| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
অত্থৰসৰগ্গাদিৰণ্ণনা
Atthavasavaggādivaṇṇanā
৪৯৮. এৰং কম্মৰগ্গৰণ্ণনং দস্সেত্ৰা তস্সানন্তরে ৰুত্তায ‘‘দ্ৰে অত্থৰসে পটিচ্চা’’তিআদিকায দেসনায অনুসন্ধিং দস্সেন্তো আহ ‘‘ইদানী’’তিআদি, ইদানি আরদ্ধন্তি সম্বন্ধো। যানি তানি সিক্খাপদানীতি যোজনা। দিট্ঠধম্মিকৰেরানন্তি দিট্ঠধম্মে পৰত্তত্তা চ ৰিরমিতব্বত্তা চ দিট্ঠধম্মিকানং ৰেরানং। সংৰরাযাতি এত্থ সংপুব্বো ৰরধাতু পিদহনত্থো, আযসদ্দো চ তদত্থোতি আহ ‘‘পিদহনত্থাযা’’তি। ৰিপাকদুক্খসঙ্খাতানন্তি পাণাতিপাতাদীনং ৰিপাকভূতানং দুক্খসঙ্খাতানং। সম্পরাযিকানন্তি সম্পরাযে পৰত্তানং। ইধাতি ইমস্মিং সিক্খাপদপঞ্ঞত্তানিসংসট্ঠানে। ‘‘ৰজ্জনীযভাৰতো’’তি ইমিনা ৰজ্জেতব্বানীতি ৰজ্জানীতি ৰচনত্থং দস্সেতি। ভাযন্তি এতেহীতি ভযানি। অক্খমট্ঠেনাতি অসহণীযট্ঠেন। ‘‘অকুসলানীতি ৰুচ্চন্তী’’তি ইমিনা ৰিপাকদুক্খানি ফলূপচারেন অকুসলানি নামাতি দস্সেতি। গণবন্ধভেদনত্থায সিক্খাপদং পঞ্ঞত্তন্তি এৰমেৰ পাঠো। পোত্থকেসু পন ‘‘গণভোজনসিক্খাপদং পঞ্ঞত্ত’’ন্তি পাঠো লিখিতো। সব্বত্থাতি সব্বস্মিং অত্থৰসৰগ্গে। যন্তি ৰচনং। এত্থাতি ইমস্মিং ৰগ্গে।
498. Evaṃ kammavaggavaṇṇanaṃ dassetvā tassānantare vuttāya ‘‘dve atthavase paṭiccā’’tiādikāya desanāya anusandhiṃ dassento āha ‘‘idānī’’tiādi, idāni āraddhanti sambandho. Yāni tāni sikkhāpadānīti yojanā. Diṭṭhadhammikaverānanti diṭṭhadhamme pavattattā ca viramitabbattā ca diṭṭhadhammikānaṃ verānaṃ. Saṃvarāyāti ettha saṃpubbo varadhātu pidahanattho, āyasaddo ca tadatthoti āha ‘‘pidahanatthāyā’’ti. Vipākadukkhasaṅkhātānanti pāṇātipātādīnaṃ vipākabhūtānaṃ dukkhasaṅkhātānaṃ. Samparāyikānanti samparāye pavattānaṃ. Idhāti imasmiṃ sikkhāpadapaññattānisaṃsaṭṭhāne. ‘‘Vajjanīyabhāvato’’ti iminā vajjetabbānīti vajjānīti vacanatthaṃ dasseti. Bhāyanti etehīti bhayāni. Akkhamaṭṭhenāti asahaṇīyaṭṭhena. ‘‘Akusalānīti vuccantī’’ti iminā vipākadukkhāni phalūpacārena akusalāni nāmāti dasseti. Gaṇabandhabhedanatthāya sikkhāpadaṃ paññattanti evameva pāṭho. Potthakesu pana ‘‘gaṇabhojanasikkhāpadaṃ paññatta’’nti pāṭho likhito. Sabbatthāti sabbasmiṃ atthavasavagge. Yanti vacanaṃ. Etthāti imasmiṃ vagge.
