| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੨੧. ਅਤ੍ਥਿਪਚ੍ਚਯਨਿਦ੍ਦੇਸવਣ੍ਣਨਾ
21. Atthipaccayaniddesavaṇṇanā
੨੧. ਅਤ੍ਥਿਪਚ੍ਚਯਨਿਦ੍ਦੇਸੇ ਚਤ੍ਤਾਰੋ ਖਨ੍ਧਾਤਿਆਦੀਹਿ ਸਹਜਾਤવਸੇਨ ਅਤ੍ਥਿਪਚ੍ਚਯੋ ਨਿਦ੍ਦਿਟ੍ਠੋ। ਚਕ੍ਖਾਯਤਨਨ੍ਤਿਆਦੀਹਿ ਪੁਰੇਜਾਤવਸੇਨ। ਯਂ ਰੂਪਂ ਨਿਸ੍ਸਾਯਾਤਿ ਏਤ੍ਥ ਸਹਜਾਤਪੁਰੇਜਾਤવਸੇਨ ਅਤ੍ਥਿਪਚ੍ਚਯੋ ਨਿਦ੍ਦਿਟ੍ਠੋ। ਏવਮਯਂ ਪਾਲ਼ਿ ਸਹਜਾਤਪੁਰੇਜਾਤਾਨਞ੍ਞੇવ ਅਤ੍ਥਿਪਚ੍ਚਯਾਨਂ વਸੇਨ ਆਗਤਾ। ਪਞ੍ਹਾવਾਰੇ ਪਨ ਸਹਜਾਤਂ, ਪੁਰੇਜਾਤਂ, ਪਚ੍ਛਾਜਾਤਂ, ਆਹਾਰਂ, ਇਨ੍ਦ੍ਰਿਯਨ੍ਤਿ ਇਮੇਸਂ વਸੇਨ ਆਗਤਤ੍ਤਾ ਪਚ੍ਛਾਜਾਤਆਹਾਰਿਨ੍ਦ੍ਰਿਯવਸੇਨਾਪਿ ਅਤ੍ਥਿਪਚ੍ਚਯੋ ਲਬ੍ਭਤਿ। ਇਧ ਪਨ ਸਾવਸੇਸવਸੇਨ ਦੇਸਨਾ ਕਤਾਤਿ ਅਯਂ ਤਾવੇਤ੍ਥ ਪਾਲ਼ਿવਣ੍ਣਨਾ।
21. Atthipaccayaniddese cattāro khandhātiādīhi sahajātavasena atthipaccayo niddiṭṭho. Cakkhāyatanantiādīhi purejātavasena. Yaṃ rūpaṃ nissāyāti ettha sahajātapurejātavasena atthipaccayo niddiṭṭho. Evamayaṃ pāḷi sahajātapurejātānaññeva atthipaccayānaṃ vasena āgatā. Pañhāvāre pana sahajātaṃ, purejātaṃ, pacchājātaṃ, āhāraṃ, indriyanti imesaṃ vasena āgatattā pacchājātaāhārindriyavasenāpi atthipaccayo labbhati. Idha pana sāvasesavasena desanā katāti ayaṃ tāvettha pāḷivaṇṇanā.
