānassa osāraṇīyaṃ paññattaṃ. Yena kammena osārīyati, taṃ kammaṃ paññattanti attho. Nissāraṇīyaṃ paññattanti bhaṇḍanakārakādayo yena kammena nissārīyanti, taṃ kammaṃ paññattanti attho.
৫০০. অপঞ্ঞত্তেতিআদীসু অপঞ্ঞত্তে পঞ্ঞত্তন্তি সত্তাপত্তিক্খন্ধা ককুসন্ধঞ্চ সম্মাসম্বুদ্ধং কোণাগমনঞ্চ কস্সপঞ্চ সম্মাসম্বুদ্ধং ঠপেত্ৰা অন্তরা কেনচি অপঞ্ঞত্তে সিক্খাপদে পঞ্ঞত্তং নাম। মক্কটিৰত্থুআদিৰিনীতকথা সিক্খাপদে পঞ্ঞত্তে অনুপঞ্ঞত্তং নাম। সেসং সব্বত্থ উত্তানমেৰাতি।
500. Apaññattetiādīsu apaññatte paññattanti sattāpattikkhandhā kakusandhañca sammāsambuddhaṃ koṇāgamanañca kassapañca sammāsambuddhaṃ ṭhapetvā antarā kenaci apaññatte sikkhāpade paññattaṃ nāma. Makkaṭivatthuādivinītakathā sikkhāpade paññatte anupaññattaṃ nāma. Sesaṃ sabbattha uttānamevāti.
আনিসংসৰগ্গৰণ্ণনা নিট্ঠিতা।
Ānisaṃsavaggavaṇṇanā niṭṭhitā.
৫০১. ইদানি সব্বসিক্খাপদানং একেকেন আকারেন নৰধা সঙ্গহং দস্সেতুং ‘‘নৰ সঙ্গহা’’তিআদিমাহ। তত্থ ৰত্থুসঙ্গহোতি ৰত্থুনা সঙ্গহো। এৰং সেসেসুপি পদত্থো ৰেদিতব্বো। অযং পনেত্থ অত্থযোজনা – যস্মা হি একসিক্খাপদম্পি অৰত্থুস্মিং পঞ্ঞত্তং নত্থি, তস্মা সব্বানি ৰত্থুনা সঙ্গহিতানীতি এৰং তাৰ ৰত্থুসঙ্গহো ৰেদিতব্বো।
501. Idāni sabbasikkhāpadānaṃ ekekena ākārena navadhā saṅgahaṃ dassetuṃ ‘‘nava saṅgahā’’tiādimāha. Tattha vatthusaṅgahoti vatthunā saṅgaho. Evaṃ sesesupi padattho veditabbo. Ayaṃ panettha atthayojanā – yasmā hi ekasikkhāpadampi avatthusmiṃ paññattaṃ natthi, tasmā sabbāni vatthunā saṅgahitānīti evaṃ tāva vatthusaṅgaho veditabbo.
যস্মা পন দ্ৰে আপত্তিক্খন্ধা সীলৰিপত্তিযা সঙ্গহিতা, পঞ্চাপত্তিক্খন্ধা আচারৰিপত্তিযা, ছ সিক্খাপদানি আজীৰৰিপত্তিযা সঙ্গহিতানি, তস্মা সব্বানিপি ৰিপত্তিযা সঙ্গহিতানীতি এৰং ৰিপত্তিসঙ্গহো ৰেদিতব্বো।
Yasmā pana dve āpattikkhandhā sīlavipattiyā saṅgahitā, pañcāpattikkhandhā ācāravipattiyā, cha sikkhāpadāni ājīvavipattiyā saṅgahitāni, tasmā sabbānipi vipattiyā saṅgahitānīti evaṃ vipattisaṅgaho veditabbo.
