| Library / Tipiṭaka / ತಿಪಿಟಕ • Tipiṭaka / ಪರಿವಾರ-ಅಟ್ಠಕಥಾ • Parivāra-aṭṭhakathā |
ಅತ್ಥವಸವಗ್ಗಾದಿವಣ್ಣನಾ
Atthavasavaggādivaṇṇanā
೪೯೮. ಇದಾನಿ ಯಾನಿ ತಾನಿ ತೇಸಂ ಕಮ್ಮಾನಂ ವತ್ಥುಭೂತಾನಿ ಸಿಕ್ಖಾಪದಾನಿ, ತೇಸಂ ಪಞ್ಞತ್ತಿಯಂ ಆನಿಸಂಸಂ ದಸ್ಸೇತುಂ ‘‘ದ್ವೇ ಅತ್ಥವಸೇ ಪಟಿಚ್ಚಾ’’ತಿಆದಿ ಆರದ್ಧಂ। ತತ್ಥ ದಿಟ್ಠಧಮ್ಮಿಕಾನಂ ವೇರಾನಂ ಸಂವರಾಯಾತಿ ಪಾಣಾತಿಪಾತಾದೀನಂ ಪಞ್ಚನ್ನಂ ದಿಟ್ಠಧಮ್ಮಿಕವೇರಾನಂ ಸಂವರತ್ಥಾಯ ಪಿದಹನತ್ಥಾಯ। ಸಮ್ಪರಾಯಿಕಾನಂ ವೇರಾನಂ ಪಟಿಘಾತಾಯಾತಿ ವಿಪಾಕದುಕ್ಖಸಙ್ಖಾತಾನಂ ಸಮ್ಪರಾಯಿಕವೇರಾನಂ ಪಟಿಘಾತತ್ಥಾಯ, ಸಮುಚ್ಛೇದನತ್ಥಾಯ ಅನುಪ್ಪಜ್ಜನತ್ಥಾಯ। ದಿಟ್ಠಧಮ್ಮಿಕಾನಂ ವಜ್ಜಾನಂ ಸಂವರಾಯಾತಿ ತೇಸಂಯೇವ ಪಞ್ಚನ್ನಂ ವೇರಾನಂ ಸಂವರತ್ಥಾಯ। ಸಮ್ಪರಾಯಿಕಾನಂ ವಜ್ಜಾನನ್ತಿ ತೇಸಂಯೇವ ವಿಪಾಕದುಕ್ಖಾನಂ। ವಿಪಾಕದುಕ್ಖಾನೇವ ಹಿ ಇಧ ವಜ್ಜನೀಯಭಾವತೋ ವಜ್ಜಾನೀತಿ ವುತ್ತಾನಿ। ದಿಟ್ಠಧಮ್ಮಿಕಾನಂ ಭಯಾನನ್ತಿ ಗರಹಾ ಉಪವಾದೋ ತಜ್ಜನೀಯಾದೀನಿ ಕಮ್ಮಾನಿ ಉಪೋಸಥಪವಾರಣಾನಂ ಠಪನಂ ಅಕಿತ್ತಿಪಕಾಸನೀಯಕಮ್ಮನ್ತಿ ಏತಾನಿ ದಿಟ್ಠಧಮ್ಮಿಕಭಯಾನಿ ನಾಮ, ಏತೇಸಂ ಸಂವರತ್ಥಾಯ। ಸಮ್ಪರಾಯಿಕಭಯಾನಿ ಪನ ವಿಪಾಕದುಕ್ಖಾನಿಯೇವ , ತೇಸಂ ಪಟಿಘಾತತ್ಥಾಯ। ದಿಟ್ಠಧಮ್ಮಿಕಾನಂ ಅಕುಸಲಾನನ್ತಿ ಪಞ್ಚವೇರದಸಅಕುಸಲಕಮ್ಮಪಥಪ್ಪಭೇದಾನಂ ಅಕುಸಲಾನಂ ಸಂವರತ್ಥಾಯ। ವಿಪಾಕದುಕ್ಖಾನೇವ ಪನ ಅಕ್ಖಮಟ್ಠೇನ ಸಮ್ಪರಾಯಿಕಅಕುಸಲಾನೀತಿ ವುಚ್ಚನ್ತಿ, ತೇಸಂ ಪಟಿಘಾತತ್ಥಾಯ। ಗಿಹೀನಂ ಅನುಕಮ್ಪಾಯಾತಿ ಅಗಾರಿಕಾನಂ ಸದ್ಧಾರಕ್ಖಣವಸೇನ ಅನುಕಮ್ಪನತ್ಥಾಯ। ಪಾಪಿಚ್ಛಾನಂ ಪಕ್ಖುಪಚ್ಛೇದಾಯಾತಿ ಪಾಪಿಚ್ಛಪುಗ್ಗಲಾನಂ ಗಣಬನ್ಧಭೇದನತ್ಥಾಯ ಗಣಭೋಜನಸಿಕ್ಖಾಪದಂ ಪಞ್ಞತ್ತಂ। ಸೇಸಂ ಸಬ್ಬತ್ಥ ಉತ್ತಾನಮೇವ। ಯಞ್ಹೇತ್ಥ ವತ್ತಬ್ಬಂ ಸಿಯಾ, ತಂ ಸಬ್ಬಂ ಪಠಮಪಾರಾಜಿಕವಣ್ಣನಾಯಮೇವ ವುತ್ತನ್ತಿ।