ਅਯਂ ਪਨ ਅਤ੍ਥਿਪਚ੍ਚਯੋ ਨਾਮ ਦੁવਿਧੋ – ਅਞ੍ਞਮਞ੍ਞਤੋ, ਨ ਅਞ੍ਞਮਞ੍ਞਤੋ। ਤਤ੍ਥ ਅਞ੍ਞਮਞ੍ਞਂ ਤਿવਿਧਂ – ਅਰੂਪਂ ਅਰੂਪੇਨ, ਰੂਪਂ ਰੂਪੇਨ, ਰੂਪਾਰੂਪਂ ਰੂਪਾਰੂਪੇਨ। ‘‘ਚਤ੍ਤਾਰੋ ਖਨ੍ਧਾ ਅਰੂਪਿਨੋ’’ਤਿ ਏਤ੍ਥ ਹਿ ਸਬ੍ਬਚਿਤ੍ਤੁਪ੍ਪਤ੍ਤਿવਸੇਨ ਅਰੂਪਂ ਅਰੂਪੇਨ વੁਤ੍ਤਂ। ‘‘ਚਤ੍ਤਾਰੋ ਮਹਾਭੂਤਾ’’ਤਿ ਏਤ੍ਥ ਸਬ੍ਬਸਨ੍ਤਤਿવਸੇਨ ਰੂਪਂ ਰੂਪੇਨ। ‘‘ਓਕ੍ਕਨ੍ਤਿਕ੍ਖਣੇ ਨਾਮਰੂਪ’’ਨ੍ਤਿ ਏਤ੍ਥ ਪਟਿਸਨ੍ਧਿਖਨ੍ਧਾਨਞ੍ਚੇવ વਤ੍ਥੁਨੋ ਚ વਸੇਨ ਰੂਪਾਰੂਪਂ ਰੂਪਾਰੂਪੇਨ વੁਤ੍ਤਂ। ਨ ਅਞ੍ਞਮਞ੍ਞਮ੍ਪਿ ਤਿવਿਧਂ – ‘‘ਅਰੂਪਂ ਰੂਪਸ੍ਸ, ਰੂਪਂ ਰੂਪਸ੍ਸ, ਰੂਪਂ ਅਰੂਪਸ੍ਸ ਚਿਤ੍ਤਚੇਤਸਿਕਾ ਧਮ੍ਮਾ’’ਤਿ ਏਤ੍ਥ ਹਿ ਪਞ੍ਚવੋਕਾਰવਸੇਨ ਅਰੂਪਂ ਰੂਪਸ੍ਸ વੁਤ੍ਤਂ। ‘‘ਮਹਾਭੂਤਾ ਉਪਾਦਾਰੂਪਾਨ’’ਨ੍ਤਿ ਏਤ੍ਥ ਸਬ੍ਬਸਨ੍ਤਤਿવਸੇਨ ਰੂਪਂ ਰੂਪਸ੍ਸ। ‘‘ਚਕ੍ਖਾਯਤਨਂ ਚਕ੍ਖੁવਿਞ੍ਞਾਣਧਾਤੁਯਾ’’ਤਿਆਦੀਸੁ વਤ੍ਥਾਰਮ੍ਮਣવਸੇਨ ਰੂਪਂ ਅਰੂਪਸ੍ਸ ਅਤ੍ਥਿਪਚ੍ਚਯੋਤਿ વੁਤ੍ਤਂ।
Ayaṃ pana atthipaccayo nāma duvidho – aññamaññato, na aññamaññato. Tattha aññamaññaṃ tividhaṃ – arūpaṃ arūpena, rūpaṃ rūpena, rūpārūpaṃ rūpārūpena. ‘‘Cattāro khandhā arūpino’’ti ettha hi sabbacittuppattivasena arūpaṃ arūpena vuttaṃ. ‘‘Cattāro mahābhūtā’’ti ettha sabbasantativasena rūpaṃ rūpena. ‘‘Okkantikkhaṇe nāmarūpa’’nti ettha paṭisandhikhandhānañceva vatthuno ca vasena rūpārūpaṃ rūpārūpena vuttaṃ. Na aññamaññampi tividhaṃ – ‘‘arūpaṃ rūpassa, rūpaṃ rūpassa, rūpaṃ arūpassa cittacetasikā dhammā’’ti ettha hi pañcavokāravasena arūpaṃ rūpassa vuttaṃ. ‘‘Mahābhūtā upādārūpāna’’nti ettha sabbasantativasena rūpaṃ rūpassa. ‘‘Cakkhāyatanaṃ cakkhuviññāṇadhātuyā’’tiādīsu vatthārammaṇavasena rūpaṃ arūpassa atthipaccayoti vuttaṃ.