যস্মা পন সত্তহাপত্তীহি মুত্তং একসিক্খাপদম্পি নত্থি, তস্মা সব্বানি আপত্তিযা সঙ্গহিতানীতি এৰং আপত্তিসঙ্গহো ৰেদিতব্বো।
Yasmā pana sattahāpattīhi muttaṃ ekasikkhāpadampi natthi, tasmā sabbāni āpattiyā saṅgahitānīti evaṃ āpattisaṅgaho veditabbo.
সব্বানি চ সত্তসু নগরেসু পঞ্ঞত্তানীতি নিদানেন সঙ্গহিতানীতি এৰং নিদানসঙ্গহো ৰেদিতব্বো।
Sabbāni ca sattasu nagaresu paññattānīti nidānena saṅgahitānīti evaṃ nidānasaṅgaho veditabbo.
যস্মা পন একসিক্খাপদম্পি অজ্ঝাচারিকপুগ্গলে অসতি পঞ্ঞত্তং নত্থি, তস্মা সব্বানি পুগ্গলেন সঙ্গহিতানীতি এৰং পুগ্গলসঙ্গহো ৰেদিতব্বো।
Yasmā pana ekasikkhāpadampi ajjhācārikapuggale asati paññattaṃ natthi, tasmā sabbāni puggalena saṅgahitānīti evaṃ puggalasaṅgaho veditabbo.
সব্বানি পন পঞ্চহি চেৰ সত্তহি চ আপত্তিক্খন্ধেহি সঙ্গহিতানি, সব্বানি ন ৰিনা ছহি সমুট্ঠানেহি সমুট্ঠন্তীতি সমুট্ঠানেন সঙ্গহিতানি। সব্বানি চ চতূসু অধিকরণেসু আপত্তাধিকরণেন সঙ্গহিতানি। সব্বানি সত্তহি সমথেহি সমথং গচ্ছন্তীতি সমথেহি সঙ্গহিতানি। এৰমেত্থ খন্ধসমুট্ঠানঅধিকরণসমথসঙ্গহাপি ৰেদিতব্বা। সেসং পুব্বে ৰুত্তনযমেৰাতি।
Sabbāni pana pañcahi ceva sattahi ca āpattikkhandhehi saṅgahitāni, sabbāni na vinā chahi samuṭṭhānehi samuṭṭhantīti samuṭṭhānena saṅgahitāni. Sabbāni ca catūsu adhikaraṇesu āpattādhikaraṇena saṅgahitāni. Sabbāni sattahi samathehi samathaṃ gacchantīti samathehi saṅgahitāni. Evamettha khandhasamuṭṭhānaadhikaraṇasamathasaṅgahāpi veditabbā. Sesaṃ pubbe vuttanayamevāti.
সমন্তপাসাদিকায ৰিনযসংৰণ্ণনায
Samantapāsādikāya vinayasaṃvaṇṇanāya
নৰসঙ্গহিতৰগ্গৰণ্ণনা নিট্ঠিতা।
Navasaṅgahitavaggavaṇṇanā niṭṭhitā.
নিট্ঠিতা চ পরিৰারস্স অনুত্তানত্থপদৰণ্ণনাতি।
Niṭṭhitā ca parivārassa anuttānatthapadavaṇṇanāti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi
২. অত্থৰসৰগ্গো • 2. Atthavasavaggo
৩. পঞ্ঞত্তৰগ্গো • 3. Paññattavaggo
৪. অপঞ্ঞত্তে পঞ্ঞত্তৰগ্গো • 4. Apaññatte paññattavaggo
৫. নৰসঙ্গহৰগ্গো • 5. Navasaṅgahavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অপঞ্ঞত্তে পঞ্ঞত্তৰগ্গৰণ্ণনা • Apaññatte paññattavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অপঞ্ঞত্তেপঞ্ঞত্তৰগ্গৰণ্ণনা • Apaññattepaññattavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অত্থৰসৰগ্গাদিৰণ্ণনা • Atthavasavaggādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / অত্থৰসৰগ্গাদিৰণ্ণনা • Atthavasavaggādivaṇṇanā