ইতি অত্থৰসৰগ্গৰণ্ণনায যোজনা সমত্তা।
Iti atthavasavaggavaṇṇanāya yojanā samattā.
৪৯৯. ৰত্তেসু ৰত্তমানো পুগ্গলো ওসারীযতি অনেনাতি ওসারণীযং, কম্মং। তেন ৰুত্তং ‘‘যেন কম্মেন ওসারীযতি, তং কম্মং পঞ্ঞত্ত’’ন্তি। ‘‘যেন কম্মেনা’’তিআদিনা ভণ্ডনকারকাদযো নিস্সারীযন্তি অনেন কম্মেনাতি নিস্সারণীযন্তি ৰচনত্থং দস্সেতি।
499. Vattesu vattamāno puggalo osārīyati anenāti osāraṇīyaṃ, kammaṃ. Tena vuttaṃ ‘‘yena kammena osārīyati, taṃ kammaṃ paññatta’’nti. ‘‘Yena kammenā’’tiādinā bhaṇḍanakārakādayo nissārīyanti anena kammenāti nissāraṇīyanti vacanatthaṃ dasseti.
৫০০. সত্তাপত্তিক্খন্ধা পঞ্ঞত্তং নামাতি সম্বন্ধো। অন্তরাতি ককুসন্ধাদীনং তিণ্ণং বুদ্ধানঞ্চ অম্হাকং ভগৰতো চ অন্তরে। ‘‘সিক্খাপদে’’তি ইমিনা ‘‘অপঞ্ঞত্তে’’তি পদস্স অত্থং দস্সেতি। মক্কটীৰত্থুআদিৰিনীতকথা অনুপঞ্ঞত্তং নামাতি সম্বন্ধো। ‘‘সিক্খাপদে’’তি ইমিনা ‘‘পঞ্ঞত্তে’’তি পদস্স অত্থং দস্সেতি। সব্বত্থাতি সব্বস্মিং আনিসংসৰগ্গে।
500. Sattāpattikkhandhā paññattaṃ nāmāti sambandho. Antarāti kakusandhādīnaṃ tiṇṇaṃ buddhānañca amhākaṃ bhagavato ca antare. ‘‘Sikkhāpade’’ti iminā ‘‘apaññatte’’ti padassa atthaṃ dasseti. Makkaṭīvatthuādivinītakathā anupaññattaṃ nāmāti sambandho. ‘‘Sikkhāpade’’ti iminā ‘‘paññatte’’ti padassa atthaṃ dasseti. Sabbatthāti sabbasmiṃ ānisaṃsavagge.
ইতি আনিসংসৰগ্গৰণ্ণনায যোজনা সমত্তা।
Iti ānisaṃsavaggavaṇṇanāya yojanā samattā.
৫০১. সব্বসিক্খাপদানং সঙ্গহন্তি সম্বন্ধো। তত্থাতি ‘‘নৰ সঙ্গহা’’তিআদিপাঠে এৰমত্থো ৰেদিতব্বোতি যোজনা। ‘‘ৰত্থুনা সঙ্গহো’’তি ইমিনা ‘‘ৰত্থুস্মিং, ৰত্থূনং সঙ্গহো’’তি অত্থং নিৰারেতি। এত্থাতি ‘‘ৰত্থুসঙ্গহো’’তিআদিপাঠে। হীতি ৰিত্থারো। যস্মা নত্থীতি সম্বন্ধো। সব্বানীতি সিক্খাপদানি। ‘‘সঙ্গহিতানী’’তি ইমিনা সঙ্গহিতব্বোতি সঙ্গহোতি নিব্বচনং দস্সেতি। এৰং তাৰাতিআদি নিগমনং।
501. Sabbasikkhāpadānaṃ saṅgahanti sambandho. Tatthāti ‘‘nava saṅgahā’’tiādipāṭhe evamattho veditabboti yojanā. ‘‘Vatthunā saṅgaho’’ti iminā ‘‘vatthusmiṃ, vatthūnaṃ saṅgaho’’ti atthaṃ nivāreti. Etthāti ‘‘vatthusaṅgaho’’tiādipāṭhe. Hīti vitthāro. Yasmā natthīti sambandho. Sabbānīti sikkhāpadāni. ‘‘Saṅgahitānī’’ti iminā saṅgahitabboti saṅgahoti nibbacanaṃ dasseti. Evaṃ tāvātiādi nigamanaṃ.
