| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. அத்தி²ராக³ஸுத்தவண்ணனா
4. Atthirāgasuttavaṇṇanā
64. சதுத்தே² ராகோ³திஆதீ³னி லோப⁴ஸ்ஸேவ நாமானி. ஸோ ஹி ரஞ்ஜனவஸேன ராகோ³, நந்த³னவஸேன நந்தீ³, தண்ஹாயனவஸேன தண்ஹாதி வுச்சதி. பதிட்டி²தங் தத்த² விஞ்ஞாணங் விரூள்ஹந்தி கம்மங் ஜவாபெத்வா படிஸந்தி⁴ஆகட்³ட⁴னஸமத்த²தாய பதிட்டி²தஞ்சேவ விரூள்ஹஞ்ச. யத்தா²தி தேபூ⁴மகவட்டே பு⁴ம்மங், ஸப்³ப³த்த² வா புரிமபுரிமபதே³ ஏதங் பு⁴ம்மங். அத்தி² தத்த² ஸங்கா²ரானங் வுத்³தீ⁴தி இத³ங் இமஸ்மிங் விபாகவட்டே டி²தஸ்ஸ ஆயதிவட்டஹேதுகே ஸங்கா²ரே ஸந்தா⁴ய வுத்தங். யத்த² அத்தி² ஆயதிங் புனப்³ப⁴வாபி⁴னிப்³ப³த்தீதி யஸ்மிங் டா²னே ஆயதிங் புனப்³ப⁴வாபி⁴னிப்³ப³த்தி அத்தி².
64. Catutthe rāgotiādīni lobhasseva nāmāni. So hi rañjanavasena rāgo, nandanavasena nandī, taṇhāyanavasena taṇhāti vuccati. Patiṭṭhitaṃ tattha viññāṇaṃ virūḷhanti kammaṃ javāpetvā paṭisandhiākaḍḍhanasamatthatāya patiṭṭhitañceva virūḷhañca. Yatthāti tebhūmakavaṭṭe bhummaṃ, sabbattha vā purimapurimapade etaṃ bhummaṃ. Atthi tattha saṅkhārānaṃ vuddhīti idaṃ imasmiṃ vipākavaṭṭe ṭhitassa āyativaṭṭahetuke saṅkhāre sandhāya vuttaṃ. Yattha atthi āyatiṃ punabbhavābhinibbattīti yasmiṃ ṭhāne āyatiṃ punabbhavābhinibbatti atthi.
ஏவமேவ கோ²தி எத்த² இத³ங் ஓபம்மஸங்ஸந்த³னங் – ரஜகசித்தகாரா விய ஹி ஸஹகம்மஸம்பா⁴ரங் கம்மங், ப²லகபி⁴த்திது³ஸ்ஸபடா விய தேபூ⁴மகவட்டங். யதா² ரஜகசித்தகாரா பரிஸுத்³தே⁴ஸு ப²லகாதீ³ஸு ரூபங் ஸமுட்டா²பெந்தி, ஏவமேவ ஸஸம்பா⁴ரககம்மங் ப⁴வேஸு ரூபங் ஸமுட்டா²பேதி. தத்த² யதா² அகுஸலேன சித்தகாரேன ஸமுட்டா²பிதங் ரூபங் விரூபங் ஹோதி து³ஸ்ஸண்டி²தங் அமனாபங், ஏவமேவ ஏகச்சோ கம்மங் கரொந்தோ ஞாணவிப்பயுத்தேன சித்தேன கரோதி, தங் கம்மங் ரூபங் ஸமுட்டா²பெந்தங் சக்கா²தீ³னங் ஸம்பத்திங் அத³த்வா து³ப்³ப³ண்ணங் து³ஸ்ஸண்டி²தங் மாதாபிதூனம்பி அமனாபங் ரூபங் ஸமுட்டா²பேதி. யதா² பன குஸலேன சித்தகாரேன ஸமுட்டா²பிதங் ரூபங் ஸுரூபங் ஹோதி ஸுஸண்டி²தங் மனாபங், ஏவமேவ ஏகச்சோ கம்மங் கரொந்தோ ஞாணஸம்பயுத்தேன சித்தேன கரோதி, தங் கம்மங் ரூபங் ஸமுட்டா²பெந்தங் சக்கா²தீ³னங் ஸம்பத்திங் த³த்வா ஸுவண்ணங் ஸுஸண்டி²தங் அலங்கதபடியத்தங் விய ரூபங் ஸமுட்டா²பேதி.
Evameva khoti ettha idaṃ opammasaṃsandanaṃ – rajakacittakārā viya hi sahakammasambhāraṃ kammaṃ, phalakabhittidussapaṭā viya tebhūmakavaṭṭaṃ. Yathā rajakacittakārā parisuddhesu phalakādīsu rūpaṃ samuṭṭhāpenti, evameva sasambhārakakammaṃ bhavesu rūpaṃ samuṭṭhāpeti. Tattha yathā akusalena cittakārena samuṭṭhāpitaṃ rūpaṃ virūpaṃ hoti dussaṇṭhitaṃ amanāpaṃ, evameva ekacco kammaṃ karonto ñāṇavippayuttena cittena karoti, taṃ kammaṃ rūpaṃ samuṭṭhāpentaṃ cakkhādīnaṃ sampattiṃ adatvā dubbaṇṇaṃ dussaṇṭhitaṃ mātāpitūnampi amanāpaṃ rūpaṃ samuṭṭhāpeti. Yathā pana kusalena cittakārena samuṭṭhāpitaṃ rūpaṃ surūpaṃ hoti susaṇṭhitaṃ manāpaṃ, evameva ekacco kammaṃ karonto ñāṇasampayuttena cittena karoti, taṃ kammaṃ rūpaṃ samuṭṭhāpentaṃ cakkhādīnaṃ sampattiṃ datvā suvaṇṇaṃ susaṇṭhitaṃ alaṅkatapaṭiyattaṃ viya rūpaṃ samuṭṭhāpeti.
எத்த² ச ஆஹாரங் விஞ்ஞாணேன ஸத்³தி⁴ங் ஸங்கி²பித்வா ஆஹாரனாமரூபானங் அந்தரே ஏகோ ஸந்தி⁴, விபாகவிதி⁴ங் நாமரூபேன ஸங்கி²பித்வா நாமரூபஸங்கா²ரானங் அந்தரே ஏகோ ஸந்தி⁴, ஸங்கா²ரானஞ்ச ஆயதிப⁴வஸ்ஸ ச அந்தரே ஏகோ ஸந்தீ⁴தி வேதி³தப்³போ³.
Ettha ca āhāraṃ viññāṇena saddhiṃ saṅkhipitvā āhāranāmarūpānaṃ antare eko sandhi, vipākavidhiṃ nāmarūpena saṅkhipitvā nāmarūpasaṅkhārānaṃ antare eko sandhi, saṅkhārānañca āyatibhavassa ca antare eko sandhīti veditabbo.
கூடாகா³ரந்தி ஏககண்ணிகங் கா³ஹாபெத்வா கதங் அகா³ரங். கூடாகா³ரஸாலாதி த்³வே கண்ணிகே க³ஹெத்வா கதஸாலா. ஏவமேவ கோ²தி எத்த² கீ²ணாஸவஸ்ஸ கம்மங் ஸூரியரஸ்மிஸமங் வேதி³தப்³ப³ங். ஸூரியரஸ்மி பன அத்தி², ஸா கேவலங் பதிட்டா²ய அபா⁴வேன அப்பதிட்டா² நாம ஜாதா, கீ²ணாஸவஸ்ஸ கம்மங் நத்தி²தாய ஏவ அப்பதிட்ட²ங். தஸ்ஸ ஹி காயாத³யோ அத்தி², தேஹி பன கதகம்மங் குஸலாகுஸலங் நாம ந ஹோதி, கிரியமத்தே ட²த்வா அவிபாகங் ஹோதி. ஏவமஸ்ஸ கம்மங் நத்தி²தாய ஏவ அப்பதிட்ட²ங் நாம ஜாதந்தி. சதுத்த²ங்.
Kūṭāgāranti ekakaṇṇikaṃ gāhāpetvā kataṃ agāraṃ. Kūṭāgārasālāti dve kaṇṇike gahetvā katasālā. Evameva khoti ettha khīṇāsavassa kammaṃ sūriyarasmisamaṃ veditabbaṃ. Sūriyarasmi pana atthi, sā kevalaṃ patiṭṭhāya abhāvena appatiṭṭhā nāma jātā, khīṇāsavassa kammaṃ natthitāya eva appatiṭṭhaṃ. Tassa hi kāyādayo atthi, tehi pana katakammaṃ kusalākusalaṃ nāma na hoti, kiriyamatte ṭhatvā avipākaṃ hoti. Evamassa kammaṃ natthitāya eva appatiṭṭhaṃ nāma jātanti. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. அத்தி²ராக³ஸுத்தங் • 4. Atthirāgasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. அத்தி²ராக³ஸுத்தவண்ணனா • 4. Atthirāgasuttavaṇṇanā
