၁. အဝဇာနာတိသုတ္တံ

1. Avajānātisuttaṃ

၁၄၁. ‘‘ပဉ္စိမေ , ဘိက္ခဝေ, ပုဂ္ဂလာ သန္တော သံဝိဇ္ဇမာနာ လောကသ္မိံ။ ကတမေ ပဉ္စ? ဒတ္ဝာ အဝဇာနာတိ, သံဝာသေန အဝဇာနာတိ, အာဓေယ္ယမုခော ¹ ဟောတိ, လောလော ဟောတိ, မန္ဒော မောမူဟော ဟောတိ ²။

141. ‘‘Pañcime , bhikkhave, puggalā santo saṃvijjamānā lokasmiṃ. Katame pañca? Datvā avajānāti, saṃvāsena avajānāti, ādheyyamukho ³ hoti, lolo hoti, mando momūho hoti ⁴.

‘‘ကထဉ္စ, ဘိက္ခဝေ, ပုဂ္ဂလော ဒတ္ဝာ အဝဇာနာတိ? ဣဓ, ဘိက္ခဝေ, ပုဂ္ဂလော ပုဂ္ဂလသ္သ ဒေတိ စီဝရပိဏ္ဍပာတသေနာသနဂိလာနပ္ပစ္စယဘေသဇ္ဇပရိက္ခာရံ။ တသ္သ ဧဝံ ဟောတိ – ‘အဟံ ဒေမိ; အယံ ပဋိဂ္ဂဏ္ဟာတီ’တိ။ တမေနံ ဒတ္ဝာ အဝဇာနာတိ။ ဧဝံ ခော, ဘိက္ခဝေ, ပုဂ္ဂလော ဒတ္ဝာ အဝဇာနာတိ။

‘‘Kathañca, bhikkhave, puggalo datvā avajānāti? Idha, bhikkhave, puggalo puggalassa deti cīvarapiṇḍapātasenāsanagilānappaccayabhesajjaparikkhāraṃ. Tassa evaṃ hoti – ‘ahaṃ demi; ayaṃ paṭiggaṇhātī’ti. Tamenaṃ datvā avajānāti. Evaṃ kho, bhikkhave, puggalo datvā avajānāti.

‘‘ကထဉ္စ , ဘိက္ခဝေ, ပုဂ္ဂလော သံဝာသေန အဝဇာနာတိ? ဣဓ , ဘိက္ခဝေ, ပုဂ္ဂလော ပုဂ္ဂလေန သဒ္ဓိံ သံဝသတိ ဒ္ဝေ ဝာ တီဏိ ဝာ ဝသ္သာနိ။ တမေနံ သံဝာသေန အဝဇာနာတိ။ ဧဝံ ခော, ဘိက္ခဝေ, ပုဂ္ဂလော သံဝာသေန အဝဇာနာတိ။

‘‘Kathañca , bhikkhave, puggalo saṃvāsena avajānāti? Idha , bhikkhave, puggalo puggalena saddhiṃ saṃvasati dve vā tīṇi vā vassāni. Tamenaṃ saṃvāsena avajānāti. Evaṃ kho, bhikkhave, puggalo saṃvāsena avajānāti.

‘‘ကထဉ္စ, ဘိက္ခဝေ, ပုဂ္ဂလော အာဓေယ္ယမုခော ဟောတိ? ဣဓ, ဘိက္ခဝေ, ဧကစ္စော ပုဂ္ဂလော ပရသ္သ ဝဏ္ဏေ ဝာ အဝဏ္ဏေ ဝာ ဘာသိယမာနေ တံ ခိပ္ပညေဝ အဓိမုစ္စိတာ ⁵ ဟောတိ။ ဧဝံ ခော, ဘိက္ခဝေ, ပုဂ္ဂလော အာဓေယ္ယမုခော ဟောတိ။

‘‘Kathañca, bhikkhave, puggalo ādheyyamukho hoti? Idha, bhikkhave, ekacco puggalo parassa vaṇṇe vā avaṇṇe vā bhāsiyamāne taṃ khippaññeva adhimuccitā ⁶ hoti. Evaṃ kho, bhikkhave, puggalo ādheyyamukho hoti.

