| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. லக்க²ணஸங்யுத்தங்
8. Lakkhaṇasaṃyuttaṃ
1. பட²மவக்³கோ³
1. Paṭhamavaggo
1. அட்டி²ஸுத்தவண்ணனா
1. Aṭṭhisuttavaṇṇanā
202. லக்க²ணஸங்யுத்தே ய்வாயங் ஆயஸ்மா ச லக்க²ணோதி லக்க²ணத்தே²ரோ வுத்தோ, ஏஸ ஜடிலஸஹஸ்ஸப்³ப⁴ந்தரே ஏஹிபி⁴க்கூ²பஸம்பதா³ய உபஸம்பன்னோ ஆதி³த்தபரியாயாவஸானே அரஹத்தங் பத்தோ ஏகோ மஹாஸாவகோதி வேதி³தப்³போ³. யஸ்மா பனேஸ லக்க²ணஸம்பன்னேன ஸப்³பா³காரபரிபூரேன ப்³ரஹ்மஸமேன அத்தபா⁴வேன ஸமன்னாக³தோ, தஸ்மா ‘‘லக்க²ணோ’’தி ஸங்க²ங் க³தோ. மஹாமொக்³க³ல்லானோ பன பப்³ப³ஜிததி³வஸதோ ஸத்தமே தி³வஸே அரஹத்தங் பத்தோ து³தியோ அக்³க³ஸாவகோ.
202. Lakkhaṇasaṃyutte yvāyaṃ āyasmā ca lakkhaṇoti lakkhaṇatthero vutto, esa jaṭilasahassabbhantare ehibhikkhūpasampadāya upasampanno ādittapariyāyāvasāne arahattaṃ patto eko mahāsāvakoti veditabbo. Yasmā panesa lakkhaṇasampannena sabbākāraparipūrena brahmasamena attabhāvena samannāgato, tasmā ‘‘lakkhaṇo’’ti saṅkhaṃ gato. Mahāmoggallāno pana pabbajitadivasato sattame divase arahattaṃ patto dutiyo aggasāvako.
ஸிதங் பாத்வாகாஸீதி மந்த³ஹஸிதங் பாதுஅகாஸி, பகாஸயி த³ஸ்ஸேஸீதி வுத்தங் ஹோதி. கிங் பன தி³ஸ்வா தே²ரோ ஸிதங் பாத்வாகாஸீதி? உபரி பாளியங் ஆக³தங் அட்டி²கஸங்க²லிகங் ஏகங் பேதலோகே நிப்³ப³த்தங் ஸத்தங் தி³ஸ்வா. தஞ்ச கோ² தி³ப்³பே³ன சக்கு²னா, ந பஸாத³சக்கு²னா. பஸாத³சக்கு²ஸ்ஸ ஹி ஏதே அத்தபா⁴வா ந ஆபாத²ங் ஆக³ச்ச²ந்தி. ஏவரூபங் பன அத்தபா⁴வங் தி³ஸ்வா காருஞ்ஞே கத்தப்³பே³ கஸ்மா ஸிதங் பாத்வாகாஸீதி? அத்தனோ ச பு³த்³த⁴ஞாணஸ்ஸ ச ஸம்பத்திங் ஸமனுஸ்ஸரணதோ. தஞ்ஹி தி³ஸ்வா தே²ரோ ‘‘அதி³ட்ட²ஸச்சேன நாம புக்³க³லேன படிலபி⁴தப்³பா³ ஏவரூபா அத்தபா⁴வா முத்தோ அஹங், லாபா⁴ வத மே, ஸுலத்³த⁴ங் வத மே’’தி அத்தனோ ச ஸம்பத்திங் அனுஸ்ஸரித்வா – ‘‘அஹோ பு³த்³த⁴ஸ்ஸ ப⁴க³வதோ ஞாணஸம்பத்தி, ‘யோ கம்மவிபாகோ, பி⁴க்க²வே, அசிந்தெய்யோ ந சிந்தேதப்³போ³’தி தே³ஸேஸி, பச்சக்க²ங் வத கத்வா பு³த்³தா⁴ தே³ஸெந்தி, ஸுப்படிவித்³தா⁴ பு³த்³தா⁴னங் த⁴ம்மதா⁴தூ’’தி ஏவங் பு³த்³த⁴ஞாணஸம்பத்திஞ்ச அனுஸ்ஸரித்வா ஸிதங் பாத்வாகாஸீதி.