ਅਪਿਚੇਸ ਅਤ੍ਥਿਪਚ੍ਚਯੋ ਨਾਮ ਸਙ੍ਖੇਪਤੋ ਖਣਤ੍ਤਯਪ੍ਪਤ੍ਤਂ ਨਾਮਞ੍ਚੇવ ਰੂਪਞ੍ਚ, વਤ੍ਤਮਾਨਾ ਪਞ੍ਚਕ੍ਖਨ੍ਧਾਤਿਪਿ વਤ੍ਤੁਂ વਟ੍ਟਤਿ। ਸੋ ਜਾਤਿਭੇਦਤੋ ਕੁਸਲਾਕੁਸਲવਿਪਾਕਕਿਰਿਯਰੂਪવਸੇਨ ਪਞ੍ਚਧਾ ਭਿਜ੍ਜਤਿ । ਤਤ੍ਥ ਕੁਸਲੋ ਸਹਜਾਤਪਚ੍ਛਾਜਾਤવਸੇਨ ਦੁવਿਧੋ ਹੋਤਿ, ਤਥਾ ਅਕੁਸਲੋ વਿਪਾਕਕਿਰਿਯਸਙ੍ਖਾਤੋ ਚ। ਤੇਸੁ ਕੁਸਲੋ ਕਾਮਾવਚਰਾਦਿਭੇਦੇਨ ਚਤੁਧਾ ਭਿਜ੍ਜਤਿ, ਅਕੁਸਲੋ ਕਾਮਾવਚਰੋવ વਿਪਾਕੋ ਚਤੁਭੂਮਕੋ, ਕਿਰਿਯਾਸਙ੍ਖਾਤੋ ਤਿਭੂਮਕੋ। ਰੂਪਸਙ੍ਖਾਤੋ ਅਤ੍ਥਿਪਚ੍ਚਯੋ ਕਾਮਾવਚਰੋવ। ਸੋ ਪਨ ਸਹਜਾਤਪੁਰੇਜਾਤવਸੇਨ ਦੁવਿਧੋ। ਤਤ੍ਥ ਪਞ੍ਚ વਤ੍ਥੂਨਿ ਆਰਮ੍ਮਣਾਨਿ ਚ ਪੁਰੇਜਾਤਾਨੇવ, ਹਦਯવਤ੍ਥੁ ਸਹਜਾਤਂ વਾ ਹੋਤਿ ਪੁਰੇਜਾਤਂ વਾ। ਪਞ੍ਹਾવਾਰੇ ਪਨ ਆਗਤੋ ਆਹਾਰੋ ਇਨ੍ਦ੍ਰਿਯਞ੍ਚ ਸਹਜਾਤਾਦਿਭੇਦਂ ਨ ਲਭਤੀਤਿ ਏવਮੇਤ੍ਥ ਨਾਨਪ੍ਪਕਾਰਭੇਦਤੋ વਿਞ੍ਞਾਤਬ੍ਬੋ વਿਨਿਚ੍ਛਯੋ।
Apicesa atthipaccayo nāma saṅkhepato khaṇattayappattaṃ nāmañceva rūpañca, vattamānā pañcakkhandhātipi vattuṃ vaṭṭati. So jātibhedato kusalākusalavipākakiriyarūpavasena pañcadhā bhijjati . Tattha kusalo sahajātapacchājātavasena duvidho hoti, tathā akusalo vipākakiriyasaṅkhāto ca. Tesu kusalo kāmāvacarādibhedena catudhā bhijjati, akusalo kāmāvacarova vipāko catubhūmako, kiriyāsaṅkhāto tibhūmako. Rūpasaṅkhāto atthipaccayo kāmāvacarova. So pana sahajātapurejātavasena duvidho. Tattha pañca vatthūni ārammaṇāni ca purejātāneva, hadayavatthu sahajātaṃ vā hoti purejātaṃ vā. Pañhāvāre pana āgato āhāro indriyañca sahajātādibhedaṃ na labhatīti evamettha nānappakārabhedato viññātabbo vinicchayo.
