| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
8. அட்ட²வத்து²காஸிக்கா²பத³வண்ணனா
8. Aṭṭhavatthukāsikkhāpadavaṇṇanā
லோகஸ்ஸாத³மித்தஸந்த²வவஸேனாதி (ஸாரத்த²॰ டீ॰ பாசித்திய 3.675) லோகஸ்ஸாத³ஸங்கா²தஸ்ஸ மித்தஸந்த²வஸ்ஸ வஸேன. கிங் தந்தி ஆஹ ‘‘காயஸங்ஸக்³க³ராகே³னா’’தி. காயஸங்ஸக்³க³ராகே³னேவ திந்தா இத⁴ அவஸ்ஸுதா நாம, ந மேது²னராகே³னாதி. கத²மேதங் விஞ்ஞாயதீதி ஆஹ ‘‘அயமேவ ஹீ’’திஆதி³. கிங் பனெத்த² காரணந்தி ஆஹ ‘‘ஸமந்தபாஸாதி³காயங் பனஸ்ஸ விசாரணா கதா’’தி. தத்தா²யங் விசாரணா – எத்த² ச அஸத்³த⁴ம்மோதி காயஸங்ஸக்³கோ³வ வேதி³தப்³போ³, ந மேது²னத⁴ம்மோ. ந ஹி மேது²னஸ்ஸ ஸாமந்தா து²ல்லச்சயங் ஹோதி. ‘‘விஞ்ஞூ படிப³லோ காயஸங்ஸக்³க³ங் ஸமாபஜ்ஜிது’’ந்தி (பாசி॰ 676) வசனம்பி செத்த² ஸாத⁴கந்தி. யங் யேன கதங், தங் தஸ்ஸேவ ஹோதீதி. புரிஸபுக்³க³லஸ்ஸாதி ஸாமிவசனந்தி த³ஸ்ஸேதுங் ‘‘யங் புரிஸபுக்³க³லேனா’’திஆதி³ வுத்தங். தத்த² ஹத்தோ²தி அத்தனோ ஹத்தோ². ந கேவலஞ்செத்த² ஹத்த²க்³க³ஹணந்தி ‘‘ஹத்தோ² நாம கப்பரங் உபாதா³ய யாவ அக்³க³னகா²’’தி (பாசி॰ 676) வுத்தஸ்ஸ ஹத்த²ஸ்ஸேவ க³ஹணங், அத² கோ² தஸ்ஸ ச அஞ்ஞஸ்ஸபி அபாராஜிககெ²த்தஸ்ஸ க³ஹணங் ஏகஜ்ஜ²ங் கத்வா ‘‘ஹத்த²க்³க³ஹண’’ந்தி வுத்தங். ததா² ஸங்கா⁴டிகண்ணக்³க³ஹணந்தி ந கேவலங் ஸங்கா⁴டிகண்ணஸ்ஸேவ க³ஹணங், அத² கோ² தஸ்ஸ ச அஞ்ஞஸ்ஸபி யஸ்ஸ கஸ்ஸசி சீவரப்பதே³ஸஸ்ஸ க³ஹணங் வுத்தந்தி த³ஸ்ஸேதுங் ‘‘எத்த² ச யஸ்ஸ கஸ்ஸசீ’’திஆதி³ வுத்தங். இத்த²ன்னாமங் டா²னந்தி ஏவங்னாமகங் டா²னங். ‘‘படிபாடியா வா உப்படிபாடியா வா பூரெத்வா’’தி இத³ங் நித³ஸ்ஸனமத்தங். தஸ்மா படிபாடியா வா உப்படிபாடியா வா ஏகந்தரிகாய வா யேன தேன நயேன பூரெத்வாதி அத்தோ².