Sitaṃ pātvākāsīti mandahasitaṃ pātuakāsi, pakāsayi dassesīti vuttaṃ hoti. Kiṃ pana disvā thero sitaṃ pātvākāsīti? Upari pāḷiyaṃ āgataṃ aṭṭhikasaṅkhalikaṃ ekaṃ petaloke nibbattaṃ sattaṃ disvā. Tañca kho dibbena cakkhunā, na pasādacakkhunā. Pasādacakkhussa hi ete attabhāvā na āpāthaṃ āgacchanti. Evarūpaṃ pana attabhāvaṃ disvā kāruññe kattabbe kasmā sitaṃ pātvākāsīti? Attano ca buddhañāṇassa ca sampattiṃ samanussaraṇato. Tañhi disvā thero ‘‘adiṭṭhasaccena nāma puggalena paṭilabhitabbā evarūpā attabhāvā mutto ahaṃ, lābhā vata me, suladdhaṃ vata me’’ti attano ca sampattiṃ anussaritvā – ‘‘aho buddhassa bhagavato ñāṇasampatti, ‘yo kammavipāko, bhikkhave, acinteyyo na cintetabbo’ti desesi, paccakkhaṃ vata katvā buddhā desenti, suppaṭividdhā buddhānaṃ dhammadhātū’’ti evaṃ buddhañāṇasampattiñca anussaritvā sitaṃ pātvākāsīti.
அத² லக்க²ணத்தே²ரோ கஸ்மா ந அத்³த³ஸ, கிமஸ்ஸ தி³ப்³ப³சக்கு² நத்தீ²தி? நோ நத்தி², மஹாமொக்³க³ல்லானோ பன ஆவஜ்ஜெந்தோ அத்³த³ஸ, இதரோ பன அனாவஜ்ஜனேன ந அத்³த³ஸ. யஸ்மா பன கீ²ணாஸவா நாம ந அகாரணா ஸிதங் கரொந்தி, தஸ்மா தங் லக்க²ணத்தே²ரோ புச்சி² கோ நு கோ², ஆவுஸோ மொக்³க³ல்லான, ஹேது, கோ பச்சயோ ஸிதஸ்ஸ பாதுகம்மாயாதி? தே²ரோ பன யஸ்மா யேஹி அயங் உபபத்தி ஸாமங் அதி³ட்டா², தே து³ஸ்ஸத்³தா⁴பயா ஹொந்தி, தஸ்மா ப⁴க³வந்தங் ஸக்கி²ங் கத்வா ப்³யாகாதுகாமதாய அகாலோ கோ², ஆவுஸோதிஆதி³மாஹ. ததோ ப⁴க³வதோ ஸந்திகே புட்டோ² இதா⁴ஹங், ஆவுஸோதிஆதி³னா நயேன ப்³யாகாஸி.
Atha lakkhaṇatthero kasmā na addasa, kimassa dibbacakkhu natthīti? No natthi, mahāmoggallāno pana āvajjento addasa, itaro pana anāvajjanena na addasa. Yasmā pana khīṇāsavā nāma na akāraṇā sitaṃ karonti, tasmā taṃ lakkhaṇatthero pucchi ko nu kho, āvuso moggallāna, hetu, ko paccayo sitassa pātukammāyāti? Thero pana yasmā yehi ayaṃ upapatti sāmaṃ adiṭṭhā, te dussaddhāpayā honti, tasmā bhagavantaṃ sakkhiṃ katvā byākātukāmatāya akālo kho, āvusotiādimāha. Tato bhagavato santike puṭṭho idhāhaṃ, āvusotiādinā nayena byākāsi.
தத்த² அட்டி²கஸங்க²லிகந்தி ஸேதங் நிம்மங்ஸலோஹிதங் அட்டி²ஸங்கா⁴தங். கி³ஜ்ஜா²பி காகாபி குலலாபீதி ஏதேபி யக்க²கி³ஜ்ஜா² சேவ யக்க²காகா ச யக்க²குலலா ச பச்சேதப்³பா³. பாகதிகானங் பன கி³ஜ்ஜா²தீ³னங் ஆபாத²ம்பி ஏதங் ரூபங் நாக³ச்ச²தி. அனுபதித்வா அனுபதித்வாதி அனுப³ந்தி⁴த்வா அனுப³ந்தி⁴த்வா. விதுதெ³ந்தீதி அஸிதா⁴ரூபமேஹி திகி²ணேஹி லோஹதுண்ட³கேஹி விஜ்ஜி²த்வா விஜ்ஜி²த்வா இதோ சிதோ ச சரந்தி க³ச்ச²ந்தி. ஸா ஸுத³ங் அட்டஸ்ஸரங் கரோதீதி எத்த² ஸுத³ந்தி நிபாதோ, ஸா அட்டி²கஸங்க²லிகா அட்டஸ்ஸரங் ஆதுரஸ்ஸரங் கரோதீதி அத்தோ². அகுஸலவிபாகானுப⁴வனத்த²ங் கிர யோஜனப்பமாணாபி தாதி³ஸா அத்தபா⁴வா நிப்³ப³த்தந்தி, பஸாது³ஸ்ஸதா³ ச ஹொந்தி பக்கக³ண்ட³ஸதி³ஸா. தஸ்மா ஸா அட்டி²கஸங்க²லிகா ப³லவவேத³னாதுரா தாதி³ஸங் ஸத்³த³மகாஸீதி.