ਏવਂ ਭਿਨ੍ਨੇ ਪਨੇਤ੍ਥ ਚਤੁਭੂਮਕਕੁਸਲੋਪਿ ਸਹਜਾਤੋ ਅਤ੍ਥਿਪਚ੍ਚਯੋ ਪਞ੍ਚવੋਕਾਰੇ ‘‘ਏਕੋ ਖਨ੍ਧੋ ਤਿਣ੍ਣਨ੍ਨਂ ਖਨ੍ਧਾਨ’’ਨ੍ਤਿਆਦਿਨਾ ਨਯੇਨ ਅਞ੍ਞਮਞ੍ਞਂ ਖਨ੍ਧਾਨਞ੍ਚੇવ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ ਠਪੇਤ੍વਾ ਪਨ ਰੂਪਾવਚਰਕੁਸਲਂ ਅવਸੇਸੋ ਆਰੁਪ੍ਪੇ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਞੇવ ਸਹਜਾਤਕੁਸਲੋ ਅਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ। ਚਤੁਭੂਮਕੋ ਪਨੇਸ ਪਞ੍ਚવੋਕਾਰੇ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤੋ ਕੁਸਲੋ ਅਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ। ਅਕੁਸਲੇਪਿ ਏਸੇવ ਨਯੋ। ਸੋਪਿ ਹਿ ਪਞ੍ਚવੋਕਾਰੇ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਚੇવ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ, ਚਤੁવੋਕਾਰੇ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਞੇવ ਸਹਜਾਤਾਕੁਸਲੋ ਅਤ੍ਥਿਪਚ੍ਚਯੇਨ ਪਚ੍ਚਯੋ। ਪਞ੍ਚવੋਕਾਰੇ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਾਕੁਸਲੋ ਅਤ੍ਥਿਪਚ੍ਚਯੇਨ ਪਚ੍ਚਯੋ।
Evaṃ bhinne panettha catubhūmakakusalopi sahajāto atthipaccayo pañcavokāre ‘‘eko khandho tiṇṇannaṃ khandhāna’’ntiādinā nayena aññamaññaṃ khandhānañceva cittasamuṭṭhānarūpassa ca ṭhapetvā pana rūpāvacarakusalaṃ avaseso āruppe sampayuttakkhandhānaññeva sahajātakusalo atthipaccayena paccayo hoti. Catubhūmako panesa pañcavokāre catusamuṭṭhānikatisamuṭṭhānikakāyassa pacchājāto kusalo atthipaccayena paccayo hoti. Akusalepi eseva nayo. Sopi hi pañcavokāre sampayuttakkhandhānañceva cittasamuṭṭhānarūpassa ca, catuvokāre sampayuttakkhandhānaññeva sahajātākusalo atthipaccayena paccayo. Pañcavokāre catusamuṭṭhānikatisamuṭṭhānikakāyassa pacchājātākusalo atthipaccayena paccayo.
વਿਪਾਕਤੋ ਪਨ ਕਾਮਾવਚਰਰੂਪਾવਚਰੋ ਅਤ੍ਥਿਪਚ੍ਚਯੋ ਨਿਯਮੇਨੇવ ਪਟਿਸਨ੍ਧਿਕ੍ਖਣੇ ਖਨ੍ਧਾਨਞ੍ਚੇવ ਕਟਤ੍ਤਾਰੂਪਸ੍ਸ ਚ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ। ਪવਤ੍ਤੇ ਪਨ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਚੇવ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ, ਠਿਤਿਪ੍ਪਤ੍ਤਸ੍ਸ ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਤ੍ਥਿਪਚ੍ਚਯੇਨ ਪਚ੍ਚਯੋ। ਅਰੂਪਾવਚਰવਿਪਾਕੋ ਪਨ ਆਰੁਪ੍ਪੇ ਉਪ੍ਪਨ੍ਨਲੋਕੁਤ੍ਤਰવਿਪਾਕੋ ਚ ਅਤ੍ਤਨਾ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਞੇવ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ। ਪਞ੍ਚવੋਕਾਰੇ ਲੋਕੁਤ੍ਤਰવਿਪਾਕੋ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਚੇવ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ, ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਤ੍ਥਿਪਚ੍ਚਯੇਨ ਪਚ੍ਚਯੋ। ਕਿਰਿਯਤੋ ਰੂਪਾવਚਰੋ ਅਤ੍ਥਿਪਚ੍ਚਯੋ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਚੇવ ਚਿਤ੍ਤਸਮੁਟ੍ਠਾਨਰੂਪਸ੍ਸ ਚ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ, ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਤ੍ਥਿਪਚ੍ਚਯੇਨ ਪਚ੍ਚਯੋ। ਕਾਮਾવਚਰਾਰੂਪਾવਚਰੋ ਪਨ ਆਰੁਪ੍ਪੇ ਸਮ੍ਪਯੁਤ੍ਤਕ੍ਖਨ੍ਧਾਨਞ੍ਞੇવ, ਪਞ੍ਚવੋਕਾਰੇ ਚਿਤ੍ਤਸਮੁਟ੍ਠਾਨਰੂਪਸ੍ਸਾਪਿ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ, ਚਤੁਸਮੁਟ੍ਠਾਨਿਕਤਿਸਮੁਟ੍ਠਾਨਿਕਕਾਯਸ੍ਸ ਪਚ੍ਛਾਜਾਤਤ੍ਥਿ ਪਚ੍ਚਯੇਨ ਪਚ੍ਚਯੋ।
Vipākato pana kāmāvacararūpāvacaro atthipaccayo niyameneva paṭisandhikkhaṇe khandhānañceva kaṭattārūpassa ca sahajātatthipaccayena paccayo. Pavatte pana sampayuttakkhandhānañceva cittasamuṭṭhānarūpassa ca sahajātatthipaccayena paccayo, ṭhitippattassa catusamuṭṭhānikatisamuṭṭhānikakāyassa pacchājātatthipaccayena paccayo. Arūpāvacaravipāko pana āruppe uppannalokuttaravipāko ca attanā sampayuttakkhandhānaññeva sahajātatthipaccayena paccayo. Pañcavokāre lokuttaravipāko sampayuttakkhandhānañceva cittasamuṭṭhānarūpassa ca sahajātatthipaccayena paccayo, catusamuṭṭhānikatisamuṭṭhānikakāyassa pacchājātatthipaccayena paccayo. Kiriyato rūpāvacaro atthipaccayo sampayuttakkhandhānañceva cittasamuṭṭhānarūpassa ca sahajātatthipaccayena paccayo, catusamuṭṭhānikatisamuṭṭhānikakāyassa pacchājātatthipaccayena paccayo. Kāmāvacarārūpāvacaro pana āruppe sampayuttakkhandhānaññeva, pañcavokāre cittasamuṭṭhānarūpassāpi sahajātatthipaccayena paccayo, catusamuṭṭhānikatisamuṭṭhānikakāyassa pacchājātatthi paccayena paccayo.