‘‘ကထဉ္စ, ဘိက္ခဝေ, ပုဂ္ဂလော လောလော ဟောတိ? ဣဓ, ဘိက္ခဝေ, ဧကစ္စော ပုဂ္ဂလော ဣတ္တရသဒ္ဓော ဟောတိ ဣတ္တရဘတ္တီ ဣတ္တရပေမော ဣတ္တရပ္ပသာဒော။ ဧဝံ ခော, ဘိက္ခဝေ, ပုဂ္ဂလော လောလော ဟောတိ။

‘‘Kathañca, bhikkhave, puggalo lolo hoti? Idha, bhikkhave, ekacco puggalo ittarasaddho hoti ittarabhattī ittarapemo ittarappasādo. Evaṃ kho, bhikkhave, puggalo lolo hoti.

‘‘ကထဉ္စ, ဘိက္ခဝေ, ပုဂ္ဂလော မန္ဒော မောမူဟော ဟောတိ? ဣဓ, ဘိက္ခဝေ, ဧကစ္စော ပုဂ္ဂလော ကုသလာကုသလေ ဓမ္မေ န ဇာနာတိ, သာဝဇ္ဇာနဝဇ္ဇေ ဓမ္မေ န ဇာနာတိ, ဟီနပ္ပဏီတေ ဓမ္မေ န ဇာနာတိ , ကဏ္ဟသုက္ကသပ္ပဋိဘာဂေ ဓမ္မေ န ဇာနာတိ။ ဧဝံ ခော, ဘိက္ခဝေ, ပုဂ္ဂလော မန္ဒော မောမူဟော ဟောတိ။ ဣမေ ခော, ဘိက္ခဝေ, ပဉ္စ ပုဂ္ဂလာ သန္တော သံဝိဇ္ဇမာနာ လောကသ္မိ’’န္တိ။ ပဌမံ။

‘‘Kathañca, bhikkhave, puggalo mando momūho hoti? Idha, bhikkhave, ekacco puggalo kusalākusale dhamme na jānāti, sāvajjānavajje dhamme na jānāti, hīnappaṇīte dhamme na jānāti , kaṇhasukkasappaṭibhāge dhamme na jānāti. Evaṃ kho, bhikkhave, puggalo mando momūho hoti. Ime kho, bhikkhave, pañca puggalā santo saṃvijjamānā lokasmi’’nti. Paṭhamaṃ.

Next: ၂. အာရဘတိသုတ္တံ • 2. Ārabhatisuttaṃ

Footnotes:

1. အာဒိယ္ယမုခော (သီ.), အာဒေယ္ယမုခော (သ္ယာ. ကံ.), အာဒိယမုခော (ပီ.) အဋ္ဌကထာယ ပဌမသံဝဏ္ဏနာနုရူပံ။ ပု. ပ. ၁၉၃ ပသ္သိတဗ္ဗံ

2. မန္ဒော ဟောတိ မောမူဟော (သီ.)

3. ādiyyamukho (sī.), ādeyyamukho (syā. kaṃ.), ādiyamukho (pī.) aṭṭhakathāya paṭhamasaṃvaṇṇanānurūpaṃ. pu. pa. 193 passitabbaṃ

4. mando hoti momūho (sī.)

5. အဓိမုစ္စိတော (သ္ယာ.)

6. adhimuccito (syā.)

Related texts:

အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁. အဝဇာနာတိသုတ္တဝဏ္ဏနာ • 1. Avajānātisuttavaṇṇanā

ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. အဝဇာနာတိသုတ္တဝဏ္ဏနာ • 1. Avajānātisuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact