| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
(15) 5. திகண்ட³கீவக்³கோ³
(15) 5. Tikaṇḍakīvaggo
1. அவஜானாதிஸுத்தவண்ணனா
1. Avajānātisuttavaṇṇanā
141. பஞ்சமஸ்ஸ பட²மே ஸங்வாஸேனாதி ஏகதோவாஸேன. ஆதெ³ய்யமுகோ²தி ஆதி³யனமுகோ², க³ஹணமுகோ²தி அத்தோ². தமேனங் த³த்வா அவஜானாதீதி ‘‘அயங் தி³ன்னங் படிக்³க³ஹேதுமேவ ஜானாதீ’’தி ஏவங் அவமஞ்ஞதி. தமேனங் ஸங்வாஸேன அவஜானாதீதி அப்பமத்தகே கிஸ்மிஞ்சிதே³வ குஜ்ஜி²த்வா ‘‘ஜானாமஹங் தயா கதகம்மங், எத்தகங் அத்³தா⁴னங் அஹங் கிங் கரொந்தோ வஸிங், நனு துய்ஹமேவ கதாகதங் வீமங்ஸந்தோ’’திஆதீ³னி வத்தா ஹோதி. அத² இதரோ ‘‘அத்³தா⁴ கோசி மய்ஹங் தோ³ஸோ ப⁴விஸ்ஸதீ’’தி கிஞ்சி படிப்ப²ரிதுங் ந ஸக்கோதி. தங் கி²ப்பஞ்ஞேவ அதி⁴முச்சிதா ஹோதீதி தங் வண்ணங் வா அவண்ணங் வா ஸீக⁴மேவ ஸத்³த³ஹதி. ஸத்³த³ஹனட்டே²ன ஹி ஆதா³னேன ஏஸ ஆதி³யனமுகோ²தி வுத்தோ. ஆதெ⁴ய்யமுகோ²தி பாளியா பன ட²பிதமுகோ²தி அத்தோ². மக்³கே³ க²டஆவாடோ விய ஆக³தாக³தங் உத³கங் வண்ணங் வா அவண்ணங் வா ஸத்³த³ஹனவஸேன ஸம்படிச்சி²துங் ட²பிதமுகோ²தி வுத்தங் ஹோதி.
141. Pañcamassa paṭhame saṃvāsenāti ekatovāsena. Ādeyyamukhoti ādiyanamukho, gahaṇamukhoti attho. Tamenaṃ datvā avajānātīti ‘‘ayaṃ dinnaṃ paṭiggahetumeva jānātī’’ti evaṃ avamaññati. Tamenaṃ saṃvāsena avajānātīti appamattake kismiñcideva kujjhitvā ‘‘jānāmahaṃ tayā katakammaṃ, ettakaṃ addhānaṃ ahaṃ kiṃ karonto vasiṃ, nanu tuyhameva katākataṃ vīmaṃsanto’’tiādīni vattā hoti. Atha itaro ‘‘addhā koci mayhaṃ doso bhavissatī’’ti kiñci paṭippharituṃ na sakkoti. Taṃ khippaññeva adhimuccitā hotīti taṃ vaṇṇaṃ vā avaṇṇaṃ vā sīghameva saddahati. Saddahanaṭṭhena hi ādānena esa ādiyanamukhoti vutto. Ādheyyamukhoti pāḷiyā pana ṭhapitamukhoti attho. Magge khaṭaāvāṭo viya āgatāgataṃ udakaṃ vaṇṇaṃ vā avaṇṇaṃ vā saddahanavasena sampaṭicchituṃ ṭhapitamukhoti vuttaṃ hoti.
இத்தரஸத்³தோ⁴தி பரித்தகஸத்³தோ⁴. குஸலாகுஸலே த⁴ம்மே ந ஜானாதீதிஆதீ³ஸு குஸலே த⁴ம்மே ‘‘இமே குஸலா’’தி ந ஜானாதி, அகுஸலே த⁴ம்மே ‘‘இமே அகுஸலா’’தி ந ஜானாதி. ததா² ஸாவஜ்ஜே ஸதோ³ஸத⁴ம்மே ‘‘இமே ஸாவஜ்ஜா’’தி, அனவஜ்ஜே ச நித்³தோ³ஸத⁴ம்மே ‘‘இமே அனவஜ்ஜா’’தி, ஹீனே ஹீனாதி, பணீதே பணீதாதி. கண்ஹஸுக்கஸப்படிபா⁴கே³தி ‘‘இமே கண்ஹா ஸுக்கே படிபா³ஹெத்வா டி²தத்தா ஸப்படிபா⁴கா³ நாம, இமே ச ஸுக்கா கண்ஹே படிபா³ஹித்வா டி²தத்தா ஸப்படிபா⁴கா³’’தி ந ஜானாதி.
Ittarasaddhoti parittakasaddho. Kusalākusale dhamme na jānātītiādīsu kusale dhamme ‘‘ime kusalā’’ti na jānāti, akusale dhamme ‘‘ime akusalā’’ti na jānāti. Tathā sāvajje sadosadhamme ‘‘ime sāvajjā’’ti, anavajje ca niddosadhamme ‘‘ime anavajjā’’ti, hīne hīnāti, paṇīte paṇītāti. Kaṇhasukkasappaṭibhāgeti ‘‘ime kaṇhā sukke paṭibāhetvā ṭhitattā sappaṭibhāgā nāma, ime ca sukkā kaṇhe paṭibāhitvā ṭhitattā sappaṭibhāgā’’ti na jānāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. அவஜானாதிஸுத்தங் • 1. Avajānātisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. அவஜானாதிஸுத்தவண்ணனா • 1. Avajānātisuttavaṇṇanā