ਰੂਪਸਙ੍ਖਾਤੋ ਪਨ ਅਤ੍ਥਿਪਚ੍ਚਯੋ ਸਹਜਾਤੋ, ਪੁਰੇਜਾਤੋ, ਆਹਾਰੋ, ਇਨ੍ਦ੍ਰਿਯਨ੍ਤਿ ਚਤੁਬ੍ਬਿਧੋ। ਤਤ੍ਥ ਸਹਜਾਤਰੂਪਤ੍ਥਿਪਚ੍ਚਯੋ ਚਤੁਸਮੁਟ੍ਠਾਨવਸੇਨ ਚਤੁਧਾ ਠਿਤੋ। ਤਤ੍ਥ ਕਮ੍ਮਸਮੁਟ੍ਠਾਨੋ ਏਕਂ ਮਹਾਭੂਤਂ ਤਿਣ੍ਣਨ੍ਨਂ ਮਹਾਭੂਤਾਨਂ, ਤੀਣਿ ਏਕਸ੍ਸ, ਦ੍વੇ ਦ੍વਿਨ੍ਨਂ, ਮਹਾਭੂਤਾ ਉਪਾਦਾਰੂਪਾਨਨ੍ਤਿ ਏવਂ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ। ਪਟਿਸਨ੍ਧਿਕ੍ਖਣੇ વਤ੍ਥੁਰੂਪਂ ਕਾਮਾવਚਰਰੂਪਾવਚਰવਿਪਾਕਕ੍ਖਨ੍ਧਾਨਂ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ। ਤੇਸਮ੍ਪਿ ਤਿਸਮੁਟ੍ਠਾਨਿਕਰੂਪਂ ਏਕਂ ਮਹਾਭੂਤਂ ਤਿਣ੍ਣਨ੍ਨਂ ਮਹਾਭੂਤਾਨਂ, ਤੀਣਿ ਏਕਸ੍ਸ, ਦ੍વੇ ਦ੍વਿਨ੍ਨਂ, ਮਹਾਭੂਤਾ ਉਪਾਦਾਰੂਪਾਨਨ੍ਤਿ ਏવਂ ਸਹਜਾਤਤ੍ਥਿਪਚ੍ਚਯੇਨ ਪਚ੍ਚਯੋ ਹੋਤਿ। ਪੁਰੇਜਾਤਤ੍ਥਿਪਚ੍ਚਯੋ ਪਨ વਤ੍ਥੁਪੁਰੇਜਾਤਆਰਮ੍ਮਣਪੁਰੇਜਾਤવਸੇਨ ਦੁવਿਧੋ ਹੋਤਿ। ਸੋ ਦੁવਿਧੋਪਿ ਹੇਟ੍ਠਾ ਪੁਰੇਜਾਤਪਚ੍ਚਯੇ વੁਤ੍ਤਨਯੇਨੇવ ਯੋਜੇਤ੍વਾ ਗਹੇਤਬ੍ਬੋ। ਆਹਾਰਤ੍ਥਿਪਚ੍ਚਯੋਪਿ ਹੇਟ੍ਠਾ ਕਬਲ਼ੀਕਾਰਾਹਾਰਪਚ੍ਚਯੇ ਯੋਜਿਤਨਯੇਨੇવ ਯੋਜੇਤਬ੍ਬੋ। ਇਧ ਪਨੇਸ ਅਤ੍ਤਨੋ ਅਨਿਰੁਦ੍ਧਕ੍ਖਣੇ ਪਚ੍ਚਯਭਾવੇਨ ਅਤ੍ਥਿਪਚ੍ਚਯੋਤਿ વੁਤ੍ਤੋ। ਰੂਪਜੀવਿਤਿਨ੍ਦ੍ਰਿਯਮ੍ਪਿ ਹੇਟ੍ਠਾ ਇਨ੍ਦ੍ਰਿਯਪਚ੍ਚਯੇ ਰੂਪਜੀવਿਤਿਨ੍ਦ੍ਰਿਯਯੋਜਨਾਯਂ વੁਤ੍ਤਨਯੇਨੇવ ਯੋਜੇਤਬ੍ਬਂ। ਇਧ ਪਨੇਤਮ੍ਪਿ ਅਤ੍ਤਨੋ ਅਨਿਰੁਦ੍ਧਕ੍ਖਣੇਯੇવ ਪਚ੍ਚਯਭਾવੇਨ ਅਤ੍ਥਿਪਚ੍ਚਯੋਤਿ વੁਤ੍ਤਨ੍ਤਿ ਏવਮੇਤ੍ਥ ਪਚ੍ਚਯੁਪ੍ਪਨ੍ਨਤੋਪਿ વਿਞ੍ਞਾਤਬ੍ਬੋ વਿਨਿਚ੍ਛਯੋਤਿ।
Rūpasaṅkhāto pana atthipaccayo sahajāto, purejāto, āhāro, indriyanti catubbidho. Tattha sahajātarūpatthipaccayo catusamuṭṭhānavasena catudhā ṭhito. Tattha kammasamuṭṭhāno ekaṃ mahābhūtaṃ tiṇṇannaṃ mahābhūtānaṃ, tīṇi ekassa, dve dvinnaṃ, mahābhūtā upādārūpānanti evaṃ sahajātatthipaccayena paccayo hoti. Paṭisandhikkhaṇe vatthurūpaṃ kāmāvacararūpāvacaravipākakkhandhānaṃ sahajātatthipaccayena paccayo hoti. Tesampi tisamuṭṭhānikarūpaṃ ekaṃ mahābhūtaṃ tiṇṇannaṃ mahābhūtānaṃ, tīṇi ekassa, dve dvinnaṃ, mahābhūtā upādārūpānanti evaṃ sahajātatthipaccayena paccayo hoti. Purejātatthipaccayo pana vatthupurejātaārammaṇapurejātavasena duvidho hoti. So duvidhopi heṭṭhā purejātapaccaye vuttanayeneva yojetvā gahetabbo. Āhāratthipaccayopi heṭṭhā kabaḷīkārāhārapaccaye yojitanayeneva yojetabbo. Idha panesa attano aniruddhakkhaṇe paccayabhāvena atthipaccayoti vutto. Rūpajīvitindriyampi heṭṭhā indriyapaccaye rūpajīvitindriyayojanāyaṃ vuttanayeneva yojetabbaṃ. Idha panetampi attano aniruddhakkhaṇeyeva paccayabhāvena atthipaccayoti vuttanti evamettha paccayuppannatopi viññātabbo vinicchayoti.
ਅਤ੍ਥਿਪਚ੍ਚਯਨਿਦ੍ਦੇਸવਣ੍ਣਨਾ।
Atthipaccayaniddesavaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਪਟ੍ਠਾਨਪਾਲ਼ਿ • Paṭṭhānapāḷi / (੨) ਪਚ੍ਚਯਨਿਦ੍ਦੇਸੋ • (2) Paccayaniddeso