498. Idāni yāni tāni tesaṃ kammānaṃ vatthubhūtāni sikkhāpadāni, tesaṃ paññattiyaṃ ānisaṃsaṃ dassetuṃ ‘‘dve atthavase paṭiccā’’tiādi āraddhaṃ. Tattha diṭṭhadhammikānaṃ verānaṃ saṃvarāyāti pāṇātipātādīnaṃ pañcannaṃ diṭṭhadhammikaverānaṃ saṃvaratthāya pidahanatthāya. Samparāyikānaṃ verānaṃ paṭighātāyāti vipākadukkhasaṅkhātānaṃ samparāyikaverānaṃ paṭighātatthāya, samucchedanatthāya anuppajjanatthāya. Diṭṭhadhammikānaṃ vajjānaṃ saṃvarāyāti tesaṃyeva pañcannaṃ verānaṃ saṃvaratthāya. Samparāyikānaṃ vajjānanti tesaṃyeva vipākadukkhānaṃ. Vipākadukkhāneva hi idha vajjanīyabhāvato vajjānīti vuttāni. Diṭṭhadhammikānaṃ bhayānanti garahā upavādo tajjanīyādīni kammāni uposathapavāraṇānaṃ ṭhapanaṃ akittipakāsanīyakammanti etāni diṭṭhadhammikabhayāni nāma, etesaṃ saṃvaratthāya. Samparāyikabhayāni pana vipākadukkhāniyeva , tesaṃ paṭighātatthāya. Diṭṭhadhammikānaṃ akusalānanti pañcaveradasaakusalakammapathappabhedānaṃ akusalānaṃ saṃvaratthāya. Vipākadukkhāneva pana akkhamaṭṭhena samparāyikaakusalānīti vuccanti, tesaṃ paṭighātatthāya. Gihīnaṃ anukampāyāti agārikānaṃ saddhārakkhaṇavasena anukampanatthāya. Pāpicchānaṃ pakkhupacchedāyāti pāpicchapuggalānaṃ gaṇabandhabhedanatthāya gaṇabhojanasikkhāpadaṃ paññattaṃ. Sesaṃ sabbattha uttānameva. Yañhettha vattabbaṃ siyā, taṃ sabbaṃ paṭhamapārājikavaṇṇanāyameva vuttanti.
ಸಿಕ್ಖಾಪದೇಸು ಅತ್ಥವಸೇನ ವಣ್ಣನಾ ನಿಟ್ಠಿತಾ।
Sikkhāpadesu atthavasena vaṇṇanā niṭṭhitā.
೪೯೯. ಪಾತಿಮೋಕ್ಖಾದೀಸು ಪಾತಿಮೋಕ್ಖುದ್ದೇಸೋತಿ ಭಿಕ್ಖೂನಂ ಪಞ್ಚವಿಧೋ ಭಿಕ್ಖುನೀನಂ ಚತುಬ್ಬಿಧೋ। ಪರಿವಾಸದಾನಾದೀಸು ಓಸಾರಣೀಯಂ ಪಞ್ಞತ್ತನ್ತಿ ಅಟ್ಠಾರಸಸು ವಾ ತೇಚತ್ತಾಲೀಸಾಯ ವಾ ವತ್ತೇಸು ವತ್ತಮಾನಸ್ಸ ಓಸಾರಣೀಯಂ ಪಞ್ಞತ್ತಂ। ಯೇನ ಕಮ್ಮೇನ ಓಸಾರೀಯತಿ, ತಂ ಕಮ್ಮಂ ಪಞ್ಞತ್ತನ್ತಿ ಅತ್ಥೋ। ನಿಸ್ಸಾರಣೀಯಂ ಪಞ್ಞತ್ತನ್ತಿ ಭಣ್ಡನಕಾರಕಾದಯೋ ಯೇನ ಕಮ್ಮೇನ ನಿಸ್ಸಾರೀಯನ್ತಿ, ತಂ ಕಮ್ಮಂ ಪಞ್ಞತ್ತನ್ತಿ ಅತ್ಥೋ।
499. Pātimokkhādīsu pātimokkhuddesoti bhikkhūnaṃ pañcavidho bhikkhunīnaṃ catubbidho. Parivāsadānādīsu osāraṇīyaṃ paññattanti aṭṭhārasasu vā tecattālīsāya vā vattesu vattamānassa osāraṇīyaṃ paññattaṃ. Yena kammena osārīyati, taṃ kammaṃ paññattanti attho. Nissāraṇīyaṃ paññattanti bhaṇḍanakārakādayo yena kammena nissārīyanti, taṃ kammaṃ paññattanti attho.
೫೦೦. ಅಪಞ್ಞತ್ತೇತಿಆದೀಸು ಅಪಞ್ಞತ್ತೇ ಪಞ್ಞತ್ತನ್ತಿ ಸತ್ತಾಪತ್ತಿಕ್ಖನ್ಧಾ ಕಕುಸನ್ಧಞ್ಚ ಸಮ್ಮಾಸಮ್ಬುದ್ಧಂ ಕೋಣಾಗಮನಞ್ಚ ಕಸ್ಸಪಞ್ಚ ಸಮ್ಮಾಸಮ್ಬುದ್ಧಂ ಠಪೇತ್ವಾ ಅನ್ತರಾ ಕೇನಚಿ ಅಪಞ್ಞತ್ತೇ ಸಿಕ್ಖಾಪದೇ ಪಞ್ಞತ್ತಂ ನಾಮ। ಮಕ್ಕಟಿವತ್ಥುಆದಿವಿನೀತಕಥಾ ಸಿಕ್ಖಾಪದೇ ಪಞ್ಞತ್ತೇ ಅನುಪಞ್ಞತ್ತಂ ನಾಮ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
500. Apaññattetiādīsu apaññatte paññattanti sattāpattikkhandhā kakusandhañca sammāsambuddhaṃ koṇāgamanañca kassapañca sammāsambuddhaṃ ṭhapetvā antarā kenaci apaññatte sikkhāpade paññattaṃ nāma. Makkaṭivatthuādivinītakathā sikkhāpade paññatte anupaññattaṃ nāma. Sesaṃ sabbattha uttānamevāti.
ಆನಿಸಂಸವಗ್ಗವಣ್ಣನಾ ನಿಟ್ಠಿತಾ।
Ānisaṃsavaggavaṇṇanā niṭṭhitā.