Lokassādamittasanthavavasenāti (sārattha. ṭī. pācittiya 3.675) lokassādasaṅkhātassa mittasanthavassa vasena. Kiṃ tanti āha ‘‘kāyasaṃsaggarāgenā’’ti. Kāyasaṃsaggarāgeneva tintā idha avassutā nāma, na methunarāgenāti. Kathametaṃ viññāyatīti āha ‘‘ayameva hī’’tiādi. Kiṃ panettha kāraṇanti āha ‘‘samantapāsādikāyaṃ panassa vicāraṇā katā’’ti. Tatthāyaṃ vicāraṇā – ettha ca asaddhammoti kāyasaṃsaggova veditabbo, na methunadhammo. Na hi methunassa sāmantā thullaccayaṃ hoti. ‘‘Viññū paṭibalo kāyasaṃsaggaṃ samāpajjitu’’nti (pāci. 676) vacanampi cettha sādhakanti. Yaṃ yena kataṃ, taṃ tasseva hotīti. Purisapuggalassāti sāmivacananti dassetuṃ ‘‘yaṃ purisapuggalenā’’tiādi vuttaṃ. Tattha hatthoti attano hattho. Na kevalañcettha hatthaggahaṇanti ‘‘hattho nāma kapparaṃ upādāya yāva agganakhā’’ti (pāci. 676) vuttassa hatthasseva gahaṇaṃ, atha kho tassa ca aññassapi apārājikakhettassa gahaṇaṃ ekajjhaṃ katvā ‘‘hatthaggahaṇa’’nti vuttaṃ. Tathā saṅghāṭikaṇṇaggahaṇanti na kevalaṃ saṅghāṭikaṇṇasseva gahaṇaṃ, atha kho tassa ca aññassapi yassa kassaci cīvarappadesassa gahaṇaṃ vuttanti dassetuṃ ‘‘ettha ca yassa kassacī’’tiādi vuttaṃ. Itthannāmaṃ ṭhānanti evaṃnāmakaṃ ṭhānaṃ. ‘‘Paṭipāṭiyā vā uppaṭipāṭiyā vā pūretvā’’ti idaṃ nidassanamattaṃ. Tasmā paṭipāṭiyā vā uppaṭipāṭiyā vā ekantarikāya vā yena tena nayena pūretvāti attho.
தா ஆபத்தியோதி தா ஆபன்னா ஆபத்தியோ. யதா² சேகேகஸ்மிங் வத்து²ஸ்மிங் ஏவங் விஸுங் விஸுங் ஸத்தஸு வத்தூ²ஸு ஸதக்க²த்தும்பி வீதிக்கந்தேஸு தா ஆபத்தியோ தே³ஸெத்வா முச்சதி. க³ணனூபிகாதி தே³ஸிதக³ணனங் உபக³ச்ச²தி. து⁴ரனிக்கே²பங் கத்வாதி ‘‘அஞ்ஞங் வத்து²ங் ஆபஜ்ஜிஸ்ஸாமீ’’தி உஸ்ஸாஹங் ட²பெத்வா.
Tā āpattiyoti tā āpannā āpattiyo. Yathā cekekasmiṃ vatthusmiṃ evaṃ visuṃ visuṃ sattasu vatthūsu satakkhattumpi vītikkantesu tā āpattiyo desetvā muccati. Gaṇanūpikāti desitagaṇanaṃ upagacchati. Dhuranikkhepaṃ katvāti ‘‘aññaṃ vatthuṃ āpajjissāmī’’ti ussāhaṃ ṭhapetvā.
அட்ட²வத்து²காஸிக்கா²பத³வண்ணனா நிட்டி²தா.
Aṭṭhavatthukāsikkhāpadavaṇṇanā niṭṭhitā.
இதி கங்கா²விதரணியா பாதிமொக்க²வண்ணனாய
Iti kaṅkhāvitaraṇiyā pātimokkhavaṇṇanāya
வினயத்த²மஞ்ஜூஸாயங் லீனத்த²ப்பகாஸனியங்
Vinayatthamañjūsāyaṃ līnatthappakāsaniyaṃ
பி⁴க்கு²னிபாதிமொக்கே² பாராஜிகவண்ணனா நிட்டி²தா.
Bhikkhunipātimokkhe pārājikavaṇṇanā niṭṭhitā.