যস্মা পন সঙ্গহিতাতি সম্বন্ধো।
Yasmā pana saṅgahitāti sambandho.
এৰমেত্থাতিআদিনা খন্ধসমুট্ঠানঅধিকরণসমথে সম্পিণ্ডেত্ৰা নিগমনং দস্সেতি। এত্থাতি সঙ্গহৰগ্গে।
Evametthātiādinā khandhasamuṭṭhānaadhikaraṇasamathe sampiṇḍetvā nigamanaṃ dasseti. Etthāti saṅgahavagge.
ইতি সমন্তপাসাদিকায ৰিনযসংৰণ্ণনায
Iti samantapāsādikāya vinayasaṃvaṇṇanāya
নৰসঙ্গহিতৰণ্ণনায যোজনা সমত্তা।
Navasaṅgahitavaṇṇanāya yojanā samattā.
নিট্ঠিতাতি নিট্ঠং নিপ্ফত্তিং ইতা গতাতি নিট্ঠিতা, অথ ৰা নিট্ঠে নিপ্ফত্তিযং ইতা ঠিতাতি নিট্ঠিতা। চসদ্দো অৰধারণত্থো, নিট্ঠিতা এৰাতি হি অত্থো। অনুত্তানত্থপদৰণ্ণনাতি অনুত্তানানং অত্থৰন্তপদানং, অত্থানঞ্চ পদানঞ্চ ৰণ্ণনা।
Niṭṭhitāti niṭṭhaṃ nipphattiṃ itā gatāti niṭṭhitā, atha vā niṭṭhe nipphattiyaṃ itā ṭhitāti niṭṭhitā. Casaddo avadhāraṇattho, niṭṭhitā evāti hi attho. Anuttānatthapadavaṇṇanāti anuttānānaṃ atthavantapadānaṃ, atthānañca padānañca vaṇṇanā.
ইতি পরিৰারৰণ্ণনায যোজনা সমত্তা।
Iti parivāravaṇṇanāya yojanā samattā.
নিট্ঠিতা চ পাচিত্যাদিৰণ্ণনায যোজনাতি।
Niṭṭhitā ca pācityādivaṇṇanāya yojanāti.
জাদিলঞ্ছিতনামেননেকানং ৰাচিতো মযা।
Jādilañchitanāmenanekānaṃ vācito mayā;
পরিৰারৰিনযস্স, সমত্তো যোজনানযো॥
Parivāravinayassa, samatto yojanānayo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi
২. অত্থৰসৰগ্গো • 2. Atthavasavaggo
৩. পঞ্ঞত্তৰগ্গো • 3. Paññattavaggo
৪. অপঞ্ঞত্তে পঞ্ঞত্তৰগ্গো • 4. Apaññatte paññattavaggo
৫. নৰসঙ্গহৰগ্গো • 5. Navasaṅgahavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / অত্থৰসৰগ্গাদিৰণ্ণনা • Atthavasavaggādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অপঞ্ঞত্তে পঞ্ঞত্তৰগ্গৰণ্ণনা • Apaññatte paññattavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অপঞ্ঞত্তেপঞ্ঞত্তৰগ্গৰণ্ণনা • Apaññattepaññattavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অত্থৰসৰগ্গাদিৰণ্ণনা • Atthavasavaggādivaṇṇanā
