| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
2. аад̇умад̇т̇зраг̇аат̇ааван̣н̣анаа
2. Ātumattheragāthāvaṇṇanā
яат̇аа гал̣ийро сусу вад̣дхид̇аг̇г̇од̇и ааяасмад̇о аад̇умад̇т̇зрасса г̇аат̇аа. гаа уббад̇д̇и? соби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяам̣ бун̃н̃ам̣ аажинанд̇о ид̇о зганавуд̇з габбз гулаг̇зхз ниб̣б̣ад̇д̇ид̇ваа вин̃н̃уд̇ам̣ бад̇д̇о вибассим̣ бхаг̇аванд̇ам̣ анд̇аравийт̇ияам̣ г̇ажчанд̇ам̣ д̣̇исваа басаннамаанасо г̇анд̇ход̣̇агзна г̇анд̇хажун̣н̣зна жа бууж̇ам̣ агааси. со д̇зна бун̃н̃агаммзна д̣̇звалогз ниб̣б̣ад̇д̇о абараабарам̣ суг̇ад̇ийсуязва сам̣саранд̇о гассабасса бхаг̇авад̇о саасанз баб̣б̣аж̇ид̇ваа саман̣ад̇хаммам̣ агааси, н̃аан̣асса бана абарибаггад̇д̇аа висзсам̣ ниб̣б̣ад̇д̇зд̇ум̣ наасагки. ат̇а имасмим̣ б̣уд̣̇д̇хуббаад̣̇з саавад̇т̇ияам̣ сздтибуд̇д̇о худ̇ваа ниб̣б̣ад̇д̇и, аад̇умод̇исса наамам̣ ахоси. д̇асса ваяаббад̇д̇асса маад̇аа ‘‘буд̇д̇асса мз бхарияам̣ аанзссаамаа’’д̇и н̃аад̇агзхи самманд̇зси. со д̇ам̣ убад̇хаарзд̇ваа хзд̇усамбад̇д̇ияаа жод̣̇ияамаано ‘‘гим̣ маяхам̣ гхарааваасзна, ид̣̇аанзва баб̣б̣аж̇иссаамий’’д̇и бхигкуунам̣ санд̇игам̣ г̇анд̇ваа баб̣б̣аж̇и. баб̣б̣аж̇ид̇амби нам̣ маад̇аа уббаб̣б̣ааж̇зд̇угаамаа наанаанаязхи балобхзд̇и. со д̇ассаа авасарам̣ ад̣̇ад̇ваа ад̇д̇ано аж̇жхаасаяам̣ багаасзнд̇о –
Yathākaḷīro susu vaḍḍhitaggoti āyasmato ātumattherassa gāthā. Kā uppatti? Sopi purimabuddhesu katādhikāro tattha tattha bhave vivaṭṭūpanissayaṃ puññaṃ ācinanto ito ekanavute kappe kulagehe nibbattitvā viññutaṃ patto vipassiṃ bhagavantaṃ antaravīthiyaṃ gacchantaṃ disvā pasannamānaso gandhodakena gandhacuṇṇena ca pūjaṃ akāsi. So tena puññakammena devaloke nibbatto aparāparaṃ sugatīsuyeva saṃsaranto kassapassa bhagavato sāsane pabbajitvā samaṇadhammaṃ akāsi, ñāṇassa pana aparipakkattā visesaṃ nibbattetuṃ nāsakkhi. Atha imasmiṃ buddhuppāde sāvatthiyaṃ seṭṭhiputto hutvā nibbatti, ātumotissa nāmaṃ ahosi. Tassa vayappattassa mātā ‘‘puttassa me bhariyaṃ ānessāmā’’ti ñātakehi sammantesi. So taṃ upadhāretvā hetusampattiyā codiyamāno ‘‘kiṃ mayhaṃ gharāvāsena, idāneva pabbajissāmī’’ti bhikkhūnaṃ santikaṃ gantvā pabbaji. Pabbajitampi naṃ mātā uppabbājetukāmā nānānayehi palobheti. So tassā avasaraṃ adatvā attano ajjhāsayaṃ pakāsento –
72.
72.
‘‘яат̇аа гал̣ийро сусу вад̣дхид̇аг̇г̇о, д̣̇уннигкамо ход̇и басаакаж̇аад̇о;
‘‘Yathā kaḷīro susu vaḍḍhitaggo, dunnikkhamo hoti pasākhajāto;
звам̣ ахам̣ бхарияааяаанийд̇ааяа, ануман̃н̃а мам̣ баб̣б̣аж̇ид̇омхи д̣̇ааний’’д̇и. –
Evaṃ ahaṃ bhariyāyānītāya, anumañña maṃ pabbajitomhi dānī’’ti. –
г̇аат̇ам̣ абхааси.
Gāthaṃ abhāsi.
д̇ад̇т̇а гал̣ийрод̇и ан̇гуро, ид̇ха бана вам̣сан̇гуро ад̇хиббзд̇о. сусууд̇и д̇арун̣о. вад̣дхид̇аг̇г̇од̇и бавад̣дхид̇асаако. сусувад̣дхид̇аг̇г̇од̇и ваа судту вад̣дхид̇асаако сан̃ж̇аад̇абад̇д̇асаако. д̣̇уннигкамод̇и взл̣уг̇умб̣ад̇о нигкаамзд̇ум̣ нийхарид̇ум̣ асаггун̣зяяо. басаакаж̇аад̇од̇и ж̇аад̇абасаако, саакаанамби баб̣б̣з баб̣б̣з уббаннаанусаако. звам̣ ахам̣ бхарияааяаанийд̇ааяаад̇и яат̇аа вам̣со вад̣дхид̇аг̇г̇о вам̣санд̇арзсу сам̣садта саакаабасаако взл̣уг̇умб̣ад̇о д̣̇уннийхаран̣ийяо ход̇и, звам̣ ахамби бхарияааяа маяхам̣ аанийд̇ааяа буд̇д̇ад̇хийд̇аад̣̇ивасзна вад̣дхид̇аг̇г̇о аасад̇д̇ивасзна гхарааваасад̇о д̣̇уннийхаран̣ийяо бхавзяяам̣. яат̇аа бана вам̣сагал̣ийро асан̃ж̇аад̇асаакаб̣анд̇хо взл̣уг̇умб̣ад̇о сунийхаран̣ийяова ход̇и, звам̣ ахамби асан̃ж̇аад̇абуд̇д̇ад̣̇аараад̣̇иб̣анд̇хо сунийхаран̣ийяо хоми, д̇асмаа анаанийд̇ааяа зва бхарияааяа ануман̃н̃а мам̣ ад̇д̇анаава мам̣ ануж̇аанаабзд̇ваа. баб̣б̣аж̇ид̇омхи д̣̇аанийд̇и, ‘‘ид̣̇аани бана баб̣б̣аж̇ид̇о амхи, саад̇ху судтуу’’д̇и ад̇д̇ано нзгкаммаабхирад̇им̣ багаасзси, ат̇а ваа ‘‘ануман̃н̃а мам̣ баб̣б̣аж̇ид̇омхи д̣̇ааний’’д̇и маад̇у гат̇зд̇и. аяан̃хзд̇т̇а ад̇т̇о – яад̣̇иби д̇ааяа буб̣б̣з наанумад̇ам̣, ид̣̇аани бана баб̣б̣аж̇ид̇о амхи, д̇асмаа ануман̃н̃а ануж̇аанаахи мам̣ саман̣абхаавзязва таад̇ум̣, наахам̣ д̇аяаа нивад̇д̇анийяод̇и . звам̣ бана гат̇знд̇о яат̇аатид̇ова вибассанам̣ вад̣дхзд̇ваа маг̇г̇абадибаадияаа гилзсз кзбзд̇ваа чал̣абхин̃н̃о ахоси. д̇зна вуд̇д̇ам̣ абад̣̇аанз (аба. т̇зра 1.13.35-40) –
Tattha kaḷīroti aṅkuro, idha pana vaṃsaṅkuro adhippeto. Susūti taruṇo. Vaḍḍhitaggoti pavaḍḍhitasākho. Susuvaḍḍhitaggoti vā suṭṭhu vaḍḍhitasākho sañjātapattasākho. Dunnikkhamoti veḷugumbato nikkhāmetuṃ nīharituṃ asakkuṇeyyo. Pasākhajātoti jātapasākho, sākhānampi pabbe pabbe uppannaanusākho. Evaṃ ahaṃ bhariyāyānītāyāti yathā vaṃso vaḍḍhitaggo vaṃsantaresu saṃsaṭṭha sākhāpasākho veḷugumbato dunnīharaṇīyo hoti, evaṃ ahampi bhariyāya mayhaṃ ānītāya puttadhītādivasena vaḍḍhitaggo āsattivasena gharāvāsato dunnīharaṇīyo bhaveyyaṃ. Yathā pana vaṃsakaḷīro asañjātasākhabandho veḷugumbato sunīharaṇīyova hoti, evaṃ ahampi asañjātaputtadārādibandho sunīharaṇīyo homi, tasmā anānītāya eva bhariyāya anumañña maṃ attanāva maṃ anujānāpetvā. Pabbajitomhi dānīti, ‘‘idāni pana pabbajito amhi, sādhu suṭṭhū’’ti attano nekkhammābhiratiṃ pakāsesi, atha vā ‘‘anumañña maṃ pabbajitomhi dānī’’ti mātu katheti. Ayañhettha attho – yadipi tāya pubbe nānumataṃ, idāni pana pabbajito amhi, tasmā anumañña anujānāhi maṃ samaṇabhāveyeva ṭhātuṃ, nāhaṃ tayā nivattanīyoti . Evaṃ pana kathento yathāṭhitova vipassanaṃ vaḍḍhetvā maggapaṭipāṭiyā kilese khepetvā chaḷabhiñño ahosi. Tena vuttaṃ apadāne (apa. thera 1.13.35-40) –
‘‘нисаж̇ж̇а баасаад̣̇аварз, вибассим̣ ад̣̇д̣̇асам̣ ж̇инам̣;
‘‘Nisajja pāsādavare, vipassiṃ addasaṃ jinaṃ;
гагуд̇хам̣ виласанд̇ам̣ва, саб̣б̣ан̃н̃ум̣ д̇аманаасагам̣.
Kakudhaṃ vilasantaṃva, sabbaññuṃ tamanāsakaṃ.
‘‘баасаад̣̇ассаавид̣̇уурз жа, г̇ажчад̇и логанааяаго;
‘‘Pāsādassāvidūre ca, gacchati lokanāyako;
бабхаа нид̣̇д̇хаавад̇з д̇асса, яат̇аа жа сад̇арам̣сино.
Pabhā niddhāvate tassa, yathā ca sataraṃsino.
‘‘г̇анд̇ход̣̇аган̃жа баг̇г̇аяха, б̣уд̣̇д̇хасздтам̣ самогирим̣;
‘‘Gandhodakañca paggayha, buddhaseṭṭhaṃ samokiriṃ;
д̇зна жид̇д̇аббасаад̣̇зна, д̇ад̇т̇а гаалан̇гад̇о ахам̣.
Tena cittappasādena, tattha kālaṅkato ahaṃ.
‘‘зганавуд̇ид̇о габбз, яам̣ г̇анд̇ход̣̇агамаагирим̣;
‘‘Ekanavutito kappe, yaṃ gandhodakamākiriṃ;
д̣̇уг̇г̇ад̇им̣ наабхиж̇аанаами, б̣уд̣̇д̇хабууж̇ааяид̣̇ам̣ палам̣.
Duggatiṃ nābhijānāmi, buddhapūjāyidaṃ phalaṃ.
‘‘згад̇им̣сз ид̇о габбз, суг̇анд̇хо наама кад̇д̇ияо;
‘‘Ekatiṃse ito kappe, sugandho nāma khattiyo;
сад̇д̇арад̇анасамбанно, жаггавад̇д̇ий махаб̣б̣ало.
Sattaratanasampanno, cakkavattī mahabbalo.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
чал̣абхин̃н̃о бана худ̇ваа маад̇арам̣ аабужчид̇ваа д̇ассаа бзгканд̇ияааязва аагаасзна баггаами. со арахад̇д̇аббад̇д̇ияаа уд̇д̇аригааламби анд̇аранд̇араа д̇амзва г̇аат̇ам̣ бажжуд̣̇аахааси.
Chaḷabhiñño pana hutvā mātaraṃ āpucchitvā tassā pekkhantiyāyeva ākāsena pakkāmi. So arahattappattiyā uttarikālampi antarantarā tameva gāthaṃ paccudāhāsi.
д̇ад̇т̇а ‘‘баб̣б̣аж̇ид̇омхий’’д̇и иминаабад̣̇зсзна аяамби т̇зрасса ан̃н̃ааб̣яаагаран̣аг̇аат̇аа ахоси ад̇д̇ано санд̇аанз рааг̇аад̣̇ималасса баб̣б̣ааж̇ид̇абхаавад̣̇ийбанад̇о. д̇знааха бхаг̇аваа – ‘‘баб̣б̣ааж̇аяамад̇д̇ано малам̣, д̇асмаа ‘баб̣б̣аж̇ид̇о’д̇и вужжад̇ий’’д̇и (д̇ха. ба. 388).
Tattha ‘‘pabbajitomhī’’ti imināpadesena ayampi therassa aññābyākaraṇagāthā ahosi attano santāne rāgādimalassa pabbājitabhāvadīpanato. Tenāha bhagavā – ‘‘pabbājayamattano malaṃ, tasmā ‘pabbajito’ti vuccatī’’ti (dha. pa. 388).
аад̇умад̇т̇зраг̇аат̇ааван̣н̣анаа нидтид̇аа.
Ātumattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 2. аад̇умад̇т̇зраг̇аат̇аа • 2. Ātumattheragāthā