೫೦೧. ಇದಾನಿ ಸಬ್ಬಸಿಕ್ಖಾಪದಾನಂ ಏಕೇಕೇನ ಆಕಾರೇನ ನವಧಾ ಸಙ್ಗಹಂ ದಸ್ಸೇತುಂ ‘‘ನವ ಸಙ್ಗಹಾ’’ತಿಆದಿಮಾಹ। ತತ್ಥ ವತ್ಥುಸಙ್ಗಹೋತಿ ವತ್ಥುನಾ ಸಙ್ಗಹೋ। ಏವಂ ಸೇಸೇಸುಪಿ ಪದತ್ಥೋ ವೇದಿತಬ್ಬೋ। ಅಯಂ ಪನೇತ್ಥ ಅತ್ಥಯೋಜನಾ – ಯಸ್ಮಾ ಹಿ ಏಕಸಿಕ್ಖಾಪದಮ್ಪಿ ಅವತ್ಥುಸ್ಮಿಂ ಪಞ್ಞತ್ತಂ ನತ್ಥಿ, ತಸ್ಮಾ ಸಬ್ಬಾನಿ ವತ್ಥುನಾ ಸಙ್ಗಹಿತಾನೀತಿ ಏವಂ ತಾವ ವತ್ಥುಸಙ್ಗಹೋ ವೇದಿತಬ್ಬೋ।
501. Idāni sabbasikkhāpadānaṃ ekekena ākārena navadhā saṅgahaṃ dassetuṃ ‘‘nava saṅgahā’’tiādimāha. Tattha vatthusaṅgahoti vatthunā saṅgaho. Evaṃ sesesupi padattho veditabbo. Ayaṃ panettha atthayojanā – yasmā hi ekasikkhāpadampi avatthusmiṃ paññattaṃ natthi, tasmā sabbāni vatthunā saṅgahitānīti evaṃ tāva vatthusaṅgaho veditabbo.
ಯಸ್ಮಾ ಪನ ದ್ವೇ ಆಪತ್ತಿಕ್ಖನ್ಧಾ ಸೀಲವಿಪತ್ತಿಯಾ ಸಙ್ಗಹಿತಾ, ಪಞ್ಚಾಪತ್ತಿಕ್ಖನ್ಧಾ ಆಚಾರವಿಪತ್ತಿಯಾ, ಛ ಸಿಕ್ಖಾಪದಾನಿ ಆಜೀವವಿಪತ್ತಿಯಾ ಸಙ್ಗಹಿತಾನಿ, ತಸ್ಮಾ ಸಬ್ಬಾನಿಪಿ ವಿಪತ್ತಿಯಾ ಸಙ್ಗಹಿತಾನೀತಿ ಏವಂ ವಿಪತ್ತಿಸಙ್ಗಹೋ ವೇದಿತಬ್ಬೋ।
Yasmā pana dve āpattikkhandhā sīlavipattiyā saṅgahitā, pañcāpattikkhandhā ācāravipattiyā, cha sikkhāpadāni ājīvavipattiyā saṅgahitāni, tasmā sabbānipi vipattiyā saṅgahitānīti evaṃ vipattisaṅgaho veditabbo.
ಯಸ್ಮಾ ಪನ ಸತ್ತಹಾಪತ್ತೀಹಿ ಮುತ್ತಂ ಏಕಸಿಕ್ಖಾಪದಮ್ಪಿ ನತ್ಥಿ, ತಸ್ಮಾ ಸಬ್ಬಾನಿ ಆಪತ್ತಿಯಾ ಸಙ್ಗಹಿತಾನೀತಿ ಏವಂ ಆಪತ್ತಿಸಙ್ಗಹೋ ವೇದಿತಬ್ಬೋ।
Yasmā pana sattahāpattīhi muttaṃ ekasikkhāpadampi natthi, tasmā sabbāni āpattiyā saṅgahitānīti evaṃ āpattisaṅgaho veditabbo.
ಸಬ್ಬಾನಿ ಚ ಸತ್ತಸು ನಗರೇಸು ಪಞ್ಞತ್ತಾನೀತಿ ನಿದಾನೇನ ಸಙ್ಗಹಿತಾನೀತಿ ಏವಂ ನಿದಾನಸಙ್ಗಹೋ ವೇದಿತಬ್ಬೋ।
Sabbāni ca sattasu nagaresu paññattānīti nidānena saṅgahitānīti evaṃ nidānasaṅgaho veditabbo.
