| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৮. অট্ঠৰত্থুকাসিক্খাপদৰণ্ণনা
8. Aṭṭhavatthukāsikkhāpadavaṇṇanā
লোকস্সাদমিত্তসন্থৰৰসেনাতি (সারত্থ॰ টী॰ পাচিত্তিয ৩.৬৭৫) লোকস্সাদসঙ্খাতস্স মিত্তসন্থৰস্স ৰসেন। কিং তন্তি আহ ‘‘কাযসংসগ্গরাগেনা’’তি। কাযসংসগ্গরাগেনেৰ তিন্তা ইধ অৰস্সুতা নাম, ন মেথুনরাগেনাতি। কথমেতং ৰিঞ্ঞাযতীতি আহ ‘‘অযমেৰ হী’’তিআদি। কিং পনেত্থ কারণন্তি আহ ‘‘সমন্তপাসাদিকাযং পনস্স ৰিচারণা কতা’’তি। তত্থাযং ৰিচারণা – এত্থ চ অসদ্ধম্মোতি কাযসংসগ্গোৰ ৰেদিতব্বো, ন মেথুনধম্মো। ন হি মেথুনস্স সামন্তা থুল্লচ্চযং হোতি। ‘‘ৰিঞ্ঞূ পটিবলো কাযসংসগ্গং সমাপজ্জিতু’’ন্তি (পাচি॰ ৬৭৬) ৰচনম্পি চেত্থ সাধকন্তি। যং যেন কতং, তং তস্সেৰ হোতীতি। পুরিসপুগ্গলস্সাতি সামিৰচনন্তি দস্সেতুং ‘‘যং পুরিসপুগ্গলেনা’’তিআদি ৰুত্তং। তত্থ হত্থোতি অত্তনো হত্থো। ন কেৰলঞ্চেত্থ হত্থগ্গহণন্তি ‘‘হত্থো নাম কপ্পরং উপাদায যাৰ অগ্গনখা’’তি (পাচি॰ ৬৭৬) ৰুত্তস্স হত্থস্সেৰ গহণং, অথ খো তস্স চ অঞ্ঞস্সপি অপারাজিকখেত্তস্স গহণং একজ্ঝং কত্ৰা ‘‘হত্থগ্গহণ’’ন্তি ৰুত্তং। তথা সঙ্ঘাটিকণ্ণগ্গহণন্তি ন কেৰলং সঙ্ঘাটিকণ্ণস্সেৰ গহণং, অথ খো তস্স চ অঞ্ঞস্সপি যস্স কস্সচি চীৰরপ্পদেসস্স গহণং ৰুত্তন্তি দস্সেতুং ‘‘এত্থ চ যস্স কস্সচী’’তিআদি ৰুত্তং। ইত্থন্নামং ঠানন্তি এৰংনামকং ঠানং। ‘‘পটিপাটিযা ৰা উপ্পটিপাটিযা ৰা পূরেত্ৰা’’তি ইদং নিদস্সনমত্তং। তস্মা পটিপাটিযা ৰা উপ্পটিপাটিযা ৰা একন্তরিকায ৰা যেন তেন নযেন পূরেত্ৰাতি অত্থো।
Lokassādamittasanthavavasenāti (sārattha. ṭī. pācittiya 3.675) lokassādasaṅkhātassa mittasanthavassa vasena. Kiṃ tanti āha ‘‘kāyasaṃsaggarāgenā’’ti. Kāyasaṃsaggarāgeneva tintā idha avassutā nāma, na methunarāgenāti. Kathametaṃ viññāyatīti āha ‘‘ayameva hī’’tiādi. Kiṃ panettha kāraṇanti āha ‘‘samantapāsādikāyaṃ panassa vicāraṇā katā’’ti. Tatthāyaṃ vicāraṇā – ettha ca asaddhammoti kāyasaṃsaggova veditabbo, na methunadhammo. Na hi methunassa sāmantā thullaccayaṃ hoti. ‘‘Viññū paṭibalo kāyasaṃsaggaṃ samāpajjitu’’nti (pāci. 676) vacanampi cettha sādhakanti. Yaṃ yena kataṃ, taṃ tasseva hotīti. Purisapuggalassāti sāmivacananti dassetuṃ ‘‘yaṃ purisapuggalenā’’tiādi vuttaṃ. Tattha hatthoti attano hattho. Na kevalañcettha hatthaggahaṇanti ‘‘hattho nāma kapparaṃ upādāya yāva agganakhā’’ti (pāci. 676) vuttassa hatthasseva gahaṇaṃ, atha kho tassa ca aññassapi apārājikakhettassa gahaṇaṃ ekajjhaṃ katvā ‘‘hatthaggahaṇa’’nti vuttaṃ. Tathā saṅghāṭikaṇṇaggahaṇanti na kevalaṃ saṅghāṭikaṇṇasseva gahaṇaṃ, atha kho tassa ca aññassapi yassa kassaci cīvarappadesassa gahaṇaṃ vuttanti dassetuṃ ‘‘ettha ca yassa kassacī’’tiādi vuttaṃ. Itthannāmaṃ ṭhānanti evaṃnāmakaṃ ṭhānaṃ. ‘‘Paṭipāṭiyā vā uppaṭipāṭiyā vā pūretvā’’ti idaṃ nidassanamattaṃ. Tasmā paṭipāṭiyā vā uppaṭipāṭiyā vā ekantarikāya vā yena tena nayena pūretvāti attho.
তা আপত্তিযোতি তা আপন্না আপত্তিযো। যথা চেকেকস্মিং ৰত্থুস্মিং এৰং ৰিসুং ৰিসুং সত্তসু ৰত্থূসু সতক্খত্তুম্পি ৰীতিক্কন্তেসু তা আপত্তিযো দেসেত্ৰা মুচ্চতি। গণনূপিকাতি দেসিতগণনং উপগচ্ছতি। ধুরনিক্খেপং কত্ৰাতি ‘‘অঞ্ঞং ৰত্থুং আপজ্জিস্সামী’’তি উস্সাহং ঠপেত্ৰা।
Tā āpattiyoti tā āpannā āpattiyo. Yathā cekekasmiṃ vatthusmiṃ evaṃ visuṃ visuṃ sattasu vatthūsu satakkhattumpi vītikkantesu tā āpattiyo desetvā muccati. Gaṇanūpikāti desitagaṇanaṃ upagacchati. Dhuranikkhepaṃ katvāti ‘‘aññaṃ vatthuṃ āpajjissāmī’’ti ussāhaṃ ṭhapetvā.
অট্ঠৰত্থুকাসিক্খাপদৰণ্ণনা নিট্ঠিতা।
Aṭṭhavatthukāsikkhāpadavaṇṇanā niṭṭhitā.
ইতি কঙ্খাৰিতরণিযা পাতিমোক্খৰণ্ণনায
Iti kaṅkhāvitaraṇiyā pātimokkhavaṇṇanāya
ৰিনযত্থমঞ্জূসাযং লীনত্থপ্পকাসনিযং
Vinayatthamañjūsāyaṃ līnatthappakāsaniyaṃ
ভিক্খুনিপাতিমোক্খে পারাজিকৰণ্ণনা নিট্ঠিতা।
Bhikkhunipātimokkhe pārājikavaṇṇanā niṭṭhitā.
