| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
(15) 5. තිකණ්‌ඩකීවග්‌ගො
(15) 5. Tikaṇḍakīvaggo
1. අවජානාතිසුත්‌තං
1. Avajānātisuttaṃ
‘‘කථඤ්‌ච, භික්‌ඛවෙ, පුග්‌ගලො දත්‌වා අවජානාති? ඉධ, භික්‌ඛවෙ, පුග්‌ගලො පුග්‌ගලස්‌ස දෙති චීවරපිණ්‌ඩපාතසෙනාසනගිලානප්‌පච්‌චයභෙසජ්‌ජපරික්‌ඛාරං. තස්‌ස එවං හොති – ‘අහං දෙමි; අයං පටිග්‌ගණ්‌හාතී’ති. තමෙනං දත්‌වා අවජානාති. එවං ඛො, භික්‌ඛවෙ, පුග්‌ගලො දත්‌වා අවජානාති.
‘‘Kathañca, bhikkhave, puggalo datvā avajānāti? Idha, bhikkhave, puggalo puggalassa deti cīvarapiṇḍapātasenāsanagilānappaccayabhesajjaparikkhāraṃ. Tassa evaṃ hoti – ‘ahaṃ demi; ayaṃ paṭiggaṇhātī’ti. Tamenaṃ datvā avajānāti. Evaṃ kho, bhikkhave, puggalo datvā avajānāti.
‘‘කථඤ්‌ච , භික්‌ඛවෙ, පුග්‌ගලො සංවාසෙන අවජානාති? ඉධ , භික්‌ඛවෙ, පුග්‌ගලො පුග්‌ගලෙන සද්‌ධිං සංවසති ද්‌වෙ වා තීණි වා වස්‌සානි. තමෙනං සංවාසෙන අවජානාති. එවං ඛො, භික්‌ඛවෙ, පුග්‌ගලො සංවාසෙන අවජානාති.
‘‘Kathañca , bhikkhave, puggalo saṃvāsena avajānāti? Idha , bhikkhave, puggalo puggalena saddhiṃ saṃvasati dve vā tīṇi vā vassāni. Tamenaṃ saṃvāsena avajānāti. Evaṃ kho, bhikkhave, puggalo saṃvāsena avajānāti.
‘‘කථඤ්‌ච, භික්‌ඛවෙ, පුග්‌ගලො ආධෙය්‍යමුඛො හොති? ඉධ, භික්‌ඛවෙ, එකච්‌චො පුග්‌ගලො පරස්‌ස වණ්‌ණෙ වා අවණ්‌ණෙ වා භාසියමානෙ තං ඛිප්‌පඤ්‌ඤෙව අධිමුච්‌චිතා 5 හොති. එවං ඛො, භික්‌ඛවෙ, පුග්‌ගලො ආධෙය්‍යමුඛො හොති.
‘‘Kathañca, bhikkhave, puggalo ādheyyamukho hoti? Idha, bhikkhave, ekacco puggalo parassa vaṇṇe vā avaṇṇe vā bhāsiyamāne taṃ khippaññeva adhimuccitā 6 hoti. Evaṃ kho, bhikkhave, puggalo ādheyyamukho hoti.
‘‘කථඤ්‌ච, භික්‌ඛවෙ, පුග්‌ගලො ලොලො හොති? ඉධ, භික්‌ඛවෙ, එකච්‌චො පුග්‌ගලො ඉත්‌තරසද්‌ධො හොති ඉත්‌තරභත්‌තී ඉත්‌තරපෙමො ඉත්‌තරප්‌පසාදො. එවං ඛො, භික්‌ඛවෙ, පුග්‌ගලො ලොලො හොති.
‘‘Kathañca, bhikkhave, puggalo lolo hoti? Idha, bhikkhave, ekacco puggalo ittarasaddho hoti ittarabhattī ittarapemo ittarappasādo. Evaṃ kho, bhikkhave, puggalo lolo hoti.
‘‘කථඤ්‌ච, භික්‌ඛවෙ, පුග්‌ගලො මන්‌දො මොමූහො හොති? ඉධ, භික්‌ඛවෙ, එකච්‌චො පුග්‌ගලො කුසලාකුසලෙ ධම්‌මෙ න ජානාති, සාවජ්‌ජානවජ්‌ජෙ ධම්‌මෙ න ජානාති, හීනප්‌පණීතෙ ධම්‌මෙ න ජානාති , කණ්‌හසුක්‌කසප්‌පටිභාගෙ ධම්‌මෙ න ජානාති. එවං ඛො, භික්‌ඛවෙ, පුග්‌ගලො මන්‌දො මොමූහො හොති. ඉමෙ ඛො, භික්‌ඛවෙ, පඤ්‌ච පුග්‌ගලා සන්‌තො සංවිජ්‌ජමානා ලොකස්‌මි’’න්‌ති. පඨමං.
‘‘Kathañca, bhikkhave, puggalo mando momūho hoti? Idha, bhikkhave, ekacco puggalo kusalākusale dhamme na jānāti, sāvajjānavajje dhamme na jānāti, hīnappaṇīte dhamme na jānāti , kaṇhasukkasappaṭibhāge dhamme na jānāti. Evaṃ kho, bhikkhave, puggalo mando momūho hoti. Ime kho, bhikkhave, pañca puggalā santo saṃvijjamānā lokasmi’’nti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1. අවජානාතිසුත්‌තවණ්‌ණනා • 1. Avajānātisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. අවජානාතිසුත්‌තවණ්‌ණනා • 1. Avajānātisuttavaṇṇanā