Tattha aṭṭhikasaṅkhalikanti setaṃ nimmaṃsalohitaṃ aṭṭhisaṅghātaṃ. Gijjhāpi kākāpi kulalāpīti etepi yakkhagijjhā ceva yakkhakākā ca yakkhakulalā ca paccetabbā. Pākatikānaṃ pana gijjhādīnaṃ āpāthampi etaṃ rūpaṃ nāgacchati. Anupatitvā anupatitvāti anubandhitvā anubandhitvā. Vitudentīti asidhārūpamehi tikhiṇehi lohatuṇḍakehi vijjhitvā vijjhitvā ito cito ca caranti gacchanti. Sā sudaṃ aṭṭassaraṃ karotīti ettha sudanti nipāto, sā aṭṭhikasaṅkhalikā aṭṭassaraṃ āturassaraṃ karotīti attho. Akusalavipākānubhavanatthaṃ kira yojanappamāṇāpi tādisā attabhāvā nibbattanti, pasādussadā ca honti pakkagaṇḍasadisā. Tasmā sā aṭṭhikasaṅkhalikā balavavedanāturā tādisaṃ saddamakāsīti.
ஏவஞ்ச பன வத்வா புன ஆயஸ்மா மஹாமொக்³க³ல்லானோ ‘‘வட்டகா³மிஸத்தா நாம ஏவரூபா அத்தபா⁴வா ந முச்சந்தீ’’தி ஸத்தேஸு காருஞ்ஞங் படிச்ச உப்பன்னங் த⁴ம்மஸங்வேக³ங் த³ஸ்ஸெந்தோ தஸ்ஸ மய்ஹங், ஆவுஸோ, ஏதத³ஹோஸி அச்ச²ரியங் வத போ⁴திஆதி³மாஹ. ததோ ப⁴க³வா தே²ரஸ்ஸ ஆனுபா⁴வங் பகாஸெந்தோ சக்கு²பூ⁴தா வத, பி⁴க்க²வே , ஸாவகா விஹரந்தீதிஆதி³மாஹ. தத்த² சக்கு² பூ⁴தங் ஜாதங் உப்பன்னங் ஏதேஸந்தி சக்கு²பூ⁴தா, பூ⁴தசக்கு²கா உப்பன்னசக்கு²கா சக்கு²ங் உப்பாதெ³த்வா விஹரந்தீதி அத்தோ². து³தியபதே³பி ஏஸேவ நயோ. யத்ர ஹி நாமாதி எத்த² யத்ராதி காரணவசனங். தத்ராயங் அத்த²யோஜனா – யஸ்மா நாம ஸாவகோபி ஏவரூபங் ஞஸ்ஸதி வா த³க்க²தி வா ஸக்கி²ங் வா கரிஸ்ஸதி, தஸ்மா அவோசும்ஹ – ‘‘சக்கு²பூ⁴தா வத, பி⁴க்க²வே, ஸாவகா விஹரந்தி, ஞாணபூ⁴தா வத, பி⁴க்க²வே, ஸாவகா விஹரந்தீ’’தி. புப்³பே³வ மே ஸோ, பி⁴க்க²வே, ஸத்தோ தி³ட்டோ²தி போ³தி⁴மண்டே³ ஸப்³ப³ஞ்ஞுதஞ்ஞாணபடிவேதே⁴ன அப்பமாணேஸு சக்கவாளேஸு அப்பமாணே ஸத்தனிகாயே ப⁴வக³தியோனிடி²தினிவாஸே ச பச்சக்க²ங் கரொந்தேன மயா புப்³பே³வ ஸோ ஸத்தோ தி³ட்டோ²தி வத³தி.
Evañca pana vatvā puna āyasmā mahāmoggallāno ‘‘vaṭṭagāmisattā nāma evarūpā attabhāvā na muccantī’’ti sattesu kāruññaṃ paṭicca uppannaṃ dhammasaṃvegaṃ dassento tassa mayhaṃ, āvuso, etadahosi acchariyaṃ vata bhotiādimāha. Tato bhagavā therassa ānubhāvaṃ pakāsento cakkhubhūtā vata, bhikkhave, sāvakā viharantītiādimāha. Tattha cakkhu bhūtaṃ jātaṃ uppannaṃ etesanti cakkhubhūtā, bhūtacakkhukā uppannacakkhukā cakkhuṃ uppādetvā viharantīti attho. Dutiyapadepi eseva nayo. Yatra hi nāmāti ettha yatrāti kāraṇavacanaṃ. Tatrāyaṃ atthayojanā – yasmā nāma sāvakopi evarūpaṃ ñassati vā dakkhati vā sakkhiṃ vā karissati, tasmā avocumha – ‘‘cakkhubhūtā vata, bhikkhave, sāvakā viharanti, ñāṇabhūtā vata, bhikkhave, sāvakā viharantī’’ti. Pubbeva me so, bhikkhave, satto diṭṭhoti bodhimaṇḍe sabbaññutaññāṇapaṭivedhena appamāṇesu cakkavāḷesu appamāṇe sattanikāye bhavagatiyoniṭhitinivāse ca paccakkhaṃ karontena mayā pubbeva so satto diṭṭhoti vadati.
கோ³கா⁴தகோதி கா³வோ வதி⁴த்வா அட்டி²தோ மங்ஸங் மோசெத்வா விக்கிணித்வா ஜீவிகங் கப்பனகஸத்தோ. தஸ்ஸேவ கம்மஸ்ஸ விபாகாவஸேஸேனாதி தஸ்ஸ நானாசேதனாஹி ஆயூஹிதஸ்ஸ அபராபரியகம்மஸ்ஸ. தத்ர ஹி யாய சேதனாய நரகே படிஸந்தி⁴ ஜனிதா, தஸ்ஸா விபாகே பரிக்கீ²ணே அவஸேஸகம்மங் வா கம்மனிமித்தங் வா ஆரம்மணங் கத்வா புன பேதாதீ³ஸு படிஸந்தி⁴ நிப்³ப³த்ததி, தஸ்மா ஸா படிஸந்தி⁴ கம்மஸபா⁴க³தாய ஆரம்மணஸபா⁴க³தாய வா ‘‘தஸ்ஸேவ கம்மஸ்ஸ விபாகாவஸேஸோ’’தி வுச்சதி. அயஞ்ச ஸத்தோ ஏவங் உப்பன்னோ. தேனாஹ – ‘‘தஸ்ஸேவ கம்மஸ்ஸ விபாகாவஸேஸேனா’’தி. தஸ்ஸ கிர நரகா சவனகாலே நிம்மங்ஸகதானங் கு³ன்னங் அட்டி²ராஸியேவ நிமித்தங் அஹோஸி. ஸோ படிச்ச²ன்னம்பி தங் கம்மங் விஞ்ஞூனங் பாகடங் விய கரொந்தோ அட்டி²ஸங்க²லிகபேதோ ஜாதோ. பட²மங்.
Goghātakoti gāvo vadhitvā aṭṭhito maṃsaṃ mocetvā vikkiṇitvā jīvikaṃ kappanakasatto. Tasseva kammassa vipākāvasesenāti tassa nānācetanāhi āyūhitassa aparāpariyakammassa. Tatra hi yāya cetanāya narake paṭisandhi janitā, tassā vipāke parikkhīṇe avasesakammaṃ vā kammanimittaṃ vā ārammaṇaṃ katvā puna petādīsu paṭisandhi nibbattati, tasmā sā paṭisandhi kammasabhāgatāya ārammaṇasabhāgatāya vā ‘‘tasseva kammassa vipākāvaseso’’ti vuccati. Ayañca satto evaṃ uppanno. Tenāha – ‘‘tasseva kammassa vipākāvasesenā’’ti. Tassa kira narakā cavanakāle nimmaṃsakatānaṃ gunnaṃ aṭṭhirāsiyeva nimittaṃ ahosi. So paṭicchannampi taṃ kammaṃ viññūnaṃ pākaṭaṃ viya karonto aṭṭhisaṅkhalikapeto jāto. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. அட்டி²ஸுத்தங் • 1. Aṭṭhisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. அட்டி²ஸுத்தவண்ணனா • 1. Aṭṭhisuttavaṇṇanā