ಯಸ್ಮಾ ಪನ ಏಕಸಿಕ್ಖಾಪದಮ್ಪಿ ಅಜ್ಝಾಚಾರಿಕಪುಗ್ಗಲೇ ಅಸತಿ ಪಞ್ಞತ್ತಂ ನತ್ಥಿ, ತಸ್ಮಾ ಸಬ್ಬಾನಿ ಪುಗ್ಗಲೇನ ಸಙ್ಗಹಿತಾನೀತಿ ಏವಂ ಪುಗ್ಗಲಸಙ್ಗಹೋ ವೇದಿತಬ್ಬೋ।
Yasmā pana ekasikkhāpadampi ajjhācārikapuggale asati paññattaṃ natthi, tasmā sabbāni puggalena saṅgahitānīti evaṃ puggalasaṅgaho veditabbo.
ಸಬ್ಬಾನಿ ಪನ ಪಞ್ಚಹಿ ಚೇವ ಸತ್ತಹಿ ಚ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾನಿ, ಸಬ್ಬಾನಿ ನ ವಿನಾ ಛಹಿ ಸಮುಟ್ಠಾನೇಹಿ ಸಮುಟ್ಠನ್ತೀತಿ ಸಮುಟ್ಠಾನೇನ ಸಙ್ಗಹಿತಾನಿ। ಸಬ್ಬಾನಿ ಚ ಚತೂಸು ಅಧಿಕರಣೇಸು ಆಪತ್ತಾಧಿಕರಣೇನ ಸಙ್ಗಹಿತಾನಿ। ಸಬ್ಬಾನಿ ಸತ್ತಹಿ ಸಮಥೇಹಿ ಸಮಥಂ ಗಚ್ಛನ್ತೀತಿ ಸಮಥೇಹಿ ಸಙ್ಗಹಿತಾನಿ। ಏವಮೇತ್ಥ ಖನ್ಧಸಮುಟ್ಠಾನಅಧಿಕರಣಸಮಥಸಙ್ಗಹಾಪಿ ವೇದಿತಬ್ಬಾ। ಸೇಸಂ ಪುಬ್ಬೇ ವುತ್ತನಯಮೇವಾತಿ।
Sabbāni pana pañcahi ceva sattahi ca āpattikkhandhehi saṅgahitāni, sabbāni na vinā chahi samuṭṭhānehi samuṭṭhantīti samuṭṭhānena saṅgahitāni. Sabbāni ca catūsu adhikaraṇesu āpattādhikaraṇena saṅgahitāni. Sabbāni sattahi samathehi samathaṃ gacchantīti samathehi saṅgahitāni. Evamettha khandhasamuṭṭhānaadhikaraṇasamathasaṅgahāpi veditabbā. Sesaṃ pubbe vuttanayamevāti.
ಸಮನ್ತಪಾಸಾದಿಕಾಯ ವಿನಯಸಂವಣ್ಣನಾಯ
Samantapāsādikāya vinayasaṃvaṇṇanāya
ನವಸಙ್ಗಹಿತವಗ್ಗವಣ್ಣನಾ ನಿಟ್ಠಿತಾ।
Navasaṅgahitavaggavaṇṇanā niṭṭhitā.
ನಿಟ್ಠಿತಾ ಚ ಪರಿವಾರಸ್ಸ ಅನುತ್ತಾನತ್ಥಪದವಣ್ಣನಾತಿ।
Niṭṭhitā ca parivārassa anuttānatthapadavaṇṇanāti.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi
೨. ಅತ್ಥವಸವಗ್ಗೋ • 2. Atthavasavaggo
೩. ಪಞ್ಞತ್ತವಗ್ಗೋ • 3. Paññattavaggo
೪. ಅಪಞ್ಞತ್ತೇ ಪಞ್ಞತ್ತವಗ್ಗೋ • 4. Apaññatte paññattavaggo
೫. ನವಸಙ್ಗಹವಗ್ಗೋ • 5. Navasaṅgahavaggo
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅಪಞ್ಞತ್ತೇ ಪಞ್ಞತ್ತವಗ್ಗವಣ್ಣನಾ • Apaññatte paññattavaggavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅಪಞ್ಞತ್ತೇಪಞ್ಞತ್ತವಗ್ಗವಣ್ಣನಾ • Apaññattepaññattavaggavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅತ್ಥವಸವಗ್ಗಾದಿವಣ್ಣನಾ • Atthavasavaggādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಅತ್ಥವಸವಗ್ಗಾದಿವಣ್ಣನಾ • Atthavasavaggādivaṇṇanā
