१. अवजानातिसुत्तं

1. Avajānātisuttaṃ

१४१. ‘‘पञ्‍चिमे , भिक्खवे, पुग्गला सन्तो संविज्‍जमाना लोकस्मिं। कतमे पञ्‍च? दत्वा अवजानाति, संवासेन अवजानाति, आधेय्यमुखो ¹ होति, लोलो होति, मन्दो मोमूहो होति ²।

141. ‘‘Pañcime , bhikkhave, puggalā santo saṃvijjamānā lokasmiṃ. Katame pañca? Datvā avajānāti, saṃvāsena avajānāti, ādheyyamukho ³ hoti, lolo hoti, mando momūho hoti ⁴.

‘‘कथञ्‍च, भिक्खवे, पुग्गलो दत्वा अवजानाति? इध, भिक्खवे, पुग्गलो पुग्गलस्स देति चीवरपिण्डपातसेनासनगिलानप्पच्‍चयभेसज्‍जपरिक्खारं। तस्स एवं होति – ‘अहं देमि; अयं पटिग्गण्हाती’ति। तमेनं दत्वा अवजानाति। एवं खो, भिक्खवे, पुग्गलो दत्वा अवजानाति।

‘‘Kathañca, bhikkhave, puggalo datvā avajānāti? Idha, bhikkhave, puggalo puggalassa deti cīvarapiṇḍapātasenāsanagilānappaccayabhesajjaparikkhāraṃ. Tassa evaṃ hoti – ‘ahaṃ demi; ayaṃ paṭiggaṇhātī’ti. Tamenaṃ datvā avajānāti. Evaṃ kho, bhikkhave, puggalo datvā avajānāti.

‘‘कथञ्‍च , भिक्खवे, पुग्गलो संवासेन अवजानाति? इध , भिक्खवे, पुग्गलो पुग्गलेन सद्धिं संवसति द्वे वा तीणि वा वस्सानि। तमेनं संवासेन अवजानाति। एवं खो, भिक्खवे, पुग्गलो संवासेन अवजानाति।

‘‘Kathañca , bhikkhave, puggalo saṃvāsena avajānāti? Idha , bhikkhave, puggalo puggalena saddhiṃ saṃvasati dve vā tīṇi vā vassāni. Tamenaṃ saṃvāsena avajānāti. Evaṃ kho, bhikkhave, puggalo saṃvāsena avajānāti.

‘‘कथञ्‍च, भिक्खवे, पुग्गलो आधेय्यमुखो होति? इध, भिक्खवे, एकच्‍चो पुग्गलो परस्स वण्णे वा अवण्णे वा भासियमाने तं खिप्पञ्‍ञेव अधिमुच्‍चिता ⁵ होति। एवं खो, भिक्खवे, पुग्गलो आधेय्यमुखो होति।

‘‘Kathañca, bhikkhave, puggalo ādheyyamukho hoti? Idha, bhikkhave, ekacco puggalo parassa vaṇṇe vā avaṇṇe vā bhāsiyamāne taṃ khippaññeva adhimuccitā ⁶ hoti. Evaṃ kho, bhikkhave, puggalo ādheyyamukho hoti.

‘‘कथञ्‍च, भिक्खवे, पुग्गलो लोलो होति? इध, भिक्खवे, एकच्‍चो पुग्गलो इत्तरसद्धो होति इत्तरभत्ती इत्तरपेमो इत्तरप्पसादो। एवं खो, भिक्खवे, पुग्गलो लोलो होति।

‘‘Kathañca, bhikkhave, puggalo lolo hoti? Idha, bhikkhave, ekacco puggalo ittarasaddho hoti ittarabhattī ittarapemo ittarappasādo. Evaṃ kho, bhikkhave, puggalo lolo hoti.

‘‘कथञ्‍च, भिक्खवे, पुग्गलो मन्दो मोमूहो होति? इध, भिक्खवे, एकच्‍चो पुग्गलो कुसलाकुसले धम्मे न जानाति, सावज्‍जानवज्‍जे धम्मे न जानाति, हीनप्पणीते धम्मे न जानाति , कण्हसुक्‍कसप्पटिभागे धम्मे न जानाति। एवं खो, भिक्खवे, पुग्गलो मन्दो मोमूहो होति। इमे खो, भिक्खवे, पञ्‍च पुग्गला सन्तो संविज्‍जमाना लोकस्मि’’न्ति। पठमं।

‘‘Kathañca, bhikkhave, puggalo mando momūho hoti? Idha, bhikkhave, ekacco puggalo kusalākusale dhamme na jānāti, sāvajjānavajje dhamme na jānāti, hīnappaṇīte dhamme na jānāti , kaṇhasukkasappaṭibhāge dhamme na jānāti. Evaṃ kho, bhikkhave, puggalo mando momūho hoti. Ime kho, bhikkhave, pañca puggalā santo saṃvijjamānā lokasmi’’nti. Paṭhamaṃ.

Next: २. आरभतिसुत्तं • 2. Ārabhatisuttaṃ

Footnotes:

1. आदिय्यमुखो (सी॰), आदेय्यमुखो (स्या॰ कं॰), आदियमुखो (पी॰) अट्ठकथाय पठमसंवण्णनानुरूपं। पु॰ प॰ १९३ पस्सितब्बं

2. मन्दो होति मोमूहो (सी॰)

3. ādiyyamukho (sī.), ādeyyamukho (syā. kaṃ.), ādiyamukho (pī.) aṭṭhakathāya paṭhamasaṃvaṇṇanānurūpaṃ. pu. pa. 193 passitabbaṃ

4. mando hoti momūho (sī.)

5. अधिमुच्‍चितो (स्या॰)

6. adhimuccito (syā.)

Related texts:

अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / १. अवजानातिसुत्तवण्णना • 1. Avajānātisuttavaṇṇanā

टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / १. अवजानातिसुत्तवण्णना • 1. Avajānātisuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact